Mulelanga Ukuti Mulatasha pa fya Bupe Ifishimoneka Ifyo Yehova Amupeela

 1. Finshi Yesu alandile pa fyuma fya ku muulu?

TE FYUMA fyonse ifyo twingamona. Na kuba ifyuma ifyacindama sana tafimoneka. Mu lyashi lyakwe ilya pa lupili, Yesu alilandile pa fyuma ifyaba mu muulu ifyacindama sana ukucila indalama ne fintu fimbi ifyo twingakwata. Lyena alandile ne cishinka ca kuti: “Ukuli icuma cobe, e kuba no mutima obe.” (Mat. 6:19-21) Umutima wesu ulalenga twalafwaisha ukukwata ifintu ifyo tulemona ukuti fyalicindama sana. Nga twapanga ishina lisuma na Lesa ninshi tuleilonganikila “ifyuma ku muulu.” Yesu alandile ukuti ifi ifyuma tafyonaika kabili abapupu te kuti bafibe.

 2. (a) Nga fintu Baibolo pali 2 Abena Korinti 4:17, 18 ilanda, finshi Paulo atukoseleshe ukulacita? (b) Finshi twalasambilila muli cino cipande?

² Umutumwa Paulo atukoseleshe ‘ukubika imitima yesu pa fishimoneka.’ (Belengeni 2 Abena Korinti 4:17, 18.) Pali ifi ifyuma ifishimoneka paba na mapaalo ayo tukaipakisha mwi sonde lipya ilya kwa Lesa. Muli cino cipande twalasambilila pa fyuma nelyo ifya bupe fine ifyo tunonkelamo pali ino nshita, e kutila, (1) bucibusa bwesu na Lesa, (2) ipepo, (3) ifyo Lesa atwafwa ukubomfya umupashi wakwe uwa mushilo, na (4) ifyo Lesa, Yesu, na bamalaika batwafwa ilyo tulebomba umulimo wa kubila imbila nsuma. Twalasambilila na pa fyo twingacita pa kulanga ukuti tulatasha pali ifi ifya bupe ifyo Yehova atupeela.

 3. Ca bupe nshi icacindama sana icishimoneka, kabili cinshi calenga tulekwata ici ica bupe?

³ Ica bupe icacindama sana icishimoneka ni bucibusa bwesu na Yehova. (Amalu. 25:14) Bushe Yehova kuti aba cibusa na bantunse abashapwililika kabili atwalilila ukuba uwa mushilo? Ee kuti aba, pantu ilambo lya cilubula ilya kwa Yesu ‘lyalisenda ulubembu lwa ba mu calo.’ (Yoh. 1:29) Na lintu Yesu talafwa, Yehova alishibe ukuti Yesu ali no kutwalilila ukuba uwa cishinka mpaka ne mfwa pa kuti alubule abantunse. Ici e calengele no kuti Lesa aleba ifibusa na bantunse abaliko ilyo Yesu talafwa no kuipeela nge lambo.—Rom. 3:25.

 4. Ni bani bamo abali ifibusa fya kwa Lesa ilyo Yesu talaisa pano isonde?

⁴ Tontonkanyeni pa bantu abaliko ninshi Yesu talaisa pano isonde abali ifibusa fya kwa Lesa. Abrahamu ali ne citetekelo icakosa nga nshi. Na lintu papitile imyaka ukucila pali 1,000 ukufuma apo Abrahamu afwiliile, Yehova amwitile ukuti “cibusa wandi.” (Esa. 41:8) Ifi Yehova alandile filanga fye apabuuta tuutu ukutila nangu ca kuti abantu abali ifibusa fyakwe bafwa, alatwalilila ukubamona ukuti fibusa fyakwe ifyo atemwa sana. Yehova alebukisha Abrahamu. (Luka 20:37, 38) Na umbi uwali cibusa wa kwa Lesa ni Yobo. Ilyo bamalaika bonse balongene pamo mu muulu, Yehova alilandile ifisuma pali Yobo. Alandile pali Yobo ukuti muntu “umulungami, uutiina Lesa kabili uutaluka ku fyabipa.” (Yobo 1:6-8) Bushe Yehova aumfwile shani pali Daniele uwamubombele ne cishinka pa myaka nalimo 80 mu calo umwali abashalepepa Yehova? Pa miku itatu bamalaika baebele Daniele ilyo akotele ukuti “walitemwikwa nga nshi” kuli Lesa. (Dan. 9:23; 10:11, 19) Kanshi te kuti tutwishike no kutwishika ukuti Yehova alafuluka inshita ilyo akabuusha ifibusa fyakwe.—Yobo 14:15.

