Akuyeni ku Ntanshi—Mulelunduluka

ILYO mwasambilile ukwikalilila ku fyo Baibolo ifunda pa muku wa kubalilapo, imitontonkanishishe, imilandile, ne mibele iyalimbile ne mishila muli imwe yatendeke ukwaluka panono panono. Ukwaluka ukwingi kwacitilwe ilyo mushilalembesha na mwi Sukulu lya Butumikishi Ilya Bulesa. Napamo nomba mwalilunduluka ica kuti mwalipeela ubumi bwenu kuli Yehova. Bushe ninshi mufwile ukuleka ukulunduluka? Awe iyo. Ulubatisho lwenu ni ntendekelo fye.

Umusambi Timote ali ni eluda wa Bwina Kristu ilyo umutumwa Paulo amwebele ‘ukuba no mute’ ku kufunda amufundile na ku mulimo aseekeshiwe—amwebele ‘ukwikala muli’ fyene—ukuti ‘ukulunduluka kwakwe kumoneke kuli bonse.’ (1 Tim. 4:12-15) Nampo nga e lintu mutendeke fye ukwenda mu nshila ya cine nelyo mwalibelesha ukwikala imikalile ya Bwina Kristu, mulingile ukufwaisha ukulunduluka.

Pa Abena Efese 3:14-19, tubelengapo ukuti Paulo apepele ukuti abasumina banankwe “[bakose] ku kulingulula . . . ifyabo bufumo no kulepa no kusansama no kushika” ifya cine. Pa kuti bacite fyo, Yesu apeele ifya bupe ku bantu ku kusambilisha, ku kuwamya, no kukuula icilonganino. Ukwetetula libili libili pa Cebo ca kwa Lesa icapuutwamo, capamo no kutungulula kwa bakasambilisha babelesha, kuti fyatwafwa ukuti “tukule” lwa ku mupashi.—Efes. 4:11-15.

Uko kukula kusanshamo no ‘kulengwa abapya [mu maka yatuninkisha imintontonkanya, NW] yenu.’ Ici e kutila ukuba na matontonkanyo yalemenena sana ku matontonkanyo ya kwa Lesa na Kristu. Cikabila lyonse ukulafwaya ukwishiba imitontonkanishishe yabo, pa kuti ‘tufwale ubuntu bupya.’ (Efes. 4:23, 24) Ilyo mwabelenga Amalandwe, bushe muyamona nge cipasho ca mikalile ya kwa Kristu ico mulingile ukukonka? Bushe mulafwaya ukusoobolamo imibele imo iyakwete Yesu no kwesha na maka yonse ukuipashanya mu mikalile yenu?—1 Pet. 2:21.

Ifyo mulanda pa kwambaula kuti fyalangilila apo mufikile muli uko kulunduluka. Abafwala ubuntu bupya tababepa, tabaponta, tabatukana, kabili tabalanda ifyabipa. Lelo basosa “icawama ku kukuula . . . ukuti cipeele ukusenamina ku baleumfwa.” (Efes. 4:25, 26, 29, 31; 5:3, 4; Yuda 16) Imilandile yabo ilyo bali beka na lintu baleyasuka pa kulongana ilangilila ukuti icine cileyalula imikalile yabo.

Nga ca kuti nomba tamuli “abasensenunwa kabili abapepelulwa ku mwela onse we sambilisho,” na co caba bushininkisho bwa kuti mulelunduluka. (Efes. 4:14) Ku ca kumwenako, mucita shani ilyo mu calo mwaisa imitontonkanishishe ipya, ifishinte fipya, nelyo ifya kusekesha fipya? Bushe mulafwaya ukufumya inshita ku fya ku mupashi pa kuti muciteko ifyo fintu? Ico kuti catusha ukulunduluka kwa ku mupashi. Ca mano ukulubulako inshita ku kucita ifya ku mupashi!—Efes. 5:15, 16.

Imicitile yenu ku bantu bambi na yo kuti yalangilila ukulunduluka kwenu ukwa ku mupashi. Bushe mwalisambilila ukuba aba ‘congwe, aba mutima wa nkumbu, ababelela uluse’ bamunyinenwe na bankashi?—Efes. 4:32.

Ukulunduluka mu kucite fintu mu nshila ya kwa Yehova kulingile ukumoneka mu cilonganino na pa myenu. Kufwile ukumoneka na ku sukulu, mu fifulo fya cintubwingi, na kuntu mubomba. (Efes. 5:21-6:9) Nga ca kuti uku konse mulelangisha sana imibele ya bukapepa, ninshi ukulunduluka kwenu kuleimonekela ukwine.

Yehova alipeela cila muntu amaka no kulamuka. Atwenekela ukubomfye fi mu kwafwilisha bambi pa kuti alange icikuuku cakwe ica pa fye kuli bene ukupitila muli ifwe. Umutumwa Petro alembele ulwa ici ati: “Mulepyungilana, umuntu onse ifyo apokelele ica bupe, nga bakapyunga basuma ba fya kusenamina fya kwa Lesa.” (1 Pet. 4:10) Bushe mulebomba shani bukapyunga bwenu?

Petro akonkanyapo ati: “Ngo muntu alanda, alande ngo ulande fyebo fya kwa Lesa.” (1 Pet. 4:11) Ici cikomo cilekomaila pa mulimo wesu uwa kulanda ifyumfwana ne fya mu Cebo ca kwa Lesa, pa kuti Lesa acindamikwe. Imilandile yesu nayo ilingile ukucindamika Yehova. Ukukanshiwa tukanshiwa mwi Sukulu lya Butumikishi Ilya Bulesa kuti kwamwafwa ukubomfya ubupe bwenu muli yo nshila—ukucindamikila Lesa mu nshila twafwilamo bambi. Apo mwakwata ubo buyo, kuti mwapima shani ukulunduluka kwenu muli ili sukulu?

