Yehova—Lesa Uusokolole fya Nkama

“Kuli Lesa mu muulu uusokolole fya nkama.”—DANIELE 2:28.

1, 2. (a) Ni mu nshila nshi Yehova apusaninako ku Cibambe cakwe icikalamba? (b) Ni shani fintu abantunse balangisha ubu bupusano?

YEHOVA, Lesa wapulishamo kabili uwa kutemwa mu bubumbo bonse, Kabumba fye umo mpo, ni Lesa wa mano no bupingushi. Takwata umulandu wa kuifishila, ukufisa imilimo yakwe, nelyo imifwaile. Pa nshita umwine atemenwe kabili ukulingana no kufwaya kwakwe, alaisokolola. Muli iyi nshila alipusanako ku Cibambe cakwe, Satana Kaseebanya, uwesha ukuifishilisha no kufisa amapange yakwe.

² Filya fine Yehova na Satana bapusana, e fyapusana na babapepa. Abakonka Satana beshibikilwa ku bumbimunda no kufutika. Besha ukumoneka abasuma, ilintu balebombe milimo ya mfifi. Abena Kristu ba ku Korinti baebelwe ukukanasunguka pa lwa ici cishinka. “Pantu ababe fi batumwa ba bufi, babomfi ba bucenjeshi, abaifungushanya ku kuba abatumwa ba kwa Kristu. Kabili te ca kusunguka; pantu Satana umwine aifungushanya ku kuba malaika wa lubuuto.” (2 Abena Korinti 11:13, 14) Abena Kristu, bena, bashintilila pali Kristu ukuti e Ntungulushi yabo. Ilintu aali pe sonde alangishe imibele ya kwa Wishi, Yehova Lesa mu kupwililika. (AbaHebere 1:1-3) Muli fyo, ukupitila mu kukonka Kristu, Abena Kristu balapashanya Yehova, Lesa wa cine, uushifisa kantu, kabili Lesa wa lubuuto. Na bo bene tabafwile ukuifisa, ukufishilisha umulimo babomba, nelyo imifwaile yabo.—Abena Efese 4:17-19; 5:1, 2.

 3. Ni shani fintu twingasuusha ukutunga kwa kuti abantu abasanguka Inte sha kwa Yehova balapatikishiwa ukuilunda ku “cakaniko ca mipepele ica mu bumfisolo”?

³ Pa nshita Yehova eshibe ukuti e ili iyalingisha, alasokolola ifyebo pa lwa mifwaile yakwe na pa lwa nshita ya ku ntanshi ifyo abantunse bashaishibe kale. Muli iyi nshila aba ni Lesa uusokolole fya nkama. E co, abantu abalefwaya ukumubombela balyebwa—e kuti balecincishiwa—ukusambilila ifyebo fya musango yo ifyasokololwa. Ukufwailisha kwa mu 1994 pali baNte ukucila pali 145,000 mu calo ca ku Bulaya cimo kwasokolwele ukuti, ilingi line, umo umo umwine alifwailishe ifisambilisho fya Nte sha kwa Yehova pa myaka itatu ilyo ashilasalapo ukuba Nte. Baliisalile abene mu kuitemenwa ukwabula ukupatikishiwa. Kabili batwalilile ukuisalila no kuibombela. Ku ca kumwenako, pa mulandu wa kuti bamo bamo tabasumineko ku fipimo fyasumbuka ifya mibele isuma ifya Bena Kristu, pa numa aba bantu bapingwilepo ukuti tabaalefwaya ukutwalilila ukuba Inte. Nangu ni fyo, cili ica buseko ukuti mu myaka yafumako isano ubwingi bwa baali kale Inte balibombelepo ukubwela e lyo no kubomba pamo nge Nte na kabili.

