Ukutesekesha Ukulongana Kwa Bwina Kristu
“Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana.”—ABAHEBERE 10:24, 25.
1, 2. (a) Mulandu nshi cabela lishuko ukusangwa ku kulongana kwa Bena Kristu ba cine? (b) Ni mu mano nshi Yesu abela pa kulongana kwa bakonshi bakwe?
MWANDI lishuko ukusangwa ku kulongana kwa Bwina Kristu, nampo nga kuli fye bakapepa ba kwa Yehova abashifikile na kuli 10 nelyo bali amakana na makana, pantu Yesu atile: “Ukuli babili napamo batatu abalonganina mwi shina lyandi e ko ndi mu kati kabo.” (Mateo 18:20) Kwena, ilyo aalelaye fyo, Yesu alelanda pa fya bupingushi ifyalekabila ukubombelwapo mu kulungika ku baletungulula mu cilonganino. (Mateo 18:15-19) Bushe icishinte cisangwa mu mashiwi ya kwa Yesu kuti cabomfiwa na ku kulongana konse ukwa Bwina Kristu ukutendeka no kwisalila ne pepo ukupitila mwi shina lyakwe? Ee. Ibukisheni, lintu Yesu atumine abakonshi bakwe ukupanga abasambi, abalaile ukuti: “Moneni, ine nakulaba na imwe ukufika na pa kupwa kwa nshita.”—Mateo 28:20.
2 Ukwabulo kutwishika Umutwe wa cilonganino ca Bwina Kristu, Shikulu Yesu Kristu, aliba uwasekelela nga nshi mu kulongana konse ukwa bakonshi bakwe aba busumino. Ukulundapo, kuti twashininkisha ukuti alaba na bo ukupitila mu mupashi wa mushilo uwa kwa Lesa. (Imilimo 2:33; Ukusokolola 5:6) Yehova Lesa na o aliba uwasekelela mu kulongana kwesu. Imifwaile ikalamba iya uko kulongana ya kuti kubeko ukulumbanya Lesa “mu nkuta.” (Ilumbo 26:12) Ilyo tusangwa ku kulongana kwa cilonganino tulashininkisha ukuti twalitemwa Lesa.
3. Ni pa milandu nshi iyacindama twabela abatesekesha ukulongana kwa Bwina Kristu?
3 Kwalibako imilandu imbi iisuma iyalenga ukuti tutesekeshe ukubungana kwa Bwina Kristu. Ilyo ashilafuma pano isonde, Yesu Kristu asontele abasambi bakwe abasubwa ukubomba ngo “musha wa cishinka kabili uwashilimuka” ku kupeela ica kulya ca ku mupashi ku ba mu ng’anda aba citetekelo mu nshita iiyene. (Mateo 24:45) Inshila yacindama umo ico ca kulya ca ku mupashi ciishila yaba kupitila mu kulongana kwa cilonganino ukusanshako no kulongana kukalamba na mabungano. Shikulu Yesu Kristu alatungulula uyu musha wa cishinka ku kupayanya ifyebo fyacindama pa kulongana kwa musango yo kuli bonse abalefwaya ukupusuka impela ya ino micitile ibifi no kunonka ubumi mu calo ca kwa Lesa icipya kabili icalungama.
4. “Mwata” nshi uwalubana uwalumbulwa mu Baibolo, kabili cinshi cikatwaafwa ukuusengauka?
4 E ico, te kuti ciwame ku Mwina Kristu ukulundulula umwata ushaibipila uo umutumwa Paulo alandilepo, ilyo alembele ati: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.” (AbaHebere 10:24, 25) Ukwetetula pe shuko no busuma bwa kusangwa ku kulongana kwa Bwina Kristu kuli no kutwaafwa ukutungilila ukulongana kwa musango yo muli bucishinka kabili no mutima onse.
