Yehova

Ubulondoloshi: Lishina lya pa lwakwe lya kwa Lesa wa cine eka fye. Ukuipaatula kwakwe umwine. Yehova ni Kabumba kabili mu nsambu, ni Kateka Mulopwe wa kubumbwa konse. “Yehova” lyapilibulwo kufuma kuli Tetragramatoni wa ciHebere, יהוה, ilipilibula “Alengo kubako.” Aya makalata yane aya ciHebere yalilangwa mu ndimi ishingi ku makalata JHVH nelyo YHWH.

Ni kwi ishina lya kwa Lesa lisangwa mu mabupilibulo ya Baibolo ayo mu kuseeka yabomfiwa ilelo?

The New English Bible: Ishina Yehova limoneka pa Ukufuma 3:15; 6:3. Mona na kabili Ukutendeka 22:14; Ukufuma 17:15; Abapingushi 6:24; Esekiele 48:35. (Lelo nga ca kuti aya na mabupilibulo yambi yabomfya “Yehova” mu ncende ishingiko, mulandu nshi te kuba abakonkesha mu kulalibomfya pa ncende iili yonse apo Tetragramatoni imoneka mu calembwa ca ciHebere?)

Revised Standard Version: Futunoti pa Ukufuma 3:15 pasosa ukuti: “Ishiwi SHIKULU lintu lyalembwa na makalata yakalamba, limininako ishina lya bulesa, YHWH.

Today’s English Version: Futunoti pa Ukufuma 6:3 asoso kuti: “SHIKULU: . . . Uko ishiwi lya ciHebere lyakwata Yahweh, mu cishilano lyalangishiwa pamo nga Yehova, ubu bupilibulo bwabomfya SHIKULU mu kuba na makalata ayakulu, akukonka imibomfeshe iyo yaanana mu mabupilibulo ya ciNgeleshi.”

King James Version: Ishina Yehova lisangwa pa Ukufuma 6:3; Ilumbo 83:18; Esaya 12:2; 26:4. Mona na kabili Ukutendeka 22:14; Ukufuma 17:15; Abapingushi 6:24.

American Standard Version: Ishina Yehova lyabomfiwa mu kukonkesha mu Malembo ya ciHebere muli ubu bupilibulo, ukutendekela pa Ukutendeka 2:4.

Douay Version: Futunoti pa Ukufuma 6:3 isoso kuti: “Ishina lyandi Adonai. Ishina, ilyo mwi shiwi lya ciHebere, e shina lyacilapo ukulinga ilya kwa Lesa, ilyalangisha iciyayaya cakwe uwaikalako umwine, (Ukufu. 3, 14,Ukuf 3:14) ilyo abaYuda ku kulicindika tabalishimbula; lelo, mu cifulo ca liko, lintu lyamoneka mu Baibolo, babelenga Adonai, ililangilila Shikulu; kabili, e co, babike fisontelelo nelyo amavawelo, ifyaba kwi shina Adonai, ku makalata yane aya ilyo ishina lishilumbulwa, Jod, He, Vau, He. E co bamo aba muno nshiku bapange shina lya Yehova, ilishaishibikwa kuli bonse pa kale, napamo abaYuda nelyo abena Kristu; pantu ukushimbula kwa cine ukwe shina, ukwaba mwi shiwi lya ciHebere, mu kushilibomfye inshita ntali nomba lyaliloba.” (Cili ca kusekelelo kuti The Catholic Encyclopedia [1913, Vol. VIII, ibu. 329] isoso kuti: “Yehova, e shina lyalinga ilya kwa Lesa mu Cipingo ca Kale; e co abaYuda baleliita ishina mu bulumba, ishina likulu, ishina lyeka fye.”)

The Holy Bible iyapilibwilwe na Ronald A. Knox itiila: Ishina Yahweh lisangwa mu mafutunoti pa Ukufuma 3:14 na 6:3.

The New American Bible: Futunoti pa Ukufuma 3:14 yasobolapo umusango “Yahweh,” lelo ishina talimoneka mu calembwa cikalamba ica bupilibulo. Mu calembwa ca Mutakatifu Joseph, mona na kabili appendix Bible Dictionary pe samba lya “Shikulu” na “Yahweh.”

The Jerusalem Bible: Tetragramatoni apilibulwa Yahweh, ukutampa mu kuba no kumoneka kwa liko ukwa kubalilapo, pa Ukutendeka 2:4.

New World Translation: Ishina Yehova libomfiwa monse mubili mu Amalembo ya ciHebere na ya bwina Kristu aya ciGreek muli ubu bupilibulo, ukumoneka imiku 7,210.