 4. Cinshi cishilingile kufuupula Abena Kristu ba busumino, kabili mulandu nshi?

⁴ Kwena, te bonse abaali Nte ababwela, kabili pali bene paba bamo abaali fye na mu fifulo fya fishingamo mu kati ka cilonganino ca Bwina Kristu. Ici tacilingile ukutusungusha, pantu nangu fye ni umo uwa bakonshi ba kwa Yesu abapalamisha, umutumwa Yuda, alipondweke. (Mateo 26:14-16, 20-25) Lelo bushe uyu uli mulandu wa kupatilapo ubuKristu mu bwine bweka? Bushe ici cilenenuna ukutunguluka kwa mulimo wa kusambilisha uwa Nte sha kwa Yehova? Awe iyo, cili fye nga fintu bushikamfutu bwa kwa Yuda Iskariote bushacilime imifwaile ya kwa Lesa.

Uwa Maka Yonse Lelo uwa Kutemwa

 5. Twaishiba shani ukuti Yehova na Yesu balitemwa abantunse, kabili ni shani fintu balangisha uku kutemwa?

⁵ Yehova ni Lesa wa kutemwa. Alasakamana abantu. (1 Yohane 4:7-11) Te mulandu no kuba uwasumbukisha, alaipakisha ukucite cibusa na bantunse. Ukukuma kuli umo uwa babomfi bakwe aba ku kale, tubelengo kuti: “Abrahamu atetekele Lesa, kabili calingilwe kuli wene ukuti bulungami; kabili aitilwe Cibusa wa kwa Lesa.” (Yakobo 2:23; 2 Imilandu 20:7; Esaya 41:8) Pamo fye nga fintu ifibusa fya buntunse baisokolwela amalyashi ya nkama, e fyo na Yehova acita ku fibusa fyakwe. Muli ici Yesu apashenye Wishi, pantu acitile cibusa na basambi bakwe no kubasokolwelako ifya nkama. Abebele ukuti: “Nshamwite abasha kabili; ico umusha taishiba ifyo shikulu wakwe acita: lelo namwita abanandi; ico namulenga mwishibe fyonse ifyo naumfwile kuli Tata.” (Yohane 15:15) Ifyebo fya mu nkama, nelyo “ifya mu bumfisolo,” ifishiba fye Yehova, Umwana wakwe, ne fibusa fyabo filabekatanya mu cikakilo cishingaputulwa ica kutemwa no kuipeelesha.—Abena Kolose 3:14.

 6. Mulandu nshi Yehova ashikabila kufisa ifyo alefwaya ukucita?

⁶ Ubupilibulo bwe shina Yehova, “Alalengo Kubako,” bulangilila amaka ayo akwata aya kuba icili conse ico alefwaya pa kuti engafikilisha imifwaile yakwe. Mu kupusanako na bantunse, Yehova takabila kufisa ico ali no kucita pa mulandu wa kutiina ukuti nakalimo bambi kuti bamucilima. Tengafilwa nangu panono, e co alasokolola apabuuta mu Cebo cakwe, Baibolo, ubwingi bwa fyo alefwaya ukucita. Alayo kuti: “Icebo candi . . . tacakabwelele ibusha kuli ine, kano cacite co natemwa, no kushuka muli ico nacitumina.”—Esaya 55:11.

 7. (a) Cinshi cintu Yehova asobele mu Edene, kabili ni shani fintu Satana aebeele Lesa ukuti alande cine? (b) Ni mu nshila nshi icishinte caba pali 2 Abena Korinti 13:8 cibombela lyonse?

⁷ Bwangu bwangu fye pa numa ya bucipondoka bwa mu Edene, Yehova alisokolwele mu kusupula icali no kufumamo mu kupelako mu fikansa ifyali pali wene ne Cibambe cakwe, Satana. Ubufyashi ubo Lesa alaile bwali no kulaswa icabipisha, lelo pa kashita fye akanono, ilintu Satana wena mu kupelako aali no kulashilwa imfwila. (Ukutendeka 3:15) Mu 33 C.E., Kaseebanya na cine alilashile Ubufyashi, Kristu Yesu, ukupitila mu kumwipaisha. Pa kucite co, Satana afikilishe Amalembo kabili pa nshita imo ine aebeele Yehova ukuti ni Lesa uulande cine, nangu cingati mu kushininkisha ici tacali e mifwaile ya kwa Satana. Ulupato ulo apata icine no bulungami, pamo pene ne mibele ya mutima iya cilumba, iyabulo kulapila, fyamulengele ukucita ico Lesa asobele mu kulungatika ukuti e co aali no kucita. Mu cine cine, bonse abakaanya icine, ukusanshako na Satana wine, ici cishinte cilabomba kuli bene: “Tatwingalwishe cine, lelo tulelwile cine.”—2 Abena Korinti 13:8.

