Mwalicindama Kuli Yehova Lesa Wenu!

1-2. Mafya nshi ababomfi ba kwa Yehova abengi bakwata, kabili kuti yalenga balacita finshi?

TONTONKANYENI pali ifi ifya kumwenako fitatu: Ba dokota baeba munyinefwe wacaice ukuti nakwata ubulwele ubwakulamupwisha amaka. Munyinefwe uuli ne myaka ukucila pali 50 bamutamfya incito, kabili aesha apo engapesha ukufwaya incito imbi, lelo afilwa ukuisanga. Nkashi umukoloci alafilwa ukubombela sana Yehova nge fyo alemubombela kale.

² Nga ca kuti mwaliba na mafya ayapala aya twalandapo, nalimo kuti mwalamona kwati tamwacindama. Amafya ya musango uyu kuti yalenga mwilaba ne nsansa, kuti yalenga mwalamona kwati tamwacindama, kabili kuti yalenga calamukosela ukumfwana bwino na abantu.

 3. Bushe Satana na bo atungulula bamona shani abantu?

³ Abantu ba muli cino calo bamona abantu banabo nga fintu Satana abamona. Satana amona kwati fwe bantu tatwacindama. Ku mufulo fye aebele Efa ukuti aali no kuba umuntungwa nga akaana ukumfwila Lesa. Satana alishibe ukuti Efa nga akaana ukumfwila Lesa aali no kufwa. Satana e utungulula ifya makwebo, ifikansa fya calo, na macalici ya muli cino calo. E co tushingapapila umulandu bashimakwebo, aba mu fikansa fya calo, ne ntungulushi sha mapepo bacitila ifilanga ukuti tabacindika abantu.

 4. Finshi twalasambilila muli cino cipande?

⁴ Yehova ena afwaya tulemona ukuti twalicindama, kabili alatwafwa ilyo twakwata amafya ayengalenga twalamona kwati tuli bacabecabe. (Amalu. 136:23; Rom. 12:3) Muli cino cipande twalasambilila pa fyo Yehova atwafwa: (1) Nga twalwala, (2) imikalile nga yaafya pa mulandu wa kuti tatukwete indalama, na (3) nga twalamona kwati te kuti tulebombela sana Yehova pa mulandu no kukota. Natubalilepo ukusambilila ifingalenga twashininkisha ukuti bonse twalicindama kuli Yehova.

 5. Finshi fyalenga mushininkishe ukuti fwe bantu twalicindama kuli Yehova?

⁵ Nangu ca kuti Yehova atupangile ukubomfya ulukungu lwa mu mushili, twalicindama sana ukucila ulukungu. (Ukute. 2:7) Tontonkanyeni pali fimo ifilenga tushininkishe ukuti twalicindama kuli Yehova. Abumbile fwe bantunse mu musango wa kuti tulepashanya imibele yakwe. (Ukute. 1:27) Ifi filanga fye ukuti abantu balicila ifibumbwa fyonse ifya pano isonde, kabili ebo apeela umulimo wa kusakamana isonde ne nama.—Amalu. 8:4-8.

 6. Cinshi na cimbi icalenga tushininkishe ukuti Yehova amona fwe bantu ukuti twalicindama nangu ca kuti tatwapwililika?

⁶ Na lintu Adamu abembwike, Yehova alitwalilile ukumona abantu ukuti balicindama. Alitucindika sana ica kuti alitupeele no Mwana wakwe uo atemwisha Yesu, ukuba icilubula pa membu shesu. (1 Yoh. 4:9, 10) Pa kuti abafwa pa mulandu wa lubembu twapyana kuli Adamu bakanonkelemo mwi lambo lya cilubula, Yehova akababuusha. Akabuusha bonse “abalungama na bashalungama.” (Imil. 24:15) Icebo cakwe citweba ukuti alatwalilila ukutumona ukuti twalicindama nangu twalwala, nangu tatukwete indalama, nelyo nga twakota.—Imil. 10:34, 35.

