Kuti Mwashipikisha Ukufika ku Mpela

“Tubutuke no [kushipikisha, NW] ulubilo ulwabikilwa ifwe.”—ABAHEBERE 12:1.

1, 2. Ukushipikisha kupilibula nshi?

UMUTUMWA Paulo alembele Abena Kristu abaHebere aba mu mwanda wa myaka uwa kubalilapo ati: “Pantu [ukushipikisha, NW] e ko mukabila.” (AbaHebere 10:36) Ilyo alekomaila pa bucindami bwa kushipikisha, umutumwa Petro na o acincishe Abena Kristu ati: “Ku citetekelo cenu lundeniko . . . ukushipikisha.” (2 Petro 1:5, 6) Bushe ukushipikisha icine cine cinshi?

² Dikishonari wa ciNgeleshi ne ciGriki alondolola verbu wa kuti “ukushipikisha” pamo nga “ukushala pamo pene lelo te kufulumuka . . . ukushansha, ukutwalilila.” Icitabo cimo cilanda pa lwa nauni wa ciGriki uwa “ukushipikisha” ati: “Yaba mibele iingashishimisha ifintu, iikaana ukucimfiwa kabili iyaba ne subilo ilyakosa icine cine . . . Yaba mibele ilengo muntu ukwiminina naloshe cinso ku cipuupu ca mwela. Yaba mibele iingasangula ica kwesha catapatisha ukuba ubukata pantu yena taipelela fye pa kumona ubucushi lelo imona no buyo ku ntanshi.” Kanshi ukushipikisha kulaafwo muntu ukuba uwashangila lintu ali ne fipindami na mafya ukwabulo kutompoka. Ni bani maka maka bakabilo kushipikisha?

3, 4. (a) Ni bani bakabilo kushipikisha? (b) Mulandu nshi tulingile ukushipikisha ukufika ku mpela?

³ Mu mampalanya Abena Kristu bonse babutuko lubilo ulukabilo kushipikisha. Mupepi na mu mwaka wa 65 C.E., umutumwa Paulo alembele kabomba munankwe kabili cibusa wakwe uwa busumino uo baleenda nankwe, Timote, aya mashiwi ya kukoselesha aya kuti: “Nimpilikito kupilikita kusuma; nimpwisho lubilo; nimbake citetekelo.” (2 Timote 4:7) Lintu Paulo abomfeshe amashiwi ya kuti ‘ukupwisho lubilo,’ alelinganya ubumi bwakwe ngo Mwina Kristu ku lubilo ulwakwata inshila ya kubutukamo na pa kuyapwishisho lubilo. Pali iyo nshita, Paulo ali mupepi fye no kucimfyo lubilo ukufika ku mpela, kabili alicetekele ukuti akapokelele cilambu. Alundilepo ati: “Nomba kwambikilwa icilongwe ca bulungami, ico Shikulu, Kapingula mulungami, akapeela kuli ine mu Bushiku bulya.” (2 Timote 4:8) Paulo alishininkishe ukuti ali no kupokelela icilambu pantu alishipikishe ukufika ku mpela. Bushe cili shani kuli ifwe fwe bashala?

⁴ Ilyo alekoselesha abaatendekako lubilo, Paulo alembele ati: “Tubutuke no [kushipikisha, NW] ulubilo ulwabikilwa ifwe.” (AbaHebere 12:1) Nga Bena Kristu, tutendeko kubutuka ulu lubilo lwa kushipikisha lintu twaipeela kuli Yehova Lesa ukupitila muli Yesu Kristu. Ukutendeka ukubutuka bwino ulubilo lwa busambi kwalicindama, lelo icacindamisha kupwisho lubilo. Yesu atile: “Uwashipikisha ukufika ku mpela, wene akapusuka.” (Mateo 24:13) Umweo wa muyayaya e cilambu cikakwata abakapwisho lubilo! Apo twalikwato buyo ku ntanshi, tufwile ukushipikisha ukufika ku mpela. Cinshi cikatwaafwa ukufika pali bulya buyo?