8, 9. (a) Cinshi cintu Satana aishiba, lelo bushe uku kwishiba kulacincintila ukufikilishiwa kwa mifwaile ya kwa Yehova? (b) Kusoka nshi ukwaumfwika kuntu abakaanya Yehova basuula, kabili mulandu nshi?

⁸ Apantu Ubufumu bwa kwa Lesa bwalitendeke ukuteka mu kukanamoneka mu 1914, Ukusokolola 12:12 kwalibomba ukutila: “E ico sangalaleni, mwe myulu, na mwe baikalamo. Kalanda kuli imwe, mwe calo na bemba! pa kuti Kaseebanya naikila pali imwe, ali ne cipyu cikalamba, pa kwishibo kuti ali ne nshita inono fye.” Lelo bushe ukwishiba uko aishiba ukuti ali ne nshita inono fye kulalenga Satana ukwalula imibele yakwe? Ico kuti capilibule fyo Satana asumina ukuti Yehova e Lesa uulande cine no kuti apo aba Kateka Wapulamo, wene eka e wawaminwo kupepwa. Nangu cibe fyo, Kaseebanya tafwaya ukucimba, nangu line alishiba ifishinka.

⁹ Yehova alisokolola apabuuta icili no kucitika ilyo Kristu akesa ku kupingule calo ca kwa Satana. (Mateo 24:29-31; 25:31-46) Ukukuma kuli ici, ukulanda pa lwa bakateka ba ku calo, Icebo Cakwe cabilisho kuti: “Ilyo balesosa, abati, Mutende, kabili, Takuli ca kusakamana, e lyo uboni ubwa kupumikisha bwabemina, filya fine ubucushi bwa kupaapa bwisa pa mwanakashi uuli ne fumo.” (1 Abena Tesalonika 5:3) Abakonka Satana balasuula uku kusoka kwaumfwika. Balipofula pa mulandu wa mitima yabo iibifi, kabili ici cibalenga ukukanalapila pa mibele yabo iya bubifi no kwalula amapange yabo na matukuto ya kucincintila imifwaile ya kwa Yehova.

10. (a) Kufika ku cipimo nshi kuntu 1 Abena Tesalonika 5:3 pambi yafikilishiwa, lelo ni shani fintu abantu aba kwa Yehova balingile ukwankulako? (b) Mulandu nshi abantu bashatetekela ku ntanshi bengabela abacilanapo kukaluka pa kukaanya abantu ba kwa Lesa?

¹⁰ Ukucilisha ukutula 1986, lintu United Nations yabilishe ukuti uyu wali Mwaka wa Mutende mu Fyalo Fyonse, kwalibako ukulandapo ukwingi mu calo conse pa lwa mutende no mutelelwe. Kwalibako ukubombesha kwa maka ku kwesha ukuletako umutende pe sonde, kabili kwena balyeshako panono. Bushe ici cilelangilila ukuti ubu busesemo nabufikilishiwa bonse, nelyo bushe tulingile ukwenekela ukubilisha kwa kutenshe sonde ku ntanshi? Yehova ali no kulenga uyu mulandu ukumfwika mu nshita yakwe iyalinga. Pali ino nshita, natube abalola lwa ku mupashi, “abalolela no kufulukisho kwisa kwa Bushiku bwa kwa Lesa.” (2 Petro 3:12) Ilyo inshita iletwalilila ukupita e lyo ukulanda pa lwa mutende no mutelelwe kulecililanako, abantu bamo abaishiba pa lwa uku kusoka, lelo abasalapo ukusuula kwene, kuti pambi baba ne misuula yacishapo ukutunga ukuti Yehova takafikilishe cebo cakwe, nelyo ukuti tengafikilisha cene. (Linganyeniko Lukala Milandu 8:11-13; 2 Petro 3:3, 4.) Lelo Abena Kristu ba cine balishiba ukuti Yehova ali no kufikilishe mifwaile yakwe!