 7. Finshi na fimbi ifilenga ababomfi ba kwa Yehova bashininkisha ukuti balicindama kuli ena?

⁷ Kwaliba na fimbi ifyalenga tushininkishe ukuti twalicindama kuli Yehova. Alilenga twaba ifibusa fyakwe kabili alimwene ifyo twatemenwe ukukutika imbila nsuma. (Yoh. 6:44) Ilyo twatendeke ukupalama kuli ena, na o alepalama kuli ifwe. (Yako. 4:8) Yehova na kabili alabomfya inshita na maka yakwe pa kutusambilisha, kabili ifi acita filanga ukuti alitucindika. Alishiba bwino ifyo twaba kabili alishiba ne fyo twingaba nga atusambilisha. Na kabili apo alitutemwa, alatusalapula. (Amapi. 3:11, 12) Ala ifi Yehova acita filanga ukuti twalicindama kuli ena!

 8. Bushe amashiwi yaba pa Amalumbo 18:27-29 kuti yalenga twalamona shani amafya tukwata?

⁸ Abantu bamo balemona kwati Imfumu Davidi tayali iyacindama, lelo yalishibe ukuti Yehova aliitemenwe kabili aleyafwa. Ifi Davidi aishibe fyalengele atwalilile ukushipikisha. (2 Sam. 16:5-7) Nga natusakamikwa nelyo nga tuli na mafya, Yehova kuti atwafwa ukwaluka mu fyo tulemona ifintu kabili kuti atwafwa ukucimfya ubwesho. (Belengeni Amalumbo 18:27-29.) Yehova nga ali ku lubali lwesu, takuli icingalenga twalafilwa ukumubombela ne nsansa. (Rom. 8:31) Natulande pa mafya yatatu ayo tulandilepo, ayo twingashipikisha fye nga tuleibukisha ukuti twalicindama kuli Yehova.

 9. Bushe ukulwala kuti kwalenga twalaumfwa shani?

⁹ Ukulwala kuti kwalenga twalaba sana no bulanda kabili kuti kwalenga twalamona kwati tapaba uutumona ukuti twalicindama. Nalimo kuti twalaumfwa insoni abantu nga bamona ukuti tulefilwa ukucita ifyo tulingile ukucita. Na lintu bambi bashishibe ukuti natulwala, kuti twalaumfwa sana ububi pa mulandu wa kuti tulefilwa ukuicitila ifintu fimo ifyo twalecita ilyo tushilalwala. Nga ca kuti ifi e fyo tuleumfwa, Yehova kuti atukoselesha. Kuti atukoselesha shani?

10. Finshi ilembo lya Amapinda 12:25 lilanda ukuti e fingatusansamusha nga natulwala?

¹⁰ Nga natulwala “amashiwi ayasuma” kuti yatusansamusha. (Belengeni Amapinda 12:25.) Mu Baibolo, Yehova alitweba amashiwi ayasuma ayengi ayalenga tuleibukisha ukuti tulatwalilila ukuba abacindama kuli ena na lintu tulwele. (Amalu. 31:19; 41:3) Nga tulebelenga aya mashiwi libili libili, Yehova akatwafwa ukukanalasakamikwa sana pa bulwele twalwala.

11. Bushe Yehova aafwile shani munyinefwe Jorge?

¹¹ Natulande pali ba Jorge. Ba Jorge balilwele ubulwele ubwaleya bulebipilako fye ica kuti batendeke ukumona kwati tabacindama. Batile: “Nshaleenekela ukutila kuti nalwala, kanshi naleumfwa sana ububi pantu abantu abengi balendolekesha pa mulandu wa bulwele nalwele. Ilyo nalelwalilako naletontonkanya sana pa fyo ifintu fyali no kumbipila. Nalisakamikwe icine cine kabili napaapeete Yehova ukuti angafwe.” Bushe Yehova aafwile shani ba Jorge? Batile: “Apo nalefilwa ukubelenga ifingi, nalebelenga fye ifikomo fimo ifyaba mu Amalumbo ifilanga ukuti Yehova alasakamana ababomfi bakwe. Nalebelenga ifi fikomo libili libili kabili fyalensansamusha. Ilyo papitile inshita, abantu balemona ukuti nalitendeke ukulamwentula. Balenjeba abati filya natendeke ukuba ne nsansa fyalibakoseleshe. Nalishininkishe ukuti Yehova alyaswike amapepo nalepepa! Alingafwile ukuleka ukutontonkanya ukuti nshacindama. Natendeke ukubika sana amano ku fyo Icebo cakwe cilanda ukuti nalicindama kuli ena nangu ca kuti nalilwala.”

