Ukwafwa Abantu Ukupalamina Kuli Yehova

“Takuli uwisa kuli Tata, kano aishila muli ine.”—YOHANE 14:6.

 1. Likambisho nshi Yesu wabuushiwe apeele abasambi bakwe, kabili cinshi cacitika ilyo Inte sha kwa Yehova shilekonka ili kambisho?

YESU KRISTU akambishe abakonshi bakwe ‘ukulenga aba nko shonse ukuba abasambi, ukubabatishisha mwi shina lya kwa Tata ne lya Mwana ne lya Mupashi wa mushilo.’ (Mateo 28:19) Mu myaka 10 iyapitapo, Inte sha kwa Yehova shalyafwa abantu ukucila pa mamilioni yatatu ukwisaishiba Lesa, no kubabatisha nge cishibilo ca kuti nabaipeela ukucita ukufwaya kwakwe. Mwandi tulasekelela nga nshi ukubafwa ukupalamina kuli Lesa!—Yakobo 4:8.

 2. Nangu cingati abapya abengi balebatishiwa, cinshi cilecitika?

² Lelo, mu fyalo fimo umo abasambi bapya abengi babatishiwa, takwaba ukwingilishiwako kumo kwine mu mpendwa ya bakasabankanya ba Bufumu. Kwena, kulabako abafwa, icipendo ca bafwa cila mwaka caba napamo pesenti umo. Lelo, mu myaka yapitapo iinono abengi balifutukako pa milandu imo imo. Mulandu nshi? Ici cipande ne cikonkelepo fili no kubebeta ifyo abantu bapalama kuli Yehova ne milandu ilenga ukuti bamo bawe.

Umulandu Tushimikilila

 3. (a) Ni shani fintu umulimo Yesu aseekesha abasambi bakwe wapalana no wa kwa malaika alandwapo pa Ukusokolola 14:6? (b) Ni nshila nshi ibomba bwino mu kulenga abantu ukufwaisha ukwishiba ubukombe bwa Bufumu, lelo bwafya nshi bwabapo?

³ Muli iyi “nshita ya ku mpela,” abasambi ba kwa Yesu bakwata umulimo wa kusalanganya “ukwishiba” pa lwa “mbila nsuma iyi ya bufumu.” (Daniele 12:4; Mateo 24:14) Umulimo wabo wapalana no wa kwa malaika ‘uwakwete imbila nsuma ya muyayaya iya kubila ku baikala pe sonde, na ku luko lonse no mukowa no lulimi na bantu.’ (Ukusokolola 14:6) Muli cino calo umo abantu baobelwa nga nshi mu fya calo, ilingi inshila ibomba bwino ku kulenga abantu ukufwaya ukwishiba ifya Bufumu bwa kwa Lesa no kubafwa ukupalamina kuli Yehova ya kubeba pa lwe subilo lya mweo wa muyayaya mu paradise wa pe sonde. Nangu cingati ici cili fye bwino, ababishanya na bantu ba kwa Lesa pa mulandu fye wa kufwaya ukwingila mu Paradise tabashangila mu kwenda mu nshila ya kamfyemfye iitwala ku mweo.— Mateo 7:13, 14.

 4. Ukulingana na Yesu na malaika alepupuka mu kati ka muulu, mifwaile nshi tushimikilila?

⁴ Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Malaika alepupuka mu kati ka muulu abilisha “imbila nsuma ya muyayaya” no kweba abaikala pe sonde ukuti: “Tiineni Lesa, no kumupeelo mucinshi, pa kuti naiise nshita ya bupingushi bwakwe; pepeni uwacitile umuulu ne calo na bemba no tumfukumfuku twa menshi.” (Ukusokolola 14:6, 7) E co imifwaile ikalamba tushimikilila imbila nsuma ya kwafwa abantu ukupalama kuli Yehova ukupitila muli Yesu Kristu.

