Ukwikalila Ubwa Lelo Nelyo Kuli Pe na Pe?

“Ni ku kulolela uku e ko twapusukile.”—ABENA ROMA 8:24.

 1. Cinshi cintu abena Epikuri balesambilisha, kabili ni shani fintu amano ya buntunse aya musango yo yaambukile Abena Kristu bamo?

UMUTUMWA Paulo alembeele Abena Kristu baleikala mu Korinti ukuti: “Bushe bamo ba muli imwe batila shani ukuti ukwima kwa bafwa takuli?” (1 Abena Korinti 15:12) Cilemoneka kwati, amano ya buntunse ayashaibipila aya muGriki wa mano Epikuri yalipekele no kwingila mu Bena Kristu ba mu mwanda wa myaka uwa kubalilapo. Muli fyo Paulo alandile pa cisambilisho ca kwa Epikuri ica kuti: “Tulye no kunwa, pantu mailo tukafwa.” (1 Abena Korinti 15:32) Ukukaana isubilo ilili lyonse ilya kuti umuntu nga afwa kuti aisabuuka, abakonshi ba kwa Epikuri basumine ukuti ukuilemena ifya ku mubili e cali icacindamisha mu bumi. (Imilimo 17:18, 32) Amano ya kwa Epikuri yali ya bukaitemwe, aya kaso, na kwi pelepele aya museebanya.

 2. (a) Mulandu nshi cabelele ica busanso nga nshi ukukaana ukwima ku bafwa? (b) Ni shani fintu Paulo akoseshe icitetekelo ca Bena Kristu ba ku Korinti?

² Uku kukaana ukwima ku bafwa kwasanshishemo ifingi. Paulo atile: “Lelo ukwima kwa bafwa nga takuli, nangu ni Kristu tabuushiwe; lelo Kristu nga tabuushiwe, ninshi imbila yesu ya fye, ne citetekelo cenu ca fye. . . . Iye, nga mu bwikashi buno fwe bali muli Kristu twakwate cilolelo fye, awe tuli ba nkumbabulili ukucila abantu bonse.” (1 Abena Korinti 15:13-19) Ee, ukwabula icilolelo ca kwikala kuli pe na pe, ubuKristu kuti bwaba ‘bwa fye.’ Kuti bwabulwa imifwaile. E mulandu wine, kanshi, ukuti pa kwambukilwa no ku kutontonkanya kwa cisenshi, icilonganino ca ku Korinti caliswilemo amafya. (1 Abena Korinti 1:11; 5:1; 6:1; 11:20-22) E ico, Paulo aalefwaisha ukukosha icitetekelo cabo mu kubuuka. Ukupitila mu kupelulula kwine kwine, ukwambula Amalembo, no kubomfye filangililo, alishinine ukwabula ukushako ukuti isubilo lya kwima ku bafwa talyali lya kwelenganya fye lelo lya cine cine ilili no kufikilishiwa. Pali uyu wine mulandu, acincishe abasumina banankwe ukuti: “Beni abashangila, abashitelententa; ukupikintika pe mu mulimo wa kwa Shikulu, pa kwishibo kuti ukucucutika kwenu te kwa fye muli Shikulu.”—1 Abena Korinti 15:20-58.

“Loleni”

3, 4. (a) Ukulingana na Petro, kutontonkanya nshi ukwa busanso kwali no kwambukila bamo mu nshiku sha kulekelesha? (b) Tulekabila ukutwalilila ukuicinkulako ulwa cinshi?

³ Pali lelo, abengi batontonkanya fye pa kuti buno bwine e bumi bweka ubwabako. (Abena Efese 2:2) Cili nga fintu umutumwa Petro asobele. Alandile ulwa “bakapumya ne fya kupumya fyabo . . . [abatila], Kuli kwi ukulaya kwa kwisa kwakwe? Pantu ukufuma pa bushiku ubo ifikolwe fyaponene mu tulo, ifintu fyonse fyaikalilila filya fyali ukutula pa citendekelo ca kulenga.” (2 Petro 3:3, 4) Nga ca kuti bakapepa ba cine batendeka ukutontonkanya muli iyo nshila, kuti baleka ukuba “abapilikita, kabili abatwale fisabo.” (2 Petro 1:8) Ku ca buseko, te fintu abantu ba kwa Lesa abengi aba pali lelo baba.