12. Nga ca kuti mwalilwala, finshi mwingacita pa kuti Yehova amwafwe?

¹² Nga ca kuti mwalilwala, mwilatwishika ukuti Yehova alishiba ifyo mumfwa. Mulemulomba ukuti alemwafwa pa kuti mwilamona kwati tamwacindama. Lyena mulefwaya amashiwi ayasuma ayo Yehova amubikila mu Baibolo ayengamusansamusha. Mulebika sana amano ku fikomo ifilanga ukuti Yehova amona ababomfi bakwe ukuti balicindama. Nga mulecita ifi mukamona ukuti Yehova aliba ne cikuuku kuli bonse abamubombela ne cishinka.—Amalu. 84:11.

13. Bushe umutwe wa lupwa kuti aumfwa shani nga bamutamfya incito?

¹³ Imitwe ya ndupwa balafwaya ukupeela indupwa shabo ifyo shikabila. Nomba inshita shimo munyinefwe kuti bamutamfya incito nangu ca kuti tapali ifyo alufyenye. Kuti aesha apo engapesha ukufwaya incito imbi, lelo nalimo kuti afilwa ukuisanga. Ici kuti calenga alamona kwati tacindama. Bushe ukutontonkanya pa fyo Yehova atulaya kuti kwamwafwa shani?

14. Finshi filenga Yehova alefikilisha ifyo alaya?

¹⁴ Yehova lyonse alafikilisha ifyo alaya. (Yosh. 21:45; 23:14) Kwaliba ifingi ifilenga alefikilisha ifyo alaya. Ica kubalilapo ca kuti ukufikilisha ifyo alaya kulalenga ishina lyakwe ukucindikwa. Yehova alilaya ukuti akulasakamana ababomfi bakwe aba cishinka, kabili alafwaisha ukufishapo ubu bulayo. (Amalu. 31:1-3) Na kabili, Yehova alishiba ukuti apo na ifwe twaba mu lupwa lwakwe, kuti twaba no bulanda kabili kuti twaumfwa ububi nga ca kuti taletusakamana. Alitulaya ukuti akulatupeela ifyo tukabila pa kuti tuletwalilila ukuba abomi, e lyo ne fyo tukabila pa kuti tutwalilile ukulamubombela. Takuli icingalesha Yehova ukufishapo ifi atulaya!—Mat. 6:30-33; 24:45.

15. (a) Mafya nshi Abena Kristu bakubalilapo bakwete? (b) Bushe ilembo lya Amalumbo 37:18, 19 lilenga twashininkisha finshi?

¹⁵ Nga tuleibukisha icilenga Yehova alefishapo ifyo atulaya, tukalacetekela ukuti akulatwafwa nga ca kuti imikalile yaafya pa mulandu wa kukanakwata indalama. Tontonkanyeni pa fyo cali ku Bena Kristu ba kubalilapo. Ilyo abalwani batendeke ukucusha aba mu cilonganino cali mu Yerusalemu, ‘bonse balisalangene ukufumyako fye abatumwa.’ (Imil. 8:1) Tontonkanyeni pa mafya bakwete ilyo basalangene. Bafwile balishile amayanda yabo e lyo na makwebo balecita nelyo incito balebomba, kabili ici calengele imikalile yafye uko baile pantu tabakwete indalama. Nomba Yehova tabalekeleshe, kabili balitwalilile ukulasekelela. (Imil. 8:4; Heb. 13:5, 6; Yako. 1:2, 3) Yehova alyafwile Abena Kristu bakubalilapo, kabili na ifwe bene akulatwafwa.—Belengeni Amalumbo 37:18, 19.

