• Bushe Lesa Amona Ukusefya Konse Ukuti Kwaliba Fye Bwino?
    Kuti Mwaba ne Nsansa Umuyayaya!—Icitabo ca Kusambililamo Baibolo

    • Belengeni Abena Efese 5:10, lyena lanshanyeni aya mepusho:

      • Finshi tulingile ukutontonkanyapo nga tulefwaya ukwishiba nampo nga kuti twasefyako holide nelyo iyo?

      • Maholide nshi ayaseeka uko mwikala?

      • Bushe mulemona ukuti Yehova alitemwa aya amaholide?

      Ku ca kumwenako, bushe mwalitontonkanyapo ifyo Yehova amona ukusefya inshiku sha kufyalwa? Baibo tayalandapo ukuti ababomfi ba kwa Yehova balesefya inshiku sha kufyalwa, lelo yalanda fye pa bantu babili abashalebombela Yehova abasefeshe inshiku sha kufyalwa. Belengeni Ukutendeka 40:20-22 na Mateo 14:6-10. Lyena lanshanyeni aya mepusho:

      • Finshi ifyacitike ifyapalana, ilyo aba babili abo Baibo yalandapo basefeshe inshiku sha kufyalwa?

      • Ukulingana na ya malembo twabelenga, bushe mulemona ukutila Yehova amona shani ukusefya inshiku sha kufyalwa?

      Nalimo kuti mwayipusha amuti, ‘Bushe Yehova alabikako amano nga nasefyako ubushiku bwa kufyalwa nelyo ukusefya kumbi ukwapusana ne fyo Baibo ilanda?’ Belengeni Ukufuma 32:1-8. Lyena tambeni VIDIO no kulanshanya amepusho yakonkapo.

      VIDIO: Ukusefya na Maholide Ifyo Lesa Apata (5:07)

      • Mulandu nshi tulingile ukubikilako sana amano ku kumona nga ca kuti ifyo tulefwaya ukucita kuti fyalenga Yehova alesekelela?

      • Kuti twacita shani pa kuti tatucitile ifingafulwisha Yehova?

      Ifyo twingeshiba nga ca kuti ukusefya kuti kwafulwisha Lesa

      • Bushe uku ukusefya kulomfwana ne fyo Baibo isambilisha? Pa kuti mwishibe nga kulomfwana ne fyo Baibo isambilisha, mufwile ukwishiba ifyo uko ukusefya kwatendeke.

      • Bushe uku ukusefya kuti kwalenga twalacindikisha abantunse, utubungwe nelyo ifishibilo fya calo? Tucindikisha Yehova ukucila icintu nelyo umuntu uuli onse, kabili twacetekela ukuti Yehova e ukapwisha fye amafya yonse ayo fwe bantunse tukwata.

      • Bushe ifyo abantu bacita pali uku kusefya fyalipusana ne fyo Baibo ilanda? Tatulingile ukulacita ifyo Yehova apata.

  • Mulesala Ifya Kuleseshamo Icitendwe Ifingalenga Yehova Alasekelela
    Kuti Mwaba ne Nsansa Umuyayaya!—Icitabo ca Kusambililamo Baibolo
    • Isambililo 53. Umufyashi umwaume, umwina mwakwe, no mwana wabo umukashana balelya amapopukoni ilyo baletamba TV.

      ISAMBILILO 53

      Mulesala Ifya Kuleseshamo Icitendwe Ifingalenga Yehova Alasekelela

      Yehova ni “Lesa wa nsansa.” (1 Timote 1:11) Afwaya na ifwe tuleba ne nsansa no kulacita ifingalenga twalasekelela. Alatemwa nga ca kuti tulekwatako inshita ya kutuusha pa numa ya kubomba. Muli lino isambililo, twalasambilila pa fyo twingabomfya bwino inshita ilyo tuletuusha pa kuti tulecita ifingalenga twaba ne nsansa kabili ifingalenga Yehova alasekelela.

