Twalilileni Ukwenda mu Nshila ya kwa Yehova

“Lolela Yehova, no kukomena mu nshila yakwe, na o akakusansabika ku kupyaninine calo.”—AMALUMBO 37:34.

1, 2. Finshi ukwenda mu nshila ya kwa Yehova kwasanshishemo ku Mfumu Davidi, kabili cinshi kufwaya kuli ifwe?

“NENGENI ukwishibe nshila iyo mfwile ukwendamo, pantu kuli imwe e ko nalosho mweo wandi.” (Amalumbo 143:8) Abena Kristu ilelo na bo balalandako ayo mashiwi ya Mfumu Davidi no mutima onse. Mu kufumaluka bafwaya ukutemuna Yehova no kwenda mu nshila yakwe. Cinshi ici cisanshamo? Kuli Davidi, capilibwile ukusunga amalango ya kwa Lesa. Casanshishemo ukucetekela Yehova ukucila ukucetekela ukumana akapi ne nko. Kabili capilibwile ukubombela Yehova muli bucishinka, te kubombela balesa ba nko ishina mupalamano. Ku Bena Kristu, ukwenda mu nshila ya kwa Yehova kubimbamo ifingi.

² Icintu cimo tufwile ukwishiba ca kuti ukwenda mu nshila ya kwa Yehova ilelo cipilibula ukutetekela ilambo lya cilubula ilya kwa Yesu Kristu, ukumupokelela ukuti e “nshila ne cine no mweo.” (Yohane 3:16; 14:6; AbaHebere 5:9) Na kabili cipilibula no kufishapo “imbela ya kwa Kristu,” iisanshamo ukutemwana na banensu, maka maka ukutemwa bamunyina basubwa aba kwa Yesu. (Abena Galatia 6:2; Mateo 25:34-40) Abenda mu nshila ya kwa Yehova balitemwa ifishinte fyakwe na mafunde. (Amalumbo 119:97; Amapinda 4:5, 6) Balakatamika ishuko lyabo ilya mutengo ilya kubombako ubutumikishi bwa Bwina Kristu. (Abena Kolose 4:17; 2 Timote 4:5) Ipepo cintu ca lyonse mu mikalile yabo. (Abena Roma 12:12) ‘Balacenjela pa kwenda kwabo pa kuti beenda nga batumpa iyo, kano nga ba mano.’ (Abena Efese 5:15) Ukwabula no kutwishika, tabaipusula ifya ku mupashi pa kuti bakwate ifyuma nelyo ifya kuilemena fishalolamo. (Mateo 6:19, 20; 1 Yohane 2:15-17) Ukulunda pali fyo, bucishinka kuli Yehova no kumucetekela fyalicindama. (2 Abena Korinti 1:9; 10:5; Abena Efese 4:24) Mulandu nshi? Pantu imibele tulimo yapalana ne ya bena Israele.

Tukabila Ukucetekela na Bucishinka

 3. Mulandu nshi bucishinka, icitetekelo, no kucetekela fingatwafwila ukwikalilila mu nshila ya kwa Yehova?

³ Israele lwali luko ulunono ulwashingulwikwe na bena mupalamano abalwani abalecita ubupulumushi mu mipepele yabo iya tulubi. (1 Imilandu 16:26) Ni Israele eka walebombela Lesa wine wine uushimoneka, Yehova, kabili alefwaya balekwata imibele iya pa muulu. (Amalango 6:4) Na lelo line, bantunse fye amamilioni ayanono e bapepa Yehova, kabili bekala mwi sonde umwaba abekashi ukufika ku mabilioni 6 abo imipepele yabo ne mibele fyapusaninina nga nshi ne yabo. Na ifwe nga twaba pali abo abanono, tufwile ukuibaka epali twasongwa mu nshila yalubana. Kuti twaibaka shani? Ifikatwafwa ni bucishinka kuli Yehova Lesa, ukumutetekela, no kucetekela nga nshi ukuti akafikilisha ifyo alaya. (AbaHebere 11:6) Ici cikatwafwa ukukanacetekela ifintu ifyo aba pano isonde bacetekela.— Amapinda 20:22; 1 Timote 6:17.