⁴ Tacalubana ukufwaisha ukwishiba pa lwa mpela ileisa iya buno bwikashi bwabipa. Ibukisheni ifyo abatumwa bene aba kwa Yesu balefwaisha ukwishiba lintu batile: “Mwe Shikulu, bushe ni mu nshita ino ine mulebwesesho bufumu kuli Israele?” Yesu ayaswike ukuti: “Te cenu ukwishibe nshita nangu myaka ifyo Tata abikile mu maka yakwe.” (Imilimo 1:6, 7) Ayo mashiwi tayapusene na yantu asosele pa Lupili lwa Miolife aya kuti: “Tamwaishibo bushiku Shikulwinwe akesamo. . . . Umwana wa muntu akesa mu kashita mushikashile.” (Mateo 24:42, 44) Tulekabila ukutwalilila ukulaicinkulako fwe bene pa lwa uko kufunda! Bamo kuti pambi batunkwa ukutontonkanya ukuti, ‘Napamo mbale nasheko panono no kukanaibikilishako sana.’ Mwandi ico kuti caba cilubo! Langulukeni Yakobo na Yohane, “Abana ba kubuluma kwa mfula.”—Marko 3:17.

5, 6. Masambililo nshi twingasambililako ku fya kumwenako fya kwa Yakobo na Yohane?

⁵ Twalishibo kuti Yakobo aali mutumwa wapimpa nga nshi. (Luka 9:51-55) Lintu icilonganino ca Bwina Kristu caimikwe, afwile alibombeleko umulimo ukalamba. Lelo lintu Yakobo aali acili fye umwaice, Herode Agripa 1 alimwipeye. (Imilimo 12:1-3) Bushe kuti twatila, ilyo Yakobo amwene ukuti alaipaiwa mu kupumikisha, aliyumfwilile ubulanda ukuti kanshi nga tali uwapimpa nga nshi, ukupilikita muli bukapyunga bwakwe? Awe iyo! Mu kushininkisha aali uwa nsansa ukuti alibomfeshe imyaka yakwe iyawamisha iya bumi ubwali fye ubwipi nga nshi ukubombela Yehova. Pali nomba, takuli nangu umo pali ifwe uwingeshiba nampo nga kuti twafwa ilili lyonse. (Lukala Milandu 9:11; linganyeniko Luka 12:20, 21.) E co mu kushininkisha cili bwino ukutwalilila ukuba abapimpa kabili abacincila pa kubombela Yehova. Muli iyo nshila tuli no kusungilile shina lisuma na wene no kutwalilila ukulolela inshita lintu tukekala kuli pe na pe.—Lukala Milandu 7:1.

⁶ Kuli isambililo lyapalako ku mutumwa Yohane, uwaliko lintu Yesu akonkomeshe ukuti, “Loleni.” (Mateo 25:13; Marko 13:37; Luka 21:34-36) Yohane alamine ayo mashiwi, ukubomba mu kupimpa pa myaka amakumi ayengi. Na kuba, cimoneka kwati e washelepo fye eka pa batumwa bambi bonse. Lintu Yohane apilulwile myaka, no kupituluka mu fyo abombele mu busumino, bushe amwene imibombele yakwe ukuti yali ni mpuso, alilubile nelyo ukuti taishibe ico alecita? Awe, iyo! Atwalilile ukufwaisha ifya ku ntanshi. Lintu Yesu wabuushiwa asosele ati, “Cine cine ndeisa bwangu,” ilyo line fye Yohane ayaswike ati, “Amene: iseni, mwe Shikulu Yesu.” (Ukusokolola 22:20) Mu cine cine Yohane taleikalila ubwa lelo, ukufwaisha imikalile ya kucibondola no kukanaibikilishako. Apampamine pa kutwalilila ukubomba ubumi bwakwe bonse no bukose, te mulandu na lintu Shikulu aali no kwisa. Ni shani pa lwa ifwe?

Apashimpwa Ukusumina mu Bumi bwa Muyayaya

 7. (a) Ni mu nshila nshi ukucetekelo mweo wa muyayaya ‘kwalaiwe ilyo shishilabako inshita sha muyayaya’? (b) Finshi Yesu alandileko pa lwa kucetekelo mweo wa muyayaya?

