Ifyo Mulingile Ukulalanga Umucinshi

Abalume batila: “Ilyo twaupene fye, ine no mwina mwandi twalipusene mu fyo twaishibe pa kuba no mucinshi. Te kutila ifyo umo aishibe fyali bwino e lyo umbi fyalibipile, lelo fyapusene fye. Nalemona kwati umwina mwandi aalingile ukukwatako umucinshi nga alelanda na ine ukucila ifyo alecita.”

Abakashi batila: “Uko nakuliile, tacabipa ukwimya ishiwi pa kulanda, ukubomfya sana icinso, no kucilima umo nga alelanda. Umuntu nga acita ifi tatwalemona ukuti takwata umucinshi. Nomba ifi te fyaba uko abena mwandi bakuliile.”

Umucinshi walicindama sana mu cupo. Bushe kuti mwalanga shani umucinshi ku bena mwenu?

Abaume balafwaya sana ukubacindika. Baibolo yeba abalume ati: “Onse atemwe umukashi wakwe ifyo aitemwa umwine.” Lyena yeba abakashi ati: “Umukashi na o abe na katiina ku mulume wakwe.” (Abena Efese 5:33) Nangu ca kuti umulume no mukashi bonse balafwaya ukutemwikwa no kucindikwa, abalume e bafwaya sana ukubacindika. Ba Carlosa batile: “Abaume balafwaya ukulamona ukutila kuti bapwisha amafya no kusakamana ulupwa.” Nga ca kuti umukashi alacindika umulume no kusumina ukutila umulume kuti apwisha amafya no kusakamana ulupwa, ifintu filabawamina sana. Ba Corrine batile: “Abalume bandi balalanga sana ukuti balintemwa nga nabalanga ukuti nalibacindika.”

Kwena na banakashi bene balafwaya ukubacindika. Ici cishinka pantu umwaume te kuti atemwe umukashi uo ashacindika. Ba Daniel batile: “Mfwile ukucindika ifyo umwina mwandi atontonkanya pa fintu ne fyo alandapo, kabili mfwile no kucindika ifyo omfwa. Nga nshishibe icilengele aleumfwa fimo pa fintu tacilola mu kuti ninshi nshifwile ukubika amano ku fyo aleumfwa.”

Ifyo tumona ukuba no mucinshi fyalipusana. Icacindama bena mwenu ukulamona ukuti mwalibacindika, te imwe ukulamona ukuti mwalicindika abena mwenu. Ifi e fyo abanakashi abaupwa abo tulandilepo pa kutendeka kwa mutwe uleti “Ubwafya Ububapo” basangile. Batile: “Nangu ca kuti nshalemona ukutila nali no musaalula, nalingile ukwaluka pantu abena mwandi balemona ukuti nshakwete umucinshi.”

• Lembeni ifintu fitatu ifyo mwatemwa pa bena mwenu. Ifyo mwalemba kuti fyalenga mwalabacindika sana.

• Pa mulungu umo mulebika amano ku fyo mucita (te mu fyo abena mwenu bacita iyo) mu fyakonkapo.

Ifyo mulanda. Mu kufwailisha kumo basangile ukuti: “Abantu abali mu fyupo umwaba nsansa balandile fye amashiwi ayabi umuku umo, e lyo ayasuma imiku 5 ilyo balelanshanya pa mafya bakwete. Nomba abali mu fyupo ifya kutila kuti fyapwa inshita iili yonse, amashiwi ayabipa e yalefula sana nga balelanshanya.”​—Ilembo ilingamwafwa: Amapinda 12:18

Ukufuma mu citabo icitila Ten Lessons to Transform Your Marriage.

Yipusheni amuti: ‘Bushe ndaba no mucinshi nga ndalenda na bena mwandi? Bushe ndalanda sana pa fyabipa ifyo bacita ukucila ukubatasha pa fisuma ifyo bacita? Bushe ishiwi lyandi lyumfwika shani nga ndi ne fya kuilishanya?’ Bushe abena mwenu kuti basumina ukuti ifyo mwayasuka fya cine?—Ilembo ilingamwafwa: Abena Kolose 3:13.

Esheniko ukucita ifi: Muletashako abena mwenu nangu fye umuku umo cila bushiku. Pa kucita ifi, muloleshe na kabili pa fyo mwacilemba ukuti e fyo mwatemwa pa bena mwenu. Mufwile ukulaeba sana abena mwenu ifyo mwatemwa pali bena.—Ilembo ilingamwafwa: 1 Abena Korinti 8:1.

Ifyo mucita. Ba Alicia balandile ukuti: “Ndapoosa inshita iikalamba ukubomba imilimo ya pa ng’anda, kanshi ndatemwa sana nga ca kuti abena mwandi balanga ukuti balatasha pa fyo mombesha ilyo baitewila ifipe nelyo ukuisukila imbale bacilalilapo, kabili ici cilalenga namona ukuti nalicindama mu cupo cesu.”

Yipusheni amuti: ‘Bushe ifyo ncita filalanga ukuti nalicindika abena mwandi? Bushe ndababikako amano kabili ndaba nabo inshita iikalamba?’ Bushe abena mwenu kuti basumina ukuti ifyo mwayasuka fya cine?

Esheniko ukucita ifi: Lembeni ifintu fitatu ifyo mwingatemwa abena mwenu balemulangilamo ukuti balimucindika. Ebeni abena mwenu ukucita cimo cine. Lyena peeleni abena mwenu apo mwacilemba e lyo nabo babule apo bacilemba pa kuti bonse babili mulecita ifyo abena mwenu bacilemba. Mulingile ukubika amano ku fyo mwingalanga umucinshi te ku fyo abena mwenu bengaulanga. Nga mwatendekelapo ukulanga umucinshi, abena mwenu nabo nalimo kuti baba no mucinshi.