 4. Mulandu nshi aba pano isonde ‘amano yabo yayaluke mfifi’?

⁴ Umutumwa Paulo alondolwele ifyo Abena Kristu bafwile ukupusanako na ba pe sonde lintu alembele ati: “E ico ndesosa no kushimikila muli Shikulu, nati, mwilaenda ifyo Abena fyalo benda mu buwelewele bwa mitima yabo, aba amano yabo yayaluke mfifi, pa kuba abanunuka ku mweo wa kwa Lesa, pa mulandu wa kukanaishiba ukuli muli bene, pa mulandu wa buumununu bwa mitima yabo.” (Abena Efese 4:17, 18) Yesu e “lubuuto lwa cine.” (Yohane 1:9) Bonse abamukaana nelyo abaitunga ukusumina muli wene lelo abashumfwila “imbela ya kwa Kristu” “amano yabo yayaluke mfifi.” Tabanyantamo na kakondo mu nshila ya kwa Yehova, lelo ‘balinunuka ku mweo wa kwa Lesa.’ Nangu bayumfwe aba mano shani mu nshila ya pano isonde, baba no ‘kukanaishiba muli bene.’ Ukukanaishiba ukwishiba uko kutungulula ku mweo, no kukanaishiba Yehova Lesa na Yesu Kristu.—Yohane 17:3; 1 Abena Korinti 3:19.

 5. Nangu ca kuti ulubuuto lwa cine lulebalika mu calo, mulandu nshi abantu abengi bashumfwila?

⁵ Nalyo line, icine cilebalika mu calo! (Amalumbo 43:3; Abena Filipi 2:15) “Amano yaulo tupundu mu misebo.” (Amapinda 1:20) Umwaka wapwile Inte sha kwa Yehova shapoosele amaawala ukucila pali bilioni umo ukwebako abanabo pa lwa kwa Yehova Lesa na Yesu Kristu. Abengi nga nshi balyumfwilile. Lelo bushe tulingile ukupapa pantu bambi tabaumfwile? Iyo. Paulo alandile pa lwa “buumununu bwa mitima yabo.” Bambi tabakutika pa mulandu wa bukaitemwe no kutemwe ndalama. Bambi icilenga caba kupepa kwa bufi nelyo ukutemwa ifya calo ukuseekele nga nshi ilelo. Ukushomboka abantu bashomboka mu mikalile kwalenga abengi ukusuulako kuli Lesa. Bambi balakaana ukwikala umwabele fipimo fya kwa Yehova ifyasumbuka. (Yohane 3:20) Bushe umutima wa wenda mu nshila ya kwa Yehova kuti waba uwa buumununu muli fyo fintu?

6, 7. Nangula ca kuti balepepa Yehova Lesa, ni pa nshita nshi abena Israele bapumbwike, kabili mulandu nshi?

⁶ Mu Israele ici calicitike, nga fintu Paulo alondolwele. Alembele ukuti: “Ifi fintu fya kutusoka, ukuti twiba abakumbwe fibi, filya balya bakumbilwe. Kabili mwiba abapepo tulubi, ifyali bamo aba muli abo; ifyo calembwa, aciti, Abantu baikele ku kulya no kunwa, e lyo baimine ku kwangala. Kabili twicita bulalelale filya bamo ba muli abo bacitile, na mu kasuba kamo bawile amakana amakumi yabili na yatatu.”—1 Abena Korinti 10:6-8.

⁷ Paulo ico alandapo intanshi ni lilya abena Israele bapepele umutepa wa ng’ombe uwa golde mwi samba lya Lupili lwa Sinai. (Ukufuma 32:5, 6) Uku kwali kutobe funde lya bulesa ilyo mu milungu fye iinono iyapitilepo basumine ukuti bali no kumfwila. (Ukufuma 20:4-6; 24:3) Lyene, Paulo alanda pa nshita lintu abena Israele bapepele Baali na bana banakashi ba mu bena Moabu. (Impendwa 25:1-9) Ukupepa umutepa wa ng’ombe kwalimo ukuiposaika kwine kwine, ‘ukwangala.’a Ukupepa Baali kwalimo bucilende bwapumbusa. (Ukusokolola 2:14) Mulandu nshi abena Israele bacitile ishi membu? Pantu balekele imitima yabo ‘ukukumbwe fibi’—nampo nga bakumbilwe ukupepo tulubi kwine nelyo ubupulumushi bwali muli ilya mipepele.

