ISAMBILILO 19
Bushe Inte sha kwa Yehova Bena Kristu ba Cine?
Fwe Nte sha kwa Yehova twasumina ukuti tuli Bena Kristu ba cine. Cinshi twasuminina ukuti tuli Bena Kristu ba cine? Ni kwi tufumya ifyo twasuminamo? Mulandu nshi tuitila ukuti Inte sha kwa Yehova? Kabili finshi tucita ifilanga ukuti twalitemwana?
1. Bushe ifyo Inte sha kwa Yehova basuminamo fifuma kwi?
Yesu atile: “Icebo [ca kwa Lesa] e cine.” (Yohane 17:17) Nga filya fine cali kuli Yesu, ifyo Inte sha kwa Yehova basuminamo fifuma mu Cebo ca kwa Lesa. Kale Inte sha kwa Yehova balebeta ukuti Abasambi ba Baibo. Nalimo mu 1870, Abasambi ba Baibo balitendeke ukusambilila Baibo capamo pa kuti beshibe bwino bwino ifyo isambilisha. Ifyo balesanga ukuti e fyo Baibo isambilisha e fyo balesuminamo, nangu fipusane ne fyo amacalici yambi yasuminemo. Lyena balitendeke ukwebako abantu icine ca mu Baibo ico basambilile.a
2. Cinshi tuitila ukuti Inte sha kwa Yehova?
Yehova eta abamupepa ukuti Inte shakwe, pantu balalanda icine pali ena. (AbaHebere 11:4–12:1) Ku ca kumwenako, mu nshita ya ku kale Lesa aebele abantu bakwe ukuti: “Muli nte shandi.” (Belengeni Esaya 43:10.) Yesu bamwita ukuti “Inte ya Cishinka.” (Ukusokolola 1:5) E ico mu 1931 twatendeke ukuita ukuti Inte sha kwa Yehova. Twalitemwa ukwitwa ukuti Inte sha kwa Yehova.
3. Bushe Inte sha kwa Yehova balanga shani ukutemwa nga filya Yesu alecita?
Yesu alitemenwe sana abasambi bakwe ica kuti alebamona fye nga balupwa. (Belengeni Marko 3:35.) Ne Nte sha kwa Yehova nabo, lupwa ulwa mwi sonde lyonse kabili balikatana. E mulandu wine baitila ukuti ni bamunyina ne nkashi. (Filemone 1, 2) Balomfwila ne funde ilitila: “Muletemwa aba bwananyina bonse.” (1 Petro 2:17) Inte sha kwa Yehova balalanga ukuti balitemwana mu nshila ishalekanalekana. Ku ca kumwenako, balafwa bamunyinabo na bankashi mwi sonde lyonse abali na mafya.
SAMBILILENI NA FIMBI
Sambilileni na fimbi pa lyashi lya Nte sha kwa Yehova, kabili mumone na fimbi ifilanga ukutila tuli Bena Kristu ba cine.
Ifyo Abena Kristu ba cine basuminamo fifuma mu Baibo kabili balebako abantu bambi ifyo basuminamo
4. Ifyo twasuminamo fifuma mu Baibolo
Yehova alisobele ukuti tukalaya tuleishiba icine ca mu Baibo panono panono. Belengeni Daniele 12:4, lyena lanshanyeni ici cipusho:
Finshi fyali no kucitika abantu ba kwa Lesa nga batwalilila ukusambilila Baibo?
Moneni ifyo abasambi ba Baibo, ukubikako na ba Charles Russell, balecita pa kusambilila Icebo ca kwa Lesa. Tambeni VIDIO, lyena lanshanyeni icipusho cakonkapo.
Ukulingana ne fyo twatamba muli vidio, bushe ba Charles Russell na Basambi ba Baibo bambi balecita shani pa kusambilila Baibo?
Bushe mwalishiba ici cishinka?
Inshita shimo tulaalulako fimo ifyo twasuminamo. Cinshi twalwila? Nga filya fine akasuba ka lucelo kaya kalebalika ica kuti twatendeka no kumona fyonse ifili mu lubansa, e fyo na Yehova acita. Panono panono alalenga twaya tuleumfwikisha ifyaba mu Cebo cakwe Baibo. (Belengeni Amapinda 4:18.) Baibo tayaluka. Nomba nga twaumfwikisha ifyabamo, tulaalulako fimo ifyo twasuminamo.