Umucinshi Walinga uwa Fibombelo Yehova Alebomfya

11. Cinshi cintu Daniele na Yosefe basambilile pa lwa kwa Yehova?

¹¹ Lintu Imfumu Nebukadnesari, kateka wa buteko bwa Babele, alotele iciloto cikalamba ico afililwe ukwibukisha, alombele ukwafwiwa. Aba bung’anga bakwe, aba finjelengwe, na ba malele balifililwe ukumweba iciloto cakwe nelyo ukumulondolwela ubupilibulo bwa ciko. Umubomfi wa kwa Lesa Daniele, nangu cibe fyo, alicitile co, nangu ca kuti alisumine bwangu bwangu fye ukuti ukusokololwa kwa ciloto no bupilibulo bwa ciko tafyali pa mulandu wa mano yakwe. Daniele atile: “Kuli Lesa mu muulu uusokolole fya nkama, kabili alenge mfumu Nebukadnesari ukwishibe cikesaba ku nshiku sha kulekelesha.” (Daniele 2:1-30) Imyanda ya myaka iingi ilyo ici tacilacitika, Yosefe, kasesema umbi uwa kwa Lesa, mu kupalako aliimwenene ukuti Yehova Alasokolole fya nkama.—Ukutendeka 40:8-22; Amose 3:7, 8.

12, 13. (a) Kasesema wa kwa Lesa uwakulisha aali nani, kabili mulandu nshi mwayasukile fyo? (b) Ni bani pali lelo babomba nga “bakaangalila pa ca nkama ca kwa Lesa,” kabili ni shani fintu tulingile ukubamona?

¹² Kasesema wa kwa Yehova uwakulisha uwabalile abako pe sonde aali ni Yesu. (Imilimo 3:19-24) Paulo alondolwele ukuti: “Kale Lesa alelandila kuli bashifwe muli bakasesema mu fyakaniko ifingi ne misango iingi, lelo pa mpela ya nshiku shino nalandila kuli ifwe mu Mwana, uo asontele ukube mpyani ya fintu fyonse, muli uyo kabili acitiile ifya muyayaya.”—AbaHebere 1:1, 2.

¹³ Yehova alandile ku Bena Kristu ba mu kubangilila ukupitila mu Mwana wakwe, Yesu, uwabebele ifya nkama fya bulesa. Yesu abebele ukuti: “Kuli imwe kwapeelwo kwishibe fya nkama fya bufumu bwa kwa Lesa.” (Luka 8:10) Pa numa Paulo alandile pa lwa Bena Kristu basalwa ukuti baali “babomfi ba kwa Kristu kabili bakaangalila pa ca nkama ca kwa Lesa.” (1 Abena Korinti 4:1) Ilelo, Abena Kristu basubwa batwalilila ukubomba muli ico cifulo, ukupanga ibumba lya musha wa cishinka kabili uwashilimuka ilyo ukupitila mwi Bumba Litungulula lipayanya ica kulya ca ku mupashi pa nshita iiyene. (Mateo 24:45-47) Nga ca kuti twalicindikisha bakasesema ba kwa Lesa abaikele mu nshiku shapita, kabili ukucilisha Umwana wa kwa Lesa, bushe tatufwile ukuba no mucinshi umo wine na ku cibombelo ca buntunse ico Yehova alebomfya pali lelo ku kusokolole fyebo fya mu Baibolo ifikabilwa nga nshi ku bantu bakwe muli shino nshita shayafya?—2 Timote 3:1-5, 13.