 8. Finshi twingasambilila ku fyacitikile abena Israele?

⁸ Paulo atile tulingile ukusambililako kuli fi fintu. Ukusambililako finshi? Umwina Kristu tengatontonkanyanapo ukukontamina umutepa wa ng’ombe nelyo lesa wa ku kale uwa bena Moabu. Lelo ni shani pa lwa bucilende no kuiposaika? Ifi fyaliseeka ilelo, kabili nga twaleka ukukumbwa fyene kwakula mu mitima yesu, fili no kutupumbula kuli Yehova. Na ifwe cikaba cimo cine nga fintu cali kuli balya bapepele utulubi—e kuti tukanunuka kuli Lesa. (Linganyeniko Abena Kolose 3:5; Abena Filipi 3:19.) E mulandu wine Paulo pa kupwisha ukulanda pali fi fintu akonkomesha abasumina banankwe ati: “Butukeniko ku kutootelo tulubi.”—1 Abena Korinti 10:14.

Ifya Kutwafwa mu Kwenda mu Nshila ya kwa Lesa

 9. (a) Kwafwa nshi tupokelela pa kuti tutwalilile ukwenda mu nshila ya kwa Yehova? (b) Ni nshila nshi imo tumfwilamo ‘icebo ku numa yesu’?

⁹ Nga twapampamina pa kwenda mu nshila ya kwa Yehova, tatulekeleshiwa. Esaya aseseme ati: “Kabili ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.” (Esaya 30:21) Ni shani fintu ‘amatwi yesu’ yomfwa ‘icebo ku numa yesu’? Kwena, takwaba umuntu ilelo uumfwa ishiwi lya cine cine nelyo uupokelela ifyebo ukufuma kuli Lesa. “Icebo” cumfwika cisa kuli ifwe bonse mu nshila imo ine. Ica kubalilapo, cisa ukupitila mu Malembo yapuutwamo, Baibolo, umwaba amatontonkanyo ya kwa Lesa ne fyo abomba na bantunse. Apantu cila bushiku tulomfwa amalyashi ukufuma ku ‘banunuka ku mweo wa kwa Lesa,’ tulekabila ukulabelenga Baibolo lyonse no kwetetulapo, nga atwikala abomi lwa ku mupashi. Ici cikatwafwa ukusengauka “ifintu fya fye” no kuba ‘abapwililila, abaiteyanya ku kubombo mulimo onse usuma.’ (Imilimo 14:14, 15; 2 Timote 3:16, 17) Cikatukosha, ukutulenga ukushangila, no kutwafwa ‘ukulenge mibele yesu ukutunguluka.’ (Yoshua 1:7, 8) Eco, Icebo ca kwa Yehova citucincisha ati: “Na nomba, mwe bana, umfweni kuli ine; balishuka ababake mibele yandi. Umfweni ukusalapula no kuba aba mano, kabili mwileka amalango yandi.”—Amapinda 8:32, 33.

10. Ni nshila nshi iya cibili iyo tumfwilamo ‘icebo ku numa yesu’?

¹⁰ Inshila na imbi tumfwilamo ‘icebo ku numa yesu’ yaba kupitila mu “musha wa cishinka kabili uwashilimuka,” uutupa “ifya kulya mu nshita iyene.” (Mateo 24:45-47) Ifi fya kulya fishila mu mpapulo shashimpwa pali Baibolo, kabili nga ni mu myaka ya nomba line, ifi fya kulya fyalipaka. Ku ca kumwenako, twalyumfwikisha ukusesema ukupitila muli magazini wa Ulupungu lwa kwa Kalinda. Muli uyu magazini, twalikoseleshiwa ukuba aba mukoosha mu mulimo wa kushimikila no kupanga abasambi te mulandu ne misuula ilefulilako, twalyafwiwa ukusengauka ifiteyo, kabili twalicincishiwa ukulundulula imibele ya Bwina Kristu. Mwandi tulakatamika ifya kulya fya musango yo mu nshita iyene!

