Programu Na Imbi iya Kulongana kwa Muputule

Icalo kuti cafwaya ifwe ukusumina ukuti buno bwikashi bukabelelela. Lelo, Icebo ca kwa Lesa te fyo citweba. (1 Yoh. 2:15-17) Cilatwafwa ukwishiba ukuti ‘ukututila ifyuma pano calo’ kuicusha fye. Pa kuti abantu ba kwa Lesa bakoshiwe, ukulongana kwa muputule ukwa mu 2007 kukakwata umutwe wa lyashi uukalalanda ukuti: “Tutileni . . . Icuma mu Muulu.”—Mat. 6:19, 20.

Pali filya ilembo lya Abena Efese 2:2 lita ati “kateeka wa maka ya mu lwelele, umupashi uyo nomba ubomba mu bana ba bucintomfwa,” paba no kutemwa sana icuma. Nga fintu umwela uba fye ukuli konse, ica kuti bonse fye kuti baupeema, e fyaba no “mupashi wa pano calo,” walyandatila ubwikashi bonse. (1 Kor. 2:12) Apo ulambukila sana, calisoswa ukuti walikwata “amaka.” Programu iipya iya kulongana kwa muputule ikatwafwa ukukaana ukutontonkanya kwa mu calo ukwa kutemwa icuma kabili ikatulenga tukabike sana amano ku fintu ifyacindamisha. (Mat. 6:33) Na kabili, programu ikatwafwa ukushintilila pali Yehova ilyo tulebomba umulimo wesu nangu twaponenwa na mafya ne fya kwesha.

Mukashininkishe ukuti mwasangwako inshiku shonse, na kabili ‘mukangweko apakalamba ku fyo muumfwa.’ (Heb. 2:1) Mukalelemba ifishinka ifyo mwingafwaya ukulakonka mwe bene, ne fyo mwingafwaya ukulabomfya mu mulimo wa mwibala. Nga mwasangwako ukufuma fye pa kutendeka mpaka na ku mpela ya iyi programu ya cebo ca kwa Lesa icishaiwamina, mukakoseleshiwa kabili mukafwiwa ukutwalilila ‘ukututila icuma mu muulu’!