ISAMBILILO 37
Ifyo Baibo Yalanda pa Ndalama no Kubomba
Bushe mwalisakamikwapo pa mulandu wa ncito nelyo indalama? Inshita shimo kuti ca-afya ukukwata ifyo tukabila mu mikalile pa nshita imo ine no kubombela Yehova. Baibo yalilanda pa fingatwafwa.
1. Finshi Baibo yalanda pa kubomba?
Lesa afwaya tulesekelela ilyo tulebomba imilimo. Baibo itila “ku muntu takwaba icawama icacila pa . . . kusekelamo mu kubombesha kwakwe.” (Lukala Milandu 2:24) Yehova alabombesha. Kanshi na ifwe nga tulebombesha, Yehova alatemwa kabili na ifwe tulaba ne nsansa.
Ukubomba kwalicindama. Lelo tatulingile ukubika sana amano ku kubomba imilimo ukucila ukubika amano ku kubombela Yehova. (Yohane 6:27) Yehova alitulaya ukuti nga twabika ifya Bufumu intanshi, akalatupeela ifyo tukabila mu mikalile.
2. Bushe tufwile ukulamona shani indalama
Nangu ca kuti Baibo ilanda ukuti ‘indalama shilacingilila,’ ilatusoka no kuti indalama shekasheka te kuti shilenge twaba ne nsansa. (Lukala Milandu 7:12) E mulandu wine Baibo itwebela ukuti tatulingile ukutemwa indalama, lelo ‘tuleteka imitima ku fintu ifyo tukwete.’ (Belengeni AbaHebere 13:5.) Nga tuleteka imitima ku fyo tukwete, tatwakulafuupuka pa mulandu wa kuti tatukwete ifintu ifingi ifyo tulefwaya. Tatwakulakongola indalama icikongolekongole. (Amapinda 22:7) Na kabili tatwakulacita ifingatuletelela pamo ngo kuteya ifyangalo fya kushitikapo nelyo ukufwaya ukukwata indalama ishingi ukwabula ukubombesha.
3. Kuti twabomfya shani bwino indalama?
Yehova ni kapekape, kabili kuti twamupashanya nga twaba “bakapekape, kabili abaiteyanya ukupeelako bambi.” (1 Timote 6:18) Kuti twabomfya bwino indalama nga tuleshibomfya ku kutungilila imilimo ya cilonganino, nelyo ku kwafwa abalekabila ubwafwilisho, maka maka Abena Kristu banensu. Ico Yehova abikako sana amano te bwingi bwa fyo tupeela, lelo mulandu tupeelela. Nga twapeela ukufuma panshi ya mutima, tulaba ne nsansa kabili na o alasekelela.—Belengeni Imilimo 20:35.
SAMBILILENI NA FIMBI
Moneni ubusuma bwaba mu kubika amano ku kubombela Yehova ukucila ukubika sana amano ku ncito nelyo ku kufwaisha ukukwata ifingi.
4. Mulelanga ukuti mulacindika Yehova ilyo mulebomba
Tufwile ukubika sana amano kuli bucibusa bwesu na Yehova ilyo tulebomba imilimo. Tambeni VIDIO, lyena lanshanyeni amepusho yakonkapo.
Muli vidio twatamba, finshi mwatemwapo sana pa fyo ba Jason balecita nga bali ku ncito e lyo ne mibele bakwete?
Finshi balecita pa kuti balekwata inshita ya kubombela Lesa, ukucila ukubika fye amano ku ncito?
Belengeni Abena Kolose 3:23, 24, lyena lanshanyeni ici cipusho:
Bushe ifyo tucita ilyo tulebomba imilimo fyacindama shani?
Ukubomba imilimo kwalicindama. Nomba tatufwile ukubika sana amano ku ncito, ukucila ukubika amano ku kubombela Yehova
5. Tulaba ne nsansa nga twateka imitima ku fyo tukwete
Abantu abengi bafwaya ukukwata indalama ishingi nga nshi. Lelo ifi te fyo Baibo itukoselesha. Belengeni 1 Timote 6:6-8, lyena lanshanyeni ici cipusho:
Finshi Baibo itukoselesha ukucita?
Nangu ca kuti tatukwete ifintu ifingi kuti twaba ne nsansa. Tambeni VIDIO, lyena lanshanyeni icipusho cakonkapo.
Cinshi calenga indupwa twatamba muli vidio shibe ne nsansa, nangu ca kuti bakwata fye indalama ishinono?
Bushe mwaliba ububi ubuli bonse mu kufwailapo ifintu na fimbi nangu ca kuti twalikwata kale ifingi? Yesu alilandile icilangililo pa kulangilila ico ukucita ifi kwabipila. Belengeni Luka 12:15-21, lyena lanshanyeni ici cipusho:
Finshi mwasambilila ku cilangililo Yesu alandile?—Moneni icikomo 15.
Belengeni no kulinganya Amapinda 10:22 na 1 Timote 6:10. Lyena lanshanyeni aya mepusho:
Cinshi mulemona ukuti e cacindama sana, pa kuba ifibusa na Yehova nelyo ukukwata indalama ishingi? Cinshi mwa-asukila ifyo?
Mafya nshi twingakwata nga twabika sana amano ku kufwaisha ukukwata indalama ishingi?
6. Yehova akulatupeela ifyo tukabila
Nga twafilwa ukusanga incito nelyo nga tatukwete indalama ishalinga, e lyo twingeshiba nga ca kuti twalicetekela Yehova. Tambeni VIDIO pa kuti mumone ifyo twingacita nga twaba na ya mafya. Lyena lanshanyeni amepusho yakonkapo.
Muli vidio twatamba, mafya nshi munyinefwe akwete?
Finshi acitile pa kuti apwishe aya amafya?
Belengeni Mateo 6:25-34, lyena lanshanyeni ici cipusho:
Finshi Yehova alaya ukucitila bonse abamucetekela?
ABANTU BAMO BATILA”: “Mfwile ukulabombesha pa kuti ndesakamana ulupwa lwandi. Te kuti nkumanishe ukulaya mu kulongana cila mulungu.”
Lilembo nshi ilyalenga mushininkishe ukuti ukubika sana amano ku kubombela Yehova e cintu icisuma sana pa fintu fyonse ifyo mwingasalapo ukucita?
IFYO MUSAMBILILE
Incito ne ndalama fisuma, lelo tafifwile ukulenga twalafilwa ukubombela Yehova.
Ukupitulukamo
Finshi fingatwafwa ukukanalabika sana amano ku ncito ica kuti twalafilwa no kubombela Yehova?
Busuma nshi bwaba mu kuteka umutima ku fyo tukwete?
Kuti mwalanga shani ukuti mwalicetekela filya Yehova alaya ukuti akalapeela bonse abamubombela ifyo bakabila?
ISHIBILENIPO NA FIMBI
Belengeni ici icipande pa kuti mumone nga ca kuti Baibo ilanda ukuti indalama shalibipa.
“Bushe Indalama E Ntulo ya Bubi Bonse?” (Icipande ca pa jw.org)
Sambilileni ifyo mwingabomfya indalama ku kucita ifingalenga Lesa alesekelela.
Bushe ukuteya ifyangalo fya kushitikapo kwaliba fye bwino?
“Ifyo Baibolo Isambilisha—Ukwangala Ifyangalo fya Cela Mushuke” (Loleni!, March 2015)
Cinshi calengele umwaume uwali icipondo kabili uwatemenwe ukuteya ifyangalo fya kushitikapo aaluke?
“Baibolo Ilaalula Abantu” (Ulupungu lwa kwa Kalinda, November 1, 2011)