Bushe Yehova Atucingilila Shani?

 1. Cinshi Yesu alombeele Yehova ukuti alecingilila abasambi bakwe?

MU NSHITA ya bushiku ilyo Yesu ali mupepi no kufwa, aletontonkanya pa mafya yonse ayo abasambi bakwe bali no kukwata. Apo Yesu alitemenwe abasambi bakwe, alombele Wishi ukuti ‘alebacingilila ku mubifi.’ (Yoh. 17:14, 15) Yesu alishibe ukuti nga abwelelamo ku muulu, Satana Kaseebanya ali no kutwalilila ukulwisha bonse abasalapo ukulabombela Yehova. Kanshi abantu ba kwa Yehova balakabila ukubacingilila.

 2. Cinshi cingalenga twacetekela ukuti Yehova akula-asuka amapepo yesu?

² Yehova alyaswike ipepo lya Mwana wakwe Yesu pantu alimutemwa. Nga tule-esha apo twingapesha ukulacita ifilenga Yehova alasekelela, na ifwe bene akatutemwa, kabili akalabikako amano ilyo tulepepa kuli ena ukuti atwafwe no kutucingilila. Yehova ni Shifwe uwaba no kutemwa, kanshi akatwalilila ukusakamana abana bakwe. Nga talecita ifi, ishina lyakwe kuti lyasaalulwa.

 3. Cinshi calenga tulekabila Yehova ukulatucingilila muno nshiku?

³ Muno nshiku tulakabila Yehova ukutucingilila ukucila ifyo cali kale. Satana balimupoosa pe sonde ukufuma ku muulu, kabili ‘aliba ne cipyu icikalamba.’ (Ukus. 12:12) Alilenga abantu bamo ukulatontonkanya ukuti nga baletucusha ninshi ‘balebombela Lesa.’ (Yoh. 16:2) Abantu bamo abashasumina muli Lesa nabo balatucusha pa mulandu wa kuti twalipusanako na ba muli ici calo. Te mulandu ne cilenga baletucusha, tatubatiina. Cinshi tushibatiinina? Pantu Icebo ca kwa Lesa citila: “Shikulu wa cishinka, kabili akamukosha no kumucingilila ku mubifi.” (2 Tes. 3:3) Bushe Yehova atucingilila shani? Lekeni tulande pa nshila shibili isho Yehova abomfya pa kutucingilila.

 4. Ukulingana na Abena Efese 6:13-17, finshi Yehova atupeela pa kuti atucingilile?

⁴ Yehova alitupeela ifya bulwi fyonse ifingatucingilila ku kusansa kwa kwa Satana. (Belengeni Abena Efese 6:13-17.) Ifi ifya bulwi ifyo Lesa atupeela fyalikosa kabili filabomba bwino! Nomba kuti fyatucingilila fye nga ca kuti twafwala fyonse kabili twatwalilila ukufifwala. Finshi ica bulwi cimo na cimo cimininako? Natulande pali ifi ifya bulwi cimo cimo.

 5. Bushe umushipi wa cine ni cinshi, kabili cinshi tulingile uku-ufwalila?

⁵ Umushipi wa cine wimininako icine icaba mu Cebo ca kwa Lesa, Baibolo. Cinshi tulingile ukufwalila uyu umushipi? Pantu Satana “e wishi wa bufi.” (Yoh. 8:44) Alibepa ubufi pa myaka iingi nga nshi kabili alalufya “aba pano isonde bonse”! (Ukus. 12:9) Lelo icine icaba mu Baibolo cilatucingilila ku bufi ubo Satana abepa. Tufwala shani uyu umushipi wa mampalanya? Tufwala uyu umushipi nga tulesambilila icine pali Yehova, nga tulemupepa “mu mupashi na mu cine,” kabili nga tuleba aba cishinka mu fintu fyonse.—Yoh. 4:24; Efes. 4:25; Heb. 13:18.

