Ku ca kumwenako, esheni ukwetetula pa mashiwi ya mutumwa Paulo ayasangwa pali 2 Abena Korinti 7:1 apatila: “E ico pa kuba ne filayo ifi, mwe batemwikwa, tuisangulule ku kukantana konse kwa mubili no mutima, tube abafishisho mushilo mu kutiina Lesa.” Ilukeni umo aya mashiwi yalolele. Ipusheni amuti, ‘Cinshi cili “ifilayo ifi” ifyo Paulo alandapo?’ Ukupitila mu kubelenga amashiwi yashingulukako, mwalasango kuti ifikomo fyatangililako fitila: “Fumeni mwi bumba lyabo, mupaatukeko, e fyo asosa Shikulu, kabili mwiikatako ku cishasanguluka; na ine nkamusekelela, kabili nkaba Shinwe, na imwe mukaba abana bandi abaume na bana bandi abanakashi, e fyo asosa Shikulu wa maka yonse.”—2 Abena Korinti 6:17, 18.

Amashiwi ya kwa Paulo aya ‘kuisangulula ku kukantana’ nomba yakwata amaka yalundwapo! Pa kutukoselesha sana ukucite co, Lesa alaya ‘ukutusekelela,’ e kuti, ukulatucingilila. Kuti pambi mwaipusha amuti ‘Bushe kuti naipakisha bucibusa bwapalamisha na wene—ukupala filya ciba ku mwana na wishi?’ Bushe ili itontonkanyo lya ‘kusekelelwa’ nelyo ukutemwikwa kuli Lesa wa mano, uwa kutemwa talitulenga ukufwaisha ukusekelelwa muli iyo nshila? Nga ca kuti ico camukosela ukumfwa, mukalolekeshe inshila bashibo balangishishamo ukutemwa ku bana babo. Nomba elenganyeni ukwikatana kwa musango yo ukubapo pa kati ka imwe na Yehova! Ilyo mwatontonkanyapo sana, e lyo cilecilapo kufwaisha ukuba no kwampana kwa musango yo.

Lelo moneni ukuti: Kuti mwapalama fye kuli Lesa nga ca kuti ‘tamuleikata ku cishasanguluka.’ Ipusheni ukuti: ‘Bushe ukukunkuma kuli fwaka tacili ni cimo ica ‘fishasanguluka’ ifyo Lesa asenuka? Bushe ukupeepa fwaka kuti ‘kwakantaika umubili,’ ukunenga ukuba mu busanso bwa kwambula amalwele yapusanapusana? Apantu Yehova aba Lesa wa busaka, nelyo “uwa mushilo,” bushe kuti asuminisha ukuti ndeikantaika fye ku mufulo muli iyi nshila?’ (1 Petro 1:15, 16) Moneni ukuti Paulo na kabili asoka pa lwa ‘kukantana kwa mutima,’ nelyo amatontonkanyo. Ipusheni amuti: ‘Bushe ici cibelesho e co ntontonkanyapo fye? Bushe kuti nafika ku cipimo ca kwikusha icilaka candi, napamo ukukanasakamana ubumi bwandi, ulupwa, nelyo ukwiminina kwandi na Lesa? Fwaka yaonaula shani ubumi bwandi?’ Ukwasuka ifi fipusho fyacindama kuti kwamupeela ubukose mulekabila ku kuleka!

Lintu baLin na bakashi tabalaishibe cine, baalibyele ifimuti fya nseke sha betel mwi bala lyabo. Nangu ca kuti cali no kusenda imyaka isano pa kuti ifimuti fingabaletele ndalama, nga fyakula, baLin na bakashi kuti baenekela ukupanga amadola 77,000 cila mwaka. Ilyo inshita ya kulobolola kwa kubalilapo yapalamine, baLin na bakashi baali no ukupingulapo kupingula kwakakala. Balisambilile ukupitila mwi sambililo lyabo ilya Baibolo ukuti Abena Kristu bafwile ukuisangulula “ku kukantana konse kwa mubili no mutima,” ukupitila mu kusengauka ukubomfya, nelyo ukusumbula ifibelesho fishasanguluka pamo ngo kupeepa fwaka, ukubomfya imiti ikola, no kusheta inseke sha betel. (2 Abena Korinti 7:1) Cinshi bengacita?

Pa mulandu wa kutitikishiwa na kampingu walecuushiwa, baLin bapingwilepo ukuleka isambililo lyabo. Pali iyi nshita, abakashi ba baLin balishitishe inseke sha betel ukufuma ku miti yabo ikalamba no kupanga icibwesha icacilile na pa madola 3,000. Aka kaali fye akakubalangisha indalama bengapanga nga batwalilila ukusunga ifimuti fyabo. Nangu cibe fyo, kampingu wa baLin alitwalilile ukubacuusha.

Balishombweke no yu mulandu mpaka fye ubushiku bumo baipwishe Inte sha ku ncende ku mwabo ukubaputwilako imiti ya betel. Inte shalondolwele ukuti baipingwile fye abene; na muli fyo, e bafwile ‘ukusende cipe cabo abene’ no kuiputwila imiti. (Abena Galatia 6:4, 5) Balibakoseleshe ukwibukisho bulayo bwaba pali 1 Abena Korinti 10:13, ubusosa ukuti: “Ica kwesha tacamusanga kano ica buntuuntu fye; lelo wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na pa kufuminamo, ukuti mube na maka ya kucishipikishako.” Inte shapelulwile nabo na kabili, ukuti: “Nga twamutemene fi fimuti, kuti mwaisatulilila nga mwalangulushiwa.” Papitile fye akashita akanono lintu abakashi ba baLin babukile uluceelo bafikile fye mu congo ca soo wa malaiti alelila. Abalume babo na bana baletema ifimuti fya betel!

BaLin basangile ukuti Yehova alaya ica cine. Balisangile incito iyabashile na kampingu wasanguluka, ukubalenga ukuba bakalumbanya ba kwa Yehova. Babatishiwe pa kulongana kwa muputule ukwa Nte sha kwa Yehova mu April 1996.