⁷ Beni abashininwa ukuti isubilo lya bumi bwa muyayaya te lya kwelenganya fye ku muntu iyo. Nga fintu Tito 1:2 asosa, ukuipeelesha kwesu ukwa bukapepa kwashimpwa pa “kucetekelo mweo wa muyayaya untu Lesa, uushibepa, alaile ilyo shishilabako inshita sha muyayaya.” Imifwaile ya kwa Lesa iya kutendekelako yali ya kuti abantunse bonse aba cumfwila bakekale kuli pe na pe. (Ukutendeka 1:28) Tapali icili conse icingapumfyanya iyi mifwaile, nangu fye kupondoka kwa kwa Adamu na Efa. Nga fintu calembwa pa Ukutendeka 3:15, bwangu bwangu Lesa alaile “ubufyashi” ubwali no kufumyapo ifyabipa fyonse ifyaponena abantunse. Lintu ubu “bufyashi” nelyo Mesia, Yesu, aishile, pa fyo asambilishe sana pali ne subilo lya mweo wa muyayaya. (Yohane 3:16; 6:47, 51; 10:28; 17:3) Ukupitila mu kupeela ubumi bwakwe ubwapwililika nge cilubula, Kristu alipokele insambu ukulingana ne funde isha kupeela abantunse umweo wa muyayaya. (Mateo 20:28) Abasambi bakwe bamo, ababa bonse pamo 144,000, bakekala kuli pe na pe mu myulu. (Ukusokolola 14:1-4) Kanshi abantunse bamo abo pa nshita imo baali abena kufwa bali no “kufwalo kukanafwa”!—1 Abena Korinti 15:53.

 8. (a) “Ukukanafwa” cinshi, kabili mulandu nshi Yehova apeelela ba 144,000 iyi mibele? (b) Lisubilo nshi lintu Yesu apeele “impaanga shimbi”?

⁸ “Ukukanafwa” kusanshamo “amaka ya mweo uushingonaika.” (AbaHebere 7:16; linganyeniko Ukusokolola 20:6.) Nangu ni fyo, cinshi cintu Lesa apwishishisha ukupitila mu kupeela ica bupe cawamisha muli uyo musango? Ibukisheni ukusonsomba kwa kwa Satana ukwa kuti ifibumbwa fya kwa Lesa fyonse te kuti ficetekelwe. (Yobo 1:9-11; 2:4, 5) Ukupitila mu kulenga ba 144,000 ukukanafwa, Lesa alalangilila ukuti alicetekela umupwilapo ili bumba ilyayasuka ukusonsomba kwa kwa Satana mu nshila yaibela nga nshi. Lelo ni shani pa lwa bantunse bambi? Yesu aebele ababalilepo ukuba muli uyu “mukuni unono” uwa mpyani sha Bufumu ukuti baali no “kwikala pa fipuna fya bufumu ukupingule mikowa ikumi na ibili ya kwa Israele.” (Luka 12:32; 22:30) Ici cilelangilila ukuti bambi bali no kupokelela umweo wa muyayaya pamo nga abatekwa ba Bufumu bwakwe. Ilintu ishi “mpaanga shimbi” tabapeelwa ukukanafwa, balapokelelo “mweo wa muyayaya.” (Yohane 10:16; Mateo 25:46) E co kanshi umweo wa muyayaya e subilo lya Bena Kristu bonse. Tacili ca kwelenganya fye lelo caba cintu “Lesa, uushibepa” umwine wine alaile, no kulipililapo umulopa waumo mutengo uwa kwa Yesu.—Tito 1:2.

Bushe Ici Cili no Kucitika ku Ntanshi Sana?

 9, 10. Finshi filelangilila mu kumonekesha nga nshi ukuti tuli mupepi na ku mpela?

⁹ Umutumwa Paulo asobele ukuti “inshita ishayafya” shali no kulangilila ukuti ukwabula no kutwishika tuli mu “nshiku sha kulekelesha.” Ilyo abantunse batushinguluka balefika mu kuba ababulwa ukutemwa, abafunushi, abaitemwa, kabili abashipepa, bushe tatulemona ukuti ubushiku bwa kwa Yehova ubwa kupingula cino calo cibifi bulepalamina nga nshi? Ilyo ulukaakala no lupato fileanana, bushe tatulemona konse konse ukufikilishiwa kwa mashiwi yalundwapo aya kwa Paulo aya kuti: “Abantu babifi kabili abafutika bakalundulukila ku kubipo kucila”? (2 Timote 3:1-5, 13) Bamo kuti mu kuishininkisha bapunda abati “Mutende,” lelo amasubilo yonse aya mutende yali no kupwa, pantu “uboni ubwa kupumikisha [bukabemina], filya fine ubucushi bwa kupaapa bwisa pa mwanakashi uuli ne fumo; kabili takwakabe ukupusuka nakalya.” Tatwashala fye ukwabula ukwishiba ubupilibulo bwa filecitika. E co, “tulole kabili tutekanye.”—1 Abena Tesalonika 5:1-6.