Ukulongana Ukukuulilila
5. (a) Ni shani fintu imilandile yesu ilingile ukwambukila ukulongana? (b) Mulandu nshi tushilingile ukushingashinga ukulaalika abalesekelela ku kulongana?
5 Apantu Abena Kristu bapepela umupashi wa mushilo uwa kwa Yehova ukuba pa kulongana kwa Bwina Kristu, uusangilweko umo umo alingile ukubombesha ukucite fintu mu kumfwana no mupashi no ‘kukanalenga Umupashi wa mushilo uwa kwa Lesa ubulanda.’ (Abena Efese 4:30) Lintu umutumwa Paulo alembele ayo mashiwi yapuutwamo, aalelanda pa milandile isuma. Cintu tusosa lyonse cilingile ukubomfiwa “ku kukuula icilingene no kukabila, ukuti cipeele ukusenamina ku baleumfwa.” (Abena Efese 4:29) Ici calicindama ukucilisha pa kulongana kwa Bwina Kristu. Muli kalata alembeele abena Korinti, Paulo akomaile pa kukabila kwa kuti ukulongana kuleba ukwa kukuulilila, ukwabamo kufunda, kabili ukwa kukoselesha. (1 Abena Korinti 14:5, 12, 19, 26, 31) Abasangwako bonse balamwenamo mu kulongana kwa musango yo, ukusanshako abapya, abengasosa fye no kuti: “Lesa aba muli imwe cine cine.” (1 Abena Korinti 14:25) Pali uyu mulandu, tatulingile ukushingashinga ukulaalika abalesekelela ku kulongana na ifwe, pantu ukucite fyo kuli no kukwankwanya ukulunduluka kwabo ukwa ku mupashi.
6. Fintu nshi fimo ifyaafwa ukulenga ukulongana ukuba ukwa kukuulilila?
6 Bonse abapeelwa amalyashi, ukulanshanya kwa kwipusha, nelyo ifilangililo pa kulongana kwa Bwina Kristu bafwile ukushininkisha ukuti imilandile yabo ili iya kukuulilila kabili ileumfwana ne Cebo ca kwa Lesa icalembwa, Baibolo. Ukulunda pa kulungika ukusosa, tulingile ukulumbulula ukuyumfwa ne nkuntu ifileumfwana ne mibele ya kutemwa iya kwa Lesa na Kristu. Nga ca kuti bonse abalelanda amalyashi pa kulongana balefwaisha ukulangisha ‘ifisabo fya Mupashi wa kwa Lesa,’ pamo nga ukusekelela, ukutekanya, ne cishinka, lyene bonse abalesangwako mu kushininkisha bakayumfwa abakuulililwa.—Abena Galatia 5:22, 23.
7. Ni shani fintu bonse abalesangwa ku kulongana bengalenga kwene ukuba ukwa kukuulilila?
7 Nangu cingati banono fye bengaba na malyashi mu kulongana kwa cilonganino, bonse kuti balenga ukuti ukulongana kube ukwa kukuulilila. Ilingi line kulabako amashuko kwi bumba ukwasukako ifipusho. Ishi shiba ni nshita sha kulumbula icitetekelo cesu. (Abena Roma 10:9) Tatufwile ukubomfya iyi nshita ku kulundulula amano yesu, ukuitakisha pa fyo twapwishishisha, nelyo ukulengulula uwasumina munensu. Bushe ico te kuti cilenge umupashi wa kwa Lesa ubulanda? Ukupusana na basumina banensu kulabombelwapo bwino ku mbali mu mupashi wa kutemwa. Baibolo itila: “Mubelane icongwe, mube aba mitima ya nkumbu, ababelelano luse, ifyo na Lesa amubelele uluse muli Kristu.” (Abena Efese 4:32) Mwandi kashita kawamisha ukulongana kwa Bwina Kristu kutupeela ku kubomfya uku kufunda kushaiwamina! Pa kucite fyo, abengi balafika bwangu ku kulongana kabili tabaya bwangu pa numa ya kulongana. Ici cilaafwa na balesekelela, abakabila nga nshi ukuyumfwa ukuti nabasengelwa. E co Abena Kristu bonse abaipeela kuti bacitako fimo ku kulenga ukulongana ukuba ukwa kukuulilila ukupitila mu ‘kwetetula umwa kucincimushanisha ku kutemwa kabili ku kubombe milimo isuma.’