Ukulya Ifya Kulya Ifisuma Kulakabilwa

5, 6. (a) Cinshi tufwile ukupooseshako amano pa kuti tushipikishe mu lubilo lwa ku bumi? (b) Kupayanya nshi ukwa ku mupashi tufwile ukubomfya, kabili mulandu nshi?

⁵ Icibansa ukwalebela Amangalo ya ku Isthmus ayaishibikwe cali mupepi no musumba wa Korinti ku Greece. Paulo alishibe bwino bwino ukuti bamunyina ba ku Korinti balishibe ulwa mbilo sha kucimfyanya na mangalo yambi ayaleba kulya. Ukubomfya fintu baishibe pa mangalo, abacinkwileko ulwa lubilo lwa ku bumi luntu balebutuka ati: “Bushe tamwaishibo kuti pa kubutuko lubilo babutuka bonse, lelo umo fye e upokelelo mwaala? E fyo mubutuke ukuti mupoke.” Paulo akomaile pa bucindami bwa kutwalililo kubutuka no kulola ku ntanshi mpaka no kupwisho lubilo. Lelo finshi fyali no kubaafwo kucite fyo? Alundilepo kusosa ati: “Onse uulepilikita ku mangalo atekanya muli fyonse.” Cine cine, abalecimfyanya mu mangalo ya pa kale baletukusha sana umubili, balepoosako sana amano ku fyo balelya no kunwa, kabili bali no kulama icibi imibombele yabo yonse pa kuti fye bacimfye.—1 Abena Korinti 9:24, 25.

⁶ Ni shani pa lubilo Abena Kristu baatendeka ukubutuka? Eluda umo mu cilonganino ca Nte sha kwa Yehova asoso kuti: “Pa kuti tushipikishe mu lubilo lwa ku bumi, tufwile ukupoosako sana mano ku fya kulya fya ku mupashi.” Tontonkanyeni pa fya kulya fya ku mupashi fintu Yehova, “Lesa uutupeelo kushipikisha” atupayanishisha. (Abena Roma 15:5, NW) Mu Cebo cakwe, Baibolo, e muntu maka maka tulya ifya kulya fya ku mupashi. Bushe tatulekabila kanshi ukulakonka ukutantika kusuma ukwa kubelenga Baibolo? Yehova na kabili alipayanya bamagazini balingana ne nshita aba Ulupungu lwa kwa Kalinda na Loleni! ne mpapulo shimbi isha Baibolo ukupitila mu “musha wa cishinka kabili uwashilimuka.” (Mateo 24:45) Ukufibelengesha kuti kwatukosha lwa ku mupashi. Tufwile ukupaatulako inshita, “ukulubulako inshita” ya kubelenga kwa pa lwesu.—Abena Efese 5:16, NW.

 7. (a) Mulandu nshi tushilingile ukupelela fye pa kwishiba ifisambilisho fya Bwina Kristu ifya kutendekelako? (b) Ni shani ‘twingalola ku bukalamba’?

⁷ Pa kutwalililo kubutuko lubilo lwa busambi lwa Bwina Kristu, tufwile ukwishibilapo na fimbi ukucila fye pa “masambililo ya kutendeka” no “kulola ku bukalamba.” (AbaHebere 6:1) E ico tufwile ukulundulula ukufwaisha kwa kwishibo “bufumo no kulepa no kusansama no kushika” kwa cine no kulya “ifilyo ifyakosa [ifya] bakalamba.” (Abena Efese 3:18; AbaHebere 5:12-14) Ku ca kumwenako, tontonkanyeni pa bulondoloshi bune mu Malandwe ya kwa Mateo, Marko, Luka, na Yohane pa lwa bumi bwa kwa Yesu ilyo ali pe sonde. Ukupitila mu kubikako amano ukubelenga ubu bulondoloshi bwa Malandwe, kuti twaishibe fintu ifyo Yesu acitile no musango wa muntu ali no kwiluka fye amontontonkanyo yamulengele ukucite fyo fintu. E cingatulengo kuti ‘tube no mutima wa kwa Kristu.’—1 Abena Korinti 2:16.