¹⁰ Ukulundapo, Baibolo ilangililo kuti inshiku sha kulekelesha shili no kuba “inshita inono fye.” (Ukusokolola 12:12; linganyeniko 17:10.) Cilemoneka kwati inshita ikalamba iya iyo “nshita inono fye” yalipita. Ku ca kumwenako, ubusesemo bwa kwa Daniele bulalondolola bwino bwino ubulwi pa kati ka “mfumu ya ku kapinda ka ku kuso” ne “mfumu ya ku kapinda ka ku kulyo” ubwafika fye na muli uno mwanda wa myaka. (Daniele 11:5, 6) Icisheleko fye ukufikilishiwa cili kusansa kwa kupelako ukwa “mfumu ya ku kapinda ka ku kuso,” ukwalondololwa pali Daniele 11:44, 45.—Moneni Ulupungu lwa kwa Kalinda ulwa July 1, 1987, no lwa November 1, 1993, e mo muli no kusanga ifyebo fyalelanda pali ubu busesemo.

11. (a) Bushe Mateo 24:14 afikilishiwa ukufika ku cipimo nshi? (b) Cinshi cintu amashiwi ya kwa Yesu ayalembwa pali Mateo 10:23 yalangilila?

¹¹ Na kabili Yesu alisobele ukuti “imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Ilelo, Inte sha kwa Yehova balebomba umulimo wabo mu fyalo, ifishi, ne fifulo 233 fyonse pamo. Ca cine, kucili kuli ififulo ifishilati fibombelwemo, kabili pambi mu nshita yalingwa iya kwa Yehova, umwinshi wa kushimikilamo uli no kwisulwa. (1 Abena Korinti 16:9) Nalyo line, amashiwi ya kwa Yesu ayalembwa pali Mateo 10:23 yalatulenga ukukutumana no kulanguluka. Patila: “Mukaba mucili tamulakumana imishi yonse ya kwa Israele, ilyo Umwana wa muntu akesa.” Ilintu imbila nsuma mu kushininkisha ili no kubilwa mwi sonde lyonse, tacilepilibula ukuti tuli no kufika ku mbali shonse ishe sonde no bukombe bwa Bufumu ilyo Yesu ‘ashilaisa’ ku Kupingula.

12. (a) ‘Kukakatikwa’ nshi kwaloshiwako pa Ukusokolola 7:3? (b) Cinshi cintu impendwa ilecepelako iya basubwa pe sonde ilepilibula?

¹² Langulukeni ilembo lya pa Ukusokolola 7:1, 3, ilisoso kuti “imyela ine” iya bonaushi yalikatwa ‘ukusuka tukakatike abasha ba kwa Lesa wesu pa mpumi shabo.’ Ici tacilelosha ku kukakatika kwa kubalilapo, ukucitikako lintu ba 144,000 basalwa ukuya ku muulu. (Abena Efese 1:13) Cilosha ku kukakatika kwa kupelako, lintu mu kukanatwishika baishibikwa nga “basha ba kwa Lesa wesu” abaeshiwa kabili aba busumino. Impendwa ya bana baume ba kwa Lesa aba cine cine abacili aba mweo pe sonde naicepa nga nshi. Ukulundapo, Baibolo ilalondolola bwino bwino ukuti ni “pa mulandu wa basalwa” iciputulwa ca kwiswila ica bucushi bukalamba ‘cikepifiwilwa.’ (Mateo 24:21, 22) Ubwingi bwa baitunga ukuba abasubwa nabakota sana. Bushe ici na co tacilelangilila ukuti impela naipalama nga nshi?

Kacefya wa Busumino

13, 14. Cishingamo nshi ice bumba lya kwa kacefya?

