Ukucimfya Ububi

“CINSHI ico imbwa iyi yafwa iletukila shikulu imfumu? Shi lekeni njeko, mputule no mutwe wakwe.” Uwalombele ulu lusa ni Abishai, mushika wa mulalo wa fita mu Israele. Pantu aumfwile ukutukana kwa mwina Benyamini uwaleitwa Shimei, uwapatile no kusaalula shikulu wa kwa Abishai, Imfumu Davidi.—2 Samwele 16:5-9.

Abishai ayankwileko nga fintu na bengi ilelo bengankulako, ukufwaisha ukubwesesha ububi pa bubi. Abishai alefwaya Shimei ukufwila pa kusaalula Davidi icibi.

Lelo, Davidi ayankwileko shani? Acincintile Abishai, ukuti: “Mulekeni aletukana.” Nangu line ali uwa kaele ku milandu balemubepesha kuli Shimei, Davidi aliicefeshe no kucincintila itunko lya kulandula. Ashiilile umulandu mu maboko ya kwa Yehova.—2 Samwele 16:10-13.

Lintu Davidi abwelulwike ku kwikala pa Bufumu, ukupusuka kuli bucipondoka bwa kuicusha fye ubwa kwa mwane, Shimei ali pa bantu ababalilepo ukusengela Davidi no kulomba ubwelelo. Na pa pene Abishai afwaile ukwipaya Shimei, lelo Davidi kabili alimukeenye.—2 Samwele 19:15-23.

Muli uyu mulandu, Davidi aiminineko Yesu Kristu bwino bwino, pantu umutumwa Petro alembele ukuti: “Ilyo [Yesu] atukilwe tatukene, . . . lelo aipeele ku upingwilo mwalungama.”—1 Petro 2:23.

Abena Kristu ba lelo bakonkomeshiwa ukuba “aba mitima ya bupete, abashibwesesha cibi pa cibi.” (1 Petro 3:8, 9) Nga twapashanya Davidi na Yesu Kristu, ne fwe bene lyonse kuti ‘tulecimfisha ububi mu kucite cisuma.’—Abena Roma 12:17-21.