Ubumi bwa kwa Yesu no Butumikishi

Ipepo lya Kusondwelela mu Muputule wa pa Mulu

UKUSESHIWA no kutemwa kwashika ukwa batumwa bakwe, Yesu alebapekanishisha ku kufumapo kwakwe ukusungamine. Nomba, pa numa ya kubakonkomesha no kubasansamusha pa nshita ntali, ainwina amenso yakwe mu mulu no kupaapaata kuli Wishi ukuti: “Cindamikeni Umwana wenu ukuti Umwana wenu amucindamike, apo mwamupeele amaka pa bantunse bonse, ukuti apeele umweo wa muyayaya kuli bonse abo mwamupeela.”

We mutwe wa kukumbamo untu Yesu atendeka—umweo wa muyayaya! Pa kuba napeelwa “amaka pa bantunse bonse,” Yesu kuti apeela ubunonshi bwe lambo lyakwe ilya cilubula ku mutundu wa buntunse onse uufwa. Nalyo line, apeela “umweo wa muyayaya” kuli abo fye beka Wishi asuminisha. Ukukuula pali uyu mutwe uwa mweo wa muyayaya, Yesu atwalilila ipepo lyakwe ukuti:

“Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” Ee, ipusukilo lyashintilila pa kupokelelo kwishiba ukwa bonse babili Lesa no Mwana wakwe. Lelo ifyafulilako filakabilwa ukucila ukwishiba fye kwa ku mutwe.

Umuntu afwile ukubeshiba mu kubamo isenge, ukulundulula bucibusa bwa kumfwana na bene. Umo afwile ukuyumfwa nge fyo bacita pa lwa milandu no kumwena ifintu mu menso yabo. Kabili pa mulu wa fyonse, umuntu alingile ukubombesha ukupashanya imibele yabo iyabulo kulinganishiwako mu kubomba na bambi.

Yesu mu kukonkapo apepa ukuti: “Ine namucindamika pano nse, napwisho mulimo uo mwampeele ukuti ncite.” Pa kuba nafikilisha muli ifyo ukupeelwa kwakwe ukwa umulimo ukufika pali iyi nshita kabili uwacetekela pa lwa kutunguluka kwakwe ukwa nshita ya ku ntanshi, apaapaata ukuti: “Mwe Tata, muncindamikile mu cinso cenu cine ku bukata nakwete kuli imwe ilyo pano isonde pacili tapalabako.” Ee, nomba alomba ukubweshiwa ku bukata bwakwe ubwa kale ubwa ku mulu ukupitila mu kubuuka.

Ukusupawila umulimo wakwe ukalamba uwa pe sonde, Yesu asoso kuti: “Nalange shina lyenu ku bantu abo mwampeelepo aba pano isonde (bali benu, mwabapeela na kuli ine), ne cebo cenu nabacibaka.” Yesu abomfeshe ishina lya kwa Lesa, Yehova, mu butumikishi bwakwe kabili alangile imishimbwile yalungama iya lyene, lelo acitile ifyafula ukucila na pali ico ukulenga ishina lya kwa Lesa ukwishibikwa ku batumwa bakwe. Na kabili atanunwine ukwishiba kwabo no kutesekesha kwa kuli Yehova, ukwa buntu bwakwe, no kwa mifwaile yakwe.

Ukucindika Yehova ngo Wasumbuka wakwe, Umo uo abombako pe samba, Yesu mu kuicefya asumina ukuti: “Ifyebo ifyo mwampeele, na bo balifipokelele, no kwishiba baliishiba cine cine ukuti ni kuli imwe nafumine, kabili balitetekela ukuti ni mwe mwantumine.”

Ukupanga ukulekana pa kati ka bakonshi bakwe no mutundu wa muntu uwashala, Yesu mu kukonkapo apepo kuti: “Ine ndebalombela: nshilelombela ba pano isonde . . . Ilyo nali na bo, ine nalebalindila . . . kabili nalibabakile, tapalubapo nangu umo, kano umwana wa boni,” ukumulumbula, Yuda Iskariote. Pali iyi ine nshita, Yuda aali pa lwendo lwakwe ulwa bunangwa ku kubemba Yesu. Muli ifyo, Yuda mu kukanaishiba alefikilisha Amalembo.

