‘Pepelaneni’

YEHOVA ni “Komfwa we pepo.” (Ilumbo 65:2, NW) Lyonse alomfwa amapepo ya abo abaipeelesha umutima onse kuli wene, kabili kuti twashininkisha ukuti alomfwa lintu bapepelana.

Lelo mulandu nshi uwa kupepelana? Kukuma kuli cinshi amapepo ya musango yo yali no kupepwa? Kabili mibele nshi iya bukapepa iiwaminako lintu tulepepelana?

Mulandu Nshi uwa Kupepelana?

Amalembo yakoselesha abantu ba kwa Yehova ukupepelana. Amapepo pa lubali lwa bambi yali pa kati ka kupaapaata kwa mutumwa Paulo kuli Lesa. (Abena Kolose 1:3; 2 Abena Tesalonika 1:11) Mu kulundapo, umusambi Yakobo alembele ukuti: ‘Pepelaneni.’—Yakobo 5:16.

Amapepo ku babomfi ba kwa Lesa bambi yaliba ayabomba. Ici calilangwa pali Yakobo 5:13-18, uko Umwina Kristu walwala lwa ku mupashi acincishiwa ukuleka baeluda ba mu cilonganino “bapepe pali wene, no kumusubila amafuta mwi shina lya kwa [Yehova, NW].” Ukuumfwa amapepo yabo kuti pambi kwakosha umuntu wapelelwa no kumushinina ukuti Lesa na o akasuka amapepo yakwe yene. (Ilumbo 23:5; 34:18) Pa mbali ya kupepa no muntu umo, baeluda besha ukupuupuutula ubutuntulu bwakwe ubwa ku mupashi pa kulumbulula amatontonkanyo ya mu Malembo ayapala amafuta yatelela.

Yakobo alundapo ukuti: “Ne pepo lya citetekelo likapususho mulwele, na [Yehova, NW] akamubuusha.” Ee, umuntu uwalwala lwa ku mupashi mu kupalishako kuti aafwiwa ne “pepo lya citetekelo” ilya baeluda. Mu kulundapo, Lesa ‘akamubuushisha’ ku butuntulu bwa ku mupashi nga ca kuti ali uwaitemenwa ukwafwiwa na Malembo. Lelo ni shani nga ca kuti ukulwala kwa ku mupashi kwaishileko ukufuma ku lubembu lwabipisha? Cisuma, nga ca kuti umuntu ali uulapila, Yehova akamweleela.

“E ico,” e fyasosa Yakobo, “yasanineni imembu shenu no kupepelana, ukuti muposhiwe; ukupaapaata kwa mulungami kubomba ku maka ayengi. Eliya . . . apepele ipepo ukuti peloka mfula, kabili imyaka itatu ne myeshi mutanda tayalokele pa nshi; e lyo abwekeshepo ukupepa, ne ulu lyapeele imfula, ne calo cameseshe ifisabo fya ciko.” (1 Ishamfumu 17:1-7; 18:1, 42-45) Mwaliba amaka mwi pepo lya muntu umulungami ilyaba mu kumfwana no kufwaya kwa kwa Lesa.—1 Yohane 5:14, 15.

Ukupepela Cinshi?

Umulandu uuli onse kuti waba mutwe wa lyashi kwi pepo lyesu ilya wasumina munensu. Ku ca kumwenako, Paulo aipwishe bambi ukupepa pa kuti engakwata amaka ya kulanda imbila nsuma. (Abena Efese 6:17-20) Ni shani nga ca kuti natwishiba ukuti umo aletunkwa? Kuti twapepa ukuti ‘ecita cibi’ no kuti Lesa emulekelesha kwi tunko lelo amupokolole ku mubifi, Satana Ciwa. (2 Abena Korinti 13:7; Mateo 6:13) Kabili nga ca kuti umo nalwala lwa ku mubili, kuti twaipusha Yehova ukumupeela ubukose bukabilwa ku kushipikisha ukulwala kwakwe.—Ilumbo 41:1-3.

Lyonse calibe calinga ukupepela bakapepa banensu aba kwa Yehova abalepakaswa. Paulo na banankwe baculile ukupakaswa kwatapata, kabili aebele Abena Kristu ba mu Korinti ukuti: “Na imwe mukoshanye na ifwe mu mapepo, ukuti abengi bakatootele pa mulandu wa ifwe pa ca bupe ico twapeelwa icaishiile mu mapepo ayengi.” (2 Abena Korinti 1:8-11; 11:23-27) Nelyo fye nga twabikwa mu cifungo, kuti twapepela bamunyina bambi abalepakaswa, lyonse ukwibukisha ukuti Yehova omfwe “pepo lya balungami.”—Amapinda 15:29.