An American Translation: Pa Ukufuma 3:15 na 6:3 ishina Yahweh lyalibomfiwa ukukonkwapo na “SHIKULU” mu mabraketi.

The Bible in Living English, S. T. Byington: Ishina Yehova lyalibomfiwa ukupulinkana Amalembo ya ciHebere.

The ‘Holy Scriptures’ yapilibwilwe na J. N. Darby: Ishina Yehova limoneka ukupulinkana Amalembo ya ciHebere, na kabili mu mafutunoti ayengi pa fyalembwa fya Malembo ya bwina Kristu aya ciGreek, ukutendeka na Mateo 1:20.

The Emphatic Diaglott, Benjamin Wilson: Ishina Yehova lisangwa pali Mateo 21:9 na mu ncende shimbi 17 muli buno bupilibulo bwa Malembo ya bwina Kristu ya ciGreek.

The Holy Scriptures According to the Masoretic Text—A New Translation Jewish Publication Society of America, Max Margolis editor-in-chief: Pa Ukufuma 6:3 Tetragramatoni wa ciHebere amoneka mwi shiwi lya ciNgeleshi.

The Holy Bible lyapilibwilwe na Robert Young: Ishina Yehova lisangwa ukupulinkana Amalembo ya ciHebere muli ubu bupilibulo bwa kukonke shiwi.

Mulandu nshi amabupilibulo ayengi aya Baibolo tayabomfye shina lya pa lwakwe lya kwa Lesa atemwa ukulibomfya fye imiku inono?

Amashiwi ya kulondolola aya Revised Standard Version yalondololo kuti: “Ku milandu ibili Komiti yapilibukila ku kubomfiwa kwafulilako ukwabeleshiwa ukwa kwa King James Version: (1) ishiwi ‘Yehova’ mu kulungikwa talilangisho musango onse uwe shina ilyabalile alibomfiwa mu ciHebere; na (2) ukubomfya kwe shina ilili lyonse lyalinga ilya kwa Lesa eka kabili umo, kwati kwali imilungu imbi ku yo aali no kuilekanyako, takwatwalilile mu buYuda pa ntanshi ya nshita ya bwina Kristu kabili umupwilapo kuli ukushalinga ku citetekelo ca konse konse ice Calici lya bwina Kristu.” (Muli ifyo imimwene yabo abene iya ico cili icalinga yalishintililwapo nge citendekelo ca kufumishapo muli Baibolo wa Mushilo ishina lya pa lwakwe lya kwa Kapanga wa liko wa buLesa, uo ishina limoneka mu ciHebere ca kutendekelako ilingi pe shina ilili lyonse limbi nelyo ilumbo ilili lyonse. Mu kusumina bakonka ica kumwenapo ca bakonene ku buYuda, abo Yesu asosele ukuti: “Namusangule cebo ca kwa Lesa ica fye ku ca cishilano cenu.”—Mat. 15:6.)

Bakapilibula abayumfwo kukakililwako ukusanshamo ishina lya pa lwakwe lya kwa Lesa mu kucepako limo atemwa nakalimo imiku inono mu calembwa cikalamba, nangula tabalecite fyo inshita yonse limoneka mu ciHebere, mu kushininkisha bakonkele ica kumwenapo ca kwa William Tyndale, uwasanshishemo ishina lya bulesa mu bupilibulo bwakwe ubwa Pentatuki ubwasabankanishiwe mu 1530, muli ifyo ukulekelako icibelesho ca kufumyamo ishina umupwilapo.

Bushe ishina lya Yehova lyabomfiwe na bakalemba bapuutwamo aba Malembo ya bwina Kristu aya ciGreek?

Jerome, mu mwanda wa myaka uwalenga ine, alembele ukuti: “Mateo, uuli na kabili Lebi, kabili ukufuma kuli bukasonkesha abele umutumwa, intanshi alembele Ilandwe lya kwa Kristu mu Yudea mu lulimi lwa ciHebere ne filembo ku kumwenamo kwa abo aba kusembululwa abasumine.” (De viris inlustribus, icipa. III) Ili Landwe lyasanshamo ukwambula kwalungatika 11 ukwa mbali sha Malembo ya ciHebere uko Tetragramatoni asangwa. Takuli umulandu ukucetekelo kuti Mateo taambwile imikululo nga fintu yalembelwe mu fyalembwa fya ciHebere uko ayambwile.

