Mwe Balume, Pashanyeni Ukutemwa Kwa Kwa Kristu!
PA BUSHIKU bwa kulekeleshako ukuba no mweo pano isonde, Yesu aebele abatumwa bakwe aba cishinka ati: “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.” (Yoh. 13:34, 35) Ca cine, Abena Kristu ba cine bafwile ukutemwana.
Muli kalata umutumwa Paulo alembele, aebele Abena Kristu abaupa ukuti: “Mwe balume, muletemwa abakashi benu, filya na Kristu atemenwe icilonganino no kuipeela pali cena.” (Efes. 5:25) Bushe Umwina Kristu uwaupa kuti acita shani pa kuti alekonka uku kufunda mu cupo cakwe, maka maka umukashi wakwe nga mubomfi waipeela uwa kwa Yehova?
Kristu Alesunga Bwino Icilonganino
Baibolo itila: “Abalume bafwile ukulatemwa abakashi babo nge mibili yabo. Uwatemwa umukashi wakwe ali-itemwa umwine, pantu takwatala akuba umuntu nangu umo uwapata umubili wakwe; lelo alauliisha no ku-usunga bwino, filya Kristu na o aliisha no kusunga bwino icilonganino.” (Efes. 5:28, 29) Yesu alitemenwe sana abasambi bakwe. Alebasunga bwino. Nangu ca kuti tabapwililike, ali uwanakilila kabili uwa cikuuku kuli bena. Apo alefwaya “aituulile umwine icilonganino icasambika,” e co abikiile amano ku mibele isuma iya basambi bakwe.—Efes. 5:27.
Filya fine Kristu alangile ukuti alitemwa icilonganino, e fyo no mulume afwile ukulanga umukashi wakwe mu mashiwi na mu ncitilo ukuti alimutemwa. Umukashi uo lyonse beba amashiwi ya citemwiko alomfwa ukuti umulume wakwe alimutemwa kabili alaba ne nsansa. Lelo nangu ca kuti umukashi alikwata fyonse ifikabilwa mu mikalile, kuti aba uwabombomana nga ca kuti umulume wakwe alimulekelesha nangu tamubikako amano.
Bushe umulume kuti acita shani pa kuti umukashi wakwe aleumfwa ukuti alimubikako amano? Nga ca kuti umulume ali no mukashi pa bantu abashamwishiba, abomfya amashiwi ya mucinshi pa kulondolola umukashi wakwe ku bashamwishiba kabili tomfwa insoni ukutasha umukashi wakwe pa cintubwingi pa fyo amwafwilisha. Nga ca kuti umukashi alibombeshe pa kuti ico ulupwa lwalefwaya cibombeke, tashimunuka ukwebako bambi ukuti umukashi alibombeshe. Ilyo bali fye babili, ifilecita umulume filenga umukashi ukwiluka ati balimutemwa. Utuntu utumoneka ngo tunono pamo nga ukumwikatamo fye, ukumumwentwila, ukumukumbata, no tumashiwi twa kumutasha twalicindama nga nshi kuli namayo.
“Tomfwa Insoni Ukubeta ati ‘Bamunyinane’”
Kristu Yesu taleumfwa “insoni [ukwita abasambi bakwe abasubwa] ati ‘bamunyinane.’” (Heb. 2:11, 12, 17) Nga muli Bena Kristu abaupa, muleibukisha ukuti abakashi benu na bo ni nkashi yenu muli Kristu. Ukuipeela kwabo kuli Yehova kwalicindamapo ukucila pa mulapo wabo uwa cupo, te mulandu nampo nga mwaupene ninshi balibatishiwa nelyo ninshi tabalabatishiwa. Ilyo uuletungulula mu kulongana alefwaya abena myenu basukepo, abeta ati “Nkashi.” Na imwe bene ni nkashi yenu, te pa Ng’anda ya Bufumu fye lelo na ku ng’anda kwine. Filya fine muba ne cikuuku no mucinshi kuli bena ilyo muli pa Ng’anda ya Bufumu e fyo mufwile ukuba na lintu muli ku ng’anda.
