Ifipusho Ukufuma ku Babelenga

Bushe ukubatishiwa pa mulandu wa bafwa e cinshi?

Ilyo umutumwa Paulo alembele pa kubuukila ku muulu, alembele ifintu fimo ifyo mwingafwaisha sana ukwishiba bwino umo aloseshe. Mu Baibolo wa Cibemba uwa mu 1956, tubelenga ati: “Ninshi bakacita shani ababatishiwa pa mulandu wa bafwa? Abafwa nga tababuushiwa nakalya, nga cinshi abalole babatishiwilwa pa mulandu wabo?” Kabili Baibolo ya Diocese of Mbala itila: ‘Ala umulandu uyu nga te wa cine cine, cinshi basubilo kumwenamo pa kupokela abanabo abafwa ulubatisho. Abafwa nga tabakashukuke icine cine, ico bapokela abafwa ulubatisho cinshi?’—1 Abena Korinti 15:29.

Bushe Paulo pano aletubulula ukuti aba mweo bafwile ukubatishiwilwa abaafwile ukwabula ukubatishiwa? E fyo cingamoneka ukufuma kuli ifi na ku fyo amaBaibolo yambi yalanda. Lelo, nga ca kuti twalolekesha sana mu Malembo na mu ciGriki icabomfeshe Paulo kuti twasanga ifipuseneko. Paulo aloseshe mu kuti Abena Kristu basubwa balabatishiwa, nelyo ukwingila, mu bumi ubutungulula ku mfwa ya bumpomfu nga ilya Kristu afwile. Pa numa, bakabuushiwa ku bumi bwa ku mupashi nga filya cali kuli Kristu.

Amalembo yashininkisha ubu bulondoloshi. Muli kalata iyo alembeele abena Roma, Paulo atile: “Bushe tamwaishiba ukuti ifwe bonse fwe babatishiwe muli Kristu Yesu twabatishiwe mu mfwa yakwe?” (Abena Roma 6:3) Muli kalata alembeele abena Filipi, Paulo alandile pa mwine ati: “[Nalikumako] ku fya kucula [fya kwa Kristu], ukuinashisha ne mwine ku mfwa iyapalana ne yakwe, ku kumona nga kuti nafika ku kubuuka kwa ku bafwa ukwa mu kubangilila.” (Abena Filipi 3:10, 11) Paulo alebalangilila icishinka ca kuti ubumi bwa bakonshi ba kwa Kristu abasubwa, bumi bwa kusunga bumpomfu ilyo kwaba amesho, cila bushiku ukulolenkana ne mfwa, na kwi pele pele ukufwa na bumpomfu, e lyo no kubuukila ku muulu.

Icili icacindama ca kuti aya malembo na malembo yambi ayalanda pa mfwa na bantu babatishiwa pamo mu kulungatika yalosha ku bantu abomi ababatishiwa kale kabili te ku bantu bafwa. Kabili Paulo aebele Abena Kristu banankwe abasubwa ati: “Mwashiikilwe pamo nankwe mu lubatisho lwakwe, kabili muli wene mwabuushiwe pamo na wene mu citetekelo cenu ku kubomba kwa kwa Lesa, uwabuushishe wene ku bafwa.”—Abena Kolose 2:12.

Ishiwi lya ciGriki ilya hy·perʹ, ilyapilibulwa ati “pa mulandu wa” nelyo “ukupokela,” pali 1 Abena Korinti 15:29 mu maBaibolo ayapusanapusana, kuti na kabili lyapilibulwa ati “pa mulandu wa kuba.” Ukumfwana na malembo yambi mu Baibolo, Amalembo ya Calo Cipya aya ciGriki aya Bwina Kristu yalilungika pa kupilibula ili lembo ati: “Ninshi bakacita shani abalebatishiwa pa mulandu wa kuba abafwa? Abafwa nga tabakabuushiwe nakalya, nga cinshi balebatishiwilwa ku bufwayo bwa kuba ifyo fine?”