 8. Ni shani fintu ukulongana kwa Bwina Kristu kutwaafwa ukushipikisha mu lubilo lwa ku bumi?

⁸ Paulo acincishe abasumina banankwe ati: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.” (AbaHebere 10:24, 25) Fintu ukulongana kwa Bwina Kristu kutukoselesha icine cine! Kabili fintu tukulililwa lintu tuli na bamunyina batutemwa ne nkashi abafwaisha ukutusakamana kabili abafwayo kuti tushipikishe ukufika ku mpela! Tufwile ukukatamika nga nshi uku kupayanya kwabamo ukutemwa ukwa kwa Yehova. Shi ‘natube abakalamba mu [kumfwikisha, NW]’ ukupitila mwi sambililo lya pa lwesu no kusangwa lyonse ku kulongana.—1 Abena Korinti 14:20.

Abatambako Abakulumba

9, 10. (a) Ni shani abaletambako bengakoselesha abalebutuko lubilo lwa kushipikisha? (b) Cinshi caba ‘ikumbi lya nte ilyakule fi ilyatushinguluka’ ilyalumbulwa pa AbaHebere 12:1?

⁹ Lelo te mulandu ne fyo uulebutuka aipekenye bwino, napamo kuti kwabako ifingacitika ilyo alebutuka ifingamulengo kupungaila. Umutumwa Paulo aipwishe ati: “Mwalebutuka bwino. Ni ani uwamuleseshe ukuumfwe cine?” (Abena Galatia 5:7) Abena Kristu ba ku Galatia bafwile balitendeke ukubishanya ne fibusa fyabipa, ne cafuminemo kupumbulwa mu lubilo lwa ku bumi. Lelo ukutungililwa no kukoseleshiwa ku bantu bambi kuti kwalengo kushipikisha ukubako eyefilya. Ici capalana na fintu abaletambako bacincimusha abali mu cangalo. Ibumba ililebatamba ilyacincimuka lilalenga abalecimfyanya ukucincimuka sana ica kuti balakoshiwa ukufuma fye pa kutendeka ukufika na pa kupwa. Ukulumba kwa baletambako, uko ilingi kusanshamo ukwimbe nyimbo sana no kutoota, kuti kwalenga abalecimfyanya ukucincimukilako uko bakabila ilyo baleya mu kupwisha. Cine cine, abaletambako no kulumba kuti balenga abalebutuka ukubutuka bwino.

¹⁰ Ni bani batamba Abena Kristu mu lubilo lwa ku bumi luntu baatendeka? Pa numa ya kulumbula inte sha kwa Yehova isha busumino isha pa ntanshi ya buKristu, ishalembwa mu cipandwa 11 mu AbaHebere, Paulo alembele ati: “E ico na ifwe, pa kuba abashingulukwa kwi kumbi lya nte ilyakule fi, . . . , tubutuke no [kushipikisha, NW] ulubilo ulwabikilwa ifwe.” (AbaHebere 12:1) Pa kubomfya ishiwi lya kupashanya ilye kumbi, Paulo tabomfeshe ishiwi lya ciGriki ililondolola ikumbi ilyo ubukulu bwaishibikwa bwino. Lelo ukulingana na kalemba wa madikishonari W. E. Vine, Paulo abomfeshe ishiwi “ilipilibula ikumbi ilikulu ilya kupa umulu ilyo bukulu bwa liko bushaishibikwa bwino.” Nacumfwika ukuti Paulo alelanda pe bumba ilikalamba ilya nte ishingi nga nshi ica kuti bali kwati likumbi ilikulu ilya kupa umulu.

11, 12. (a) Ni shani fintu inte sha busumino isha pa ntanshi ya buKristu shingaba kwati shiletucincisha ukubutuko lubilo no kushipisha? (b) Ni shani fintu twingamwenamo sana mwi ‘kumbi ilyakula ilya nte’?