11. Londololeni inshila ya butatu iyo tumfwilamo ‘icebo ku numa yesu.’

¹¹ Umusha wa cishinka kabili uwashilimuka na kabili atupa ifilyo ukupitila mu kulongana kwesu ukwa lyonse. Uku kwaba kulongana kwa pa cilonganino, ukulongana kukalamba ukwa mu miputule, na mabungano ya pa mwaka. Mwina Kristu nshi uwa busumino uushakatamika ukubungana kwa musango yo? Kwalicindama ku kutwafwa ukwenda mu nshila ya kwa Yehova. Apantu abengi bapoosa inshita iitali ku ncito na ku sukulu capamo na bashasumina, ukubishanya lyonse na Bena Kristu cine cine kulapususha. Ku kulongana e ko tukwata ishuko lyawamisha ilya “kucincimushanisha ku kutemwa kabili ku kubombe milimo isuma.” (AbaHebere 10:24) Twalitemwa bamunyinefwe, kabili twalitemwa ukubishanya na bo.—Amalumbo 133:1.

12. Mupampamina nshi uwakwata Inte sha kwa Yehova, kabili baulangishe shani nomba line?

¹² Pa kukoshiwa ne fyo ifya kulya fya ku mupashi, abantu mupepi na mamilioni 6 ilelo baleenda mu nshila ya kwa Yehova, kabili bambi na bo abafikile mu mamilioni balesambilila Baibolo ku kwishiba ifya kwenda mu nshila ya kwa Yehova. Bushe balafuupulwa nelyo ukutompoka umulandu wa kuti banono ku bantu ba pe sonde lyonse abafika ku mabilioni? Nakalya! Bapampamina pa kutwalilila ukumfwila ‘icebo ku numa yabo,’ ukucita ukufwaya kwa kwa Yehova muli bucishinka. Ku kulangilila apabuuta uyu mupampamina, pa Mabungano ya Citungu na ya pa Kati ka Nko aya mu 1998 na 99 ayaleti “Imikalile ya Bukapepa,” abasangilweko balisuminishenye ku kulangilila apo baiminina ne mitima yabo yonse. Ukusuminishanya ni uku kwalakonkapo.

Ukusuminishanya

13, 14. Bushe Inte sha kwa Yehova shimona shani imibele ya mu calo?

¹³ “Ifwe, fwe Nte sha kwa Yehova fwe balongene pe Bungano lya ‘Imikalile ya Bukapepa,’ tulesumina no mweo onse ukuti imikalile ya bukapepa e yawamisha ukwikalilamo. Nangu cibe fyo, twalishibe fyo icinabwingi ca bantu tabaimona nge yawamisha. Abantunse balyeshako imfundo shishaifulila, amano ya buntunse, ne mfundo sha fya mipepele ukumone cingaba e mikalile yawamisha. Ukubebeta mu bufumacumi ifyacitikila abantunse ne mibele ya calo ilelo kushininkisha fye ukuti amashiwi ya bulesa ayalembwa pali Yeremia 10: 23 aya kuti: ‘Te kwa muntu uuleya ukushikimika amatampulo yakwe,’ ya cine.

¹⁴ “Cila bushiku tulamona ubushininkisho ubulango kuti aya mashiwi ya cine. Icikalamba icalenga, abantunse balisuula imikalile ya bukapepa. Abantu bakonkelela ico bamona ukuti e calungama. Ifyafumamo fyalileta akayofi, ukubongoloka kwa ndupwa, ukusha abana ukwabula ubutungulushi; ukukonkelela bumulila cuma, ubuletako fye bucafye no kukalifiwa; bumpulamafunde bwa buwelewele no lukaakala, ubulenga imintapendwa ukuculilamo; ukushenkana ne nkondo sha mitundu, ishilofya imyeo ya bantu iishaifulila; bucisenene ubuleyanana icabipisha, ubulefusha ifikuko fya malwele yapishiwa mu kulaalana. Aya yali yanono fye pa mafya yapikana ayashaifulila ayapumfyanya ukukonkelela insansa, umutende, no mutelelwe.