 6. Bushe ica kucinga icifuba ica bulungami cimininako finshi, kabili mulandu nshi tulingile ukulacifwalila?

⁶ Ica kucinga icifuba ica bulungami cimininako amafunde ya kwa Yehova ayalungama. Cinshi tufwile ukufwalila ica kucinga icifuba ica bulungami? Nga filya fine ica kucinga icifuba cicingilila umutima wa mushilika ku mifwi ya balwani bakwe, ica kucinga icifuba ica bulungami cilacingilila umutima wesu uwa mampalanya ku fintu fyabipa ifya muli cino calo. (Amapi. 4:23) Yehova atwenekela ukumutemwa no kulamubombela no mutima wesu onse. (Mat. 22:36, 37) Nomba Satana alesha ukutulenga twatemwa ifya muli ici calo ifyo Yehova apata, pa kuti tuleke ukubombela Yehova no mutima wesu onse. (Yako. 4:4; 1 Yoh. 2:15, 16) Kabili nga amona ukuti uyu umucenjelo taubombele, alesha ukututiinya pa kuti tucite ifyapusana na mafunde ya kwa Yehova.

 7. Bushe tufwala shani ica kucinga icifuba ica bulungami?

⁷ Tufwala ica kucinga icifuba ica bulungami nga twasumina ifyo amafunde ya kwa Yehova yalanda pa calungama ne calubana kabili nga tuleyakonka. (Amalu. 97:10) Bamo nalimo kuti balamona kwati amafunde ya kwa Yehova yalyafya ukukonka. Lelo nga twaleka ukukonka amashinte ya mafunde ya mu Baibolo mu mikalile yesu, kuti twaba ngo mushilika uwafuula ica kucinga icifuba ilyo ali ku bulwi pa mulandu wa kuti alemona kwati cilemufinya. Ukucita ifi kuti kwaba buwelewele! Bonse abatemwa Yehova tabamona ukuti amafunde yakwe ‘yalyafya,’ lelo bayamona ukuti ya kubacingilila.—1 Yoh. 5:3.

 8. Bushe calola mwi ukufwala insapato sha mbila nsuma ku makasa yesu?

⁸ Paulo atukoseleshe ukuti tufwile ukufwala ku makasa yesu insapato sha mbila nsuma ya mutende. Mu mashiwi yambi, aleti lyonse tufwile ukuba abaiteyanya ukubila imbila nsuma ya Bufumu. Nga tule-ebako abantu icine icaba mu Baibolo, icitetekelo cesu cikalakoselako. Tulatemwa ukumona ifyo abantu ba kwa Yehova mwi sonde lyonse besha na maka ukubila imbila nsuma konse uko bali. Balabila imbila nsuma ilyo bali ku ncito, ilyo bali ku sukulu, mu fifulo fya makwebo, ku ng’anda ne ng’anda, ilyo baya mukushita fimo mu matuuka, ilyo batandalila balupwa lwabo abashili ba Nte, ilyo balelanda na bantu abo baishibana fye nabo, na lintu bashilefuma pa ng’anda pa mulandu wa fintu fimo. Nga twaumfwa umwenso ica kuti twaleka no kubila imbila nsuma, kuti twaba kwati mushilika uufuulile insapato ilyo ali ku bulwi. Umushilika nga afuula insapato ilyo ali ku bulwi kuti aicena. Ici kuti calenga ca-angukila abalwani bakwe ukumusansa, kabili te kuti akonke ifyo umukalamba wabo alebeba ukucita.

 9. Cinshi tulingile ukulasendela inkwela iikalamba iya citetekelo?

⁹ Inkwela iikalamba iya citetekelo imininako ukuba ne citetekelo muli Yehova. Twalicetekela ukuti akafikilisha fyonse ifyo atulaya. Icitetekelo cikatwafwa ‘ukushimya imifwi yonse iya mulilo iya mubifi.’ Cinshi tulingile ukulasendela inkwela iikalamba? Pantu ilatucingilila pa kuti twibepwa ku fisambilisho fya basangu, kabili tatufuupuka abantu nga balesuusha ifyo twasuminamo. Ukwabula icitetekelo te kuti tube na maka ya kukaana abantu nga batweba ukutoba amafunde ya kwa Yehova. Nomba nga twakaana ukucita ifyo Yehova apata ilyo tuli ku ncito nelyo ku sukulu, ninshi inkwela yesu iya citetekelo iletucingilila. (1 Pet. 3:15) Lyonse ilyo twakaana ukwingila incito ya kufola indalama ishingi iingalenga twaleka ukubombela bwino Yehova, ninshi tulesenda inkwela yesu iya citetekelo, kabili ninshi iletucingilila. (Heb. 13:5, 6) Kabili lyonse ilyo twatwalilila ukubombela Yehova na lintu baletukaanya, ninshi inkwela yesu iya citetekelo iletucingilila.—1 Tes. 2:2.

