“Ino Ine E Nshita ya Kupokelelwamo”

“Moneni! Ino ine e nshita ya kupokelelwamo. Moneni! Buno e bushiku bwe pusukilo.”—2 KOR. 6:2.

 1. Mulandu nshi tufwile ukwilukila ifyacilapo ukucindama ifyo tufwile ukucita pa nshita iili yonse?

“ICINTU conse calikwata inshita ya ciko, kwaba ne nshita ku mulandu onse mwi samba lya muulu.” (Luk. Mil. 3:1) Solomone alelemba pa bucindami bwa kwishiba inshita isuma iya kucitilamo ifyalondoloka, nampo nga kulima, ukuya pa bulendo, ukucita amakwebo, nangu ukulanda na bambi. Lelo, tufwile no kwishiba umulimo wacindamisha uo tufwile ukubomba pa nshita iili yonse. Nangu kuti twatila, tufwile ukwiluka bwino bwino ifyacilapo ukucindama.

 2. Twaishiba shani ukuti ilyo Yesu aleshimikila, alishibe bwino ifyali no kucitwa mu nshita yakwe?

² Ilyo Yesu ali pano isonde, alishibe bwino ifyali no kucitika mu nshita yakwe kabili alishibe ifyo alingile ukucita. Apo alishibe bwino ifyacilapo ukucindama, alishibe ukuti inshita abantu balepembela pa myaka iingi iya kuti ukusesema kwapusanapusana ukwa pali Mesia kufikilishiwe, yalifikile. (1 Pet. 1:11; Ukus. 19:10) Alikwete imilimo iingi iya kubomba pa kuti abantu beshibe ukuti e Mesia walaiwe. Alingile ukubila sana icine pa lwa Bufumu no kulonganika abali no kuyateka nankwe mu Bufumu. Kabili alingile ukupekanya ifintu pa kuti icilonganino ca Bena Kristu cikapangwe, icali no kukonkanyapo umulimo wa kushimikila no kupanga abasambi ukufika ku mpela sha pano isonde.—Marko 1:15.

 3. Bushe ifyo Yesu aishibe pa fyalekabila ukucitwa ilyo ali pano isonde fyalengele acite finshi?

³ Ukwishiba ifyo kwalengele Yesu ukuba uwapimpa mu kucita ukufwaya kwa kwa Wishi. Aebele abasambi bakwe ukuti: “Ukulobolola kukalamba, lelo ababomfi bena nabacepa. E ico lombeni Umwine wa kulobolola ukuti atume ababomfi mu kulobolola kwakwe.” (Luka 10:2; Mal. 4:5, 6) Pa kubalilapo, Yesu asalile abasambi 12, e lyo pa numa aishilesala bambi 70, no kubasambilisha ifya kucita, e lyo abatumine ukuyashimikila ubukombe bwa kucincisha ubwa kuti: “Ubufumu bwa mu muulu nabupalama.” Kumfwa umwine, ilembo litila: “Ilyo . . . apwishishe ukweba abasambi bakwe 12 ifi fintu, alifumineko no kuya alesambilisha no kushimikila mu misumba yabo.”—Mat. 10:5-7; 11:1; Luka 10:1.

 4. Ni muli finshi Paulo apashenye Yesu Kristu?

⁴ Kuli Yesu e ko abasambi bonse bamwenene ukupimpa kwine kwine no kuipeelesha ifyo nabo balingile ukukwatako. Ici cine e co umutumwa Paulo alandilepo ilyo acincishe Abena Kristu banankwe ukuti: “Mulempashanya, ifyo na ine mpashanya Kristu.” (1 Kor. 11:1) Ni muli finshi Paulo alepashanya Kristu? Ni mu kubombesha umulimo wa kubila imbila nsuma. Mu makalata Paulo alelembela ifilonganino, tusangamo amashiwi ya kuti “mwilawayawaya mu mulimo wenu,” “bombeleni Yehova,” “beni . . . abacincila pe mu mulimo wa kwa Shikulu,” na ya kuti “conse ico mulecita, mulebomba no mweo onse kwati mulebombela Yehova te bantu iyo.” (Rom. 12:11; 1 Kor. 15:58; Kol. 3:23) Paulo tatalile alaba filya akumene na Shikulu Yesu Kristu ilyo aleya ku Damaseke na mashiwi ya kwa Yesu ayo umusambi Anania afwile afishishe kuli ena aya kuti: “Uyu muntu cipe ico nasala ku kutwala ishina lyandi ku bena fyalo na ku shamfumu na ku bana ba kwa Israele.”—Imil. 9:15; Rom. 1:1, 5; Gal. 1:16.

