Ukulaumfwana Bwino na Balupwa ne Fibusa
Abantu abengi tabatwalilila ukulaumfwana bwino na balupwa ne fibusa. Natulande pali fimo ifyo Baibolo yalandapo ifingamwafwa ukulaumfwana bwino na bantu.
TAMUFWILE UKUBA BAKAITEMWE
IFYO BAIBOLO ILANDA: “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:4.
UMWALOLA AYA AMASHIWI: Nga mulefwaya ukulaumfwana bwino na bantu, mufwile ukulabafwa mu nshita ya kulafwaya fye ukuti ni mwe baleyafwa. Nga ca kuti mwaba bakaitemwe, te kuti muleumfwana bwino na bantu. Ku ca kumwenako, nga ca kuti umuntu uwaupa nelyo ukuupwa ni kaitemwe, kuti acita ubucende. Na kabili, bonse fye tatufwaya ukukwata ifibusa abalanda fye pa fyo bakwata na pa fyo baishiba. E mulandu wine icitabo citila The Road to Character cilandila ukuti, “abantu ababika fye amano ku fyo abene balefwaya balaba sana mafya.”
IFYO MWINGACITA:
Muleafwa abantu. Nga ca kuti abantu baleafwana, bucibusa bwabo bulakosa sana kabili balacetekelana. Na kabili abafwailisha pa fintu basanga ukutila abantu abafwa abanabo tabalwala sana amasakamika kabili tabaisuula.
Muleba no luse. Umuntu uwaba no luse nga amona umuntu umbi ali na mafya omfwa kwati e ukwete ayo amafya. Kanshi nga ca kuti mwaliba no luse, tamwakulalanda amashiwi ayengakalifya abantu, nangu fye ukulanda ayo mashiwi mu mipulwe.
Nga ca kuti mwaliba no luse, tamwakabe na kapatulula. Ici cikalenga mukapange ifibusa ifyalekanalekana.
Mulekwatako inshita ya kuba pamo na bantu. Nga muleba pamo na bantu bambi e lyo mwingabeshiba bwino. Mufwile ukulakwatako inshita ya kwisha na bantu nga mulefwaya ukupanga ifibusa ifisuma. Nga balelanda fimo, mufwile ukulakutikisha. Mufwile ukubikako sana amano nga pali ifibasakamike. Abafwailisha pa fintu basanga ukutila “abantu abakwata abo balanda nabo amalyashi ayacindama balaba sana ne nsansa.”
MULESALA BWINO IFIBUSA
IFYO BAIBOLO ILANDA: “Ukwampana pamo na babi kulonaula imibele isuma.”—1 Abena Korinti 15:33.
UMWALOLA AYA AMASHIWI: Ifibusa fyenu kuti fyalenga mwaba ne mibele iisuma nelyo iyabipa. Nangu fye bantu abasambilila sana balasumina ukutila ici cishinka. Ku ca kumwenako, nga muleba sana na bantu abapeepa fwaka nelyo abalekana na bena mwabo, na imwe kuti mwatendeka ukupeepa fwaka nelyo kuti mwalafwaya ukulekana na bena mwenu.
IFYO MWINGACITA: Mufwile ukupanga bucibusa na bantu ababa ne mibele iisuma iyo mwingatemwa ukupashanya. Ku ca kumwenako, mulepanga bucibusa na bantu abalangulukilako abanabo, aba mucinshi, bakapekape, kabili ababika amano ku bantu.
FIMBI IFYO BAIBOLO ILANDA IFINGAMWAFWA
Tambeni amavidio ayalanda pa fyaba muli Baibolo ayo bapanga ku kwafwa abaupana, imisepela, na bana abanono ukuba ne nsansa mu lupwa
MWILABA NO MUSAALULA.
“Umuntu uulanda ukwabula ukutontonkanya aba kwati lupanga ululasaula.”—AMAPINDA 12:18.
MULEBA BAKAPEKAPE.
“Umuntu wa bukapekape akakwata ifingi.”—AMAPINDA 11:25.
MULECITILA ABANTU IFYO MWINGATEMWA NA IMWE BAMUCITILA.
“Fyonse ifyo mufwaya abantu ukuti balemucitila, e fyo na imwe mulebacitila.”—MATEO 7:12.