BUSHE MULEIBUKISHA?

Bushe mwalibelenga bwino bwino bamagazini ba Ulupungu lwa kwa Kalinda aba nomba line? Moneni nga kuti mwayasuka ifipusho pe samba:

Bushe caliba fye bwino ku Bena Kristu ukoca umuntu nga afwa?

Umuntu umwine e ufwile ukupingulapo nga ca kuti alefwaya bakamoce nga afwa nelyo iyo. Nangu ca kuti Baibolo tayalandapo mu kulungatila pa koca icitumbi ca muntu, icitumbi ca Mfumu Shauli ne citumbi ca ca mwana wakwe Yonatani balifyocele e lyo pa numa bashika amafupa. (1 Sam. 31:2, 8-13)—6/15, ibula 7.

Kuti twashininkisha shani ukuti Lesa te ulenga ukuti ifyabipa filecitika?

Lesa alilungama mu mibele yakwe yonse. Wamulinganya, wa cishinka kabili alitambalala. Yehova na kabili wa nkumbu kabili wa luse. (Amala. 32:4; Amalu. 145:17; Yako. 5:11)—7/1, ibula 4.

Mafya nshi umuntu engakwata nga akuukila ku calo cimbi uko bakabila ba mbila nsuma bacepa?

Amafya yatatu ayo engakwata ni ya (1) ubwafya bwakubelesha imikalile imbi, (2) ubwafya bwa kufuluka ba lupwa, na (3) ubwafya bwakupanga ifibusa na bamunyina mu cilonganino. Abengi abacimfya aya mafya balapaalwa sana na Lesa.—7/15, amabula 4-5.

Cinshi calengele ukuti Yosefe bamupate kuli bamunyina?

Cimo icalengele ca kuti, Yakobo alitemenwe sana Yosefe, ica kuti alimupele ne cakufwala icisuma. Bamunyina ba kwa Yosefe batendeke ukumupata kabili bashitishe Yosefe mu busha.—8/1, amabula 11-13.

Mulandu nshi amatrakiti ayapya yabombela bwino kabili yayanguka shani ukubomfya?

Amatrakiti ayapya yonse bayapanga fye cimo cine. Amatrakiti yonse yalatwafwa ukubelenga ilembo no kwipusha icipusho umuntu uo tuleshimikilako. Te mulandu ne fyo umuntu uo muleshimikilako ayasuka, kuti mwaya pe bula lyakonkapo no kumulanga ifyo Baibolo ilanda. Na kabili kuti mwamulanga icipusho mukayalanshanyapo nga mwabwelelako.—8/15, amabula 13-14.

Bushe Syriac Peshitta ni cinshi?

Ululimi lwa ciSyriac lwalipalene no lulimi lwa ciAramaic, abantu balelulanda muli ba 100 C.E nelyo 200 C.E. Cimoneka kwati ululimi lwa ciSyriac e lulimi lwa kubalilapo umo babalilepo ukupilibwila Amalembo ya Bwina Kristu aya ciGreek. Baibolo ya mu lulimi lwa mu ciSyriac batendeke ukuita ukuti Peshitta.—9/1, amabula 13-14.

Finshi abafyashi Abena Kristu bafwile ukulacita pa kucema abana babo?

Pa kuti abafyashi beshibe bwino abana babo bafwile ukulakutika abana babo nga balelanda. Bafwile ukukosapo ukulabasambilisha ifya kwa Lesa. Mulebatungula bwino, ku ca kumwenako, nga baletwishika ifyo basambilila pali Lesa.—9/15, amabula 18-21.

Ilyo Ubufumu bwa kwa Lesa bukalateka icalo, finshi ifishakabeko?

Ukulwala, imfwa, ukubula kwa ncito, inkondo, ukubulisha ifya kulya, no bupiina tafyakabeko.—10/1, amabula 6-7.

Cipangano nshi icaba mu Baibolo icalenga kwaba abakuteka pamo na Kristu?

Pa numa ya kulya ica Kucilila ca kulekeleshako na batumwa bakwe aba cishinka, Yesu apangene nabo icipangano ico twingeta ukuti icipangano ca Bufumu. (Luka 22:28-30) Cali bushininkisho bwa kuti bakateka pamo na Yesu ku muulu.—10/15, amabula 16-17.

Landeni pa fya kumwenako fibili ifya mu Baibolo ifilanga ukuti Satana mu cine cine eko aba.

Amalembo yalanda ukuti Satana alilandile na Yesu ilyo aleesha ukumutunka. Na kabili mu nshiku sha kwa Yobo, Satana alilandile na Lesa. Aya malyashi yalanga ukuti Satana cine cine eko aba.—11/1, amabula 4-5.

Ni bani abo Yakobo alandilepo ukuti “ba pe shina lyakwe” nga fintu calembwa pa Imilimo 15:14?

Baali Bena Kristu abaYuda na baishileba abaYuda abo Lesa asalile ukuba umushobo uwasalwa pa kuti ‘babile konse konse ubucindami’ bwa wabetile. (1 Pet. 2:9, 10)—11/15, amabula 24-25.

Ni kwi Umusumba wa Timgad wali, kabili mibele nshi abaleikalamo bakwete?

Timgad wali musumba uukalamba uwa bena Roma mu calo icabelele ku kapinda ka ku kuso aka Africa (iciitwa nomba ukuti Algeria). Pa kulanga ifyo bamo aba muli uyu musumba babikileko sana amano, pa cashulwa mu mushili palembwa ukuti: “Balelunga, ukusamba, ukwangala ifyangalo, no kuseka kabili balecita ifi cila bushiku!” Ifi aba bantu balecita fyalipalana sana ne fyalembwa pali 1 Abena Korinti 15:32—12/1, amabula 8-10.