Incito Yesu mu Mulimo wa kwa Yehova

 5. Fyebo nshi fyalandilwe na Paulo na Yesu ifilangilila ukuti umulimo tulebomba wa kwa Yehova, te wesu?

⁵ Ilyo alelembela Abena Kristu banankwe abasubwa, umutumwa Paulo alandile pa lwa “bukapyunga bwa kuwikishanya” no kusosa ukuti Lesa awikishisha abantu ku mwine mwi lambo lya cilubula ca kwa Yesu Kristu. Paulo asosa ukuti caba “kwati ni Lesa e ulepaapaatila muli ifwe” no kuti pamo nge ‘nkombe sha kwa Kristu tulemulombela atuti, Shi muwikishiwe kuli Lesa.’ Mwandi litontonkanyo lya kusansamusha! Nampo nga tuli basubwa ‘ababela Kristu inkombe’ nelyo nga tuli inkombe shakwata isubilo lya pe sonde, tatufwile ukulaba ukuti uyu mulimo wa kwa Yehova, te wesu. (2 Abena Korinti 5:18-20) Ni Lesa e upalamika abantu no kusambilisha abesa kuli Kristu. Yesu atile: “Takuli uwingesa kuli ine, kano Tata uwantumine amukula; na ine nkamwimya mu bushiku bwa kupelelekesha. Calembwa muli bakasesema, aciti, Kabili bonse bakasambilishiwa kuli Lesa. Umuntu onse uwaumfwa no kusambilila kuli Tata esa kuli ine.”—Yohane 6:44, 45.

 6. Ni shani fintu Yehova aletensha inko mu nshila inono, kabili pa nshita imo ine, ni bani balesanga umutelelwe mu “ng’anda” yakwe iya kupepelamo?

⁶ Muli shino nshiku sha kulekelesha, ni shani fintu Yehova apalamika abantu no kubeswila “umwinshi wa citetekelo”? (Imilimo 14:27; 2 Timote 3:1) Inshila ikalamba yaba kubomfya Inte shakwe mu kubila ubukombe bwakwe ubwe pusukilo no bwa bupingushi akapingula buno bwikashi bubifi. (Esaya 43:12; 61:1, 2) Uku kubilisha kwa mwi sonde lyonse kuletensha inko—icilelangilila ubupingushi bwa kapeleko ubuli no kwisa mu kwangufyanya. Pa nshita imo ine, abantu ba “mutengo” mu menso ya kwa Lesa balesalwa ukufuma muli buno bwikashi no kusanga umutelelwe mu “ng’anda” yakwe iya kupepa kwa cine. Na muli fyo Yehova alefishapo amashiwi yakwe aya cebo ca kusesema ayalembelwe na Hagai ayatila: “Nkatensha ne nko shonse, fikasuke afiisa ifisuma fya nko shonse, na ine njisusha mu ng’anda iyi ubukata.”—Hagai 2:6, 7, NW utulembo twa pe samba; Ukusokolola 7:9, 15.

 7. Ni shani fintu Yehova esula imitima ya bantu no kupalamika umo umo ku mwine na ku Mwana wakwe?

⁷ Yehova esula imitima ya aba batiina Lesa, ababa “ifintu fyayembesha ifya nko shonse”—ku kuleka ‘bangwe ku filelandwa’ ku Nte shakwe. (Hagai 2:7, Jewish Publication Society; Imilimo 16:14) Nga fintu cali mu mwanda wa myaka uwa kubalilapo, inshita shimo Yehova abomfya bamalaika bakwe ku kutungulula Inte shakwe ku bantu ba bufumacumi abalilila kuli wene ukuti abaafwe. (Imilimo 8:26-31) Ilyo abantu balesambilila pa lwa fishaiwamina ifyo Yehova abapayanishisha ukupitila mu Mwana wakwe, Yesu Kristu, ukutemwa kwa kwa Yehova kubapalamika kuli wene. (1 Yohane 4:9, 10) Lesa apalamika abantu ku mwine na ku Mwana wakwe ukupitila mu “luse” Lwakwe, nelyo “ukutemwa kwa cishinka.”—Yeremia 31:3, NW utulembo twa pe samba.

Ni Bani Yehova Apalamika?