“Inshita ya Kupokelelwamo”

 5. Cinshi calengele ukuti Paulo abombe umulimo wakwe no kupimpa?

⁵ Ilyo twabelenga ibuuku lya Imilimo, kuti twamona bwino bwino ifyo Paulo ali uwashipa kabili uwapimpa pa kubila imbila nsuma. (Imil. 13:9, 10; 17:16, 17; 18:5) Paulo alishibe ubucindami bwa nshita aleikalamo. Atile: “Moneni! Ino ine e nshita ya kupokelelwamo. Moneni! Buno e bushiku bwe pusukilo.” (2 Kor. 6:2) Mu 537 B.C.E., yali ni nshita ya bankole abali mu Babiloni ukubwelelamo ku calo cabo. (Esa. 49:8, 9) Lelo cinshi Paulo alelandapo pano? Twalaumfwa nga twamona amashiwi na yambi aya muli ili lembo.

6, 7. Bushe Abena Kristu abasubwa bacindikwa shani pali lelo, kabili ni bani abalebombela pamo na basubwa?

⁶ Pa kubala muli kalata yakwe, Paulo alandile pa fyo ena na Bena Kristu banankwe abasubwa bacindikwe pa kupeelwa umulimo. (Belengeni 2 Abena Korinti 5:18-20.) Alondolwele ukuti kwali umulimo wa kulungatika uo Lesa abetiile, e kutila “umulimo wa kubwesesha abantu kuli Lesa,” ukubapapaata ‘ukubwelela kuli Lesa.’ Ico calolele mu kuti balepapaata abantu ukuba ifibusa fya kwa Lesa na kabili, atemwa ukuwikishanya nankwe.

⁷ Ukufuma fye apo umuntu apondokele mu Edeni, abantu bonse balifuma kuli Yehova. (Rom. 3:10, 23) Uko kutaluka kuli Lesa kwalenga abantu ukukanamwishiba, kabili ico calenga balecula no kufwa. Paulo alembele ukuti: “Twalishiba ukuti ifibumbwa fyonse fitetela capamo no kucululukila capamo ukufika kuli nomba.” (Rom. 8:22) Lelo Lesa e waitendekeleko ukucincisha, na kuba ‘ukupapaata,’ abantu ukubwela kuli ena, nelyo ukuwikishanya nankwe. Uyo e mulimo apeele Paulo na Bena Kristu banankwe abasubwa pali ilya nshita. Iyo “inshita ya kupokelelwamo,” kuti yaba “bushiku bwe pusukilo” ku batetekela Yesu. Abena Kristu basubwa bonse na banabo aba mu “mpaanga shimbi,” abalebombela pamo balitwalilila ukwita abantu ukuti banonkelemo mu “nshita ya kupokelelwamo.”—Yoh. 10:16.

 8. Cinshi calenga uku kwita abantu ukuti babwelela kuli Lesa kube ukwaibela?

⁸ Uku kwita abantu ukuti babwelele kuli Lesa kwali-ibela pantu nangu ca kuti abantu e baonawile bucibusa bwabo na Lesa mu Edeni, Lesa umwine e waitendekeleko ukweba abantu ukuti babwelele kuli ena. (1 Yoh. 4:10, 19) Finshi acitile? Paulo ayaswike ukuti: “Lesa alelenga aba pano calo ukuti babwelele kuli ena muli Kristu, ukukanabapendela imembu shabo, kabili ni fwe apeele aya mashiwi aya kubwesesha abantu kuli ena.”—2 Kor. 5:19; Esa. 55:6.