“Aba pano isonde nababapata,” e fintu Yesu atwalilila ukupepa. “Nshilelomba ukuti mubafumye pano isonde, lelo ukuti mubabake ku mubifi. Tabali ba pano isonde, ifyo na ine nshili wa pano isonde.” Abakonshi ba kwa Yesu baba mu calo, uyu sosaite wa buntunse uwateyanishiwa uwatekwa na Satana, lelo baliba kabili bafwile lyonse ukwikala abapaatuka ukufuma kuli cene no bubifi bwa ciko.

“Bashishisheni ku cine cenu,” e fintu Yesu atwalilila, “icebo cenu e cine.” Pano Yesu aibukisha Amalembo ya ciHebere ayapuutwamo, umo aleyambula mu kutwalilila, “icine.” Lelo cintu asambilishe abasambi bakwe na cintu balembele pa numa pe samba lya kupuutwamo nga Amalembo ya ciGreek aya Bwina Kristu mu kupalako caba “cine.” Ici cine kuti cashisha umuntu, ukwalula umweo wakwe umupwilapo, no kumulenga umuntu uwapaatukako ukufuma ku calo.

Yesu nomba apepa ukuti “nshilelombela aba beka, lelo na [bakatetekela wene] pa mulandu wa cebo cabo.” E co Yesu apepela abo abakaba abakonshi bakwe basubwa na basambi bambi aba ku nshita ya ku ntanshi abo abali no kulonganikwa mu “mukuni umo.” Cinshi alelombela aba bonse? “Ukuti bonse babe bamo; ifyo imwe, mwe Tata, mwaba muli ine na ine muli imwe, . . . ukuti babe bamo ifyo ifwe twaba bamo.”

Yesu na Wishi tabali mu cine cine umuntu umo, lelo baba mu kusuminishanya mu fintu fyonse. Yesu apepa ukuti abakonshi bakwe baipakishe ubu buumo bumo bwine pa kuti “aba pano isonde beshibe ukuti ni mwe mwantumine, kabili mwabatemenwe ifyo mwatemenwe ine.”

Mu kwimininako abo abaali no kuba abakonshi bakwe basubwa, Yesu nomba acita ukulomba kuli Wishi wa mu mulu. Pali cinshi? “Tukabe na bo uko ndi, ukuti bamone ubukata bwandi ubo mwampeela; pantu mwantemenwe ilyo pano isonde tapalatendekwa,” uko e kuti, lintu Adamu na Efa bafyele ubufyashi bwabo ubwa kubalilapo. Kale sana pa ntanshi ya ico, Lesa atemenwe Umwana wakwe uwafyalwa eka, uwabele Yesu Kristu.

Ukusondwelela ipepo lyakwe, Yesu na kabili akomailapo ukuti: “Nabalengele ukwishibe shina lyenu, kabili nkalenga liishibwe; ukuti ukutemwa uko mwantemenweko kube muli bene, na ine muli bene.” Ku batumwa, ukusambilila ishina lya kwa Lesa kwabimbamo ukwishiba ukutemwa kwa kwa Lesa pa lwabo. Yohane 17:1-26; 10:16; Amapinda 8:22, 30.

▪ Ni mu mano nshi Yesu apeelelwa “amaka pa bantunse bonse”?

▪ Cinshi cipilibula ukupokelela ukwishiba kwa kwa Lesa no Mwana wakwe?

▪ Ni mu nshila nshi Yesu alengele ishina lya kwa Lesa ukwishibikwa?

▪ “Icine” cinshi, kabili ni shani ‘cishisha’ Umwina Kristu?

▪ Ni shani Lesa, Umwana wakwe, na bakapepa ba cine bonse babela umo?

▪ Ni lilali ilyo kwali ‘ukutendeka kwa pano isonde’?