Ukucilisha tulingile ukupepela bamuyinefwe abasunse fishingamo fyakulisha mu kati na nkati ka kuteyanya kwa kwa Yehova. Ici cisanshamo abo abatungulula ukuteyanya no kupekanya ica kulya ca ku mupashi icipekanishiwa no “musha wa cishinka kabili uwashilimuka.” (Mateo 24:45-47) Ku ca kumwenako, ifilundwa fye Bumba Litungulula ilya Nte sha kwa Yehova bawaminwa amapepo yesu, kabili kuti twapepo kuti Lesa abapeele “[umupashi] wa mano.”—Abena Efese 1:16, 17.

Imibele ya Bwina Kristu Ilawaminako

Pa kupepela abasumina banensu, tuilanga ukuba abayangwako, ababula akaso, kabili abakwato kutemwa. Ukwangwako kwabula akaso, ukwabamo ukutemwa kuli bumupashi bwa bamunyinefwe ne nkashi kumfwana ne cishinka ca kwa Paulo ica kuti ukutemwa “takuifwaila ifya kuko.” (1 Abena Korinti 13:4, 5) Ukupepela bambi ni nshila imo iya ‘kulolekesha te pa fyesu fyeka, lelo ukulolekesha na pa fya banensu.’ (Abena Filipi 2:4) Lintu twacita ubusuma bwa ku mupashi ubwa bambi ukuba e kwangwako kwesu mwi pepo, tuisanga tulepalamina kuli bene mu kutemwa kwa bumunyina uko ukwishibisha abasambi ba kwa Yesu.—Yohane 13:34, 35.

Imibele ya kulangulukila ilalundululwa ukulola kuli abo tupepela. (1 Petro 3:8) Twalikwata uluse pali bene, ukwakana amabuseko yabo no kupelelwa. Mu mubili wa buntunse, nga ca kuti ukuboko kumo kwacenwa, kumbi kulasakamana ukubiye no kwesha ukwilulula ukucula kulengelwe ne cilonda. (Linganyeniko 1 Abena Korinti 12:12, 26.) Mu kupalako, ukupepela bamunyinefwe ne nkashi abalecula kulundulula uluse lwesu pali bene no kutwaafwa ukubebukisha. Cili kulufya kwesu nga twalekelesha Abena Kristu banensu aba busumino mu mapepo yesu, pantu Lesa na Kristu tababalekelesha.—1 Petro 5:6, 7.

Imibele yalekanalekana iya bukapepa ilawaminako lintu twapepela bambi. Tuba abomfwikisha mu kucilapo kabili tuba abatekanya ukulola kuli bene. Icilulo cingabako cilanukulwa, ukushile ncende amatontonkanyo yakuulilila ayatulenga ukuba abakwato kutemwa kabili aba buseko. Ukupepela bambi na kabili kusumbula umutende no kwikatana pa kati ka bantu ba kwa Yehova.—2 Abena Korinti 9:13, 14.

Twalilileni Ukupepelana

Ukupala Paulo, kuti twaipusha bambi ukutupepela. Pa mbali ya kupepela pamo na ifwe, ifibusa fyesu kuti pa mbali bapepa kuli Lesa pa lubali lwesu, ukutulumbula amashina, ukulumbula impika yesu, no kwipusha ukuti atwafwilishe. Kabili ukwaafwa kukesa, pantu “[Yehova, NW] aishibo kupokolola bakapepa ku ca kwesha.”—2 Petro 2:9.

Inte sha kwa Yehova abatulumbula mu mapepo yabo na bo bene balikwata amesho—nakalimo ayacilapo ukulengo kupelelwa ukucila ayesu yene. Nalyo line, batwala ukusakamikwa kwesu pa ntanshi ya Mfumu ya Ciyayaya, nakalimo no kuponya fye ifilamba pa lubali lwesu. (Linganyeniko 2 Abena Korinti 2:4; 2 Timote 1:3, 4.) Ifyo tulingile ukuba aba kutasha pa lwa ici! Mu kutasha kabili pa milandu imbi iyalandwapo, lyene, lekeni tupepelane.