ISAMBILILO 15
Bushe Yesu Nani?
Yesu aba pa bantu abaishibikwa sana abaliko pano isonde. Abengi balishiba ishina lya kuti Yesu, lelo tabaishiba ifingi pali ena kabili abengi balanda ifyapusanapusana pali Yesu. Finshi Baibo ilanda pali ena?
1. Bushe Yesu nani?
Yesu cibumbwa ca mupashi ica maka kabili ekala ku muulu. Yehova Lesa e wamubumbile kabili e o abalilepo ukubumba. Kanshi “e beli pa fibumbwa fyonse.” (Abena Kolose 1:15) Baibo ilanda ukuti Yesu “Mwana [wa kwa Lesa] uwafyalwa eka,” pantu e o Yehova abumbile mu kulungatika. (Yohane 3:16) Yesu alibombele sana na Wishi Yehova ilyo alemwafwako ukubumba ifintu fyonse. (Belengeni Amapinda 8:30.) Yesu alitwalilila ukuba sana cibusa wa kwa Yehova. Na kuba Yesu ni “Cebo,” alalandilako Lesa kabili abomba uyu mulimo ne cishinka.—Yohane 1:14.
2. Cinshi Yesu aishiile pano isonde?
Napapita imyaka nalimo 2,000 ukutula apo Yehova mu cisungusho abomfeshe umupashi wakwe uwa mushilo, ukukuusha ubumi bwa kwa Yesu ukufuma ku muulu no kubuleta mwi fumo lya kwa Maria umukashana nacisungu. Ici calengele ukuti Yesu afyalwe umuntunse. (Belengeni Luka 1:34, 35.) Ico Yesu aishiile pano isonde kwisaba Mesia walaiwe nelyo Kristu, na ku kupususha abantunse.a Amasesemo ya mu Baibo yonse ayalanda pali Mesia yafikilishiwe muli ena, kabili yalengele abantu baishiba ukuti Yesu ni “Kristu, Umwana wa kwa Lesa wa mweo.”—Mateo 16:16.
3. Bushe Yesu aba kwisa pali ino nshita?
Ilyo Yesu afwile no mubili wa buntunse, Lesa alimubuushishe nga malaika kabili alibwelelemo ku muulu. Ilyo abwelelemo ku muulu, “Lesa alimusansabike.” (Abena Filipi 2:9) Pali ino nshita Yesu ni malaika uwa maka nga nshi, kabili alikwata icifulo icikalamba. Ni Yehova fye e wakwata amaka ukumucila.
SAMBILILENI NA FIMBI
Sambilileni na fimbi pali Yesu, kabili moneni no mulandu cicindamine sana ukusambilila pali ena.
4. Yesu te Lesa wa Maka Yonse
Baibo isambilisha ukuti, nangu ca kuti Yesu cibumbwa ca mupashi ica maka ku muulu, alomfwila Lesa wakwe kabili Wishi, Yehova. Cinshi twalandila ifi? Tambeni VIDIO pa kuti mumone ifyo Baibo isambilisha pa bupusano bwaba pali Yesu na Lesa Wa Maka Yonse.
Amalembo yakonkapo yalatwafwa ukwishiba ubupusano bwaba pali Yehova e lyo na Yesu. Belengeni ilembo limo na limo, lyena lanshanyeni amepusho yakonkelepo.
Belengeni Luka 1:30-32.
Bushe ifyo malaika alandile filanga shani ukuti Yesu e lyo na Yehova “Uwapulamo” te bamo bene?
Belengeni Mateo 3:16, 17.
Bushe ilyo Yesu alebatishiwa, ishiwi ilyafumine ku muulu lyatile shani?
Bushe mulemona ukuti lyali lishiwi lya kwa nani?
Belengeni Yohane 14:28.
Bushe umukalamba kabili uwakwata sana amaka pali wishi no mwana ni nani?
