Ifipusho Ukufuma ku Babelenga
Abena Efese 3:14, 15 batila kuli Lesa e ko “indupwa shonse mu muulu na pano nse shiinikwako amashina.” Bushe mu muulu mwalibamo indupwa, kabili bushe ulupwa lumo na lumo ulwa buntunse mu nshila imo lupokelela ishina lya luko ukufuma kuli Yehova?
Tamwaba indupwa mu muulu nga fintu shaba pano isonde, ukuba na wishi, nyina, na bana—bonse ababa ni balupwa mu nshila ya ku mubili. (Luka 24:39; 1 Abena Korinti 15:50) Yesu alangilile mu kumfwiko kuti bamalaika taboopa, kabili tapaba icili conse icilangilila ifyo kuti bakwata abana.—Mateo 22:30.
Nangu cibe fyo, Baibolo ilanda mu mampalanya ulwa kwa Yehova Lesa ngo waupa ukuteyanya kwakwe ukwa ku muulu; aupa mu nshila ya ku mupashi. (Esaya 54:5) Kulya kuteyanya kwa ku muulu kulakwata abana, pamo nga bamalaika. (Yobo 1:6; 2:1; 38:4-7) Muli aya mano, kanshi, kwalibako ulupwa lwa ku mupashi ulwawamisha ku muulu.
Ukulundapo, ulupwa lwa mampalanya ulupya lulepangwa mu muulu, umwaba Yesu Kristu na nabwinga wakwe uwapange cilonganino ca ba 144,000. (2 Abena Korinti 11:2) Ubwingi bwa aba basubwa balifwa kale, mu kuba no kwenekela ubumi bwa mu muulu. Bamo bacili aba mweo pe sonde. Bonse benekela mu kuswatuka “ubwinga bwa Mwana wa mpaanga.” Baibolo ilundanya bulya bwinga ku bucushi bukalamba ubulepalamina—ukonaulwa kwa Babele Mukalamba, e lyo no kufumishiwapo kwa micitile yashala iya kwa Satana.—Ukusokolola 18:2-5; 19:2, 7, 11-21; Mateo 24:21.
Ukukuma ku ndupwa sha pe sonde, umutumwa Paulo talelangilila pa Abena Efese 3:15 ukuti ulupwa ululi lonse lwinikwa ishina mu kulungatika ukufuma kuli Yehova. Ukucila, Paulo mu kumonekesha akwete mu muntontonkanya imitande ya ndupwa shikalamba iisungilila ishina. Yoshua 7:16-19 alapeela ica kumwenako. Yehova palya alesansalika ulubembu lwa kwa Akani. Intanshi, umulandu watontelwe nelyo ukupeleshiwa pa mukowa wa kwa Yuda. Lyene waishilecefiwa ukuletwa pa lupwa lwa bena Sera. Mu kupelako, aba ŋanda ya kwa Akani balisansalikwe. Akani capamo no mukashi wakwe na bana baalemonwa, nelyo ukulangililwa, nga bali ulubali lwa ba ŋanda (nelyo, ulupwa) ya kwa Sabdi, wishikulu kwa Akani. Lulya lupwa, mu kukonkapo, lyali libumba lyatanunuka ilyo lyabakilile ishina lya cikolwe cabo Sera.
Pa kati ka baHebere, imitande ya ndupwa iya musango yo yalicindeme nga nshi, abengi balitantikwa na mu Baibolo. Lesa alyafwilishe ukuti iyo mitande ibakwe ukupitila mu kupayanya ukuti impyani shilesungilila ishina lya lupwa ukupitila mu cupo ca Kupyana Munyina, nelyo kucito musango wa kwa munyina kwa mulume, ilyo calekabilwa.—Ukutendeka 38:8, 9; Amalango 25:5, 6.
Pamo nge ca kumwenako na cimbi ica ndupwa shakulako nelyo ishatanunuka isha musango yo, languluka Yesu nga mwana Davidi. Ukwabulo kutwishika taali mwana wa kuifyalila uwa Mfumu Davidi, apo aishilefyalwa imyanda ya myaka iingi pa numa Davidi alifwa. Lelo, ica kwishibilako Mesia cali ca kuti aali no kuba wa mu lupwa lwa kwa Davidi, nga fintu abaYuda baishibe mu cinkumbawile. (Mateo 22:42) Yesu aali mu mutande wa kwa Davidi konse kubili kuli nyina na kuli wishi umuleshi.—Mateo 1:1; Luka 2:4.
Lelo ni shani fintu indupwa sha musango yo shiinikwa amashina kuli Yehova? Icishinka cili ca kuti kwaliko utushita tumo—pamo nga mu mulandu wa kwa Abrahamu na Isaki—lintu Yehova mu kulungatika fye ainike umutwe wa lupwa ishina. (Ukutendeka 17:5, 19) Uto twali tushita twaibela fye. Ilingi line, Yehova tapeela ulupwa lumo na lumo ishina ilyo lushila abana.
Yehova, nangu cibe fyo, e watendeke ulupwa lwa buntunse lintu akambishe Adamu na Efa ‘ukufyalana, ukufula, no kukumana pe sonde.’ (Ukutendeka 1:28) Kabili Yehova asuminishe Adamu na Efa abashapwililika ukukwata abana, muli fyo ukwimike citendekelo ku ndupwa sha buntunse shonse. (Ukutendeka 5:3) E co mu nshila ishingiko, Lesa kuti aitwa nga Katendeka wa mashina ya ndupwa.
Mu ntambi ishingi ilelo abantu tabayumfwa ukukabila kwa kusungilila amashina ya ndupwa ku nkulo ishingi. Nangu ni fyo, mu fyalo fyonse Abena Kristu balatasha Yehova pa kutantika kwa lupwa kabili balamucindika ukupitila mu kubombesha ukulenga icikakilo cabo ica lupwa ukube catunguluka.