¹³ Pali ino nshita, kuti twacita bwino ukumfwila ifiletungulula “umusha wa cishinka.” (Mateo 24:45) Pa myaka ukucila pali 100, “umusha” wa muno nshiku alibomba ngo “wa kucefya” uwa busumino. (Esekiele 3:17-21) Ulupungu lwa kwa Kalinda ulwa May 15, 1984, lwalondolwele ukuti: “Uyu kacefya alamona uko ifilecitika pe sonde filefikilisha amasesemo ya Baibolo, alasoka ulwa ‘bucushi bukalamba ubushatala abubako ukutula pa kutendeka kwa pano isonde’ ubulepalamina kabili alabile ‘mbila nsuma.’”—Mateo 24:21; Esaya 52:7.

¹⁴ Ibukisheni: Waba mulimo wa kwa kacefya ukusosa “ico amona.” (Esaya 21:6-8) Bakacefya balembwa mu Baibolo balesoka nangu fye cingati icilemoneka ngo busanso cali cicili ukutali ukwa kuti tacilamonwa na bwino bwino. (2 Ishamfumu 9:17, 18) Mu kushininkisha pali ilya nshita kwalebako no kusoka kwa bufi. Lelo kacefya musuma taleshimba ukusoka pa mulandu wa kutiina ukuseebana. Nga ca kuti ing’anda yenu ilepya, kuti mwayumfwa shani nga ca kuti aba kushimyo mulilo bakaana ukwisa pa mulandu wa kuti baletontonkanye fyo pambi ukusoka kwa bufi fye? Kwena, twenekela abo bantu ukwankulako bwangu ku cishibisho icili conse ica busanso! Mu kupalako, ibumba lya kwa kacefya lyalisoka lintu imibele yalangilila ukuti cili icalinga ukucite fyo.

15, 16. (a) Mulandu nshi kubelako kuteuluka mu nshila tumfwilamo amasesemo? (b) Cinshi cintu twingasambililako ku babomfi ba busumino aba kwa Lesa abaumfwilile amasesemo yamo mu nshila yalubana?

¹⁵ Nangu ni fyo, ilyo ifintu filecitika, tulomfwikisha bwino bwino amasesemo. Ukupita kwa nshita kwalangilila ukuti ni limo limo fye, nga kwingabako ne yo nshita, e lintu amasesemo ya bulesa yomfwikwa ilyo yashilafikilishiwa. Lesa aebele Abramu mu kulungatika lintu ubufyashi bwakwe bwali no ‘kulebela mu calo icishili ca buko,’ e kutila, imyaka 400. (Ukutendeka 15:13) Nangu cibe fyo, Mose alisupile ukufwaya ukulubula balya bantu.—Imilimo 7:23-30.

¹⁶ Na kabili langulukeni amasesemo ya buMesia. Nga twapitulukamo sana cilamonekesha ukuti imfwa ya kwa Mesia no kubuushiwa kwakwe fyalisobelwe. (Esaya 53:8-10) Lelo, abasambi bene aba kwa Yesu balifililwe ukumfwikisha ici cishinka. (Mateo 16:21-23) Tabaumfwikishe ukuti Daniele 7:13, 14 aali no kufikilishiwa muli pa·rou·siʹa nelyo “ukubapo” kwa kwa Kristu, ukwa ku ntanshi. (Mateo 24:3, NW) E co mu matontonkanyo yabo balitangilile imyaka mupepi na 2,000 lintu baipwishe Yesu ukuti: “Mwe Shikulu, bushe ni mu nshita ino ine mulebwesesho bufumu kuli Israele?” (Imilimo 1:6) Nangu lintu icilonganino ca Bwina Kristu cibe nacimikwa, imfundo shabamo ifilubo no kwenekela kwa bufi fyatwalilile ukulamoneka. (2 Abena Tesalonika 2:1, 2) Nangu cingati mu nshita mu nshita bamo balemona ifintu mu kuluba, ukwabulo kutwishika Yehova alipaalile umulimo wa balya basumina ba mu mwanda wa myaka uwa kubalilapo!

17. Ni shani fintu tulingile ukumona ukumfwikisha kwateululwa ukwa Malembo?

¹⁷ Ibumba lya kwa kacefya wa muno nshiku nalyo line lyaliteulula amatontonkanyo ya liko mu nshita mu nshita. Lelo bushe uuli onse kuti atwishika nampo nga Yehova alipaala “umusha wa cishinka”? Pa mbali ya ico, nga twatontonkanyapo sana, bushe tali ubwingi bwa kuteuluka ukwabako kunono nga nshi? Ukumfwikisha kwesu ukwa kutendekelako pa lwa Baibolo takwaaluka. Pali nomba tuli abashininwa nga nshi ukuti tuleikala mu nshiku sha kulekelesha ukucila ifyo twabala atushininwapo!

