Ifyo Lesa Atusambilisha Filatupeela Isubilo

“Ababifi nga bamena nge cani ne ncitatubi shonse shabalula, ni pa kuti bonaulwe pe na pe.” —AMALUMBO 92:7.

Nga fintu tusambilile mu cipande cifumineko, ifyabipa fileya filefulilako fye. Ici tacifwile ukutupapusha, pantu Baibolo pali 2 Timote 3:1-5 yalisobele ukuti, “mu nshiku sha kulekelesha” abantu bakabipa sana. Inshiku sha kulekelesha isha finshi? Inshiku sha kulekelesha isha calo umwaba abantu abacita ifyabipa. Nomba line fye Lesa ali no konaula abantu bonse abashifwaya ukuleka ukucita ifyabipa. Lyena pa calo pakaba fye abantu abasuma abomfwila Lesa beka beka. “Abalungama e bakekala mu calo, kabili bakekalamo umuyayaya.”—Amalumbo 37:29.

“Lesa uupeela umutende akashonaula Satana.”—ABENA ROMA 16:20.

Nga ca kuti Lesa afumyapo abantu abacita ifyabipa, Satana e lyo ne fibanda fyakwe, pe sonde pakaba umutende umuyayaya. Kabumba wesu alitulaya ukuti pali iyi nshita ‘tapakabe no wa kututiinya.’—Mika 4:4.

“Itenti lya kwa Lesa lili pamo na bantunse . . . Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—UKUSOKOLOLA 21:3, 4.

Lesa akafumyapo amacushi na malwele ayabako pa mulandu wa kwa Satana, Adamu, Efa e lyo no kukanapwililika kwesu. Ne ci cikalenga ‘imfwa ikabako na kabili.’ Abantu abatemwa Kabumba wesu kabili abamumfwila bakekala umuyayaya. Nomba ni kwisa bakalaikala?

“Amatololo ne mpanga yauma fikasekelela, kabili iciswebebe cikasansamuka no kubalula nga maluba ya ntongola.” —ESAYA 35:1.

Lesa nga afumyapo abacita ifyabipa pe sonde, pakaba paradaise! Isonde likalamoneka bwino kabili mukaba ifya kulya ifingi. (Amalumbo 72:16) Amenshi ya muli fibemba na mu fimana yakaba aya busaka, kabili mukaba ifya mweo ifingi! Abantu bonse bakalaikala mu mayanda yabo ayo bakakuula. Mu calo tamwakabe umuntu uushakakwate umwa kwikala, uushakalekwata ifya kulya, nelyo umupiina.—Esaya 65:21, 22.

“Kukaba ukubuuka.” —IMILIMO 24:15.

Bushe mulafwaya ifibusa fyenu na balupwa abafwa bakabuuke? Lesa wa maka yonse akababuusha kabili akalenga bakaleikala muli Paradaise pano pene pe sonde. Ilyo bakabuuka, mukabeshiba kabili nabo bene bakamwishiba. Tontonkanyeni pa fyo mukatemwa e lyo ne fyo nabo bakatemwa ilyo mukamonana! Cinshi calenga tucetekele ukuti ifi Lesa atulaya fikacitika? Ni co Baibolo yalilanda pa bantu abengi, abaice na bakalamba, abaume e lyo na banakashi ababuushiwe, kabili balimonene na balupwa lwabo. Yesu abushishe abafwa ninshi na bantu abengi balemonako.—Luka 8:49-56; Yohane 11:11-14, 38-44