Ni mwi Yesu aloseshe ilyo aitile Yehova ukuti Tata?
Belengeni Yohane 12:49.
Bushe mulemona ukuti Yesu aletontonkanya ukutila ena na Wishi baba fye cimo cine??
5. Ifyalangile ukuti Yesu ali e Mesia
Mu Baibo mwaliba amasesemo ayengi ayali no kulenga abantu baishiba Mesia, e kutila uo Lesa asala ukupususha abantunse. Tambeni VIDIO pa kuti mumone amasesemo yamo ayo Yesu afikilishe ilyo aishile pano isonde.
Belengeni aya masesemo ya mu Baibo, lyena lanshanyeni amepusho yakonkapo:
Belengeni Mika 5:2 pa kuti mwishibe uko Mesia ali no kufyalilwa.b
Bushe ubu busesemo bwalifikilishiwe ilyo Yesu afyelwe?—Mateo 2:1.
Belengeni Amalumbo 34:20 na Sekaria 12:10 pa kuti mumone ifyo Baibo yasobele pa mfwa ya kwa Mesia.
Bushe aya masesemo yalifikilishiwe?—Yohane 19:33-37.
Mulandu nshi tushingalandila ukuti kwali ifyo Yesu acitile pa kuti aya amasesemo yafikilishiwe?
Bushe aya amasesemo yalenga mwashininkisha cinshi pali Yesu?
6. Tulanonkelamo nga tulesambilila pali Yesu
Baibo yalilanda ico cacindamina ukusambilila pali Yesu na pa mulimo Lesa amupeela. Belengeni Yohane 14:6 na 17:3, lyena lanshanyeni ici cipusho:
Mulandu nshi cacindamina ukusambilila pali Yesu?
Yesu aliswile inshila pa kuti tuleba ifibusa fya kwa Lesa. Alesambilisha icine pali Yehova, kabili muli ena emo tukakwatila umweo wa muyayaya
ABANTU BAMO BATILA: “Inte sha kwa Yehova tabasumina muli Yesu.”
Kuti mwabasuka shani?
IFYO MUSAMBILILE
Yesu cibumbwa ca mupashi ica maka. Mwana wa kwa Lesa kabili ni Mesia.
Ukupitulukamo
Mulandu nshi Baibo ilandila ukuti Yesu “e beli pa fibumbwa fyonse”?
Mulimo nshi Yesu abombeleko ilyo ashilaisa pano isonde?
Twaishiba shani ukuti Yesu e Mesia?
ISHIBILENIPO NA FIMBI
Sambilileni na fimbi ifyalenga twishibe ukuti Yesu e Mesia.
“Bushe Amasesemo Ayalanda Pali Mesia Yalanga Ukuti Yesu E Wali Mesia?” (Icipande ca pa jw.org)
Moneni nga ca kuti Baibolo isambilisha ukutila Lesa afyele Yesu nge fi fine abantu bafyala abana.
“Cinshi Yesu Etilwa Ukuti Umwana wa kwa Lesa?” (Icipande ca pa jw.org)
Moneni nga ca kuti Baibo isambilisha ukutila Lesa afyele Yesu nge fi fine abantu bafyala abana.
“Bushe Yesu ni Lesa?” (Ulupungu lwa kwa Kalinda, April 1, 2009)
Belengeni ifyo umwanakashi umo ayalwile ubumi bwakwe ilyo aishibe ifyo Baibolo ilanda pali Yesu.
“Umwanakashi UmuYuda Alondolola ico Ayalwilile Ifyo Asuminemo” (Loleni!, May 2013)
a Mwi sambililo 26 na 27, tukasambilila ico fwe bantunse tukabila ukulubulwa e lyo ne fyo Yesu atulubula.
b Belengeni Ifyebo na Fimbi pa 2, pa kuti mumone ubusesemo ubwalandile ilyo Yesu ali no kwisa pano isonde.