Pekanyeni Bwino
8. (a) Kuipusula nshi uko twingatasha uko bamo baipusula pa kusangwa ku kulongana? (b) Ca kumwenako nshi Yehova emika nga kacema?
8 Ilintu bamo cilabangukila ukusangwa ku kulongana kwa Bwina Kristu, bambi bena cifwaya ukuba no mupashi wa kuipusula mu kutwalilila. Ku ca kumwenako, nyina uuli Mwina Kristu uubomba incito ya ku mubili ku kusakamana ifikabilwa fya ba ng’anda yakwe ilingi line alabo wanaka nga afika pa ng’anda ukufuma ku ncito. Lyene afwile ukupekanya ifya kulya no kwaafwa abana bakwe ukuipekanya ukuya ku kulongana. Abena Kristu bambi benda intamfu ishalepa pa kuti bafike ku kulongana, nelyo kuti pambi balalwalilila nelyo bakote. Cine cine, Yehova Lesa alomfwikisha imibele ya usangwa ku kulongana mu busumino umo na umo, nga fintu fye kacema wa kutemwa omfwikisha ukukabila kwaibela ukwa mpaanga imo na imo mu mukuni wakwe. Baibolo itila, “Ngo mucemi e fyo [Yehova] alisho mukuni wakwe, ku kuboko kwakwe aulonganya, asendela pa cifuba cakwe abana ba mpaanga, ne shonsha ashitungulula bwino bwino.”—Esaya 40:11.
9, 10. Ni shani fintu twinganonkelamo nga nshi mu kulongana?
9 Abaipusula nga nshi pa kuti balesangwa fye ku kulongana lyonse te kuti babe sana ne nshita ya kupekanya ifyebo fili no kusambililwa. Ukulabelenga Baibolo ukutantikwa cila mulungu kulenga ukusangwa kwi Isukulu lya Butumikishi bwa Teokrasi ukuba ukwa kulambula nga nshi. Mu kupalako, ukupekanishisha libela ukulongana kumbi, pamo nga Isambililo lya Ulupungu lwa kwa Kalinda ne Sambililo lya Citabo pa Cilonganino, kulenga uku kulongana ukuba ukwa kunonsha apakalamba. Ukupitila mu kubelengela libela ifyebo fya kusambililamo ukusanshako fye no kulangulukako Amalembo yamo yamo ayaloshiweko, ababa ne fishingamo fya ndupwa ifikabila inshita ikalamba bakaba nabaipekanya ukukonkamo bwino bwino mu kulanshanya kwa Baibolo ukwacindama.
10 Bambi, abashakwata sana ifishingamo, kuti bapoosa inshita ikalamba ukupekanishisha ukulongana. Ku ca kumwenako, kuti basapika amalembo ayaloshiweko lelo ayashambwilwe. Muli fyo bonse kuti baipekanya ku kunonkelamo nga nshi mu kulongana no kukuulililako icilonganino ukupitila mu malyashi yabo ne fyasuko. Ukupitila mu kuipekanya bwino, baeluda na babomfi batumikila bakemika ica kumwenako cisuma mu kwasuka ifyasuko ifipi, ifya kulungatika. Pa mulandu wa kucindika ukupayanya kwa kwa Yehova, abalesangwako bakasengauka ifya kupumbula ifili fyonse ilyo ukulongana kuletwalilila.—1 Petro 5:3.