Nga mwalikwatilapo imilimo na imbi mu cilonganino, nalimo inshita shimo kuti cilemwafya ukubomba bwino iyo e lyo ne milimo ya mu lupwa. Nga mulebombela pamo mwi bumba lya baeluda na batumikila e lyo mulepeelako bambi imilimo ya cilonganino kuti calenga mwalakwata inshita iikalamba iya kuba pamo ne nkashi yenu iimukabila sana, e kutila abakashi benu. Muleibukisha ukuti kwaliba bamunyinenwe abengabomba imilimo mwakwata iya mu cilonganino, lelo umulimo wa kusakamana abakashi benu, takwaba nangu umo uwingamubombelako pantu ena mubili wenu.
Cimbi na co ca kuti, ni mwe mutwe wa bakashi benu. Baibolo itila: “Umutwe wa mwaume onse ni Kristu; no mutwe wa mwanakashi mwaume.” (1 Kor. 11:3) Bushe mufwile ukubomba shani umulimo wa bumutwe? Mu nshila ya kutemwa, te kulacinkulako abakashi benu libili libili amashiwi ya muli ili lembo e lyo no kulabeba ukuti bafwile ukulamucindika. Nga mulefwaya ukubomba bwino bumutwe mulepashanya fye Yesu Kristu mu fyo mulecita ku bakashi benu.—1 Pet. 2:21.
“Muli Banandi”
Yesu aitile abasambi bakwe ati abanankwe. Abebele ati: “Muli banandi nga mulecita ifyo mweba. Nomba nshakulamwita ukuti muli basha bandi, pantu umusha teshiba ifyo shikulu wakwe acita. Lelo nakulamwita ati abanandi, pantu fyonse ifyo naumfwa kuli Tata nalimwishibisha.” (Yoh. 15:14, 15) Yesu na basambi bakwe baleumfwana sana. Kabili balecitila ifintu pamo. “Yesu na basambi bakwe” balitilwe ukuyasangwa ku mutebeto wa bwinga ku Kana. (Yoh. 2:2) Balikwete incende uko batemenwe ukuya, pamo nga mwi bala ya Getsemane. Baibolo itila “Yesu aleyako ilingi na basambi bakwe.”—Yoh. 18:2.
Umukashi na o afwile ukumfwa ukuti e munankwe sana uwa mulume wakwe. Ala calicindama nga nshi mwe balume na bakashi ukulacitila pamo ifintu ifisuma! Bombeleni Lesa pamo. Muleumfwa bwino ukusambilila Baibolo pamo. Mulesangwa pamo inshita iingi, limo kuti mwaya muleololako amolu pamo na bakashi benu, limbi kuti mwasangako fye inshita ya kwisha na bo, e lyo no kuliila pamo ifya kulya. Mwipelela fye pa kuba umulume no mukashi; beni ifibusa fya cine cine.
“Abatemenwe Ukufika na ku Mpela”
Yesu ‘atemenwe abasambi bakwe ukufika na ku mpela.’ (Yoh. 13:1) Abalume bamo balafilwa ukupashanya uyu musango wa kutemwa uwakwete Kristu. Bamo balasha ‘abakashi ba ku bulumendo bwabo,’ no kupondokela ku tukashana.—Mal. 2:14, 15.
Lelo bambi, pamo nga ba Willi, balapashanya Kristu. Pa mulandu wa kulwalilila, abakashi ba ba Willi, balekabila uwa kubatensha pa myaka iingi. Bushe ba Willi baumfwile shani pali ubu bwafya? Batile: “Lyonse mona ukuti umukashi wandi bupe ubo Lesa ampeela kabili ni pali uyu wine mulandu imusungila bwino. Kabili, imyaka 60 iyapita, nalilaile ukuti nkalamusakamana mu nsansa na mu macushi. Nshakatale ndaba bulya bulayo.”
Mwe Bena Kristu abaupa, pashanyeni ukutemwa kwa kwa Kristu. Mulesunga bwino abakashi benu abatiina Lesa—inkashi yenu kabili cibusa wenu.
[Icikope pe bula 20]
Bushe abakashi benu e banenu sana?
[Icikope pe bula 20]
‘Twalilileni ukutemwa abakashi benu’