Ukucila ukutontonkanya pa fishinka mwabombelapo pali formu wa kufunda kwa milandile nelyo umusango wa malyashi mupeelwe, tontonkanyeni ifyo ukukanshiwa mukanshiwa kwamwafwa ukuwamyako ilambo lyenu ilya malumbo. Isukulu litupekanishisha ukuti tulebomba bwino sana mu butumikishi bwa mwi bala. E co ipusheni amuti: ‘Bushe cine cine ndapekanya ifyo ndi no kuyasosa mu mulimo wa mwi bala? Bushe nalisambilila ukutemwa abantu nshimikilako? Bushe ndabika icitendekelo ca cipempu ca kubwelelamo ukupitila mu kwipusha abantu icipusho ca kuyalandapo umuku ukakonkapo? Nga kwaliba uo nsambilisha Baibolo, bushe ndeesha ukuba kasambilisha musuma uufika pa mutima?’

Mwilapimina fye ukulunduluka ku mashuko mupeelwa aya kubomba imilimo imo. Ukulunduluka kwenu takumonekela mu mulimo mwapeelwa, lelo kumonekela mu fyo mulebomba uyo mulimo. Nga mwapeelwa umulimo usanshamo ukusambilisha, ipusheni mwe bene amuti: ‘Bushe cine cine nacibomfya ukulamuka kwa kusambilisha? Bushe nacilanda filya fyebo mu nshila ingaalula imikalile ya bacikutikako?’

Ukukonkomeshiwa kwa kubomfya ubupe bwenu kwalola mu kuti mufwile ukuitendekelako. Bushe mulaitendekelako ukubomba na bambi mu butumikishi bwa mwi bala? Bushe mulafwaya amashuko ya kwafwilisha abapya, abacaice, nelyo abanakuka lwa ku mubili aba mu cilonganino? Bushe mulaipeela ukuwamyako Ing’anda ya Bufumu nelyo ukwafwilisha mu nshila shalekanalekana pa mabungano na pa kulongana kukalamba? Bushe mu nshita mu nshita kuti mulelembeshako bupainiya bwa kwafwilisha? Bushe kuti mwabombako bupainiya bwa nshita yonse nelyo ukwafwilishako mu cilonganino umwaba sana ukubulisha? Nga ni mwe bamunyina, bushe muletinamina ukufika pa milingo ya mu Malembo iya kuba ababomfi batumikila na baeluda? Ukuipeela kwenu mu kufwaya ukwafwilishako no kusumina ukubomba umulimo mwapeelwa ciishibilo ca kulunduluka.—Amalu. 110:3.

Nga muleumfwa abapelebela ico tamwabelesha imikalile ya Bwina Kristu, shipikisheni. Icebo ca kwa Lesa kuti calengo “wapelwa amano ukubo wa mano.” (Amalu. 19:7; 119:130; Amapi. 1:1-4) Ukukonka ukufunda kwa mu Baibolo kutulengo kumwenamo mu mano ya kwa Yehova ayapwililika, ayaumisho mutengo ukucila amasambililo yonse twingasambilila pa mulandu wa bukokole fye. Lelo, ilyo tulelunduluka mu kubombela Yehova, tulapita mu fingi ifingatwafwa icine cine. Kuti twafibomfya shani mu nshila isuma?

Umuntu nga apita mu fyalekanalekana mu bumi, kuti afwaya ukupelulula ati: ‘Nalipitamo muli fi kale. Ninjishiba ifya kucita.’ Bushe ico kuti caba ca mano? Amapinda 3:7 yasoka ati: “Wiba uwa mano mu menso yobe we mwine.” Ca cine ukuti ukupita mu fyalekanalekana kulingile ukutwafwa ukumone fingi ifya kutontonkanyapo ilyo tulebombela pa fintu fimo mu bumi. Lelo ilyo tulelunduluka mu fya ku mupashi, ifyo twapitamo filingile ukulenga amantontonkanyo yesu ne mitima ukucishamo ukushininkisha ukuti tulakabila amapaalo ya kwa Yehova nga twingabomba bwino. Ukulunduluka kwesu kanshi, takumonekela mu kuicetekela kwacilamo ilyo tulepita mu fintu fimo, lelo kumonekela mu kuitemenwa ukulomba Yehova ukuti atutungulule mu mikalile yesu. Kumonekela mu kucetekela ukuti takuli ifingacitika ukwabula ukuti afisuminishe e lyo na mu kuba na bucibusa bwabamo ukucetekela ne citemwishi na Shifwe wa ku muulu.

Umutumwa Paulo, nangu line ali Mwina Kristu wakosoka, uwasubwa, alishibe ukuti alekabila ukutwalilila “ukusupile fya ku ntanshi” pa kufika ku buyo bwa mweo. (Fil. 3:13-16) Bushe na imwe mumona ukuti mufwile ukusupila ifya ku ntanshi?

Ni pi mwafika ukulunduluka? Pa kupima ifyo mwalunduluka, mufwile ukumona nga mwalifwala ubuntu bupya ukwabula ukushako, e lyo no kumona nga mwalinakila mu kukumanina ku mitekele ya kwa Yehova, kabili no kumona ifyo mwacincila mu kubomfya ubupe bwenu mu kucindika Yehova. Ilyo mulenonkelamo mu masambililo ye Sukulu lya Butumikishi Ilya Bulesa, imibele yapulamo mu Cebo ca kwa Lesa ilingile ukulamoneka panono panono mu milandile yenu ne misambilishishe. Twalilileni ukutontomesha pali ishi mbali sha kulunduluka kwenu. Sekeleleni muli shene, no kulunduluka kwenu kukailanga fye ukwine.