11. Mulandu nshi cabela icakabilwa ukuisalapula pa kupekanishisha ukulongana?
11 Imibombele ne fya kusekesha ifishakatama ku butuntulu bwesu ubwa ku mupashi kuti fyatusendela inshita ikalamba. Nga ni fyo, tulekabila ukuibebeta no ‘kukanaba abashashilimuka,’ pa fya kubomfya inshita yesu. (Abena Efese 5:17) Ubuyo bwesu bulingile ukuba ‘kulubule nshita’ ku fishacindama sana pa kuti twingapoosa inshita yakulilako ku kusambilila Baibolo pa lwesu no kupekanishisha ukulongana, pamo pene na mu mulimo wa Bufumu. (Abena Efese 5:16) Ca cine, ici tacabe cayanguka lyonse kabili cifwaya ukuisalapula. Abacaice abalubule nshita balebika ica kukuulapo ukulunduluka kwabo ukwa ku ntanshi. Paulo alembeele umunankwe uwacaice Timote ukuti: “Ube no mute ku fintu ifi [ukufunda uko Paulo alefunda Timote], ikala muli ifyo, ukuti ukulunduluka kobe kumoneke kuli bonse.”—1 Timote 4:15.
Ifya Kumwenako Ukufuma mu Cebo ca kwa Lesa
12. Ca kumwenako nshi icapulamo ico ulupwa lwa kwa Samwele lwaimike?
12 Langulukeni ica kumwenako cishaiwamina icaimike ulupwa lwa kwa Samwele, abalelongana lyonse pamo na bakapepa banabo ilyo ihema lya kwa Lesa lyali mu Shilo. Abaume fye e balefwaikwa ukuyasangwa ku mitebeto ya pa mwaka. Lelo wishi kwa Samwele, Elkana, alesenda ulupwa lonse ilyo “alenina alefuma ku mwabo umwaka no mwaka ku kuyashinshimuna kabili ku kwipaila Yehova wa milalo mu Shilo.” (1 Samwele 1:3-5) Umushi wa kwa Samwele, Ramataimu-sufi, napamo wabelele ku lulamba ukwabela Rentis pali lelo ku mukunkuluko wa “calo ca mpili ca kwa Efraimu.” (1 Samwele 1:1) E co ulwendo lwa kuya ku Shilo lufwile lwali lwendo lwa bakilomita 30, ubulendo bwa kulengo kufunshika muli shilya nshiku. Ici e co ulupwa lwa kwa Elkana lwalecita muli bucishinka ‘umwaka no mwaka, inshita yonse lwalenina ukuya ku ng’anda ya kwa Yehova.’—1 Samwele 1:7.
13. Ca kumwenako nshi ico abaYuda ba busumino baimike mu nshita Yesu aali pano isonde?
13 Yesu na o akulile mu lupwa lukalamba. Cila mwaka ulupwa lwaleimo bulendo ukufuma ku Nasarete ukwenda bakilomita mupepi na 100 ukulola ku kapinda ka ku kulyo ku kusangwa ku mutebeto wa Ca Kucilila mu Yerusalemu. Bafwile babomfeshe inshila imo pali ishi shibili. Inshila ishashokoloka yabimbilemo ukutentemukila mu Mupokapoka wa Megido e lyo ukuninikako akamulundu panono pali bamita 600 ukuyapita mu Samaria no kukonkanyapo ku Yerusalemu. Inshila imbi iyaishibikwe sana ni ilya Yesu abomfeshe pa lwendo lwakwe ulwa kupelako ukuya ku Yerusalemu mu 33 C.E. Iyi yabimbilemo ukwenda mu mupokapoka wa Yordani mupepi na bemba mpaka na lintu afikile “mu mipaka ya Yudea kwi shilya lya Yordani.” (Marko 10:1) Ukufuma kuno, ‘inshila yanina ukuya ku Yerusalemu’ yalepa bakilomita 30 ukusanshako ukuninikako akamulundu panono aka bamita ukucila pali 1,100. (Marko 10:32) Amabumba ya baleya ku mutebeto aba busumino baleimo bulendo mu Galili ukuya ku Yerusalemu lyonse. (Luka 2:44) Mwandi ca kumwenako cishaiwamina ku babomfi ba kwa Yehova ababa mu fyalo ifikankaala ilelo, abengi abasangwa ku kulongana kwa Bwina Kristu ukwabula amafya ayengi, pa mulandu ne fya kwendelamo ifya muno nshiku!
