Ifya Kuba Ne Nsansa

IFWE bonse tulafwaya insansa, bushe te ifyo?— Lelo te bengi baba ne nsansa. Bushe walishiba icilenga?— Pantu tabaishiba icileta insansa. Batontonkanya ati ukukwata ifintu ifingi e kuleta insansa. Lelo lintu bakwata ifi fintu, insansa shabo tashitwalilila.

Pano pali icintu cacindama icileta insansa. Kasambilisha Mukalamba alandile ati: ‘Ukupeela kulaleta sana insansa ukucila ukupokelela.’ (Imilimo 20:35) E co, cinshi cileta insansa?— Ca cine, kupeela bambi ifintu no kubacitilako ifintu. Bushe walishibe co?—

Natutontonkanye pali ci na kabili. Bushe Yesu alandile ati umuntu uwapokelela ica bupe te kuti abe ne nsansa?— Iyo, te fyo alandile. Ulatemwa ukupokelela ifya bupe, bushe te ifyo?— Bonse balatemwa. Tulaba ne nsansa lintu twapokelela ifintu fisuma.

Lelo Yesu alandile ati insansa shilacilapo lintu twapeela. E co kuti watila nani uwapeela ifintu ifingi ku bantu ukucila uuli onse?— Ca cine, ni Yehova Lesa.

Baibolo ilanda ati Lesa ‘apeela bonse umweo, no kupeema, na fyonse.’ Alatupeela imfula ukufuma ku muulu na kasuba, pa kuti ifilimwa fikule, tukwate ne fya kulya. (Imilimo 14:17; 17:25) E mulandu wine Baibolo ita Yehova ati ‘Lesa wa nsansa’! (1 Timote 1:11) Ukupeela bambi ifintu cintu cimo iciletela Lesa insansa. Kabili lintu twapeela, na ifwe kuti catuletela insansa.

Nomba, finshi twingapeela bambi? Kuti watila shani?— Inshita shimo ica bupe cikabila indalama. Nga ca kuti ca bupe ca mwi shitolo, ukakabila ukulipila indalama. E co nga ulefwaya ukupeela ica bupe ca musango yo, ufwile ukusunga indalama mpaka shakumana ukushita ico ca bupe.

Lelo te fya bupe fyonse fifwile ukufuma ku mashitolo. Ku ca kumwenako, lintu kukabile, amenshi yatalala yalapembesula. E co lintu wapeela umuntu uuli ne cilaka amenshi, kuti wakwata insansa shifuma mu kupeela.

Bushiku bumo napamo iwe na banoko kuti mwaipika ifya kulya. Ico kuti cawama. Lelo cinshi wingacita ne fyo fya kulya icingakuletela sana insansa ukucila ukulya fyonse weka?— Ca cine, kuti wapeelako abanobe. Bushe kuti watemwa ukucite co bushiku bumo?—

Kasambilisha Mukalamba na batumwa bakwe bonse balishibe insansa shaba mu kupeela. Bushe walishiba ico bapeele abantu bambi?— Cali cintu cawamisha mu calo! Balishibe icine pali Lesa, kabili balesekelela ukwebako bambi iyi mbila nsuma. Bacitile ci ukwabula ukulipilisha abantu pa co balebapeela.

Bushiku bumo umutumwa Paulo no munankwe sana umusambi Luka bakumenye umwanakashi uwalefwaya ukukwata insansa shaba mu kupeela. Bamukumenye ku mumana. Paulo na Luka baile kulya pantu baumfwile ukuti eko abantu balepepela. Kabili na cine, lintu bafikile, basangile abanakashi bamo balepepa.

Paulo atendeke ukushimikila aba banakashi imbila nsuma pali Yehova Lesa no Bufumu bwakwe. Umo pali aba, ali ni Ludia, kabili alekutikisha. Pa numa, Ludia alefwaya ukucitako cimo ica kulanga ukuti atemenwe imbila nsuma iyo aumfwile. E co apaapaatile Paulo na Luka ukuti: “Nga mwaningo kubo wa cishinka kuli Shikulu, iseni mu ng’anda yandi, e mo mwikale.” Kabili abapatikishe ukuya ku ng’anda yakwe.—Imilimo 16:13-15.

Ludia alitemenwe ukuba na ba babomfi ba kwa Lesa mu ng’anda yakwe. Alibatemenwe pantu bamwafwile ukusambilila pali Yehova na Yesu na pa fyo abantu bengekala umuyayaya. Calimuletele insansa ukupeela Paulo na Luka ifya kulya na pantu bengalaala. E co ukupeela kwa kwa Ludia kwamuletele insansa pantu alefwaisha ukupeela. Ico cintu tufwile ukwibukisha. Umuntu kuti atweba ati tufwile ukupeela ica bupe. Lelo nga tatulefwaya ukupeela, kulya kupeele takwakatuletele insansa.

Ku ca kumwenako, ni shani nga naukwata switi ulefwaya ukulya? Nga nakweba ati upeeleko umunobe, bushe kuti watemwa ukumupeela?— Lelo napamo walikwete switi ilyo wakumenye umunobe watemwa sana. Lelo we mwine nga watontonkenye pa kupeelako umunobe, bushe ico te kuti cikuletele insansa?—

Inshita shimo tulatemwa umuntu ica kuti tufwaya ukumupeela fyonse ukwabula ukushako nangu cimo. Ilyo ukutemwa Lesa kulekulilako, ifyo e fyo tufwile ukuyumfwa pali Wene.

Kasambilisha Mukalamba alishibe umwanakashi umupiina uwayumfwile ifyo. Amumwene pe tempele mu Yerusalemu. Akwete utumakobili tunono tubili; e to akwete fye. Lelo abikile utu tumakobili tubili mu kabokoshi ka misangulo, nelyo aka bupe bwa pe tempele. Tapali uwamupatikishe ukucite co. Abantu abengi kulya tabaishibe ne co acitile. Acitile ci pantu alefwaya, kabili pantu atemenwe Yehova icine cine. Ukupeela kwalimuleteele insansa.—Luka 21:1-4.

Kwaliba inshila ishingi isho twingapeelelamo. Bushe kuti watontonkanyapo inshila shimo?— Nga twapeela pa mulandu wa kuti tulefwaya, tukaba ne nsansa. E mulandu wine Kasambilisha Mukalamba atwebela ati: “Peeleni.” (Luka 6:38) Nga tulecite fyo, tukalaletela bambi insansa. Kabili ifwe tukacilapo ukuba ne nsansa!