 5. Finshi tufwile ukucita pa kuti tube ifibusa na Yehova?

⁵ Bantu banga abashapwililika ababa ifibusa fya kwa Yehova pali ino nshita? Muno nshiku amamilioni ya bantu baliba ifibusa fya kwa Lesa. Twaishiba shani? Pantu abantu abengi mwi sonde lyonse, abaume, abanakashi, na bana abanono balacita ifilanga ukuti fibusa fya kwa Lesa. “Abalungama e baba bacibusa [ba kwa Yehova].” (Amapi. 3:32) Tacibakosela ukuba ifibusa fya kwa Lesa pantu balicetekela mwi lambo lya cilubula ilya kwa Yesu. Pa mulandu we lambo lya cilubula ilya kwa Yesu kuti twaba ifibusa ifya kwa Yehova kabili kuti twaipeela kuli ena no kubatishiwa. Nga twaipeela no kubatishiwa, tulailunda ku mamilioni ya Bena Kristu abaipeela kabili ababa ‘ifibusa’ no wapulamo pano isonde na mu muulu!

 6. Kuti twalanga shani ukuti tulatasha pali bucibusa twakwata na Yehova?

⁶ Kuti twalanga shani ukuti twalicindika bucibusa bwesu na Yehova? Nga filya fine Abrahamu na Yobo batwalilile ukuba aba cishinka ukucila pa myaka 100, e fyo na ifwe tufwile ukutwalilila ukuba aba cishinka kuli Yehova te mulandu ne myaka ubwingi twamubombela. Kabili tufwile ukucindika sana bucibusa bwesu na ena ukucila umweo wesu nga fintu Daniele acitile. (Dan. 6:7, 10, 16, 22) Apo Yehova alatwafwa, kuti twashipikisha amesho yonse ayo twingakwata kabili ici kuti calenga twatwalilila ukuba ifibusa fyakwe.—Fil. 4:13.

 7. (a) Ukulingana na Amapinda 15:8, bushe Yehova omfwa shani nga tulepepa kuli ena? (b) Bushe Yehova asuka shani amapepo yesu?

⁷ Ica bupe na cimbi icishimoneka ico Lesa atupeela lipepo. Abantu ababa sana ifibusa balalanshanya pa fyo baletontonkanya na pa fyo baleumfwa. Ifi fine e fyo caba na kuli bucibusa bwesu na Yehova. Alalanda na ifwe ukubomfya Icebo cakwe, kabili mu Cebo cakwe emo atwebela ifyo atontonkanya ne fyo omfwa. Na ifwe tulalanda na Yehova ilyo tulepepa kabili kuti twamulondolwela ifyo tuletontonkanya ne fyo tuleumfwa. Yehova alatemwa ukukutika ku mapepo yesu. (Belengeni Amapinda 15:8.) Apo Yehova ni Cibusa wesu uwatutemwa, tapelela fye pa kukutika ku mapepo yesu lelo alasuka no kwasuka. Inshita shimo nga twapepa alasuka bwangu. Nomba inshita shimbi nalimo Yehova te kuti asuke ipepo lyesu apo pene, lelo tulingile ukutwalilila ukupepela pa co tulemulomba. Na lyo line tulingile ukucetekela ukuti akasuka pa nshita yalinga kabili mu nshila iisuma. Kwena inshita shimo nalimo Lesa te kuti asuke ipepo lyesu ukulingana ne fyo tule-enekela. Ku ca kumwenako, mu cifulo ca kufumyapo ubwesho tukwete, kuti atupeela fye amano na maka ya “kubushipikisha.”—1 Kor. 10:13.