Bakalemba bambi abapuutwamo abasangwilileko ku fyabamo ifya Malembo ya bwina Kristu aya ciGreek baambwile imyanda ya mikululo ukufuma kuli Septuagint, ubupilibulo bwa Malembo ya ciHebere ukutwala mu ciGreek. Iingi iya iyi mikululo yasanshishemo Tetragramatoni wa ciHebere ukulungatika mu fyalembwa fya ciGreek ifya makope ya mu kubangilila aya Septuagint. Mu kuumfwana ne mibele ya kwa Yesu umwine ukulosha kwi shina lya kwa Wishi abasambi bafwile balisungile ilyo ishina muli uko kwambula.—Linganyako Yohane 17:6, 26.

Muli Journal of Biblical Literature, George Howard uwa ku University wa ku Georgia alembele ukuti: “Natwishiba mu cishinka ukuti abaYuda balelande ciGreek batwalililo kulemba יהוה, mu kati ka Malembo yabo aya ciGreek. Mu kulundapo, cili ukucile icishapalako ukuti abena Kristu ba ciYuda abakoneneko mu kubangilila abalelande ciGreek balipusanako kufuma kuli ici cibelesho. Nangula mu fya kuloshako ifya cibili kuli Lesa nakalimo babomfeshe amashiwi [Lesa] na [Shikulu], nga ca kuti cali icishili ca lyonse ukucilisha kuli bene ukufumyamo Tetragramu mu calembwa ca baibolo icine ceka. . . . Apantu Tetragramu aali acili alelembwa mu makope ya Baibolo wa ciGreek uwapangile Amalembo ye calici lya mu kubangilila, calibe ca kupelulula ukucetekelo kuti bakalemba ba Cipingo Cipya, lintu bambulo kufuma kwi Lembo, babakile Tetragramu mu calembwa ca baibolo. . . . Lelo ilintu lyafumishiwemo mu Cipingo ca Kale ica ciGreek, na kabili lyafumishiwemo mu kwambula ukufuma ku Cipingo ca Kale ukutwala mu Cipingo Cipya. Muli ifyo mupepi no kutendeka kwa mwanda wa myaka uwa cibili ukubomfye fya kupyanikapo kufwile kwalifimbilikishe Tetragramu muli fyonse fibili Ifipingo.”—Vol. 96, No. 1, March 1977, ibu. 76, 77.

Musango nshi uwe shina lya bulesa uli uwalungikwa—Yehova atemwa Yahweh?

Takuli umuntunse ilelo uwingashikimika ifyo mu kutendeka lyaleshimbulwa mu ciHebere. Mulandu nshi? Baibolo ya ciHebere mu kutendeka yalembelwe fye mu kuba na makonsonanti, tamwali amavawelo. Ilintu ululimi lwalebomfiwa ubwaca no bwaca, bakabelenga mu kwanguka bapayenye amavawelo yalinga. Mu kupita kwa nshita, nangu cibe fyo, abaYuda baishilekwata imfundo ya kutiine mipashi ukuti cali icalubana ukusose shina lya pa lwakwe ilya kwa Lesa mu kupongomoka, e co babomfeshe inumbwilo sha kupyanikapo. Pa numa ya myanda ya myaka, abasambi ba ciYuda balundulwile imicitile ya fisontelelo ku fyo bengalangisha mavawelo nshi ku kubomfya lintu balebelenga iciHebere ca pa kale, lelo babikile amavawelo aya numbwilo sha kupyanikapo mu makonsonanti yane ukwimininako ishina lya bulesa. Muli ifyo imishimbwile ya kubalilapo iye shina lya bulesa yalilobele.

Abasambi abengi basobolapo ukulumbula “Yahweh,” lelo talyashininkishiwa kabili takwaba kusuminishanya pa kati kabo. Pa lubali lumbi, “Yehova” e musango we shina wacilapo ukwishibwa, pantu lyalibomfiwa mu ciNgeleshi pa myanda ya myaka iingi no kubaka mu kulingana mu kuba ne misango imbi, amakonsonanti yane aya Tetragramatoni wa ciHebere.

J. B. Rotherham, muli The Emphasised Bible, abomfyo musango wa Yahweh ukupulinkana Amalembo ya ciHebere. Nangu cibe fyo, pa numa muli Studies in the Psalms abomfeshe umusango wa “Yehova.” Alondolwele ukuti: “JEHOVAH—E mibomfeshe ya musango uyu uwa ciNgeleshi uwe shina lya Cibukisho . . . mu bupilibulo bulipo ubwa Amalumbo tabwaima ukufuma ku kutwishiko kuli konse ukukuma ku kushimbula kwacilapo kulungikwa, ukuba nga Yahwéh; lelo kweka ukufuma ku bushinino bubomba ubwasalilwe pa lwakwe ukwa kufwaisha kwa ukwikatanya ukumfwa kwa cintubwingi no kumona muli uyu mulandu wa mutundu uyu, umo icintu cikalamba cili kwishibwa kwayanguka ukwe shina lya bulesa ukwafwaikwa.”—(London, 1911), ibu. 29.