      1. Finshi tufwile ukulaibukisha ilyo tulesala ifya kuleseshamo icitendwe?

      Finshi mwatemwa ukucita ilyo muletuusha? Abantu bamo ilyo baletuusha basalapo ukuba fye pa ng’anda balebelenga, balekutika ku nyimbo, baletamba filimu, nelyo ukuya pa Intaneti. E lyo bambi basalapo ukuba pamo na banabo ilyo baleangala, baleowa, baleteya ifyangalo nelyo ukuya mu kutandala ku fifulo fimbi. Te mulandu ne fyo twatemwa ukucita, tufwile ukushininkisha ukuti ifyo twasalapo ukuleseshamo icitendwe kuti “fyasekesha Shikulu.” (Abena Efese 5:10) Calicindama ukwishiba ici cishinka pantu mu fya kuleseshamo icitendwe ifingi mulaba ifyo Yehova apata pamo ngo bunkalwe, ubulalelale, e lyo no kupupa imipashi. (Belengeni Amalumbo 11:5.) Finshi fingatwafwa ukusala ifya kuleseshamo icitendwe ifisuma?

      Nga twasala ifibusa abatemwa Yehova, bakatwafwa ukusala bwino ifya kuleseshamo icitendwe. Nga fintu twasambilile mwi sambililo lyafumako, “uwenda na ba mano akaba uwa mano.” Nomba nga twalitemwa ukwangala na bashatemwa amafunde ya kwa Lesa, ‘tukacula.’—Amapinda 13:20.

      2. Mulandu nshi cacindamina ukubika amano ku nshita tupoosa ku fya kuleseshamo icitendwe?

      Nangu ca kuti ifyo tuleleseshamo icitendwe fili fye bwino, tufwile ukushininkisha ukuti tatulepoosa sana inshita kuli ifyo fintu, pantu kuti twaonaula inshita iyo tulingile ukubomfya ku fintu ifyacindama. Baibo itukoselesha ukuti ‘tulebomfya bwino inshita yesu.’—Belengeni Abena Efese 5:15, 16.

      SAMBILILENI NA FIMBI

      Sambilileni ifyo mwingacita pa kuti mulesala ifya kuleseshamo icitendwe ifisuma.

      3. Mwilasala ifya kuleseshamo icitendwe ifyabipa

      Mulandu nshi tulingile ukubikilako amano ilyo tulesala ifya kuleseshamo icitendwe? Tambeni VIDIO, lyena lanshanyeni amepusho yakonkapo.

      VIDIO: Fyakuleseshamo Icitendwe Nshi Ningile Ukusala? (4:39)

      • Bushe ifyangalo fyaliko kale mu Roma fyapalana shani ne fyangalo fimo ifyabako muno nshiku?

      • Muli vidio twatamba, finshi ba Danny basambilile pa fya kuleseshamo icitendwe?

      Belengeni Abena Roma 12:9, lyena lanshanyeni ici cipusho:

      • Bushe ili ilembo kuti lyamwafwa shani ilyo mulesala ifya kuleseshamo icitendwe?

      Fintu nshi fimo ifyo Yehova apata? Belengeni Amapinda 6:16, 17 na Abena Galatia 5:19-21. Pa numa ya kubelenga ilembo limo na limo, lanshanyeni ici cipusho:

      • Fintu nshi ifili mwi lembo ifyo mumona ifyaseeka mu fya kuleseshamo icitendwe?

      Ifyo mwingacita pa kuti mulesala bwino ifya kuleseshamo icitendwe

      Muleyipusha amuti:

      • Bushe muli ifi ifya kuleseshamo icitendwe mwaliba ifyo Yehova apata?

      • Bushe iyi nshita ndefwaya ukulesha icitendwe kuti yalenga nicita ifyacilapo ukucindama ifyo mfwile ukucita?

      • Bushe ifi ifya kuleseshamo icitendwe kuti fyalenga nalaba sana pamo na bashatemwa Yehova?