 9. Finshi Paulo acitile pa kulanga ukuti aletasha pa luse lwa kwa Lesa?

⁹ Yehova apeele abantu icilubula pa kuti abali ne citetekelo bengelelwa imembu shabo no kuba na bucibusa na ena na kabili nelyo ukuwikishanya nankwe. Kabili atumine inkombe shakwe ukucincisha abantu konse konse ukuti bawikishanye nankwe ilyo kucili inshita. (Belengeni 1 Timote 2:3-6.) Ilyo Paulo aumfwikishe ubufwayo bwa kwa Lesa no kwishiba ubucindami bwa nshita aleikalamo, alibombeshe nga nshi “umulimo wa kubwesesha abantu kuli Lesa.” Ubufwayo bwa kwa Yehova tabwayaluka iyo. Na lelo line afwaya abantu ukuwikishanya nankwe. Amashiwi ya kwa Paulo aya kuti “ino ine e nshita ya kupokelelwamo” na ya kuti “buno e bushiku bwe pusukilo,” yacili yalabomba na lelo. Mwandini Yehova ni Lesa wa luse kabili uwa cikuuku!—Ukufu. 34:6, 7.

“Mwilacita Ifipusene no Bufwayo”

10. Bushe “ubushiku bwe pusukilo” bwakumine shani Abena Kristu basubwa aba ku kale kabili bwakuma shani aba ino nshita?

¹⁰ Aba kubalilapo ukunonkela mu cikuuku ca kwa Lesa ni balya ‘aba kwa Kristu.’ (2 Kor. 5:17, 18) Kuli bena, “ubushiku bwe pusukilo” bwatampile pa Pentekoste mu 33 C.E. Ukufuma iyo nshita, balipeelwa umulimo wa kubila “amashiwi aya kubwesesha abantu kuli [Lesa].” Muno nshiku, abashalapo pa Bena Kristu basubwa bacili balebomba “umulimo wa kubwesesha abantu kuli Lesa.” Balishiba ukuti bamalaika bane abo umutumwa Yohane amwene mu cimonwa ca mu kusesema “[balikatilila] imyela ine iye sonde, pa kuti umwela wipuupila pe sonde.” E ico, na ino nshita icili ni “nshita ya kupokelelwamo,” kabili “bushiku bwe pusukilo.” (Ukus. 7:1-3) E mulandu wine ku kutendeka fye kwa myaka ya ba 1900 ukufika na lelo, abashalapo abasubwa baliba abapimpa mu kubomba “umulimo wa kubwesesha abantu kuli Lesa” ukufika na ku mpela sha pano isonde.

11, 12. Bushe Abena Kristu basubwa mu kutampa kwa myaka ya ba 1900 balangile shani ukuti balishibe ubucindami bwa ilya nshita? (Moneni icikope cili pe bula 15.)

¹¹ Ku ca kumwenako, nga fintu icitabo ca Jehovah’s Witnesses—Proclaimers of God’s Kingdom cisosa, ilyo imyaka ya ba 1900 yaletendeka, “C. T. Russell na banankwe balitetekele sana ukuti bali mu nshita ya kulobolola no kuti abantu balingile ukumfwa icine icilubula.” Finshi bacitilepo? Pa kwishiba ukuti bali mu nshita ya kulobolola, “inshita ya kupokelelwamo,” aba bamunyinefwe tabaleita fye abantu ukusangwa ku mapepo. Ifyo e fyo bashimapepo ba mu macalici yaleitunga ukuti ya Bena Kristu balecita pa myaka iingi. Lelo, balya Bena Kristu basubwa batampile ukufwaya inshila shimbi isha kusabankanishishamo imbila nsuma. Pa fyo bacitile, pali no kushukila ifya kupangapanga no kufibomfya ku kutwala pa ntanshi umulimo wabo.