14, 15. (a) Ca kumwenako nshi cintu Ana aimike? (b) Cinshi twingasambililako ku mibele iba na bapya abasangwa ku kulongana?
14 Ica kumwenako cimbi ca kwa mukamfwilwa wa myaka 84 Ana. Baibolo ilondololo kuti wene “talefuma pe tempele.” (Luka 2:37) Ukulundapo, Ana alitemenwe abantu bambi. Ilyo amwene akana ka Yesu no kwishiba ukuti kali e Mesia walaiwe, cinshi acitile? Atootele Lesa no kutendeko “kulando lwa wene kuli bonse abalelolelo kulubulwa kwa Yerusalemu.” (Luka 2:38) Mwandi iyo yali mibele ishaiwamina, iyalinga ukupashanya ku Bena Kristu ba lelo!
15 Ee, ukusangwa mu kulongana no kwasukapo kulingile ukuba ca kulengo kucankwa nga nshi ica kuti, ukupala Ana, tatwingafwaya ukupuswako. Abapya abengi e fyo bayumfwa. Pa numa ya kufuma mu mfifi ukwisa mu lubuuto lwa kwa Lesa ulwapesha amano, balafwaya ukusambilila na maka yabo yonse, kabili abengi balaba abacincimuka nga nshi pa lwa kulongana kwa Bwina Kristu. Lubali lumbi, abakokola mu cine bafwile ukuibaka pa kuti ‘tabalekele ukutemwa kwabo ukwa pa kutendeka.’ (Ukusokolola 2:4) Ukulwalisha nelyo ifintu fimbi ificilile amaka ya muntu limo limo kuti fyalenga umuntu ukukanasangwa ku kulongana. Lelo tatulingile ukuleka ukutemwa ifikwatwa, ukukokoloka, nelyo ukubulwa ubuseko ukutulenga ukukanapekanya, ukuba abatalalila fye, nelyo ukukanasangwa lyonse ku kulongana.—Luka 8:14.
Ica Kumwenako Cawamisha
16, 17. (a) Ni shani fintu Yesu aalemona ukulongana kwa ku mupashi? (b) Mwata nshi uusuma uo Abena Kristu bonse balingile ukwesha ukukonka?
16 Yesu aimike ica kumwenako capulamo mu kutesekesha ukulongana kwa ku mupashi. Ilyo aali fye umunono ne myaka 12, alangishe ukutemwa uko atemenwe ing’anda ya kwa Lesa mu Yerusalemu. Abafyashi bakwe balimulufishe lelo pa numa bamusangile alelanshanya Icebo ca kwa Lesa na bakasambilisha ba mwi tempele. Pa kwankula ku kusakamikwa kwa mufyashi wakwe, mu mucinshi Yesu aipwishe ati: “Bushe tamwishibe ukuti ndi no kuba mu ng’anda ya kwa Tata?” (Luka 2:49) Mu kunakila, Yesu munono abwelele na bafyashi bakwe ku Nasarete. Kulya atwalilile ukutemwa ukulongana ku kupepa ukupitila mu kusangwako lyonse pe sunagoge. E co, lintu atendeke ubutumikishi bwakwe, Baibolo ishimiko kuti: “Aile ku Nasarete, uko aleleelwe, aingile na mwi sunagoge pa bushiku bwe sabata umwabelele umwata wakwe, no kwiminina ku kubelenga.” Pa numa lintu Yesu abelengele no kulondolola Esaya 61:1, 2, ibumba lyatendeke “ukusunguka pa fyebo fya kusenamina ifyalefuma mu kanwa kakwe.”—Luka 4:16, 22.