¹¹ Bushe nte sha busumino isha pa ntanshi ya buKristu kuti shaba abakutambako ba cine cine ilelo? Awe iyo. Bonse balilaala mu mfwa kabili balelolela ukubuushiwa. Nangu cibe fyo, balipwishisho lubilo bwino ilyo bali abomi, kabili ifya kumwenako fyabo ficili mu Baibolo. Lintu tulesambilila Amalembo, aba bantu ba busumino balaba aba cine cine mu muntontonkanya wesu kabili kuti batulumba ukuti tubutuke ukufika ku mpela.—Abena Roma 15:4.a

¹² Ku ca kumwenako, lintu twatunkwa ku mashuko ya ku calo, ukutontonkanya pa fyo Mose akene ubusambashi bwa ku Egupti kuti kwatucincisha ukutwalililo kubutuko lubilo. Ngo bwesho tulepitamo napamo bwamoneko kuba ubwatapatisha, ukwibukisha ubwesho bwatapata Abrahamu apitilemo ilyo aebelwe ukupeelo mwana wakwe Isaki nge lambo kuti kwatukoseleshe cine cine ukukanatompoka mu bulwi bwa citetekelo. Icingapima ifyo ili ‘kumbi lyakula’ lya ishi nte lingatucincisha cikashintilila pa fyo tubamona bwino na menso yesu aya kumfwikisha.

13. Inte sha kwa Yehova isha muno nshiku shitucincisha shani mu lubilo lwa ku bumi?

¹³ Na kabili twalishingulukwa ne kumbi ilyakula ilya Nte sha kwa Yehova ishingi isha muno nshiku. Mwandi fya kumwenako fishaiwamina Abena Kristu basubwa e lyo na baume na banakashi abe “bumba likalamba” baimika! (Ukusokolola 7:9) Inshita shimo kuti twabelenga amalyashi yabo aya bumi muli uno magazini ne mpapulo shimbi isha Watch Tower.b Ilyo twatontonkanya pa citetekelo cabo, tulakoseleshiwa ukushipikisha ukufika ku mpela. Kabili fintu cawama ukutungililwa ku fibusa fyesu ifyapalamisha na balupwa besu abo na bo babombela Yehova mu busumino! Cine cine, twalikwata abengi abatucincisha mu lubilo lwa ku bumi.

Mano Mano Imikileni Umusenselo wa Lubilo

14, 15. (a) Mulandu nshi cacindamina ukuimikila umusenselo wa lubilo mano mano? (b) Mulandu nshi tufwile ukubela abakondenkana pa kwimika amabuyo?

¹⁴ Lintu kabutuka alebutuko lubilo lwa ntamfu iitali, tutile ulwa nakatango, afwile ukuimikila umwine umusenselo wa lubilo mano mano. Magazini wa New York Runner atila: “Ukubutukisha pa kwamba kuti kwamulenga fye ukufilwo kucimfya. Napamo icingafumamo kushomboke nshita ntali pa kupwisha amakilomita yasheleko nelyo ukulekelo lubilo pa nshila.” Kabutuka wa nakatango umo e bukisha ati: “Uwaletupanda amano mwi kalasi nasangilweko pa kupekanishisha ulubilo asokele ati: ‘Te kwesha ukufwayo kusanga balya babutukisha. Butukileni pa musenselo mwe bene mubutukilapo. Nga mwaesha ukubasanga mukanakapo fye kabili napamo mukalekelo lubilo pa nshila.’ Ukumfwila uku kupanda amano kwalingaafwile ukupwisho lubilo.”

