ISAMBILILO 28
Muletasha Yehova na Yesu pa fyo Bamucitila
Bushe mumfwa shani cibusa wenu nga amupeela ubupe ubusuma? Ukwabula no kutwishika mulomfwa bwino kabili mulafwaya ukulanga cibusa wenu ukuti mulatasha pa bupe amupeele. Yehova na Yesu balitupeela ubupe ubwacindama ubwacila pa bupe ubuli bonse ubo umuntu engatupeela. Bupe nshi ubu bwine, kabili kuti twalanga shani ukuti tulatasha pali ubu bupe?
1. Ni nshila nshi imo iyo twingalangilamo ukuti tulatasha Lesa na Kristu pa fyo batucitila?
Baibo itila “onse [uutetekela Yesu]” akekala umuyayaya. (Yohane 3:16) Kuti twalanga shani ukuti twalitetekela Yesu? Ifyo tusalapo ukucita e lyo ne fyo tucita filalanga nampo nga twalitetekela Yesu nelyo iyo. (Yakobo 2:17) Nga tulelanda no kucita ifilanga ukuti twalitetekela Yesu, bucibusa bwesu na Yesu e lyo na Wishi Yehova bukakoselako.—Belengeni Yohane 14:21.
2. Kulongana nshi ukwaibela ukulenga twalatasha Yehova na Yesu pa fyo batucitila?
Mu nshita ya bushiku ilyo Yesu ashilafwa, aebele abasambi bakwe inshila na imbi iyo bali no kutashishamo pa fyo apeele ubumi bwakwe nge lambo. Atendeke ukulongana ukwaibela uko Baibo ita ukuti “Umulaalilo wa kwa Shikulu,” kabili uku ukulongana bakwita no kuti Icibukisho ca mfwa ya kwa Kristu. (1 Abena Korinti 11:20) Ico Yesu atendekele uku kulongana, ni co alefwaya abatumwa bakwe na Bena Kristu bonse aba cine bakaleibukisha ukuti alifwile pa mulandu wesu. E ico abebele ukuti: “Mulecita ici pa kunjibukisha.” (Luka 22:19) Kanshi nga mwasangwa ku Cibukisho, ninshi mulelanga ukuti mulatasha Yehova na Yesu pa fyo batutemwa nga nshi.
SAMBILILENI NA FIMBI
Sambilileni na fimbi ifyo mwingacita pa kulanga ukuti mulatasha Yehova na Yesu pa fyo bamucitila. Kabili moneni ne co cacindamina ukusangwa ku Cibukisho ca mfwa ya kwa Kristu.
3. Finshi twingacita pa kulanga ukuti tulatasha?
Elenganyeni ukuti mwalenwena mu mumana e lyo umuntu amupususha. Bushe kuti mwalabako ku fyo uyu muntu amucitiile? Nelyo bushe kuti mwafwaya inshila ya kuti mumulangilemo ukuti mulatasha pa fyo amupuswishe?
Twalikwata ishuko lya kwisaikala umuyayaya pa mulandu wa cikuuku ca kwa Yehova. Belengeni 1 Yohane 4:8-10, lyena lanshanyeni aya mepusho:
Cinshi ilambo lya kwa Yesu lyabela bupe ubwacindama nga nshi?
Bushe mumfwa shani pa fyo Yehova na Yesu bamucitila?
Kuti twalanga shani ukuti tulatasha Yehova na Yesu pa fyo batucitila? Belengeni 2 Abena Korinti 5:15 na 1 Yohane 4:11; 5:3. Pa numa ya kubelenga ilembo limo na limo, lanshanyeni ici cipusho:
Ukulingana ne li lembo, finshi twingacita pa kulanga ukuti tulatasha?
4. Mulepashanya Yesu
Inshila na imbi iyo twingalangilamo ukuti tulatasha, kulapashanya Yesu. Belengeni 1 Petro 2:21, lyena lanshanyeni ici cipusho:
Finshi twingacita pa kulanga ukuti tulakonka sana mu ntampulo sha kwa Yesu?
Yesu alitemenwe Icebo ca kwa Lesa, alebila imbila nsuma, kabili aleafwa abantu
5. Mulesangwa ku Cibukisho ca mfwa ya kwa Kristu
Pa kuti mwishibe ifyacitike ilyo Yesu atendeke Umulaalilo wa kwa Shikulu, belengeni Luka 22:14, 19, 20. Lyena lanshanyeni aya mepusho:
Finshi fyacitike pa Mulaalilo wa kwa Shikulu?
Bushe umukate no mwangashi fimininako finshi? —Moneni icikomo 19 na 20.
Yesu alefwaya abasambi bakwe baleibukisha imfwa yakwe umuku umo mu mwaka pa bushiku afwile. E ico Inte sha kwa Yehova balakumana pamo cila mwaka mu kwibukisha imfwa ya kwa Kristu, kabili bacita filya fine fye alandile ukuti e fyo bafwile ukulacita. Pa kuti mwishibilepo na fimbi pali uku kulongana kwacindama, tambeni VIDIO. Lyena lanshanyeni icipusho cakonkapo.
Finshi ficitika pa Cibukisho?
Umukate no mwangashi fimpashanya fye. Umukate wimininako umubili wa kwa Yesu uwapwililika uo apeele nge cilubula pa kuti atulubule. Umwangashi wimininako umulopa wakwe
ABANTU BAMO BATILA: “Ico umuntu alingile fye ukucita pa kuti akapusuke, kusumina fye muli Yesu.”
Kuti mwabomfya shani ilembo lya kwa Yohane 3:16 na Yakobo 2:17 pa kulanga umuntu ukuti kwaliba na fimbi ifyo alingile ukucita pa kuti akapusuke?
IFYO MUSAMBILILE
Tulalanga ukuti tulatasha Yesu pa fyo atucitila nga twamutetekela, kabili nga tulesangwa ku Cibukisho ca mfwa yakwe.
Ukupitulukamo
Kuti mwalanga shani ukuti mwalitetekela Yesu?
Finshi mwingatemwa ukucita pa kulanga ukuti mulatasha Yehova na Yesu pa fyo bamucitila?
Mulandu nshi cacindamina ukulasangwa ku Cibukisho ca mfwa ya kwa Kristu?
ISHIBILENIPO NA FIMBI
Bushe imfwa ya kwa Kristu ilenga twalafwaisha ukucita finshi?
Sambilileni na fimbi pa citetekelo, e lyo ne fyo twingacita pa kulanga ukuti twaliba ne citetekelo.
“Bushe Mwalitetekela Amalayo ya kwa Yehova?” (Ulupungu lwa kwa Kalinda, October 2016)
Belengeni ilyashi ilitila “Nalisanguluka Kabili ndi Muntu,” pa kuti mumone ifyo ukusambilila pe lambo lya kwa Kristu kwalengele umwanakashi umo ukwaluka.
“Baibolo Ilaalula Abantu” (Ulupungu lwa kwa Kalinda, August 1, 2011)
Moneni umulandu abantu abalyako umukate no kunwako umwangashi pa Cibukisho babela fye abanono.