¹² Pa kusabankanya imbila nsuma ya Bufumu, balya babomfi bapimpa abali fye abanono balebomfya amatrakiti, magazini, ne fitabo. Na kabili balelemba amalyashi ne fipande ifyo baletuma ukuti fikafume mu manyunshipepala ayengi sana. Balesabankanya amaprogramu yashimpwa pali Baibolo pa milabasa iyo ifyalo ifingi fyaleumfwako. Balepanga ubunkolanya umo abantu balelanda, nangu ca kuti abapanga amafilimu pali iyo nshita ninshi tabalaishiba ukupanga ifya musango yo. Apo bali abapimpa kabili babombele uyu mulimo ukwabula ukunenuka, cinshi cafumamo? Pali lelo, kwaba abantu ukucilako panono pali 7 milioni abaisa mu kubilako ubukombe bwa kuti: “Bweleleni kuli Lesa.” Cine cine, balya babomfi ba kwa Yehova aba mu myaka ya ku numa, bali abapimpa nga nshi te mulandu ne fyo ifintu fyayafishe.

13. Bufwayo nshi ubwa kwa Lesa ubo tufwile ukucindamika?

¹³ Amashiwi ya kwa Paulo aya kuti “ino ine e nshita ya kupokelelwamo” yacili ya cine na lelo. Ifwe fwe bo Yehova alanga icikuuku tulatasha pantu twalikwata ishuko lya kumfwa no kwankula ku bukombe bwa kubwelela kuli Lesa. Tatwaba no mulele, lelo twalicindamika amashiwi Paulo akonkeshepo ukulanda aya kuti: “Mwilacita ifipusene no bufwayo bwa cikuuku ico Lesa alanga kuli imwe.” (2 Kor. 6:1) Ubufwayo bwa cikuuku ca kwa Lesa bwa kuti “aba pano calo . . . babwelele kuli ena” ukupitila muli Kristu.—2 Kor. 5:19.

14. Fisuma nshi ifilecitika mu fyalo ifingi pali lelo?

¹⁴ Abantunse abengi bacili balitaluka kuli Lesa kabili tabaishiba ubufwayo bwa cikuuku ca kwa Lesa pa mulandu wa kuti Satana alibapofwisha. (2 Kor. 4:3, 4; 1 Yoh. 5:19) Lelo, ilyo ifintu filebipilako pa calo, cilalenga abengi balekutika ilyo twabalondolwela ukuti ukutaluka kuli Lesa e kwalenga ububifi bonse no kucula kwa bantu. Nangu fye ni mu fyalo umo abantu bashatemwa umulimo wesu uwa kushimikila, abengi nomba balesumina imbila nsuma no kubwelela kuli Lesa. Bushe ifwe twaliluka ukuti ino e nshita ya kuba abapimpa mu kupapaata abantu ukuti: “Bweleleni kuli Lesa”?

15. Mu nshita ya kulasembeleka fye abantu pa kuti baleisa mu kupepa, finshi tufwaya abantu konse konse ukwishiba?

¹⁵ Umulimo wesu te wa kweba fye abantu ukuti nga babwelela kuli Lesa, ali no kubafwa mu mafya yabo yonse kabili imikalile yabo ikabako eyefilya. Ifyo fine e fyo abantu bafwaya ilyo baya ku macalici, na kuba e fyo babalaya kuli bashimapepo babo pa kuti fye abengi baleya ku macalici. (2 Tim. 4:3, 4) Ubu te buyo bwesu ilyo tushimikila. Imbila nsuma tubila ya kuti, Yehova alitemwa abantu kabili alafwaya ukubabelela uluse ukupitila muli Kristu. Kanshi, abantu abataluka kuli Lesa kuti babwelela kuli ena. (Rom. 5:10; 8:32) Lelo, “inshita ya kupokelelwamo” ileya ilepwa lubilo lubilo.

