Bushe Bamalaika ni Bani, Kabili Milimo Nshi Babomba?

Yehova afwaya twaishiba ulupwa lwakwe ulwa ku muulu. Muli ulu lupwa mwaliba na bamalaika, abo Baibo ita ukuti “abana . . . abaume aba kwa Lesa.” (Yobo 38:7) Finshi Baibo ilanda pali bamalaika? Bushe bafwa shani abantu? Kabili bushe bamalaika bonse baba mu lupwa lwa kwa Lesa?

1. Bushe bamalaika ni bani?

Yehova abumbile bamalaika ilyo ashilabumba isonde. Bamalaika bekala ku muulu, kabili te kuti tubamone nga filya fine tushingamona Yehova. (AbaHebere 1:14) Kwaba bamalaika abengi nga nshi, kabili umo na umo aba ne mibele iyaibela. (Ukusokolola 5:11) ‘Balomfwa ifyo Yehova alanda no kucita ifyo abeba.’ (Amalumbo 103:20) Mu nshita ya ku kale, inshita shimo Yehova aletuma bamalaika ukuyaeba abantu amashiwi yakwe, ukubafwa, e lyo no kupususha abantu bakwe. Muno nshiku, bamalaika balatungulula Abena Kristu ku bantu abalefwaya ukusambilila pali Lesa.

2. Bushe Satana ne fibanda fyakwe ni bani?

Bamalaika bamo tabatwalilile ukuba ne cishinka kuli Yehova. Malaika uwabalilepo ukupondoka ni ‘Kaseebanya kabili Satana, uulufya aba pano isonde bonse.’ (Ukusokolola 12:9) Satana alefwaya ukulateka, e ico alitunkile Adamu na Efa, kabili mu kupita kwa nshita alitunkile na bamalaika bambi ukupondokela Yehova. Balya bamalaika abapondweke betwa ukuti ifibanda. Yehova alibatamfishe ukufuma ku muulu no kubapoosa pe sonde, kabili ali no kubonaula.—Belengeni Ukusokolola 12:9, 12.

3. Finshi Satana ne fibanda fyakwe bacita pa kulufya abantu?

Satana ne fibanda fyakwe balalufya abantu abengi ukupitila mu kupupa imipashi. Ukupupa imipashi kwalibipa, pantu kulanshanya ne fibanda. Ku ca kumwenako, abantu bamo balaya mu kwipusha ku babukila ku ntanda, ku basobela ifikacitika ku ntanshi, ku batila balikwata amaka ya kwishiba ifyo umuntu aletontonkanya, e lyo na ku ng’anga. E lyo bambi nabo nga nabalwala, balasalapo ukundapwa mu nshila iingalenga balaumfwana ne fibanda. Na kabili abantu bamo balababepa ukutila kuti balanda na bafwa. Lelo Yehova alatusoka ukuti: “Mwilaya ku bomfwana ne mipashi, kabili mwilaya ku basobela ifintu.” (Ubwina Lebi 19:31) Ico atusokela ni co afwaya ukutucingilila kuli Satana ne fibanda. Satana ne fibanda balwani ba kwa Lesa, kabili ico bafwaya kutusansa.

SAMBILILENI NA FIMBI

4. Bamalaika balafwa abantu ukusambilila pali Yehova

Bamalaika ba kwa Lesa tabaya mu kubila imbila nsuma ku bantu. Lelo kuti batungulula ababomfi ba kwa Lesa ku bantu abalefwaya ukusambilila pali ena. Belengeni Ukusokolola 14:6, 7, lyena lanshanyeni aya mepusho:

• Cinshi tufwaila ukuti bamalaika baletwafwa ilyo tulebila imbila nsuma?

• Bushe ukwishiba ukuti bamalaika kuti bamutungulula ku bantu abalefwaya ukusambilila Baibo kwamukoselesha? Mulandu nshi?

5. Mwilaumfwana ne fibanda

Satana ne fibanda balwani ba kwa Yehova, kabili balwani besu. Belengeni Luka 9:38-42, lyena lanshanyeni ici cipusho:

• Finshi ifibanda ficita ku bantu?

Tatufwile ukucita ifingalenga twalaumfwana ne fibanda. Belengeni Amalango 18:10-12, lyena lanshanyeni aya mepusho:

• Ni nshila nshi ifibanda fibomfya pa kutubeleleka na pa kuti tulelanshanya na fyo? Finshi ifyo mumona abantu bacita ifyaseeka uko mwikala ifingalenga balaumfwana ne fibanda?

• Bushe mulemona ukuti caliba fye bwino ifi Yehova alanda ukuti tatufwile ukulacita ifingalenga twalaumfwana ne fibanda? Cinshi mwa-asukila ifyo?

Tambeni VIDIO, lyena lanshanyeni amepusho yakonkapo.

VIDIO: “Kaaneni Kaseebanya” (5:02)

• Bushe mulemona ukuti cali fye bwino filya ba Palesa bafwikile umwana wabo impinga? Cinshi mwalandila ifyo?

• Finshi ba Palesa balingile ukucita pa kuti baicingilile ku fibanda?

Abena Kristu ba cine lyonse balataluka ku fibanda. Belengeni Imilimo 19:19 na 1 Abena Korinti 10:21, lyena lanshanyeni ici cipusho:

• Mulandu nshi cacindamina ukupoosa fyonse fye ifyo mwakwata ifingalenga mwalaumfwana ne fibanda?

6. Kuti mwacimfya Satana ne fibanda fyakwe

Satana e utungulula ifibanda. Lelo bamalaika ba cishinka batungululwa na malaika mukalamba Mikaele, e kutila Yesu. Mikaele wa maka nga nshi. Belengeni Ukusokolola 12:7-9, lyena lanshanyeni aya mepusho:

• Ni bani bakwatisha amaka, pali Mikaele na bamalaika bakwe na Satana ne fibanda fyakwe?

• Bushe mulemona ukuti abasambi ba kwa Yesu balingile ukutiina Satana ne fibanda fyakwe?

Kuti mwacimfya Satana ne fibanda fyakwe. Belengeni Yakobo 4:7, lyena lanshanyeni ici cipusho:

• Kuti mwaicingilila shani kuli Satana ne fibanda fyakwe?

IFYO MUSAMBILILE

Bamalaika ba cishinka balatwafwa. Satana ne fibanda fyakwe balwani ba kwa Yehova. Kabili Satana alalenga abantu balapupa imipashi pa kuti abalufye.

Ukupitulukamo

• Bushe bamalaika ba kwa Yehova bafwa shani abantu ukusambilila pali ena?

• Bushe Satana ne fibanda fyakwe ni bani?

• Cinshi mushilefwaila ukulacita icili conse icingalenga mwalaumfwana ne fibanda?

ISHIBILENIPO NA FIMBI

Moneni icalenga tushininkishe ukuti Yesu e Mikaele malaika mukalamba.

“Bushe Mikaele Malaika Mukalamba Nani?” (Icipande ca pa jw.org)

Moneni ifishinka ifilanga ukuti Satana e ko aba, te mibele iyabipa iyaba mu bantu.

“Bushe Satana E ko Aba?” (Icipande ca pa jw.org)

Belengeni ifyo umwanakashi umo acitile pa kuti aleke ukutungululwa ne fibanda.

“Asangile Imifwaile mu Bumi” (Ulupungu lwa kwa Kalinda, July 1, 1993)

Moneni ifyo Satana alenga abantu balapupa imipashi pa kuti abalufye.

“Icine pa Malele no Buloshi” (Inshila Iitwala ku Mweo wa Muyayaya, isambililo 5)