Pa numa ya kulanshanya ukushimbula kwalekanalekana, profesa umuGermany Gustav Friedrich Oehler asondwelele ukuti: “Ukufuma pali iyi nshita ukuya ku ntanshi ndabomfya Yehova, pa mulandu wa kuti, mu cine cine, ili shina nomba lyasanguka ilyacilapo kube lya cifyalilwa mu mashiwi yesu, kabili te kuti lipyanikwepo.”—Theologie des Alten Testaments (Ukusambilile fya Bulesa ukwa Cipingo ca Kale), ukulembwa kwa cibili, (Stuttgart, 1882), ibu. 143.

Umusambi wa ciJesuit Paul. Joüon alondololo kuti: “Mu mabupilibulo yesu, mu cifulo ca mibele ya Yahweh (iyatubululwa), twabomfya imibele ya Jéhovah . . . iyaba mibele ya milembele yabeleshiwa mu ciFrench.”—Grammaire de l’hébreu biblique (Rome, 1923), futunoti pe ibu. 49.

Amashina yafula yaluko kuya ku ntunga shimo lintu yatwalwa ukufuma ku lulimi lumo ukuya ku lubiye. Yesu afyelwe umuYuda, ne shina lyakwe mu ciHebere nakalimo lyaleshimbulwa Ye·shuʹa‛, lelo bakalemba bapuutwamo aba Malembo ya bwina Kristu tabashimbile ukubomfya umusango wa ciGreek uwe shina, I·e·sousʹ. Mu ndimi ishingi ukushimbula kwalipusana panono, lelo mu kukakuka tubomfyo musango uyo uli mu kuseeka mu lulimi lwesu. Cili cimo cine ulwa mashina ya mu Baibolo yambi. Ni shani, lyene, twingalango mucinshi walinga kuli Umo Uwabo mwine we shina lyacilapo kucindama kuli yonse? Bushe kuti twakano kulanda atemwo kulemba ishina lyakwe pa mulandu wa kuti tatwalishiba mu kulungatika ifyo pa kutendeka lyaleshimbulwa? Atemwa, ukucila, bushe kuti caba kubomfyo kushimbula no kulumbula uko kwaseeka mu lulimi lwesu, lintu tulelanda bwino ulwa mwine wa liko no kuitungulula nga bakapepa bakwe mu mibele iyo icindika wene?

Mulandu nshi cabele cacindama ukwishiba no kubomfye shina lya pa lwakwe ilya kwa Lesa?

Bushe walikwato kwampana na onse uo ishina lya pa lwakwe tawalishiba? Ku bantu ku bo Lesa takwata ishina ilingi line ali fye maka ayashili muntu, tali umuntu wine wine, tali umo uo baishiba no kutemwa kabili ku o bengalandako ukufuma ku mutima mu kupepa. Nga ca kuti balapepa, amapepo yabo yaliba fye kusefya, icibelesho ca kubwekeshabwekeshapo ica numbwilo shasungilwa.

Abena Kristu ba cine bakwato kutumwa ukufuma kuli Yesu Kristu ukupanga abasambi ba bantu ba nko shonse. Lintu balesambilisha aba abantu, cingacitika shani ukwishiba Lesa wa cine ngo wapusanako ukufuma ku milungu ya bufi iya nko? Kano ukubomfya ishina lyakwe ilya pa lwakwe, nga fintu Baibolo iyine yeka icita.—Mat. 28:19, 20; 1 Kor. 8:5, 6.

Ukufu. 3:15: “Lesa atile . . . kuli Mose, E fyo ukatile ku bana ba kwa Israele, Yehova Lesa wa bashinwe . . . antuma njise kuli imwe, ati . . . Ili e shina lyandi umuyayaya, kabili ici e cibukisho candi ku nkulo ne nkulo.”

Esa. 12:4: “Toteleni Yehova, lilileni kwi shina lyakwe, lengeni abantu na bantu ukwishibe milimo yakwe, lengeni ukwibukisho kuti ishina lyakwe lyalisansuka.”