 8. Finshi twingacita pa kulanga ukuti tulatasha pe pepo ilyaba bupe ubo Lesa atupeela?

⁸ Finshi twingacita pa kulanga ukuti tulatasha pe pepo, ilyaba bupe ubwacindama ubo Lesa atupeela? Cimo ico twingacita kulakonka ifyo atweba ukuti “mulepepa ukwabula ukuleka.” (1 Tes. 5:17) Yehova tatupatikisha ukulapepa. Lelo alicindika insambu shesu isha kuisalila ifya kucita kabili atukoselesha ukuba “no mute wa kupepa.” (Rom. 12:12) Kanshi kuti twalanga ukuti tulatasha nga tulepepa imiku iingi cila bushiku. Lelo tatulingile ukulaba ukulatasha Yehova no kulamulumbanya ilyo tulepepa.—Amalu. 145:2, 3.

 9. (a) Bushe munyinefwe Chris omfwa shani pe pepo? (b) Inga imwe mumfwa shani pe pepo?

⁹ Nga tulebombela Yehova kabili tulemona ne fyo aleasuka amapepo yesu, tukalatasha sana pe pepo ilyaba bupe ubo atupeela. Tontonkanyeni pali munyinefwe Chris uwabomba umulimo wa nshita yonse pa myaka 47 iyapita. Atile: “Ndomfwa bwino ukubuuka ulucelo no kupepa. Ndatemwa ukulanda na Yehova ilyo akasuba kaletula kabili kalelenga umume ukubengeshima! Ici cilalenga ndemutasha sana pa fya bupe fyonse ukubikako fye ne pepo. Kabili nga napepa kuli Lesa ilyo nshilaya mu kulaala, ndasendama na kampingu yasanguluka.”

10. Cinshi tulingile ukulatashisha pa mupashi wa mushilo uo Lesa atupeela?

¹⁰ Umupashi wa mushilo na o bupe ubushimoneka ubo Lesa atupeela ubo tulingile ukucindamika. Yesu alitukoseleshe ukutwalilila ukulapepela umupashi wa mushilo. (Luka 11:9, 13) Yehova alabomfya umupashi wakwe uwa mushilo pa kutupeela “amaka yacila aya bantunse.” (2 Kor. 4:7; Imil. 1:8) Kanshi umupashi wa mushilo kuti watwafwa ukushipikisha amesho ayali yonse ayo twingakwata.

11. Bushe umupashi wa mushilo utwafwa shani?

¹¹ Umupashi wa mushilo kuti watwafwa no kubomba imilimo ya kwa Lesa. Kabili kuti walenga twaishibilako ifya kubomba imilimo iyo twaishiba. Twalishiba ukuti icilenga tulebomba bwino imilimo ya kwa Lesa ni co umupashi wa mushilo ulatwafwa.

12. Nga fintu Baibolo ilanda pa Amalumbo 139:23, 24, cinshi cingalenga twapepa kuli Lesa ukuti atupeele umupashi wakwe?

¹² Cimbi ico twingacita pa kulanga ukuti tulatasha pa mupashi wa mushilo uo Lesa tupeela, kulapepa kuli ena ukuti uletwafwa ukwishiba nga ca kuti ifyo tuletontonkanya ne fyo tulefwaya ukucita tafili bwino. (Belengeni Amalumbo 139:23, 24.) Nga twacita ifi, Yehova kuti abomfya umupashi wakwe pa kutwafwa ukwishiba nga ca kuti ifyo tuletontonkanya nelyo ifyo tulefwaya ukucita tafili bwino. Kabili nga twaishiba ukuti tafili bwino, tufwile ukupepa ukuti Lesa atupeele umupashi wakwe pa kuti tatucitile ifyabipa ifyo tuletontonkanya nelyo ifyo tulefwaya ukucita. Nga tulecita ifi, ninshi tulelanga ukuti tatufwaya ukucita icili conse icingalenga Yehova aleka ukutwafwa ukubomfya umupashi wakwe uwa mushilo.—Efes. 4:30.

