Mulandu Nshi Yehova Alekela Ubucushi?

10, 11. (a) Ukulingana na Abena Roma 8:19-22, cinshi cacitike ku “bubumbo bonse”? (b) Kuti twaishiba shani uwalengele ububumbo ukunakila ku kuicusha fye?

¹⁰ Ilembo muli kalata ya mutumwa Paulo iyo alembeele abena Roma lilatusambilishako pali uyu mulandu wacindama. Paulo alembele ati: “Ukufulukisha kwa bubumbo kulelolela ukusokololwa kwa bana ba kwa Lesa. Pantu ububumbo bwalengelwe ukunakila ku kuicusha fye, te ku kuitemenwa iyo lelo ku wabulengele ukunakila, pa mulandu wa kusubila ukuti ububumbo na bo bukalubulwa ku busha bwa kubola no kukwata ubuntungwa bwa bukata ubwa bana ba kwa Lesa. Pantu twalishiba ukuti ububumbo bonse bulatetela capamo no kucululukila capamo ukufika kuli nomba.”—Abena Roma 8:19-22.

¹¹ Pa kuti tumfwikishe ifi fikomo, intanshi tulingile ukwasuka ifipusho fyacindama. Ku ca kumwenako, Nani walengele ububumbo ukunakila ku kuicusha fye? Bamo batila ni Satana; bambi batila ni Adamu. Lelo aba babili tabengacite fyo. Mulandu nshi? Pantu uulenga ububumbo ukunakila ku kuicusha fye acite fyo “pa mulandu wa kusubila.” Apeela isubilo lya kuti aba busumino bakasuka ‘bakalubulwe ku busha bwa kubola.’ Adamu nelyo Satana tabengapeela abantu isubilo lya musango yu. Yehova fye e wingacite co. E co kanshi, e walengele ububumbo ukunakila ku kuicusha fye.

12. Cimfulumfulu nshi cabako pa lwa fyo “ububumbo bonse” bupilibula, kabili ici cipusho cayasukwa shani?

¹² Lelo, bushe “ububumbo bonse” ubwalandwapo muli ili lembo bubumbo nshi? Bamo batila “ububumbo bonse” bulosha ku fyabumbwa fyonse ifya mu calo, ukusanshako inama ne filimwa. Lelo bushe inama ne filimwa fyalikwata isubilo lya “buntungwa bwa bukata ubwa bana ba kwa Lesa”? Iyo. (2 Petro 2:12) E co kanshi, “ububumbo bonse” kuti bwalosha fye ku bantunse epela. Ubu e bubumbo bwakumwa ku lubembu ne mfwa pa mulandu wa bucipondoka bwali mu Edene kabili ubu bubumbo bukabila sana isubilo.—Abena Roma 5:12.

13. Cinshi bucipondoka mu Edene bwaletele pa bantunse?

¹³ Bushe ubu bucipondoka bwakumine shani abantunse? Paulo alondolola ifyafuminemo na mashiwi ya kuti: ukuicusha fye.a Ukulingana no lupapulo lumo, aya mashiwi yalondolola “bucafye bwa cintu cishilebomba umulimo capangiilwe.” Abantunse bapangilwe ukwikala umuyayaya, ukubombela pamo ngo lupwa lwapwililika kabili ulwaikatana mu kusakamana paradaise wa pe sonde. Lelo, bekala inshiku shinono isha mafya no kukalipwa. Nga fintu Yobo asosele, “umuntu uwafyalwa ku mwanakashi wa nshiku shinono, kabili uwaisulamo ukutenkana.” (Yobo 14:1) Ni bucafye icine cine!

14, 15. (a) Yehova alangile shani ubulungi mu fyo apingwile abantunse? (b) Mulandu nshi Paulo asosele ukuti ububumbo bwalengelwe ukunakila ku kuicusha fye “te ku kuitemenwa”?

¹⁴ Nomba natumone icipusho cikalamba: Mulandu nshi “Kapingula wa pano isonde ponse” alengela abantunse ukunakila kuli uku kukalipwa? (Ukutendeka 18:25) Bushe alilungike mu kucite co? Ibukisheni ico abafyashi besu aba kubalilapo bacitile. Mu kupondokela Lesa, babele ku lubali lwa kwa Satana, uwasonsombele bumulopwe bwa kwa Yehova. Ku fyo bacitile, basuminishe ukutunga kwa kuti abantunse kuti baikala bwino ukwabula Yehova, ukuiteka abene mu kutungululwa ne cibumbwa ca mupashi icapondoka. Mu kupingula aba bacipondoka, Yehova abapeele ico balefwaya. Alekele abantunse ukuiteka abene mu kusongwa na Satana. Mu mibele ya musango yu, icingaba bwino ukucita kulenga abantunse ukunakila ku kuicusha fye lelo pa mulandu we subilo.

¹⁵ Kwena uku takwali ku “kuitemenwa” kwa bubumbo. Tatuisalila ukufyalwa abasha ku lubembu no kubola. Lelo Yehova mu nkumbu shakwe alekele Adamu na Efa ukuba abomi no kukwata abana. Nangu ca kuti ifwe, fwe ntuntuko shabo, twalengwa ukunakila ku kuicusha fye kwa lubembu ne mfwa, twalikwata ishuko lya kucita ico Adamu na Efa bafililwe ukucita. Kuti twakutika kuli Yehova no kusambilila ukuti bumulopwe bwakwe bwalilungama kabili bwalipwililika, e lyo ukuteka kwa bantunse ukwabula ukutungululwa na Yehova, kwena kuleta fye ukukalipwa, ukukalifiwa, na bucafye. (Yeremia 10:23; Ukusokolola 4:11) Kabili ukusonga kwa kwa Satana kulenga fye ifintu ukubipilako. Ifyacitikila abantunse fishininkisha ukuti ici twalandapo cine.—Lukala Milandu 8:9.

16. (a) Mulandu nshi twingacetekela ukuti Yehova te uleta ubucushi tumona mu calo lelo? (b) Lisubilo nshi Yehova mu kutemwa apeela abantu ba busumino?

¹⁶ Caumfwika ukuti Yehova alikwete imilandu isuma iya kulenga ububumbo ukunakila ku kuicusha fye. Lelo, bushe ico cilepilibula ukuti Yehova e walenga kube bucafye no bucushi ubutuponena ilelo? Tontonkanyeni pa mupingushi uwapingula mpulamafunde. Uyu mpulamafunde kuti acula ilyo ali nakakwa, lelo bushe afwile ukupeela kapingula umulandu ukuti e walenga alecula? Iyo! Na kuba, Yehova te uleta ifyabipa. Yakobo 1:13 itila: “Lesa te kuti eshiwe ku bubi, kabili umwine tesha muntu iyo.” Natuleibukisha no kuti Yehova apingwile abantu “pa mulandu wa kusubila.” Mu kutemwa aliteyanya ukuti intuntuko sha busumino isha kwa Adamu na Efa bakamone impela ya bucafye no kusangalala mu “buntungwa bwa bukata ubwa bana ba kwa Lesa.” Ku ciyayaya conse, abantunse ba busumino tabakasakamikwe ukuti ububumbo bonse kuti na kabili bwabwelela ku kunakila ku kuicusha fye. Ifyo Yehova akabomba mu bulungi pali uyu mulandu fikalanga icishinka ca kuti e walinga ukuba mulopwe ku ciyayaya.—Esaya 25:8.