Ukubomba pa Mbilibili Nelyo mu Bumfisolo?

14. Ni lilali lintu Abena Kristu babomba mu bumfisolo, kabili ilyo balecite co ca kumwenako ca kwa nani bakonka?

¹⁴ Bushe ukuipeelesha kwa kwa Yehova mu kusokolole fya nkama kulepilibulo kuti Abena Kristu pa nshita iili yonse na ku ncende iili yonse balingile ukusokolola fyonse ifyo baishiba? Kwena Abena Kristu bakonka ukupanda amano kwa kwa Yesu uko apandile abatumwa bakwe ukuba “abacenjela nge nsoka, kabili abafuuke nge nkunda.” (Mateo 10:16) Nga ca kuti babindwa ukupepa Lesa ukupusana na bakampingu wabo, Abena Kristu batwalililo “kunakila Lesa,” pantu balishibo kuti takwaba icibombelo ca bantunse icakwata amaka ya kubinda ukupepa Yehova. (Imilimo 5:29) Yesu umwine wine alangishe ifyo ici calinga. Tubelengo kuti: “Apo papitile ifi fintu, Yesu aleenda mu Galili; pantu talefwaya kwenda mu Yudea, ico abaYuda balefwayo kumwipaya. Awe umutebeto wa baYuda, uwa nsakwe, wali mupepi. E ico Yesu atile kuli bene [bamunyina ba ku mubili abashamutetekele], . . . Nineni ni mwe, muye ku mutebeto; ine nshilenina nomba ku mutebeto uyu, ico inshita yandi tailafika. Awe pa kusosa ifi fintu kuli bene, aikele mu Galili. Lelo ilyo bamunyina baninine baya ku mutebeto, e lyo wene na o aninine, apabuuta iyo, lelo kwati ni mu bumfisolo.”—Yohane 7:1, 2, 6, 8-10.

Bushe Tulingile Ukusokolola Nelyo Tatulingile Ukusokolola?

15. Ni shani fintu Yosefe alangishe ukuti ukusunge nkama inshita shimo shimo kwaba cintu cabamo kutemwa?

¹⁵ Limo limo, ukusunge nkama kwaba cintu ca mano kabili pa nshita imo ine icabamo kutemwa. Ku ca kumwenako, ni shani fintu Yosefe, wishi umuleshi uwa kwa Yesu, ayankwileko lintu aishibe ukuti umukashana akobekele, Maria, aali ne fumo? Tubelengo kuti: “Na Yosefe umulume wakwe pa kubo walungama kabili uushafwaile ukumuseebanya apabuuta, afwaile ukumuleka mu bumfisolo.” (Mateo 1:18, 19) Fintu cali no kubulwamo icikuuku ukumuseebanya pa cintubwingi!

16. Cishingamo nshi ica baeluda, pamo pene na bonse bambi ababa mu cilonganino, ukukuma ku kusunge nkama?

¹⁶ Imilandu ya mu nkama iingaleto museebanya nelyo ukukalifya abantu tailingile ukusokololwa ku bashilingile. Baeluda ba Bwina Kristu balebukishe ci lintu balefunda nelyo ukusansamusha Abena Kristu banabo nelyo fye ukubasalapula pa kubembukila Yehova icabipisha. Cilafwaikwa ukubombela pali iyi milandu mu nshila ya mu Malembo; ukusokolole fyebo fya nkama ku bashibimbilwemo takufwaikwa kabili taili ni nshila ya kutemwa. Mu kushininkisha, ababa mu cilonganino ca Bwina Kristu tabakeshe ukufwaya baeluda ukubebako ifyebo fya nkama lelo bali no kucindika icishingamo ca baeluda ica kusunge nkama. Amapinda 25:9 yasoso kuti: “Lubululeni no mubiyo umulandu babili, ne ca nkama cakwe wisokolwela umbi.”