Ukwikalila Kuli Pe na Pe

18. Mulandu nshi tulingile ukusengaukila ukwikalila fye ubwa lelo?

¹⁸ Aba pano isonde kuti batila, ‘Tulye no kunwa, pantu mailo tukafwa,’ lelo ifwe te fyo tufwile ukutontonkanya. Mulandu nshi wa kutukutile busha pa mulandu wa musamwe mwingaipakisha pali nomba ilintu kuti mwabombela fye ne nshita ya ku ntanshi iya ciyayaya? Ilyo isubilo, nampo nga lya bumi bwa kukanafwa mu muulu nelyo umweo wa muyayaya pe sonde, te lya kwelenganya fye iyo. Calilaiwa mu cine cine kuli Lesa “uushibepa.” (Tito 1:2) Kuliko ubushininkisho ubwingi ubwa kuti ukufikilishiwa kwe subilo lyesu nakupalamisha nga nshi! “Naipipe nshita iyashalako.”—1 Abena Korinti 7:29.

19, 20. (a) Ni shani fintu Yehova amona ukuipusula uko twaipusula pa mulandu wa Bufumu? (b) Mulandu nshi tulingile ukwikalila kuli pe na pe?

¹⁹ Ca cine, buno bwikashi kale kale nabwikalisha ukucila fintu abengi batontonkenye ukuti bwali no kwikala. Bamo kuti nomba batontonkanya ukuti abeshiba kale ulwa ici, nga tabaipuswile fimo fimo fintu baipuswileko. Lelo umuntu talekabila ukulangulushiwa muli iyo nshila. Na kuba, ukuipusulako fimo caba lubali lukalamba ulwa kuba Umwina Kristu. Abena Kristu ‘balaikaanya.’ (Mateo 16:24) Tatufwile ukutontonkanya ukuti ukubombesha kwesu ukwa kuteemuna Lesa kwa fye. Yesu alaile ukuti: “Takuli nangu umo uwashile ku mwabo, nangu ni bamunyina, nangu ni nkashi, nangu ni nyina, nangu ni wishi, nangu bana, nangu filime, pa mulandu wa ine na pa mulandu wa mbila nsuma, uushakapokelele nomba mu nshita ino ifya miku umwanda umo . . . na mu bwikashi ubukesa umweo wa muyayaya.” (Marko 10:29, 30) Ukupenda imyaka 1,000 ukufuma nomba, bucindami nshi buntu incito yenu, ing’anda, nelyo indalama ku banki fili no kukwata? Lelo, ukuipusula uko mwaipusula pa mulandu wa kubombela Yehova kukafumamo icibwesha nangu pabe napapita milioni umo uwa myaka nelyo fye bilioni umo uwa myaka! “Pantu Lesa tali uushalungama; takalabe umulimo wenu.”—AbaHebere 6:10.

²⁰ E co kanshi, natwikalile kuli pe na pe, ukukanalolekesha “ifimoneka, lelo ifishimoneka; pantu ifimoneka fya kashita fye, lelo ifishimoneka fya muyayaya.” (2 Abena Korinti 4:18) Kasesema Habakuki alembele ukuti: “Icimonwa cicili cilelola ku nshita iyalingilwe, cilabutukisha ukulola ku mpela—tacakabepe ubufi; nga cashingashinga e lyo ucilolele, pantu ukwisa cikesa, tacakashimbe iyo.” (Habakuki 2:3) Ni shani fintu ‘ukulolela’ impela kwambukila inshila tufikilishishamo ifishingamo fya pa lwesu ne fya ndupwa shesu? Icipande cikonkelepo cili no kulanda pali iyi milandu.

Ifishinka fya Kupitulukamo

Ni shani fintu bamo pali lelo bayambukilwa ku cimoneka ngo kushingashinga kwa mpela ya buno bwikashi?

Ni pi pashimpwa ukucetekela uko twacetekelo mweo wa muyayaya?

Ni shani fintu tulingile ukumona ukuipusula uko twaipusula pa lwa fya Bufumu?

[Icikope pe bula 15]

Umulimo wa kushimikila mwi sonde lyonse ufwile ukupwishishiwa ilyo impela ishilaisa