¹⁵ Ababomfi ba kwa Lesa bafwile ukupilikita mu lubilo lwa ku bumi. (Luka 13:24) Lelo, umusambi Yakobo alembele ati: “Amano ayafuma mu muulu yena . . . [yalikondenkana, NW].” (Yakobo 3:17) Ilintu ica kumwenako ca bambi kuti catukoselesha ukubombesha, ukukondenkana kuti kwatwaafwa ukwimika amabuyo ayo twingafikapo ukulingana na maka yesu ne mibele. Amalembo yatucinkulako ukuti: “Umuntu onse alinge umulimo wakwe wine, e lyo akaba na pa kutakishisha ku mwine eka, na ku mubiye iyo. Pantu umuntu onse ali no kusende cipe cakwe umwine.”—Abena Galatia 6:4, 5.

16. Ubufuke butwaafwa shani ukuimikila umusenselo wa lubilo?

¹⁶ Tulepushiwa icipusho cakutulengo kutontonkanya pali Mika 6:8 icisosa ukuti: “Cinshi cimbi ico Yehova alefwaya kuli iwe, kano . . . ukwenda bufuke bufuke na Lesa obe?” Ubufuke busanshamo ukwishiba apapela amaka yesu. Bushe ukulwala nelyo ukukota kulatwansho kubomba apapela maka yesu mu mulimo wa kwa Lesa? Shi twifuupulwa. Yehova alapokelelo kubombesha kwesu no kuipusula ‘umo twakwatila, te umo tushakwatila.’—2 Abena Korinti 8:12; linganyeniko Luka 21:1-4.

Tonteni Amenso pa Cilambu

17, 18. Cinshi Yesu aletontonkanyapo icamwaafwile ukushipikisha pa cimuti ca kucushiwilwapo?

¹⁷ Lintu Paulo aleeba Abena Kristu ba ku Korinti pa bucindami bwa kushipikisha mu lubilo lwa ku bumi, alumbwile na cimbi ico balekabila ukupoosako amano icali mu Mangalo ya ku Isthmus. Paulo alembele ulwa balecimfyanya muli yalya mangalo ati: “Balya bena [babutuka] ukuti bapokelele icitebo ca mabuula icibonsa; lelo ifwe tucita ukuti tupokelele icishibonsa. E ico ine e fyo mbutuka, te pamo ngo ubutuke cibutukebutuke; ndelwe fyo, te pamo ngo uleumo mwela.” (1 Abena Korinti 9:25, 26) Icilambu ca wacimfya mu mangalo ya pa kale cali citebo, nelyo ingala ifyapangwa ku cimenwa ca pine nelyo ifimenwa fimbi, nelyo fye amabula baumika aya makaroti ya mu mpanga. Cine cine, “citebo ca mabuula icibonsa.” Lelo cinshi Abena Kristu abakashipikisha ukufika ku mpela bakapokelela?

¹⁸ Lintu Paulo alelanda ulwa kwa Yesu Kristu, uwaba ica Kumwenako cesu, alembele ati: “Pa mulandu wa kusekelela ukwabikilwe pa ntanshi yakwe, ashipikishe [cimuti ca kucushiwilwapo, NW], ukusuule nsoni, no kwikala ku kulyo kwa cipuna ca bufumu ca kwa Lesa.” (AbaHebere 12:2) Yesu alishipikishe mpaka ne mfwa ukupitila mu kutonta pa cilambu cali ku ntanshi lelo te pa cimuti ca kucushiwilwapo. Icilambu cisanshamo ukusekelela akwata pa kushishako ishina lya kwa Yehova, ukulubula abantunse ku mfwa, no kube Mfumu na Shimapepo Mukalamba lintu ali no kubwesesha abantunse bacumfwila ku bumi bwabulo kufwa muli paradise wa pe sonde.—Mateo 6:9, 10; 20:28; AbaHebere 7:23-26.