17 Ukulongana kwa Bwina Kristu ilelo kukonka ici cine cipasho cimo cine. Pa numa ya kwiswila ukulongana no lwimbo ne pepo, ifikomo fya mu Baibolo (nelyo ifikomo fyayambulwa mu mpapulo sha kusambililamo Baibolo) filabelengwa no kulondololwa. Abena Kristu ba cine bafwile ukupashanya umwata usuma uwa kwa Yesu Kristu. Ukulingana fye ne mibele yabo, balabekelwa mu kusangwa lyonse mu kulongana kwa Bwina Kristu.
Ifya Kumwenako fya Muno Nshiku
18, 19. Fya kumwenako nshi ifyapulamo ifyo bamunyina mu fyalo ifipiina baimika ukukuma ku kulongana ukunono no kukalamba, na mabungano?
18 Mu mbali she sonde umwabo bupiina, bamunyinefwe ne nkashi abengi balemika ica kumwenako cishaiwamina ica kutesekesha ukulongana kwa Bwina Kristu. Ku Mozambique casendele kangalila wa citungu, Orlando, no mukashi wakwe, Amélia, amaawala 45 pa kwenda bakilomita 90 ukunina ulupili ku kuyabombela ukulongana kukalamba. Lyene baendele ulwendo lumo lwine ukubwelelamo ku kuyabombela ukulongana kukalamba kumbi. Mu bufuuke Orlando ashimike ukuti: “Twayumfwile ifyo tatwaendele intamfu ine ine ukulinganya kuli bamunyina mu cilonganino ca Bawa. Ukuyasangwa ku kulongana no kubwelelamo ku sha myabo kwasanshishemo ulwendo lwa nshiku 6 ulwa bakilomita mupepi na 400 pa makasa, kabili pali bene pali na munyina wa myaka 60!”
19 Ni shani pa lwa kutesekesha ukulongana kwa cilonganino ukwa cila mulungu? Kashwashwa Njamba ni nkashi wanakuka mu myaka ya ba70. Ekala mu Kaisososi, umushi unono uwaba bakilomita basano ukufuma pa Ng’anda ya Bufumu mu Rundu, Namibia. Pa kusangwa ku kulongana, ukuya no kubwela enda bakilomita 10 ukupita mu mpanga. Bambi balisanswa muli iyi nshila, lelo Kashwashwa atwalilila ukusangwa ku kulongana. Ukulongana ukwingi kuba mu ndimi isho ashumfwa. Nomba ni shani fintu anonkelamo mu kulongana? Kashwashwa atila: “Ukupitila mu kukonka amalembo, ndesha ukusanga ico ilyashi lilelandapo.” Lelo taishiba ukubelenga, e co akonka shani amalembo? Ayasuka ati: “Ndakutika ukumfwa amalembo ayo nasungila.” Kabili mu kupita kwa myaka, alisungila amalembo ayafulilako. Pa kuti engeshiba ukubelenga Baibolo, alasangwa kwi sukulu lya shibukeni ilya mu cilonganino. Atila: “Nalitemwa ukusangwa ku kulongana. Lyonse kulaba ifya kusambilila ifipya. Nalitemwa ukubishanya na bamunyina ne nkashi. Nangu ca kuti nshingakumamo ukulanda na bonse, balesa ku kumposha. Kabili icacindamisha, nalishiba ukuti ukupitila mu kusangwa ku kulongana, ndelenga umutima wa kwa Yehova ukusamwa.”