“Lekeni Umupashi Umulenge Ukucincila”

16. Cinshi cayafwile sana Paulo ukuba uwashipa kabili uwapimpa?

¹⁶ Kuti twacita shani pa kuti tube abapimpa mu kutungilila ukupepa kwa cine? Bamo mu cifyalilwa ba nsoni kabili balitalalila, kabili cilabakosela ukulanga ifyo baleumfwa mu mutima. Lelo, tufwile ukwibukisha ukuti ukupimpa te kumoneka fye uwa nsansa; kabili takwashintilila pa fyo icifyalilwa ca muntu caba. Paulo alilondolwele icingatwafwa ukuba abapimpa ilyo aebele Abena Kristu banankwe ukuti: “Lekeni umupashi umulenge ukucincila.” (Rom. 12:11) Umupashi wa kwa Yehova walyafwile sana uyu mutumwa ukuba uwashipa no kushipikisha mu mulimo wa kubila imbila. Paulo atwalilile fye ukuba uwapimpa, tabalile anenuka pa myaka ukucila pali 30, e kutila ukufuma pa nshita Yesu amwitile ukufika na pa nshita bamukakile mu cifungo umuku wa kulekelesha, mpaka fye ne mfwa yakwe mu Roma. Lyonse atetekele Lesa, uwamukoseshe ukupitila mu mupashi wakwe. Paulo asosele ati: “Muli fyonse ndi na maka pantu kuli uulenkosha.” (Fil. 4:13) Ala kuti twanonkelamo icine cine nga twasambilila ku fyo apitilemo!

17. Kuti twacita shani pa kuti ‘umupashi uletulenga ukucincila’?

¹⁷ Ishiwi lya ciGriki ilyo bapilibula ati “ukucincila” lipilibula “ukubilauka.” (Kingdom Interlinear) Pa kuti amenshi yali mwi ketulo yatwalilile ukubilauka, umulilo taufwile ukushima. Na ifwe nga tulefwaya ‘umupashi utulenge ukucincila,’ tufwile lyonse ukulapokelela umupashi wa kwa Lesa. Pa kuti tulepokelela uyo mupashi, tufwile ukubomfya fyonse ifyo Yehova atupeela pa kuti tukoshe bucibusa bwesu na ena. E kutila tufwile ukucindamika sana amapepo ya lupwa no kulongana, ukulaisambilisha lyonse no kulatungulula isambililo lya lupwa lyonse, ukuba no mute wa kupepa, no kulasangwa mu kulongana na Bena Kristu banensu. Ifi fintu fikatwafwa pa kuti ‘umupashi uletulenga ukucincila,’ kwati ni filya umulilo ulenga amenshi ayali mwi ketulo ukutwalilila ukubilauka.—Belengeni Imilimo 4:20; 18:25.

18. Bushe fwe Bena Kristu baipeela, buyo nshi tufwile ukukwata?

¹⁸ Umuntu uwaipeela ni ulya uwatonta fye pa buyo bumo kabili tapumbulwa bwangu nangu ukufuupulwa no kuleka ukukonkelela ubuyo bwakwe. Ubuyo bwesu fwe Bena Kristu abaipeela, bwa kucita fyonse ifyo Yehova afwaya tulecita, nga filya na Yesu alecita. (Heb. 10:7) Ubufwayo bwa kwa Yehova pali lelo bwa kuti abantu abengi nga nshi babwelele kuli ena. E ico, natube abapimpa nga Yesu na Paulo ilyo tulebomba uyu mulimo wacindama nga nshi, uupamfishe sana, uufwile ukubombwa ino ine nshita.

Bushe Muleibukisha?

• Bushe “umulimo wa kubwesesha abantu kuli Lesa” uo Paulo na Bena Kristu bambi abasubwa bapeelwe wali mulimo nshi?

• Finshi abashalapo pa basubwa bacita mu “nshita ya kupokelelwamo” iyo bashukila?

• Finshi Abena Kristu ababila imbila bengacita pa kuti ‘umupashi ubalenge ukucincila’?

[Icikope pe bula 12]

Paulo tatalile alaba filya akumene na Shikulu Yesu Kristu