17. Mulandu nshi Abena Kristu ilingi line basungile nkama, lelo mulandu nshi bashilekabila ukucite co lyonse fye?

¹⁷ E fyo caba na ku baba mu lupwa nelyo pa kati ka fibusa fyapalamisha. Ukukanasokolole fintu fimo kwalikatama pa kusengauka ukupusana ne fibusa. “Umwela wa ku kapinda ka ku kuso ulete mfula, no lulimi lwa lwambo lucite cinso ca cipyu.” (Amapinda 25:23) Kwena, bucishinka kuli Yehova na ku fishinte fyakwe ifyalungama, ukusanshako no kutemwa abalufyenye, inshita shimo shimo kuti fyatulenga ukwebako abafyashi, baeluda ba Bwina Kristu, nelyo abantu bambi abali ne nsambu sha kwishiba ifyo fintu fya nkama.a Lelo ilingi line, Abena Kristu balasunga inkama sha bambi, nga fintu fye basunga inkama shabo abene.

18. Mibele nshi itatu iya Bwina Kristu iingatwaafwa ukupimununa ico tulingile ukusokolola na cintu tushilingile ukusokolola?

¹⁸ Mu kwipifya, Umwina Kristu alapashanya Yehova ukupitila mu kusunga imilandu imo mu nkama lintu cakabilwa, ukuisokolola fye ilyo cili icalinga. Pa kupingulapo ico alingile ukusokolola na cintu ashilingile kusokolola, atungululwa no kuicefya, icitetekelo, no kutemwa. Ukuicefya kulamucilikila ku kuituntumba, ukwesha ukusekesha bambi ukupitila mu kubeba ifyo eshibe fyonse nelyo ukupitila mu kubacincimusha ne fya nkama ifyo ashabebe no kubeba. Ukutetekele Cebo ca kwa Yehova ne cilonganino ca Bwina Kristu filamukunta ukushimikila ifyebo fya mu Baibolo ifyapayanishiwa na Lesa ilintu ali uwapempwila ukusengauka ukusose fintu ifingakalifya bambi lintu fye bafyumfwa. Ee, ukutemwa kulamukunta ukusose fintu apabuuta ifyo filecindika Lesa kabili ifyo abantu balekabila ukwishiba pa kuti benganonka umweo. Ifintu fya mu nkama, fyena, alafishilisha, pa kwishibo kuti ilingi line ukufisokolola kuli no kulangilila ukuti tali na kutemwa.

19. Ni ncitilo nshi iyafwa ukwishiba Abena Kristu ba cine, kabili finshi fifumamo?

¹⁹ Iyi mimwene yashikatala ilaafwa ukwishiba Abena Kristu ba cine. Tabakaana ukulondolola Lesa ukupitila mu kusoso kuti takwata ishina nelyo ukuti kwaba Balesa batatu aba mu nkama abashingalondololwa. Balesa bashaishibikwa basangwa mu kupepa kwa bufi, te mu kupepa kwa cine iyo. (Moneni Imilimo 17:22, 23.) Inte shasubwa isha kwa Yehova balitesekesha nga nshi ipaalo lyabo ilya kuba “bakaangalila pa ca nkama ca kwa Lesa.” Ukupitila mu kusokolwela bambi ci ca nkama apabuuta, balaafwa ukukulila aba mitima ya bufumacumi ku kufwaya ukuba ifibusa na Yehova.—1 Abena Korinti 4:1; 14:22-25; Sekaria 8:23; Malaki 3:18.

[Futunoti]

Kuti Mwayasuka Shani?

Mulandu nshi Yehova ashikabila ukufisa ico alefwaya ukucita?

Ni bani bantu Yehova asokolwela ifya nkama?

Cishingamo nshi cintu Abena Kristu baba na co ukukuma ku kusunge nkama?

Mibele nshi itatu ili no kwaafwa Abena Kristu ukwishiba ico bengasokolola na cintu bashifwile ukusokolola?

[Ifikope pe bula 8, 9]

Yehova asokolole fya nkama ukupitila mu Cebo cakwe