20. Mulandu nshi tushilingile ukuba abaleka ukulongana kwa Bwina Kristu?
20 Ukupala Kashwashwa, amamilioni ya bakapepa ba kwa Yehova mwi sonde lyonse balatesekesha nga nshi ukulongana kwa Bwina Kristu. Ilyo icalo ca kwa Satana cilelola ku bonaushi, twiba abaleka ukulongana. Mu cifulo ca ico, natutwalilile ukuba abalola lwa ku mupashi no kutesekesha apakalamba ukulongana ukunono no kukalamba, na mabungano. Ico cili no kulenga umutima wa kwa Yehova ukusamwa kabili cikatunonsha nga nshi ilyo tulepokelela ukusambilisha kwa bulesa ukutungulula ku mweo wa muyayaya.—Amapinda 27:11; Esaya 48:17, 18; Marko 13:35-37.
Ifipusho fya Kupitulukamo
◻ Mulandu nshi cabela lishuko ukusangwa ku kulongana kwa Bwina Kristu?
◻ Ni shani fintu bonse abalesangwa ku kulongana bengalenga kwene ukuba ukwa kukuulilila?
◻ Ca kumwenako nshi icapulamo ico Yesu Kristu aimike?
◻ Cinshi twingasambililako kuli bamunyina mu fyalo ifipiina?
[Akabokoshi pe bula 17]
Balitesekesha Ukulongana Kwa Cila Mulungu
Amamilioni ya bantu bekala mu misumba umwaba ubupiina na bumpulamafunde. Te mulandu ne fintu fya musango yo, Abena Kristu ba cine pali bene balitesekesha nga nshi ukulongana kwa Bwina Kristu. Eluda uwaba mu cilonganino cimo ica ku Soweto mu citungu ca Gauteng, South Africa ashimiko kuti: “Mu cilonganino umwaba baNte 60 na bakasabankanya abashabatishiwa, tulongana 70 na 80, e lyo limo limo ukucilanapo. Nangu cingati bamunyina na bankashi tabenda intamfu iitali, ifintu muli ci citungu ca Soweto fyalyafya. Munyina umo alilashilwe umwele mu numa ilyo aaleya ku kulongana. Bankashi babili balifyambetwe pa kuti bengabebila. Lelo ici tacibalesha ukusangwa ku kulongana. Pa nshiku sha Mulungu, tulasambililako inyimbo panono pa numa ya kwisalila ukulongana ne pepo. Amaperesenti mupepi na 95 aya basangwako balashala lyonse no kwimbako inyimbo shonse ishili no kubomfiwa mu kulongana umulungu ukonkelepo. Ici cilaafwa abapya ukusambilila inyimbo no kulaimbako.”
Abekala mu mishi balikwata amafya yambi, pamo nga intamfu shalepa isho benda pa kusangwa ku kulongana imiku itatu mu mulungu. Abaupana babili abalesekelela bekala apali bakilomita 15 ukufuma pa Ng’anda ya Bufumu mu Lobatse, Botswana. Umwaka wapwile, balisangilwe ku kulongana lyonse na bana babo babili. Umulume abila insapato pa kusakamana ulupwa. Umukashi ashitisha utwa kushitishashitisha ku kongelesha pa ndalama shisanga umulume pa kuti bengalanininamo pa kuya ku kulongana na pa kubwela.
Pa cungulo bushiku cimo ica mu lusuba, pa numa ya kulongana mu mulungu waibela, ulu lupwa lwaliililwa pa citesheni pa 21:00 hrs. Babasi balilekele bwangu pantu imiceele yalibipile. Kapokola aliminike motoka wa cipampamwa ku kwipusha ifyo balecita. Ilyo aumfwile ubwafya baalimo, alibekatilwe nkumbu no kubatwala ku ng’anda na motoka bakilomita 15. Umukashi, uuli ni kasabankanya ushabatishiwa, aebele umulume wakwe ukuti: “Mwamona, nga twatangishako ukulongana, lyonse Yehova alapayanya.” Pali nomba umulume alisosa ati na o wine alefwaya ukuba kashimikila wa mbila nsuma.
[Icikope pe bula 18]
BaNte ukupala aba mu Romania balimika ica kumwenako icisuma ica kutesekesha ukulongana kwa Bwina Kristu