6, 7. (a) Bushe Sergi Pauli ali ni nani, kabili mulandu nshi Bar-Yesu alefwaila ukumulesha ukukutika ku mbila nsuma? (b) Finshi Sauli acitile ilyo Bar-Yesu alefwaya ukulesha umulashi ukukutika ku mbila nsuma?

⁶ Mu nshita ya batumwa, abantu mu Kupro balepepa sana tulesa twa bufi. Barnaba na Sauli balimwene ifi ilyo bafikile ku Pafu, ku masamba ya ici icishi. Ilyo bali kulya “bakumenye umwaume umuYuda uwe shina lya kuti Bar-Yesu, uwalecita ifinjelengwe kabili uwali kasesema wa bufi.”f Mu nshita ya batumwa, abena Roma abengi abali abasambilila sana ukubikako no muntu “uwali uwacenjela,” Sergi Pauli, ilingi line baleya ku uwalecita ifinjelengwe nelyo ku upendula intanda mu kwipusha pa kuti beshibe ifyo bengacita pa fintu fimo ifyacindama. Nangu cibe fyo, Sergi Pauli alitemenwe imbila nsuma ya Bufumu kabili “alefwaisha ukumfwa icebo ca kwa Lesa.” Nomba Bar-Yesu tatemwenwe pa fyo Sergi Pauli alefwaisha ukumfwa imbila nsuma ya Bufumu. Pa mulandu wa ncito alebomba Bar-Yesu balemwita ukuti Eluma, icipilibula ‘uucita finjelengwe.’—Imil. 13:6-8.