16. Finshi nalimo fingalenga twalamona kwati Yehova tacindamika ifyo tumubombela?

¹⁶ Nga twatendeka ukukota, kuti twalamona kwati tatucindeme kuli Yehova pa mulandu wa kuti tatulemubombela nge fyo twalemubombela kale. Imfumu Davidi nayo nalimo yalisakamikwe ilyo yatendeke ukukota. (Amalu. 71:9) Bushe Yehova kuti atwafwa shani?

17. Finshi twingasambilila ku lyashi lya ba nkashi Jheri?

¹⁷ Lekeni tulande pa fyo cali kuli nkashi Jheri. Ba Jheri balibebele ukuyasangwa ku kumana kwaliko pa Ng’anda ya Bufumu uko baali no kubasambilisha ifya kusakamana ifikuulwa tubomfya mu cilonganino ca kwa Lesa, lelo tabalefwaya ukuyako. Batile: Ninkula e lyo nine mukamfwilwa, kabili nshaishibapo nangu cimo pa fya kusakamana Ing’anda ya Bufumu. Ndi wa cabecabe fye.” Mu nshita ya bushiku ilyo kwashele ubushiku bumo ukuya kuli kulya ku kumana, ba Jheri balipepele kuli Yehova kabili balimwebele fyonse ifyali ku mutima. Ilyo bafikile pa Ng’anda ya Bufumu, balisakamikwe pantu balemona kwati tabaalingile ukuyako. Ilyo ukukumana kwatendeke, munyinefwe umo pa balebasambilisha alikomaile pa cishinka ca kuti icacindama sana kufwaya ukusambilishiwa na Yehova. Ba Jheri batile: “Natontonkenye nati ‘ndafwaisha ukuti Yehova alensambilisha!’ Nalilukwishe ifilamba pantu nalilwike ukuti Yehova alyaswike ipepo lyandi. Yehova alenjeba ukuti kwali umulimo uwacindama uo ningamubombela kabili alefwaisha ukunsambilisha!” Balandile no kuti: “Nangu ca kuti nalisakamikwe ilyo fye nafikile pa Ng’anda ya Bufumu, nali ne nsansa nga nshi ilyo nalefumapo pantu nalikoseleshiwe kabili nalishibe ukuti nalicindama!”

18. Finshi Baibolo yalanda ifilanga ukuti Yehova alatasha pa fyo tumubombela na lintu tukotele?

¹⁸ Nga twakota, tufwile ukwishiba ukuti kwaliba imilimo iyo twingabombela Yehova. (Amalu. 92:12-15) Yesu atusambilishe ukuti, nangu ca kutila kuti twalamona kwati imilimo tulekumanisha ukubombela Yehova tayacindama, Yehova amona fyonse ifyo tuipeelesha ukucita mu cilonganino cakwe ukuti fyalicindama. (Luka 21:2-4) Kanshi mulebika amano ku fyo mwingakumanisha ukucita. Ku ca kumwenako, kuti mwaebako bamo pali Yehova, kuti mwapepelako aba bwananyina, kabili kuti mwakoseleshako bambi ukutwalilila ukuba aba cishinka. Yehova amona ukuti mubombela pamo nankwe. Icilenga alemona ifi te bwingi bwa milimo mu mubombela, lelo fintu muipeelesha ukumumfwila.—1 Kor. 3:5-9.

19. Bushe ifyaba pa Abena Roma 8:38, 39 filenga twashininkisha cinshi?

¹⁹ Tulatemwa sana ukubombela Yehova, pantu ni Lesa uumona abamubombela ukuti balicindama! Atubumbile pa kuti tulecita ukufwaya kwakwe, kabili ukupepa kwa cine e kulenga tuleba ne nsansa. (Ukus. 4:11) Nangu ca kuti abantu muli cino calo kuti balatumona kwati tatwacindama, Yehova ena atumona ukuti twalicindama. (Heb. 11:16, 38) Nga twasakamikwa pa mulandu wa kuti (1) natulwala, (2) imikalile yaafya pantu tatukwete indalama, na (3) natukota, tuleibukisha ukuti takuli icingatupaatula ku kutemwa kwa kwa Shifwe wa ku muulu.—Belengeni Abena Roma 8:38, 39.