15, 16. Mupampamina nshi walumbulwilwe mu kusuminishanya ukukuma ku mikalile ya bukapepa?

¹⁵ “Pa mulandu wa mibele ya bulanda iyo abantunse balimo na pa mulandu wa kupalamina kwa ‘kulwa kwa bushiku bukalamba bwa kwa Lesa wa maka yonse,’ ukwitwa Armagedone (Ukusokolola 16:14, 16), ifwe fwe Nte sha kwa Yehova tulesuminishanyo kuti:

¹⁶ “Ica kubalilapo: Tuimona nga fwe ba kwa Yehova Lesa, apo twaiipeela umo umo kuli wene umupwilapo, kabili tukasungilila icitetekelo cabulo kutenshiwa mu kupayanya kwa kwa Yehova ukwa cilubula ukupitila mu Mwana wakwe, Yesu Kristu. Twalipampamina pa kwendela mu nshila ya kwa Lesa iya ku mweo, ukubomba nge Nte shakwe no kunakila kuli bumulopwe bwakwe ubusokolokela mu kuteka kwa kwa Yesu Kristu.

17, 18. Ni pi Inte sha kwa Yehova shikatwalilila ukwiminina ukukuma ku fipimo fya mibele isuma na ku bwananyina bwa Bwina Kristu?

¹⁷ “Ica bubili: Tukatwalilila ukukakatila ku fipimo fya pa muulu ifya mibele isuma ne fya ku mupashi ifya mu Baibolo. Twalipampamina ukutaluka ku kwenda ifyo Abena fyalo benda mu buwelewele bwa mitima yabo. (Abena Efese 4:17-19) Natupingulapo ukutwalilila ukuba aba busaka pa ntanshi ya kwa Yehova kabili ababula akabi ku fya pano isonde.—Yakobo 1: 27.

¹⁸ “Ica butatu: Tukekatilila ku fintu Baibolo ilanda nga aba bwananyina ba Bwina Kristu aba mu calo conse. Tukatwalilila ukukanaibimbamo pamo nga Bena Kristu mu milandu ya calo. Tatwakaleke tukekatwe mu lupato nelyo mu malekano ya mushobo, ifyalo, nelyo mukowa.

19, 20. (a) Cinshi abafyashi Abena Kristu bali no kucita? (b) Ni shani Abena Kristu ba cine bonse bali no kulaishibisha ukuti basambi ba kwa Kristu?

¹⁹ “Icalenga bune: Fwe bafyashi tuli no kufundisha abana besu inshila ya kwa Lesa. Tuli no kubike ca kumwenako mu mikalile ya Bwina Kristu, icilesanshamo ukubelenga Baibolo lyonse, isambililo lya lupwa, no kubombako no mweo onse imilimo ya cilonganino na mu butumikishi bwa mwi bala.

²⁰ “Icalenga busano: Ifwe bonse tuli no kutukuta ukulundulula imibele ya bukapepa iyo Kabumba wesu alangisha, kabili tuli no kwesha ukupashanya ifyo aba ne nshila shakwe, nge fyacitile Yesu. (Abena Efese 5:1) Natupingulapo ukulenga fyonse filecitilwa mu kutemwa, muli fyo ukuishibisha nga basambi ba kwa Kristu.—Yohane 13:35.

21-23. Cinshi Inte sha kwa Yehova shikatwalililo kucita, kabili mulandu nshi bashitwishikila?

²¹ “Icalenga 6: Twakulashimikila imbila nsuma ya Bufumu bwa kwa Lesa ukwabulo kuleka, ukulapanga abasambi, kabili tukabasambilisha imikalile ya bukapepa no kubakoselesha ukulasambilishiwa na fimbi ku kulongana kwa cilonganino.—Mateo 24:14; 28:19, 20; AbaHebere 10:24, 25.

²² “Icalenga 7: Pa lwesu umo umo kabili no kuteyanya kwesu ukwa mipepele konse, tukatwalilila ukutangisha ukufwaya kwa kwa Lesa mu mikalile yesu. Pa kubomfya Icebo cakwe Baibolo nge ca kututungulula, tatwakapumbukile ku kwa kulyo nelyo ku kwa kuso, muli fyo ukushininkisho kuti imikalile ya bukapepa yalipulamo pa mikalile ya ba pano isonde. Tuli abapampamina pa kukonkelela imikalile ya bukapepa—mu kushangila kabili muli bucishinka, pali nomba no muyayaya!