10. Bushe icisote ce pusukilo cimininako cinshi, kabili cinshi tulingile ukufwalila ici icisote?

¹⁰ Icisote ce pusukilo lisubilo ilyo Yehova atupeela, e kutila isubilo lya kuti akatulubula ku mfwa kabili akalambula bonse abacita ukufwaya kwakwe. (1 Tes. 5:8; 1 Tim. 4:10; Tito 1:1, 2) Nga filya fine icisote cicingilila umutwe wa mushilika, isubilo nalyo lilacingilila amatontonkanyo yesu. Licingilila shani amatontonkanyo yesu? Isubilo lilalenga tuletontonkanya sana pa fyo Lesa atulaya, kabili lilatwafwa ukukanasakamikwa sana nga twaba na mafya. Bushe tufwala shani icisote ce pusukilo? Tufwala icisote ce pusukilo nga ca kuti tuletontonkanya nge fyo Lesa atontonkanya. Ku ca kumwenako, tatushintilila pa fyuma ifishitwalilila ukubako, lelo tubika amano ku fyo Lesa atulaya.—Amalu. 26:2; 104:34; 1 Tim. 6:17.

11. Bushe ulupanga lwa mupashi ni cinshi, kabili mulandu nshi tulingile ukulalubomfesha?

¹¹ Ulupanga lwa mupashi Cebo ca kwa Lesa, Baibolo. Ulu ulupanga lwalikwata amaka ya kulenga ubufi bwa misango yonse ukwishibikwa, no kulubula abantu ku fisambilisho fya bufi e lyo na ku mibele yabipa. (2 Kor. 10:4, 5; 2 Tim. 3:16, 17; Heb. 4:12) Ifyo tusambilila ilyo tuleisambilisha Baibolo e lyo ne fyo icilonganino ca kwa Lesa citusambilisha, filalenga tuleishiba ifya kubomfya bwino ulu ulupanga. (2 Tim. 2:15) Ukulunda pa kutupeela ifya bulwi fyonse, kwaliba inshila na imbi iyo Yehova abomfya pa kutucingilila. Ni nshila nshi iyo ine?

12. Cinshi cimbi ico tukabila pa kuti tucimfye ubulwi bwa ku mupashi, kabili mulandu nshi?

¹² Umushilika uwaishiba sana ukulwa, alishiba ukuti te kuti acimfye ibumba lya bashilika ilikalamba eka. Alakabila abashilika banankwe ukumwafwa. Ifi fine e fyo caba na kuli ifwe. Te kuti tucimfye Satana na bamukonkelela nga ca kuti tuli fye fweka. Tulakabila bamunyinefwe na bankashi ukutwafwa. Yehova alitupeela “aba bwananyina” ababa mwi sonde lyonse abaitemenwa ukutwafwa.—1 Pet. 2:17.

13. Nga fintu Baibolo ilanda pa AbaHebere 10:24, 25, tunonkelamo shani nga tulesangwa mu kulongana?

¹³ Cimo ico twingacita pa kuti Yehova atwafwe kulasangwa mu kulongana. (Belengeni AbaHebere 10:24, 25.) Bonse fye inshita shimo tulafuupuka. Nga twafuupuka, ukulongana kulatusansamusha. Ifyo bamunyinefwe na bankashi basukapo ilyo tuli pa kulongana filatukoselesha. Amalyashi ayashimpwa pali Baibolo e lyo ne filangililo, filalenga tulefwaisha ukutwalilila ukulabombela Yehova. Kabili tulakoseleshiwa nga tulelanda na bamunyinefwe na bankashi ilyo ukulongana kushilatendeka na pa numa ya kulongana. (1 Tes. 5:14) Na kabili ilyo tuli pa kulongana tulakwata ishuko lya kwafwako bambi, kabili ukucita ifi kulalenga tuleba ne nsansa. (Imil. 20:35; Rom. 1:11, 12) Ukulongana kwesu kulatwafwa mu nshila na shimbi. Kulatwafwa ukwishibilako ifya kubomba bwino umulimo wa kubila imbila nsuma no kusambilisha abantu Baibolo. Ku ca kumwenako, ilyo tuli pa kulongana tulasambilila ifya kubomfya bwino Impapulo Tubomfya Sana pa Kusambilisha Abantu Baibolo. Kanshi mulepekanya sana ukulongana. Kabili ilyo muli pa kulongana mulekutikisha. Lyena pa numa ya kulongana mulebomfya ifyo mwacisambilila. Nga mulecita ifi, mukaba “umushilika umusuma uwa kwa Kristu Yesu.”—2 Tim. 2:3.