13. Kuti twacita shani pa kuti tuletasha sana pa mupashi wa mushilo uo Lesa atupeela?

¹³ Tukalatasha sana pa mupashi wa mushilo uo Lesa atupeela nga tuletontonkanya pa fyo ubomba muno nshiku. Ilyo Yesu ashilabwelelamo ku muulu, aebele abasambi bakwe ukuti: “Mukapokelela amaka ilyo umupashi wa mushilo ukesa pali imwe, kabili mukaba inte shandi . . . na ku mpela ya pano isonde.” (Imil. 1:8) Ifi Yesu alandile e filecitika muno nshiku. Umupashi wa mushilo walilenga abantu ukucila pa mamilioni 8.5 ukufuma mwi sonde lyonse batendeka ukupepa Yehova. Na kabili, tulaipakisha paradaise ya ku mupashi pantu umupashi wa mushilo ulalenga twaba ne “fisabo fya mupashi” pamo nga ukutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, no kuilama. (Gal. 5:22, 23) Ala umupashi wa mushilo bupe ubusuma nga nshi!

14. Ni bani abo tushimona abatwafwa ilyo tulebila imbila nsuma?

¹⁴ Ica bupe na cimbi icacindama icishimoneka ico twakwata, ‘kubombela pamo’ na Yehova e lyo ne cilonganino ca kwe ica ku muulu. (2 Kor. 6:1) Nga tulebomba umulimo wa kulenga abantu baba abasambi ninshi tulebombela pamo na Yehova, Yesu, na bamalaika. Ilyo Paulo alelanda pa mulimo alebomba uo na ifwe tubombako alandile ukuti: “Ifwe tubombela pamo na Lesa.” (1 Kor. 3:9) Na kabili ilyo tulebila imbila nsuma, tulabombela pamo na Yesu. Ibukisheni ukuti ilyo Yesu apeele abasambi bakwe ifunde lya kuti “kalengeni aba nko shonse ukuba abasambi,” alibebele no kuti “nakulaba na imwe.” (Mat. 28:19, 20) Inga bamalaika bena tubombela shani pamo nabo? E batutungulula ilyo tulebila imbila nsuma. Ala lishuko nga nshi ukutungululwa na bamalaika ilyo tulebila “imbila nsuma ya muyayaya . . . ku baikala pe sonde”!—Ukus. 14:6.

15. Landeni ica kumwenako cimo ica mu Baibolo icilanga umulimo uwacindama uo Yehova abomba mu mulimo wa kubila imbila nsuma.

¹⁵ Bushe Yehova alenga shani umulimo wa kubila imbila nsuma wabombwa bwino? Ilyo tuletanda imbuto sha Bufumu, shimo shiponena pa mitima iisuma kabili shilakula. (Mat. 13:18, 23) Nani alenga ishi imbuto ukukula no kutwala ifisabo? Yesu alandile ukuti takuli umuntu uwingaba umusambi wakwe kano ‘Wishi amukula.’ (Yoh. 6:44) Baibolo yalilanda pa muntu umo uo Lesa akulile. Ibukisheni ifyacitike inshita imo ilyo Paulo ashimikile kwi bumba lya banakashi abo asangile kunse ya musumba wa Filipi. Moneni ifyo Baibolo yalanda pa mwanakashi umo uwali pali ili ibumba uwe shina lya Lidia. Itila: “Yehova aiswile nga nshi umutima wakwe ku kubika amano ku fyalelanda Paulo.” (Imil. 16:13-15) Yehova alikulila abantu abengi nga nshi kuli ena nga filya akulile Lidia.

16. Nani tufwile ukutasha pa fisuma ififuma mu mulimo tubomba uwa kubila imbila nsuma?

¹⁶ Nani tufwile ukutasha pa fisuma ififuma mu mulimo tubomba uwa kubila imbila nsuma? Paulo alyaswike ici cipusho ilyo alembeele icilonganino cali mu Korinti amashiwi ya kuti: “Ine nalilimbile, Apolo alitapilile, lelo Lesa e wameseshe; kanshi uulimba nangu uutapilila taba kantu, kano Lesa uumesha.” (1 Kor. 3:6, 7) Tufwile ukulacindika Yehova pa fisuma fyonse ififuma mu mulimo wa kubila imbila nsuma nga fintu Paulo alecita.