 8. Bantu ba musango nshi Yehova apalamika?

⁸ Yehova apalamika ku mwine na ku Mwana wakwe abo Abamufwayafwaya. (Imilimo 17:27) Aba basanshamo abantu “abateta no kulila pa fya muselu fyonse ifilecitwa” mu Kristendomu na kuba, mu calo fye conse. (Esekiele 9:4) “Baibukila ulwa kukabila kwabo ukwa ku mupashi.” (Mateo 5:3, NW) Cine cine, e “bafuuka” [“abaicefya,” NW utulembo twa pe samba] ba mu calo,” abakekala pe sonde ku ciyayaya.—Sefania 2:3.

 9. Ni shani fintu Yehova engamona nga ca kuti abantu “bakongamina ku kuya mu mweo wa muyayaya,” kabili abapalamika shani?

⁹ Yehova kuti aishiba ifyo umutima wa muntu waba. Imfumu Davidi yaebele umwana wa iko Solomone ukuti: “Imitima yonse Yehova aifwayamo, kabili eluko kwelenganya konse kwa matontonkanyo. Nga wafwaya wene, kuti asangwa kuli iwe.” (1 Imilandu 28:9) Ukushimpa pa mutima wa muntu umo umo ne fyo aba nelyo imibele yakwe, Yehova kuti amona nampo nga akankulako ku kupayanya kwa bulesa ukwa kulekelelwa kwa membu ne subilo lya mweo wa muyayaya mu bwikashi bupya ubwa kwa Lesa ubwa bulungami. (2 Petro 3:13) Ukupitila mu Cebo cakwe, ico Inte shakwe shishimikila no kusambilisha, Yehova apalamika ku mwine na ku Mwana wakwe “bonse [abakongamina, NW] ku kuya mu mweo wa muyayaya,” kabili aba batendeka ‘ukutetekela.’—Imilimo 13:48.

10. Cinshi cilangilila ukuti Yehova nga apalamika bamo bamo tacipilibula ukuti alilingila libela?

¹⁰ Bushe Yehova nga apalamika bamo bamo cilangilila ukuti nalingila libela? Iyo! Ukupalamikwa kwa bantu kuli Lesa kushintilila pa fyo bafwaisha. Tacilima ukuisalila kwabo. Ilelo Yehova aeba abaikala pe sonde ukuisalila nga fintu aebele abena Israele ukucila pa myaka 3,000 iyapitapo, lintu Mose atile: “Nimbika ku cinso cenu lelo umweo no busuma, ne mfwa no bubi. . . . Nalenga umuulu ne calo ukube nte pali imwe lelo, ukuti nimbika ku cinso cenu umweo ne mfwa, ipaalo ne citiipu: e ico saleni umweo, ku kuleka mube no mweo, imwe no bufyashi bwenu, ku kutemwa Yehova Lesa wenu, ku kuumfwa kwi shiwi lyakwe, no kulambatila kuli wene; pantu e mweo wenu kabili e kutantalila kwa nshiku shenu.”—Amalango 30:15-20.

11. Ni shani fintu abena Israele bali no kusala umweo?

¹¹ Moneni ukuti abena Israele bali no kusala ubumi ‘ku kutemwa Yehova Lesa, ku kuumfwa kwi shiwi lyakwe, no kulambatila kuli wene.’ Lintu ayo mashiwi yalandilwe, abena Israele bali tabalakwata Icalo Calaiwe. Bali mu malungu ya Moabu, baleipekanishisha ukwabuka Umumana wa Yordani no kwingila mu Kaanani. Nangu cingati cali ica cifyalilwa ukutontonkanya pa lwa calo “cisuma kabili icapabuka . . . icalefumfumune shiba no buci” ico bali no kupokelela mu kwangufyanya, ukupokelela ici cintu balefwaisha kwashintilile pa kutemwa Yehova, ukumfwa kwi shiwi lyakwe, no kulambatila kuli wene. (Ukufuma 3:8) Mose alengele ici ukumfwika ilyo atile: “Nga mwaumfwe funde ndemweba lelo, ku kutemwa Yehova Lesa wenu, ku kwenda mu mibele yakwe, kabili ku kubaka amafunde yakwe ne fipope fyakwe ne fya bupingushi fyakwe, e lyo mukaba no mweo no kusanda, kabili Yehova Lesa wenu akamupaala mu calo ico muleingilamo ku kucikwata.”—Amalango 30:16.