²³ “Twasuminishanya ifi fyonse pantu twalicetekela umupwilapo ubulayo bwa kwa Yehova ubwa kutemwa ubwa kuti onse uucito kufwaya kwa kwa Lesa akekalililo muyayaya. Twasuminishanya ifi fyonse pantu twalishininwa ukuti ukumfwila ifishinte, ukufunda no kukonkomesha kwa mu Malembo, e mikalile yawamisha ilelo kabili e ibike ntendekelo yawamisha iya ku ntanshi, pa kuti twingekata ku mweo uwabo mweo wine wine. (1 Timote 6:19; 2 Timote 4:7b, 8) Ne cacilapo pali ifi fyonse, twasuminishanya ifi fyonse pantu twalitemwa Yehova Lesa no mutima wesu onse, umweo wesu onse, na ku kutontonkanya kwesu konse, na ku maka yesu yonse!

24, 25. Bushe abantu bayaswike shani pa kusuminishanya kwatubulwilwe, kabili cinshi abenda mu nshila ya kwa Yehova bapampaminapo ukucita?

²⁴ “Bonse mwe balongene pali lino ibungano abalefwaya ukusuminishako, twapaapaata soseni amuti EE!”

²⁵ Ifibansa ifingi nga nshi mwi sonde lyonse fyalitentele ilyo bonse abasangilweko bapundile abati “EE!” Inte sha kwa Yehova tashitwishika ukuti shikatwalilila ukwenda mu nshila ya kwa Yehova. Shalicetekela Yehova umupwilapo no kutetekela ukuti akafikilisha ifyo alaya. Inte shitwalilila isha cishinka kuli wene, nangu cikabe shani. Kabili shapampamina pa kucita ukufwaya kwakwe.

‘Lesa Mwina Mwesu’

26. Mibele nshi iya nsansa iyabamo abenda mu nshila ya kwa Yehova?

²⁶ Inte sha kwa Yehova shibukisha ukukonkomesha kwa kwa kemba wa malumbo ukwa kuti: “Lolela Yehova, no kukomena mu nshila yakwe, na o akakusansabika ku kupyaninine calo.” (Amalumbo 37:34) Tashilaba ifyebo fya kukoselesha ifya kwa Paulo ifya kuti: “Lesa nga aba mwina mwesu, nani engapinkana na ifwe? Uyo ushaciikile Mwane wine, lelo amupooseele ifwe bonse, bushe akaleka shani ukutupeelo bupe ifintu fyonse pamo nankwe?” (Abena Roma 8:31, 32) Nga twatwalilila ukwenda mu nshila ya kwa Yehova, akatupeeleshe “fintu fyonse ifya muilemeno.” (1 Timote 6:17) Takwaba uko twingaba ukwacila muno twaba, mu nshila ya kwa Yehova, capamo na bamunyinefwe batemwikwa na bankashi. Apo Yehova aba mwina mwesu, lekeni tupampamine pa kwikalililamo no kushipikisha ukufika ku mpela, abacetekela nga nshi ukuti mu nshita yakwe, tukamona uko akafikilisha amalayo yakwe yonse fye.—Tito 1:2.

[Futunoti]

Bushe Muleibukisha?

◻ Cinshi cifwaikwa pa kuti Umwina Kristu ende mu nshila ya kwa Yehova?

◻ Mulandu nshi tukabila ukukusha ukucetekela Yehova na bucishinka kuli wene?

◻ Kwafwa nshi kwabako ilyo tuleenda mu nshila ya kwa Yehova?

◻ Landenipo ifishinka fimo mu kusuminishanya kwaliko pa Mabungano ya “Imikalile ya Bukapepa.”

[Ifikope pe bula 18]

Kwali ukusuminishanya kwacindama pa Mabungano ya pa Kati ka Nko na ya Citungu ayaleti “Imikalile ya Bukapepa”