Icilubula Cilanga Ubulungami bwa kwa Lesa

ILYO Adamu na Efa bapondweke, Yehova atile kukaba Ubufyashi ubukalaswa ku citende. (Ukutendeka 3:15) Ici calicitike ilyo abalwani ba kwa Lesa baipeye Yesu Kristu no kumupoopela pa cimuti ca kucushiwilwapo. (Abena Galatia 3:13, 16) Yesu tali na lubembu, pantu aimitwe mu cipesha mano mwi fumo lya kwa nacisungu ku maka ya mupashi wa mushilo. E mulandu wine, umulopa wakwe uwasuumiwe wakwatile umutengo wa kulubula abantu abapyene ulubembu ne mfwa ukufuma kuli Adamu.—Abena Roma 5:12, 19.

Takwaba icingalesha Lesa wa maka yonse, Yehova, ukufikilisha ubufwayo bwakwe. Kanshi, ilyo abantu babembwike, kuli Yehova, cali kwati ilambo lya cilubula nalipeelwa kale, kabili abantu abacetekele ukuti amalayo yakwe yakacitika, bali no kuba ifibusa fyakwe. E calengele ukuti abana ba kwa Adamu ababembu, pamo nga Enoke, Noa na Abrahamu, babe ifibusa fya kwa Lesa ukwabula ukuti bakoweshe bumushilo Bwakwe.—Ukutendeka 5:24; 6:9; Yakobo 2:23.

Bamo abacetekele Yehova balicitile imembu shabipisha. Umo pali abo, aali ni Mfumu Davidi. Napamo kuti mwaipusha amuti: ‘Cinshi calengele Yehova ukutwalilila fye ukupaala Imfumu Davidi na lintu yacitile ubucende na Bati-sheba no kulenga umulume wakwe Uria, ukwipaiwa?’ Icikalamba icalengele ca kuti Davidi ali ne citetekelo kabili alilapile mu bufumacumi. (2 Samwele 11:1-17; 12:1-14) Pa mulandu we lambo lya kwa Yesu Kristu ilyali no kwisa ku ntanshi, Lesa alilekelele Davidi walapiile, kabili ukucite co takwalengele Lesa ukukowela, lelo ubulungami bwakwe no bulungi fyatwalilile filya fine fyaba. (Amalumbo 32:1, 2) Pa kushininkisha ukuti ico ca cine, Baibolo ilondolola icintu cawamisha ico icilubula ca kwa Yesu cibomba, ne co cintu caba ca kuti, “alange ubulungami bwakwe bwine, pantu Lesa alelekelela imembu ishacitilwe kale” ne sha “mu nshita ya nomba.”—Abena Roma 3:25, 26.

Ca cine, abantu balamwenamo apakalamba mu cilubula ca mulopa wa kwa Yesu. Pa mulandu wa cilubula, ababembu abalapila balaba ifibusa fya kwa Lesa. Na kabili, icilubula calenga ukuti kukabe ukubuuka kwa bafwa mwi sonde lipya ilya kwa Lesa. Na babomfi ba kwa Lesa aba busumino abafwile ninshi Yesu talapeela ilambo lya cilubula, na bo bene bakabuushiwa, pamo na bengi abashalepepa Lesa abafwile ilyo tabalaishiba icine. Baibolo itila: “Kukaba ukubuushiwa kwa balungama na bashalungama.” (Imilimo 24:15) Pali ilya nshita, pa mulandu we lambo lya cilubula, Yehova akapeela bonse abamumfwila ubumi bwa muyayaya. (Yohane 3:36) Yesu umwine atile: “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Ilambo lya cilubula ilyo Lesa apekanya, e likalenga abantu bakapokelele aya mapaalo.

Icalenga icilubula ukucindama sana, busuma ubo caleta kwi shina lya kwa Yehova, te busuma ubo caleta kuli ifwe. Icilubula cilanga ukuti Yehova ni Lesa wa bulungi bwapwililika, uwingapanga icibusa na bantu ababembu no kutwalilila uwasanguluka kabili uwa mushilo. Lesa akaana kutupeela icilubula, nga takwali umwana wa kwa Adamu nelyo umo, nangu fye ni Enoke, Noa, na Abrahamu, uwali no kwenda na Yehova nelyo ukuba cibusa wakwe. Kemba wa malumbo alishibe ici kabili alembele ukuti: “Amampuulu nga mwayamwensekesha, mwe Yehova, mwe Shikulu, nani uwingeminina?” (Amalumbo 130:3) Fintu tufwile ukutasha kuli Yehova pa kutuma Umwana wakwe uwatemwikwa ukwisa pano calo, na kuli Yesu pa kuitemenwa ukupeela ubumi bwakwe ukuba icilubula cesu!—Marko 10:45.