“Ukucucutika Kwenu te kwa Fye”

¹ Mwandi ayo mashiwi ya kukoselesha! Ukucucutika kwenu mu mulimo wa kwa Yehova te kwa fye. (1 Kor. 15:58) Tontonkanyeni pa fyo mwapusana na bantu abashomboka pa myake ingi pa kuti bengalumbuka mu bwikashi, nelyo ukunonka ulupiya ulwingi. Kuti pambi bapoosa imyake ingi ku masomo ya pa muulu nelyo ukubomba kwati basha ku kunonke fyuma. Lelo, pa mulandu wa “nshita ne ca mankumanya,” nalimo te kuti balumbuke nga fintu baalefwaya, nelyo pambi kuti basuka banaka no kwikala pa nshi ukwabula ukunonka ifyuma baalefwaya. Ukupala “ukufuluko mwela,” ukucucutika kwabo kwa fye. (Luk. Mil. 1:14; 9:11) Mwandi caliwama apo tupikintika pe mu mulimo uushili wa fye, pantu mulimo uwaba no bucindami bwa muyayaya!

² Umulimo Uwacindama Icine Cine: Ukushimikila imbila nsuma ya Bufumu bwa kwa Lesa e mulimo wacindamisha pano isonde. Uyu mulimo ufwile ukubombwa te mulandu abantu balekutika nelyo tabalekutika. Tulefwaya ukusosa nge fyasosele umutumwa Paulo ukuti: “Ndi wa kaele ku mulopa wa mwe bonse; pantu nshakwindile ukulondolola kuli imwe ukupanga konse kwa kwa Lesa.”—Imil. 20:26, 27.

³ Mwandi cilawama nga nshi ilyo abantu bakutika no kwankula ku bukombe bwa Bufumu! Umukashana umo alifwililwe nasenge. Alelanguluka uko nasenge aile. Bushe aile ku muulu nelyo ku helo? Apepele kuli Lesa ukuti amwafwe, ukulumbula ishina Yehova, nga fintu nkashi nankwe amusambilishe. Tapakokwele, atendeke ukusambilila Baibolo no kusangwa ku kulongana kwa Bwina Kristu. Ici camulengele ukwaluka icine cine mu mikalile yakwe ica kuti alifumine na mwi bungwe lya bamukukulu ba mu misebo. Uyu mukashana alekele ukupeepa, ukubomfya imiti ikola, no bupuupu. Umwine alailandila ukuti: “Ukutemwa Yehova fye e kwanengele ukushe mikalile yabipa umusango yu. Ni Yehova fye mu nkumbu shakwe shikalamba e wingampeela isubilo lya bumi bwa muyayaya.” Pali nomba, taleonaula ubumi bwakwe ukucucutikila ifya fye.

⁴ Nangu fye ni lintu abantu balekaana ukukutika, mulapwishishisha cimo icacindama. Baleshiba ukuti Inte sha kwa Yehova shalitandele pa mwabo. Mulashininkisha bumpomfu bwesu, icitetekelo no kutemwa. E co bushe kuti twatila ukucucutika kwenu kwa fye muli Shikulu? Iyo!