12. Imicitile ya bena Israele ilingile ukutusambilisha cinshi pa lwa mulimo wesu uwa kushimikila no kusambilisha?

¹² Bushe ifi fyalandwapo tafifwile ukutusambilisha fimo pa lwa mulimo wesu uwa kushimikila no kusambilisha muli ino nshita ya ku mpela? Tutontonkanya pa lwa Paradise wa pe sonde uuleisa no kulandapo mu butumikishi bwesu. Lelo ifwe nelyo abasambi tupanga tatwakamone ici cilayo ukufishiwapo nga ca kuti tulebombela Lesa pa mulandu wa bukaitemwe. Ukupala abena Israele, ifwe na bo tusambilisha tulingile ukusambilila ‘ukutemwa Yehova, ukuumfwa kwi shiwi lyakwe, no kulambatila kuli wene.’ Nga tuleibukishe ci ilyo tuli mu butumikishi, tukalabombela pamo na Lesa mu kupalamika abantu kuli wene.

Ababomfi ba kwa Lesa Abalebombela Pamo

13, 14. (a) Ukulingana na 1 Abena Korinti 3:5-9, ni shani fintu twisa mu kuba ababomfi abalebombela pamo na Lesa? (b) Nani tulingile ukutasha pa kulunduluka ukuli konse, kabili mulandu nshi?

¹³ Paulo alangilile ifyo tubombela pamo na Lesa ilyo alandile pa kulime bala. Alembele ukuti: “Nga kanshi Apolo cinshi? Paulo na o cinshi? Ni bakapyunga muli abo e mo mwatetekelele; kabili umo umo bukapyunga bwakwe ni filya Shikulu amupeele. Ine nalilimbile, Apolo alitapilile, lelo ni Lesa e wameseshe. E ico nangu uulimba nangu uutapilila tali kantu; kano Lesa uumesha. Awe uulimba no utapilila bamo bene, lelo onse umo umo akapokelele cilambu cakwe cine umwabelo kucucutika kwakwe kwine. Pantu ifwe tuli babomfi ba kwa Lesa abalebombela pamo; icilime ca kwa Lesa, ubukuule bwa kwa Lesa, ni mwe.”—1 Abena Korinti 3:5-9.

¹⁴ Pamo nga babomfi ba kwa Lesa abalebombela pamo, tufwile mu busumino ukulimba “icebo ca bufumu” mu mitima ya bantu, lyene ukutapilila uuli onse uwafwaisha ukwishiba icine ukupitila mu kubwelelako ninshi natupekanya bwino no kuyatungulula masambililo ya Baibolo ayapekanishiwa bwino. Nga ca kuti iloba lyaba no mufundo, e kuti umutima nga usuma, Yehova akabomba umulimo wakwe uwa kulenga ulubuto lwa cine ca Baibolo ukumena ukuba cimenwa cisuma. (Mateo 13:19, 23) Akapalamika ulya muntu ku mwine na ku Mwana wakwe. Mu kupelako, ukufula ukuli konse muli bakabila ba Bufumu kubako pa mulandu wa mulimo Yehova abomba pa mitima ya bantu, ukulenga ulubuto lwa cine ukukula no kupalamika aba musango yu ku mwine na ku Mwana wakwe.