14. Ni bani bambi abatwafwa?

¹⁴ Bamalaika iminshipendwa aba maka nabo balatwafwa. Tontonkanyeni pa fyo malaika umo engacita! (Esa. 37:36) Kabili tontonkanyeni na pa fyo ibumba ilikalamba ilya bamalaika aba maka lingacita. Takuli umuntu nangu umo nelyo icibanda icingacimfya ibumba lya maka ilya kwa Yehova. Yehova nga ali no mubomfi wakwe umo, ninshi abali ku lubali lwa mubomfi wa kwa Yehova bengi ukucila abalwani bakwe. (Abapi. 6:16) Kuti twashininkisha ukuti ici cishinka! Muletontonkanya pa bali ku lubali lwenu lyonse ilyo mwafuupuka pa mulandu ne fyo uo mubomba nankwe, uo musambilila nankwe, nelyo lupwa lwenu uushili Nte alanda nelyo acita. Muleibukisha ukuti tamulwa mweka ubu ubulwi. Mulakonka ifyo Yehova amweba ukucita, kanshi akulamwafwa.

15. Nga fintu ilembo lya kwa Esaya 54:15, 17 lilanda, cinshi bashingatulesesha ukubila imbila nsuma?

¹⁵ Abantu ba muli ici calo icitungululwa na Satana balikwata ifingi ifyo batupatilapo. Tatuitumpa mu fikansa fya calo kabili tatulwako inkondo. Tulebako abantu pe shina lya kwa Lesa, tulabila ukuti Ubufumu bwa kwa Lesa e bukaleta fye umutende pe sonde, kabili tulakonka amafunde yakwe ayalungama. Tulalenga abantu bashininkisha ukuti kateka wa cino calo mubi, wa bufi, kabili ni kepaya. (Yoh. 8:44) Kabili tulabilisha ukuti cino calo icitungululwa na Satana cili no konaulwa nomba line. Satana na bamukonka tabakatuleshe ukubomba umulimo wa kubila imbila nsuma. Lelo tukatwalilila ukulumbanya Yehova apapela amaka yesu. Nangu ca kuti Satana alikwata sana amaka, alifilwa ukulesha imbila nsuma ya Bufumu ukubilwa ku bantu mwi sonde lyonse. Icalenga ni co Yehova alatucingilila.—Belengeni Esaya 54:15, 17.

16. Bushe Yehova akapususha shani abantu bakwe mu bucushi bukalamba?

¹⁶ Finshi fili no kucitika nomba line? Mu nshita ya bucushi bukalamba, Yehova akatupususha mu nshila shibili ishaibela. Inshila ya kubalilapo, akacingilila ababomfi bakwe aba cishinka pa nshita lintu akalenga ishamfumu sha pano isonde ukonaula Babiloni Mukalamba, e kutila ukupepa konse ukwa bufi. (Ukus. 17:16-18; 18:2, 4) Lyena inshila yalenga bubili, akapususha abantu bakwe ilyo akonaula icalo conse icitungululwa na Satana pa Amargedone.—Ukus. 7:9, 10; 16:14, 16.

17. Tunonkelamo shani nga twatwalilila ukuba sana ifibusa fya kwa Yehova?

¹⁷ Nga twatwalilila ukuba sana ifibusa fya kwa Yehova, tapali ico Satana engacita icingalenga twalacula umuyayaya. Na kuba, Satana e o bakonaula umuyayaya. (Rom. 16:20) Kanshi mulefwala ifya bulwi fyonse ifya kwa Lesa, kabili te kwesha ukufifuula! Mwilaesha ukulwa ubulwi bwa ku mupashi mweka. Muleafwa bamunyinenwe na bankashi. Kabili mulekonka ifyo Yehova amweba. Nga mulecita ifi, mukashininkisha ukuti Shinwe wa ku muulu uwaba no kutemwa, akalamukosha kabili akalamucingilila.—Esa. 41:10.