5. Tulacita ifintu ukulingana ne shina lyesu
Mulandu nshi twasaliile ukulaitwa ati Inte sha kwa Yehova? Tambeni VIDIO, lyena lanshanyeni icipusho cakonkapo.
Cinshi twingalandila ukuti calilinga ifi tuita ukuti Inte sha kwa Yehova?
Mulandu nshi Yehova asalila abantu ukuba Inte shakwe? Ni pa kuti balelenga caishibikwa ukuti e Lesa wa cine, pantu kwaliba abamubepesha ubufi ubwingi. Natulandeko pa bufi bubili.
Imipepele imo isambilisha abantu babo ukuti Lesa afwaya balebomfya utulubi pa kumupepa. Nomba moneni ifyo Baibo isambilisha. Belengeni Ubwina Lebi 26:1, lyena lanshanyeni aya mepusho:
Ukulingana ne lembo, bushe ifi basambilisha fya cine? Bushe Yehova omfwa shani abantu nga balebomfya ifilubi pa kumupepa?
Intungulushi sha mapepo shisambilisha ukuti Yesu e Lesa. Nomba moneni ifyo Baibo isambilisha. Belengeni Yohane 20:17, lyena lanshanyeni aya mepusho:
Ukulingana ne lembo, bushe ifi intungulushi sha mapepo shisambilisha fya cine? Bushe Yesu na Lesa muntu umo wine?
Bushe mwaumfwa shani ifi mwaishiba ukuti Yehova alituma Inte shakwe ukusambilisha abantu icine pali ena na pa Mwana wakwe?
6. Twalitemwana
Baibo ilinganya Abena Kristu kuli filya umubili waba. Belengeni 1 Abena Korinti 12:25, 26, lyena lanshanyeni aya mepusho:
Bushe Abena Kristu ba cine bafwile ukucita shani nga ca kuti Abena Kristu banabo balecula?
Finshi mwamona ifilanga ukuti Inte sha kwa Yehova balitemwana?
Nga ca kuti ba Nte mu fyalo fimo baponenwa no busanso, ba Nte banabo mwi sonde lyonse balabafwilisha ilyo line fye. Pa kuti mumone ifyo bacita, tambeni VIDIO. Lyena lanshanyeni icipusho cakonkapo.
Bushe ifi ba Nte bafwilisha ba Nte banabo abaponenwa na masanso filanga shani ifyo batemwana?
Abena Kristu ba cine balafwilishako abalekabila ubwafwilisho
ABANTU BAMO BATILA: “Icilonganino ca Nte sha kwa Yehova te ca kale, ca nomba line fye.”
Ni lilali Yehova atendeke ukwita bakapepa bakwe ukuti inte shakwe?
IFYO MUSAMBILILE
Inte sha kwa Yehova Bena Kristu ba cine. Tuli lupwa ulwa mwi sonde lyonse. Ifyo twasuminamo fifuma mu Baibo, kabili tulalenga icine caishibikwa pali Yehova.
Ukupitulukamo
Mulandu nshi twasalile ukulaitwa ukuti Inte sha kwa Yehova?
Bushe tulanga shani ukuti twalitemwana?
Bushe mulemona ukuti Inte sha kwa Yehova Bena Kristu ba cine?
ISHIBILENIPO NA FIMBI
Ishibilenipo na fimbi pe lyashi lya Nte sha kwa Yehova.
Inte Sha kwa Yehova—Ifilanga Ukuti ba Citetekelo, Ulubali 1: Ukufuma mu Mfifi (1:00:53)
Moneni ifyo Inte sha kwa Yehova bacitile pa kulenga ifisambilisho fya bufi fishibikwe.
Moneni amasuko ku mepusho yamo ayo nalimo mwakwata pa Nte sha kwa Yehova.
“Amepusho Abantu Bepusha Sana pa Nte sha kwa Yehova” (Icipande ca pa jw.org)
Ba Stephen balipatile abantu abo bapusene nabo inkanda ica kuti balebasansa no kubasansa. Belengeni pa kuti mumone icalengele baaluke pa numa ya kumona ifyo Inte sha kwa Yehova baba.
“Imibele Yandi Yalebipilako Fye” (Ulupungu lwa kwa Kalinda, July 1, 2015)
a Ukutula mu 1879, Inte sha kwa Yehova balasabankanya magazini ya Ulupungu lwa kwa Kalinda iilondolola ifyo Baibo isambilisha.