Umulimo wa Kukuula Uukashala

15. Cilangililo nshi Paulo abomfeshe ku kulangilila ifyo twafwa bambi ukulundulula icitetekelo?

¹⁵ Ilyo tulesekelela pa kulunduluka, tulefwaisha mu bufumacumi ukumona abantu baletwalilila ukutemwa Yehova, ukumfwa kwi shiwi lyakwe, no kulambatila kuli wene. Tulaba no bulanda lintu twamona bamo bashibantukila no kufutukako. Bushe kuti twacitapo cimo ku kulesha ici ukucitika? Mu cilangililo na cimbi, Paulo alangilila ifyo twingafwa bambi ukuba ne citetekelo. Alembele ukuti: “Takuli uwingabike ca kukuulapo cimbi pamo ne cabikwa, ico ni Yesu Kristu. Awe umuntu nga akuulapo pali ici ca kukuulapo golde, silfere, amabwe ayaumo mutengo, ifimuti, icani, impimbili, umulimo wa onse umo umo ukamoneka; pantu Ubushiku bulya bukaulanga, ico mu mulilo e mo Ubushiku bulya bukasokolwelwa, e lyo umulimo wa muntu onse umulilo wine ukawesho musango wa uko.”—1 Abena Korinti 3:11-13.

16. (a) Ni shani fintu ubuyo bwa filangililo fibili ifyo Paulo abomfya bwapusana? (b) Ni shani fintu ubukuule bwesu bwingesaba ubushafikapo no kufilwa ukucincintila umulilo?

¹⁶ Mu cilangililo ca kwa Paulo ice bala, ukukula kushintilila pa kubikako amano pa kulimba, ukutapilila lyonse, ne paalo lya kwa Lesa. Icilangililo ca mutumwa cimbi cikomaila pa kuti umutumikishi wa Bwina Kristu alishingamwa pa lwa fyo ubukuule bwakwe bwisa mu kuba. Bushe akuula pa ca kukuulapo cakosa ne fya kukuulilako fyakosa? Paulo asokele ukuti: “Onse umo umo asakamane ifyo akuulapo.” (1 Abena Korinti 3:10) Pa numa ya kucincimusha umuntu ukupitila mu kumweba pa lwe subilo lya mweo wa muyayaya mu Paradise, bushe tukosha fye pa kumusambilisha pa fya kutendekelako fya kwishiba kwa mu Malembo no kukomaila fye pa fyo afwile ukucita pa kuti apokelele umweo wa muyayaya? Bushe tufwile ukusambilisha fye pa lwa kuti: ‘Nga mulefwaya ukwikala kuli pe na pe mu Paradise, mulingile ukusambilila, ukusangwa ku kulongana, no kubombako umulimo wa kushimikila’? Nge fyo cili, ninshi tatulekuula icitetekelo ca ulya muntu pa ca kukuulapo cakosa, kabili ifyo tulekuula tafingacincintila umulilo wa mesho nelyo ukutwalilila pa nshita ntali. Ukwesha ukupalamika abantu kuli Yehova pa mulandu fye we subilo lya kwingila mu Paradise pa kumubombela fye imyaka inono kuli kwati kukuula ne “fimuti, icani, impimbili.”

Ukukuulapo Ukutemwa Lesa na Kristu

17, 18. (a) Cinshi cacindama nga nshi nga ca kuti icitetekelo ca muntu cili no kutwalilila? (b) Ni shani fintu twingafwa umuntu ukulenga Kristu ekale mu mutima wakwe?

¹⁷ Pa kuti icitetekelo citwalilile, cilingile ukushimpwa pali bucibusa na Yehova Lesa ukupitila muli Yesu Kristu. Pamo nga bantu bashapwililika, kuti twakwata bucibusa bwa mutende na Lesa ukupitila fye mu Mwana wakwe. (Abena Roma 5:10) Ibukisheni ukuti Yesu atile: “Takuli uwisa kuli Tata, kano aishila muli ine.” Ku kwafwa bambi ukukwata icitetekelo, “takuli uwingabike ca kukuulapo cimbi pamo ne cabikwa, ico ni Yesu Kristu.” Cinshi ici cibimbamo?—Yohane 14:6; 1 Abena Korinti 3:11.