17. Finshi tufwile ukucita pa kulanga ukuti tulatasha pali ifi ‘tubombela pamo’ na Yehova, Yesu, na bamalaika?

¹⁷ Finshi tufwile ukucita pa kulanga ukuti tulatasha pe shuko twakwata ilya ‘kubombela pamo’ na Yehova, Yesu, na bamalaika? Kuti twalanga ukuti tulatasha nga ca kuti tuli abacincila mu mulimo wa kubila imbila nsuma. Kwaliba inshila ishalekanalekana isho twingabililamo imbila nsuma pamo nga ukushimikila “[ku cintubwingi] na ku ng’anda ne ng’anda.” (Imil. 20:20) Abengi balatemwa ukubombako no bunte bwa mu lyashi. Nga bakumanya umuntu uo bashaishiba, balamuposha ne nsansa kabili balatendeka ukulanshanya nankwe. Nga ca kuti amoneka ukutila kuti atemwa batwalilila ukulanshanya nankwe, mu muncenjelo balatendeka ukumushimikila imbila ya Bufumu.

18-19. (a) Bushe tutapilila shani imbuto sha Bufumu? (b) Landeni pa cacitike icilanga ifyo Yehova aafwile umusambi wa Baibolo umo.

¹⁸ Apo “tubombela pamo na Lesa,” tatulingile ukupelela fye pa kubyala imbuto sha Bufumu, lelo tulingile no kulashitapilila. Nga ca kuti umuntu natemwa ifyo twalanshanya, tufwile ukwesha apo twingapesha ukubwelelako no kulanshanya nankwe na kabili, nelyo ukweba kasabankanya umbi ukuyalanshanya nankwe no kutendeka isambililo lya Baibolo. Tulaba ne nsansa nga nshi ilyo twamona ifyo Yehova aleafwa umusambi ukwaluka mu fyo atontonkanya na mu fyo omfwa.

¹⁹ Tontonkanyeni pali ba Raphalalani aba ku South Africa abali ni ng’anga iyakamamo na menshi. Balitemenwe nga nshi ifyo basambilile mu Baibolo. Nomba calibakosele sana ukusumina ifyo Icebo ca kwa Lesa cilanda pa kulanshanya ne fikolwe abafwa. (Amala. 18:10-12) Panono panono balilekele Yehova ayalula ifyo baletontonkanya. Basukile baleka bung’anga nangu ca kuti e ncito fye balebomba iya kusangilamo imikalile. Pali ino nshita ba Raphalalani bali ne myaka 60, kabili batile: “Ndatasha icine cine pa fyo Inte sha kwa Yehova bangafwa mu nshila ishalekanalekana ica kuti balingafwa no kusanga incito. Na kabili ndatasha sana Yehova pa kungafwa ukwalula ubumi bwandi, ica kuti pali ino nshita ndi Nte yakwe iya batishiwa kabili ndabombako no mulimo wa kubila imbila nsuma.”

20. Finshi mulefwaisha ukulacita?

²⁰ Muli cino cipande, natusambilila pa fya bupe fine ifishimoneka. Ica bupe icacindamisha pali ifi fyonse, kuba ifibusa fya kwa Yehova. Ici cilenga tulenonkelamo na mu fya bupe fimbi ifishimoneka pamo nga ukulanda na Yehova mwi pepo, umupashi wa mushilo ukutwafwa, e lyo ne fyo Yehova ne cilonganino cakwe ica ku muulu batwafwa mu mulimo wa kubila imbila nsuma. Kanshi natulecita ifilanga ukuti tulatasha pali ifi ifya bupe ifishimoneka ifyo Lesa atupeela. Kabili natutwalilile ukulatasha Yehova pa kuba Cibusa wesu umusuma.