      Kuti cawama nga twaesha na maka ukutaluka ku fingatuletelela. E mulandu wine tushilingile ukulesesha icitendwe mu fintu ifyo tulemona ukuti tafili bwino

      Motoka ile-endela mu mbali sana iya musebo wa mu mpili. Amawilo ya ku numa nayatendeka no kufuma mu nshila.

      4. Mulebomfya bwino inshita

      Tambeni VIDIO, lyena lanshanyeni icipusho cakonkapo.

      VIDIO: Fintu Nshi Mupoosako Sana Inshita? (2:45)

      • Nangu ca kuti munyinefwe uwaciba muli vidio taletamba ifyabipa, bwafya nshi akwete?

      Belengeni Abena Filipi 1:10, lyena lanshanyeni ici cipusho:

      • Bushe ili ilembo kuti lyatwafwa shani ukwishiba inshita tulingile ukupoosa ku fya kuleseshamo icitendwe?

      5. Mulesala ifya kuleseshamo icitendwe ifisuma

      Nangu ca kuti ifya kuleseshamo icitendwe fimo filafulwisha Yehova, kwaliba ifya kuleseshamo icitendwe ifingi ifishimufulwisha. Belengeni Lukala Milandu 8:15 na Abena Filipi 4:8, lyena lanshanyeni ici cipusho:

      • Fya kuleseshamo icitendwe nshi ifisuma ifyo mwatemwa?

      Ifikope: Abantu aba mishinku iyalekanalekana na basala ifya kuleseshamo icitendwe ifisuma. 1. Umukashana alekutika ku nyimbo ilyo alelenga fimo. 2. Abalumendo batatu baleteya basketball. 3. Abalumendo babili balecofa incinga. 4. Umulumendo alepanga ka motoka ka kwangasha. 5. Umwaume alelisha ing’oma. 6. Umulumendo aleteya ifyangalo fya pali kompyuta na bawishi. 7. Umwanakashi alekopa icikope.

      Kuti mulesala ifya kuleseshamo icitendwe ifisuma kabili ifi ifya kuleseshamo icitendwe kuti fyalenga mwaba ne nsansa

      ABANTU BAMO BATILA: “Tacabipa ukubelenga ifitabo, ukukutika ku nyimbo, nelyo ukutamba amafilimu umwaba ubunkalwe, ubulalelale, nelyo ukupupa imipashi, cikulu fye nshilecitako ifyo fintu.”

      • Imwe muletipo shani?

      IFYO MUSAMBILILE

      Yehova afwaya tuletuushako no kusala ifya kuleseshamo icitendwe ifisuma.

      Ukupitulukamo

      • Fintu nshi ifyo Abena Kristu bashilingile ukuleseshamo icitendwe?

      • Mulandu nshi tulingile ukubikilako sana amano ku nshita tupoosa ku fya kuleseshamo icitendwe?

      • Cinshi mulefwaila ukulasala ifya kuleseshamo icitendwe ifingalenga Yehova alasekelela?

      Ifyo Mwingacita

      ISHIBILENIPO NA FIMBI

      Moneni uulingile ukutusalila ifya kuleseshamo icitendwe.

      “Bushe Inte sha kwa Yehova Balalesha Abantu Ukutamba Amafilimu Yamo, Ukubelenga Ifitabo Fimo, no ku Kutika ku Nyimbo Shimo?” (Icipande ca pa jw.org)

      Belengeni ifingamwafwa ukusala bwino ifya kuleseshamo icitendwe.

      “Bushe Ifyo Mucita Ilyo Muletuusha Filamunonsha?” (Ulupungu lwa kwa Kalinda, October 15, 2011)

      Mu lyashi ilitila “Nalilekele no Kupata Abantu Babuuta,” moneni ifyo umwaume umo acitile pa kuti atendeke ukusala bwino ifya kuleseshamo icitendwe.

      “Baibolo Ilaalula Abantu” (Ulupungu lwa kwa Kalinda, February 1, 2010)

      Moneni ifyo umufyashi umwanakashi umo asala bwino ifya kuleseshamo icitendwe umushaba ifibanda.

      Mwilatamba Amafilimu Umwaba Ifibanda (2:02)