19. Finshi tufwile lyonse ukulatontonkanyapo lintu tuletwalilila ukubutuko lubilo lwa busambi bwa Bwina Kristu?

¹⁹ Tontonkanyeni pa kusekelela twakwata ilintu tulebutuko lubilo ulwa busambi bwa Bwina Kristu.Yehova alitupeelo mulimo wa nsansa nga nshi uwa kushimikile mbila nsuma ya Bufumu no kusambilisha abantu ukwishiba kwa Baibolo ukupususho bumi. (Mateo 28:19, 20) Fintu tuba ne nsansa lintu twasango muntu uufwaya ukwishiba Lesa wa cine no kumwaafwo kutendeko lubilo lwa ku bumi! Kabili te mulandu na fintu abantu tushimikila bankulako, lishuko ukubombako umulimo uushisha ishina lya kwa Yehova. Lintu twashipikisha mu butumikishi te mulandu ne mpatila ya bantu no kukaanya mu cifulo cesu ica kubombelamo, tulaba ne nsansa pa kulengo mutima wa kwa Yehova ukusamwa. (Amapinda 27:11) Kabili ubumi bwa muyayaya e cilambu ca kulisha ico atulaya. Fintu tukasekelela! Tufwile lyonse ukulatontonkanya pali aya mapaalo e lyo no kutwalililo kubutuka.

Ilintu Impela Ilepalama

20. Ni shani pambi fintu ulubilo lwa ku bumi lwingakoselako ilyo impela ilepalama?

²⁰ Ilyo tulebutuko lubilo lwa ku bumi, tufwile ukulwa no mulwani wesu umukalamba, Satana Kaseebanya. Lintu tulepalamina ku mpela, Satana taletuusha na kutusha mu kwesha ukutuwisha nelyo ukunasho musenselo wesu uwa lubilo. (Ukusokolola 12:12, 17) Kabili tacayanguka ukutwalilila nga bakabilisha ba Bufumu abaipeela ilyo kuli nkondo, ifipowe, ifikuko, na macushi yonse ayeshibisha “inshiku sha kulekelesha.” (Daniele 12:4; Mateo 24:3-14; Luka 21:11; 2 Timote 3:1-5) Ukulundapo, napamo inshita shimo impela kuti yamoneko kuba ukutali ukucila apo twaleyenekela, maka maka nga twatendeke ukubutuko lubilo imyaka iingi iyapitapo. Nalyo line, Icebo ca kwa Lesa citulaya ukuti impela ikesa. Yehova atila tayakashimbe iyo. Impela naipalama.—Habakuki 2:3; 2 Petro 3:9, 10.

21. Finshi fikatukosha lintu tuletwalilila ukubutuko lubilo lwa ku bumi? (b) Cinshi tufwile ukupampaminapo ilyo impela ileya ilepalama?

²¹ Kanshi pa kupwisho lubilo lwa ku bumi, tufwile ukufumya ubukose mu fintu Yehova mu kutemwa atupayanishisha nge fya kulya fya ku mupashi. Kabili tukabila ukukoseleshiwa icine cine pa kubishanya lyonse na basumina banensu, abo tubutuka na bo. Nangu ca kuti ukupakasa kwatapatisha nelyo ifya mankumanya fyabulo kwenekela fyalengo lubilo ukwafishako, kuti twashipikisho ukufika ku mpela pantu Yehova alatupeela “ukucishamo kwa maka.” (2 Abena Korinti 4:7) Fintu tukoseleshiwa pa kwishiba ukuti Yehova afwayo kuti tukapwishe ulubilo no kucimfya! Natupampamine mu kushangila pa ‘kubutuka no [kushipikisha, NW] ulubilo ulwabikilwa ifwe,’ no kucetekele icine cine ukuti “ku nshita iiyene tukalobolola, nga tatutompweke.”—AbaHebere 12:1; Abena Galatia 6:9.

[Amafutunoti]

Bushe Muleibukisha?

◻ Mulandu nshi tulingile ukushipikisha ukufika ku mpela?

◻ Kupayanya nshi ukwa kwa Yehova tushifwile ukulekelesha?

◻ Mulandu nshi cacindamina ukuimikila umusenselo wa lubilo mano mano?

◻ Kusekelela nshi twakwata ilintu tuletwalililo kubutuka?

[Icikope pe bula 18]

Lekeni ukulongana kwa Bwina Kristu kulemukoselesha