Ubumi bwa kwa Yesu no Butumikishi

Ukufutukwa no Kwikatwa

CILI pa numa ya bushiku pa kati ilintu Yuda atungulula ibumba ilikalamba ilya bashilika, bashimapepo bakalamba, abaFarise, na bambi mwi bala lya Getsemane. Bashimapepo nabasumina ukulipila Yuda isha silfere 30 ku kufutuka Yesu.

Mu kubangilila, lintu Yuda atamfiwe ukufuma pa ca kulya ca Kucilila, mu kwangufyanya aile mu kulungatika kuli bashimapepo bakalamba. Aba apo pene balonganike abalashi babo bene, capamo ne mpuka ya bashilika. Nakalimo Yuda mu kubalilapo abatungulwile uko Yesu na batumwa bakwe basefeshe ica Kucilila. Ukusanga ukuti balifumineko, ibumba likalamba abali ne fyanso kabili abasendele inyali ne myenge bakonkele Yuda ukufuma mu Yerusalemu kabili ukucilinganya Umukonko wa Kidrone.

Ilintu Yuda atungulula umulongo ukuninika Ulupili lwa Miolife, ayumfya uwashininkisha ukuti naishiba ukwa kusanga Yesu. Mu kati ka mulungu wapita, ilintu Yesu na batumwa baendele ukuya no kubwela pa kati ka Betani na Yerusalemu, ilingi line baliminine mwi bala lya Getsemane ku kutuusha no kulanshanya. Lelo, nomba, mu kuba na Yesu mu kucitikako ukufiswa mu mfifi pe samba lya fimuti fya miolife, ni shani fintu abashilika bali no kumwishiba? Kuti pambi tababalile abamumonapo kale. Yuda apayanya icishibilo, ukusoso kuti: “Uo ndefyompa, e o. Mwikateni.”

Yuda aletungulula ibumba likalamba mwi bala, amona Yesu na batumwa bakwe, no kuya mu kulungatika kuli wene. “Mwapoleni, mwe Rabi!” e fyo asosa no kumufyompa mu kubondoka.

“Mune, mifwaile nshi ubelele pano?” (NW) Yesu ayankulako. Lyene, ukwasuke cipusho cakwe cine, asoso kuti: “We Yuda, bushe ulefutukilo Mwana wa muntu ku kufyompa?” Lelo atendwa kuli kafutuka wakwe! Yesu atampula ukuya ku ntanshi mu lubuuto lwa myenge ileaka ne nyali no kwipusha ukuti: “Ni ani mulefwaya?”

“Ni Yesu umwina Nasarete,” e fyaise casuko.

“Nine,” e fyo Yesu ayasuka, ilintu eminine mu kukosa pa ntanshi yabo. Ukuba abapapushiwa ku kushipa kwakwe kabili ukukanaishiba ica kwenekela, abaume babwelela cimfwemfwe no kuwa pa nshi.

“Nimweba, nati nine,” Yesu mu kutekanya atwalilila. “E ico nga mulefwaya ine, lekeni aba baye.” Mu kwipipa pa ntanshi mu muputule wa pa mulu, Yesu aebele Wishi mwi pepo ukuti alisungile abatumwa bakwe aba citetekelo kabili takuli nangu umo uwa bene uwalubile “kano umwana wa boni.” E co, pa kuti icebo cakwe cingesushiwa, aipusha ukuti abakonshi bakwe basuminishiwe ukuya.

Ilintu abashilika banonka cipya cipya ukushikatala kwabo, baima, no kutendeka ukukaka Yesu, abatumwa baishiba icili mupepi no kucitika. “Mwe Shikulu, bushe tulekoma ku lupanga?” e fyo baipusha. Pa ntanshi Yesu talayasuka, Petro, asomona lumo ulwa mpanga shibili isho abatumwa baletele, asansa Maliki, umusha wa kwa shimapepo mukalamba. Ulupumo lwa kwa Petro lwapusa umutwe wa musha lelo lwaputula ukutwi kwakwe ukwa ku kulyo.

“Lekeni!” e fyasosa Yesu lintu acilima. Ukwikata ukutwi, aposha icilonda. Lyene asambilisha isambililo ilyacindama, ukukambisha Petro ukuti: “Bwesesho lupanga lobe umo lwikala; pantu bonse ababuula ulupanga bakafwa ku lupanga. Bushe uletila shingapaapaata Tata, na o nomba line kuti antumina bamalaika amatulwe ayacila ikumi na yabili?”

Yesu ali uwaitemenwa ukwikatwa. Pantu alondolola ukuti: “Nga kanshi yengafishiwa shani amalembo ayatila cili no kube fi?” Kabili alundapo kuti: “Ulukombo ulo Tata ampeela bushe te ti nwenemo?” Ali mu kusuminishanya kwakumanina no kufwaya kwa kwa Lesa kuli wene!

Lyene Yesu alanda kwi bumba. “Bushe kwati ni pa cipondo e po mufumiine ne mpanga ne nkonto ku kwisanjikata?” e fyo aipusha. “Akasuba na kasuba naikele mwi tempele nalesambilisha, kabili tamwanjikete. Lelo ici conse capona ukuti yafishiwe amalembo ya bakasesema.”

Pali ico impuka ya bashilika na mushika wa mulalo wa fita na balashi ba baYuda baikata Yesu no ku mukaka. Pa kumona ici, abatumwa basha Yesu no kufulumuka. Nangu cibe fyo, umulumendo—nakalimo umusambi Marko—ashala pa kati ke bumba. Pambi kuti epo aali pa ŋanda apo Yesu asefeeshe ica Kucilila kabili pa numa ya ico akonkele ibumba ukufuma palya. Nomba, nangu cibe fyo, aishibikwa, kabili ukwesha kwa kumwikata kwacitwa. Lelo asha insalu ya kolokondwe no kufulumuka nafwale ndelemba. Mateo 26:47-56; Marko 14:43-52; Luka 22:47-53; Yohane 17:12; 18:3-12.

◆ Mulandu nshi Yuda ayumfwilile uwashininkisha ukuti aali no kusanga Yesu mwi bala lya Getsemane?

◆ Ni shani Yesu alangisha ukwangwako ku batumwa bakwe?

◆ Ni ncitilo nshi Petro abuula mu kucingilila Yesu, lelo cinshi Yesu asosa kuli wene?

◆ Ni shani Yesu asokolola ukuti ali mu kusuminishanya kwakumanina no kufwaya kwa kwa Lesa kuli wene?

◆ Lintu abasambi basha Yesu, ni ani ashala, kabili cinshi cacitika kuli wene?