¹⁸ Ukukuula pali Kristu nge ca kukuulapo kupilibula ukusambilisha mu nshila ya kuti umusambi wa Baibolo atemwa sana Yesu ukupitila mu kwishiba pa lwa mulimo Wakwe nga Kalubula, ngo Mutwe wa cilonganino, nga Shimapepo Mukalamba uwa kutemwa, kabili Imfumu ileteka. (Daniele 7:13, 14; Mateo 20:28; Abena Kolose 1:18-20; AbaHebere 4:14-16) Kupilibula ukulenga Yesu aba uwa cine cine kuli bene ica kuti camoneka kwati ekele mu mitima yabo. Tufwile ukubapepelako nge fyo Paulo apaapaatile Abena Kristu ba mu Efese. Alembele ukuti: ‘Mfukama kuli Shifwe, . . . ukuti . . . amupe . . . Kristu ekale mu mitima yenu pa mulandu wa kutetekela; ukuti mube abalimbwa kabili abakuulwa ku kutemwa.’— Abena Efese 3:14-17.

19 Cinshi cifwile ukufumamo ilyo twakuula ukutemwa Kristu mu mitima ya basambi besu aba Baibolo, lelo cinshi tufwile ukubasambilisha?

¹⁹ Nga ca kuti tulekuula mu musango wa kuti ukutemwa Kristu kwaba mu mitima ya basambi besu, ici cikabalenga ukutemwa Yehova Lesa. Ukutemwa kwa kwa Yesu, ifyo aleyumfwa, ne nkumbu filangilila imibele ya cine iya kwa Yehova. (Mateo 11:28-30; Marko 6:30-34; Yohane 15:13, 14; Abena Kolose 1:15; AbaHebere 1:3) E co ilyo abantu baleishiba no kutemwa Yesu, bakesa mu kwishiba no kutemwa Yehova.a (1 Yohane 4:14, 16, 19) Tulekabila ukusambilisha abasambi besu aba Baibolo ukuti Yehova e walengele ukuti Kristu acite fyonse ifyo acitiile abantunse no kuti tufwile Ukumutasha, ukumulumbanya, no kumupepa nga “Lesa ipusukilo lyesu!”—Ilumbo 68:19, 20; Esaya 12:2-5; Yohane 3:16; 5:19.

20. (a) Ni shani fintu twingafwa abantu ukupalama kuli Lesa no Mwana wakwe? (b) Cinshi cikalandwapo mu cipande cikonkelepo?

²⁰ Pamo nga babomfi ba kwa Lesa abalebombela pamo, natwafwe abantu ukupalama kuli wene no Mwana wakwe, ukubafwa ukulundulula ukutemwa mu mitima yabo no kuba ne citetekelo. E co Yehova akaba uwa cine cine kuli bene. (Yohane 7:28) Ukupitila muli Kristu, bakaba fibusa sana ifya kwa Lesa, kabili bakamutemwa no kulambatila kuli wene. Tabakapime nshita ya kupokelapo penshoni mu mulimo wabo uwa kutemwa, lelo bakatetekela ukuti amalayo ya kwa Yehova ayashaiwamina yakafishiwapo mu nshita yakwe. (Inyimbo sha Bulanda 3:24-26; AbaHebere 11:6) Lelo, ilyo tuleafwa bambi ukuba ne citetekelo, isubilo, no kutemwa, tulingile ukukosha icitetekelo cesu ica kuti caba nge shitima lya pa menshi ilyakosa ilingacincintila inkuuka shabipisha. Ici cikalandwapo mu cipande cikonkelepo.

[Futunoti]

Ukupitulukamo

◻ Ni shani fintu ilingi tulenga abantu ukufwaisha ukumfwa ku bukombe bwa Bufumu, lelo busanso nshi bwabamo?

◻ Bantu ba musango nshi Yehova apalamika ku mwine na ku Mwana wakwe?

◻ Cinshi cali no kulenga abena Israele ukwingila mu Calo Calaiwe, kabili finshi twingasambililako?

◻ Mulimo nshi tubomba mu kwafwa abantu ukupalama kuli Yehova no Mwana wakwe?

[Icikope pe bula 10]

Nangu cingati tulebako bambi ifyo kuti baisaikala umweo wa muyayaya mu Paradise, ubuyo bwesu ubukalamba bwa kubapalamika kuli Yehova

[Ifikope pe bula 13]

Ifipempu fyesu ifya kubwelelamo kuti fyaenda bwino sana nga twapekanishisha bwino