Esek. 38:17, 23: “E fyo Shikulu [Mulopwe] Yehova atila: . . . Kabili nkaikusha no kuishisha no kuilengo kwishibwa ku menso ya nko ishingi; e lyo shikeshibo kuti ni ne Yehova.”

Mal. 3:16: “Abali na katiina kuli Yehova balesoshanya; na o Yehova alepeepeka, no kuumfwa, ne buku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.”

Yoh. 17:26: “[Yesu apepele kuli Wishi atile:] Nabalengele ukwishibe shina lyenu [abakonshi bakwe], kabili nkalenga liishibwe; ukuti ukutemwa uko mwantemenweko kube muli bene, na ine muli bene.”

Imil. 15:14, NW: “Sumeone nalondolola ifyo Lesa pa muku wa kubalilapo ayalwile ukusakamana kwakwe ku nko ku kuibulilamo abantu ba pe shina lyakwe.”

Bushe Yehova aba mu “Cipingo ca Kale” e Yesu Kristu mu “Cipingo Cipya”?

Mat. 4:10: “Yesu atile kuli wene, Fuma apa, we Satana: pantu calembwa, aciti [Yehova] [“Sokulu,” KJ na yambi] Lesa obe e o ulepepa, kabili wene eka e o ulebombela.” (Yesu pa bwelu taleilandilo kuti umwine wine ali no kupepwa.)

Yoh. 8:54: “Yesu alyaswike [abaYuda], ati: Ine nga naicindika, ubukata bwandi bwa fye; ni Tata e ulencindika; untu mutila Lesa wenu.” (Amalembo ya ciHebere mu kulengama yeshibisha Yehova pamo nga Lesa uo abaYuda baletunga ukupepa. Yesu tasosele ukuti, umwine wine aali ni Yehova, lelo ukuti Yehova aali ni Wishi. Yesu pano acilengele ukumfwika nga nshi ukuti wene na Wishi baali bantu bapusana.)

Amalu. 110:1: “Icisemo ca kwa [Yehova] kuli shikulu; Ikala ku kwa kulyo kwandi, nkasuke ncita abalwani bobe icipuna ca makasa yobe.” (Pali Mateo 22:41-45, Yesu alondolwele ukuti umwine wine aali ni “Shikulu wa kwa Davidi, uwaloshiwako muli ili ilumbo. E co Yesu te Yehova lelo ni umo uo amashiwi ya kwa Yehova yalungikweko.)

Fil. 2:9-11: “E ico na Lesa amusansabike [Yesu Kristu], no kumupeele shina ilyacila amashina yonse; ukuti kwi shina lya kwa Yesu ikufi lyonse likafukame, ilya mu mulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe. [Dy atila: “. . . ululimi lonse lusose ukuti Shikulu Yesu Kristu ali mu bukata bwa kwa Lesa Shifwe.” Kx na CC abelengwa mu kupalako, lelo futunoti muli Kx asumino kuti: “ . . . iciGreek nakalimo cipilibula mu kucilapo icifyalilwa mu kuti ‘ku bukata,’” na NAB na JB yapilibulwa muli iyo nshila.]” (Ishibo kuti Yesu Kristu alangwa pano ukubo wapusanako kuli Lesa Wishi no kunakila kuli Wene.)

Ni shani umuntu engatemwa Yehova nga na kabili ali no kutiina Wene?

Baibolo itwebo kuti tufwile ponse pabili ukutemwa Yehova (Luka 10:27) no kumutiina. (1 Pet. 2:17; Amapi. 1:7; 2:1-5; 16:6) Akatiina katuntulu kuli Lesa kakatulenga ukuba abasakamana sana ukusengauka ukuiletelela ukufulwa kwakwe. Ukutemwa kwesu kuli Yehova kukatusesha ukufwayo kucite fintu ifyo fili ifya kutemuna kuli wene, ukulumbululo kutesekesha kwesu ukulumbulula kushingapendwa ukwa kutemwa kwakwe ne cikuku ca pa fye.

Ifilangililo: Umwana mu kulinga atiino kufulwisha wishi, lelo ukutesekesha konse ukwa conse cintu wishi acita kuli wene kufwile na kabili ukusesho mwana ukulumbulula ukutemwa kwa cine cine kuli wishi. Uwibila mu menshi pambi kuti asoso kuti alitemwa bemba, lelo akatiina katuntulu aka yene kamulengo kumona ukuti kwalibako ifintu ifingi ifyo afwile ukusengauka ukulacita. Mu kupalako, ukutemwa kwesu ukwa kuli Lesa kufwile ukwendela pamo na katiina katuntulu aka kulacite cili conse icikaleta ukufulwa kwakwe.