Isukulu lya Gileadi Lyatuma Bamishonari “ku Mpela ya Pano Nse”

PALIPITA imyaka ukucila pali 50 ukutula apo Isukulu lya Watchtower Bible School of Gilead lyatendekela ukutuma bamishonari. Pa September 11, 1999, ikalasi lyalenga 107 lyalipwishishe Isukulu lya Gileadi. Mwali abana be sukulu 48 abafumine ku fyalo 11, kabili batuminwe ukuyabombela mu fyalo 24. Bakayabombela pamo na makana ya bamishonari bambi, ababombesha mu kufikilisha amashiwi ya kulekelesha Yesu asosele ilyo ashilanina ukuya ku muulu. Asobele ukuti abasambi bakwe bakabe “nte [shakwe] . . . ku mpela ya pano nse.”—Imilimo 1:8.

Programu wa kupwisha isukulu, uwabelele pa Watchtower Educational Center mu Patterson, ku New York, aliweme nga nshi pali ici cifulo cayemba. Abana be sukulu abalepwisha balitemenwe icibi pa kumona balupwa lwabo, ifibusa fyapalamisha, na beni abasangilweko. Abakutikeko no kumonako uyu programu ukupitila mu fibombelo fya kumfwilako ne fya vidio ifyasuntinkanishiwe ku fikuulwa fya ku Brooklyn na Wallkill, bonse pamo bali 4,992.

Bombeleni Yehova na Banenu mu Busumino

“Nani Ali ku Lubali lwa kwa Yehova?” Uyo wali e mutwe wa lyashi lya kwiswila ilya kwa Carey Barber, uwa mwi Bumba Litungulula kabili uwali ceyamani wa programu wa kupwisha isukulu. Alondolwele ukuti abena Israele balolenkene no yu mulandu mu nshiku sha kwa Mose. Abana be sukulu abalepwisha ukusanshako na basangilweko balicinkwilweko ukuti abena Israele abengi balifwile mu matololo pa mulandu wa kuti tabaikalilile muli bucishinka ku lubali lwa kwa Yehova. Ilyo baalukile ku kupepo tulubi, “baikele ku kulya no kunwa, kabili baimine ku kwangala.” (Ukufuma 32:1-29) Yesu asokele Abena Kristu ulwa busanso bumo bwine ati: “Muyangwe, epali imitima yenu yalemenenwa ku buliili no kukolwakolwa na masakamika ya bwikashi buno, no bushiku bulya bwaisa pali imwe no kupumikisha kwati citeyo.”—Luka 21:34-36.

Kalanda uwakonkelepo, Gene Smalley, uwa ku Dipartimenti wa Kulemba, aipwishe abana be sukulu abalepwisha ati: “Bushe Mukaba Ngo Muti wa Paregoria?” Alondolwele ukuti ishiwi lya ciGriki ilya pa·re·go·riʹa lyatendeke ukubomfiwa mu ciNgeleshi nge shina lya muti wa kusakanya uwa kunashako ukukanaumfwa bwino. Lelo, umutumwa Paulo abomfeshe ili shiwi lyashika ilya ciGriki pa Abena Kolose 4:11 ukulosha kuli bakabomba banankwe. Muli Baibolo wa New World Translation, ili shiwi lyapilibulwa ati “inkosho.”

Ku fifulo batumwa bamishonari bapya kuti baba ngo muti wa paregoria uwa muno nshiku lintu mu kuicefya babe nkosho kuli bamunyina na bankashi na lintu balangisha imibele ya kubombela pamo no kutemwana na bamishonari banabo.

Daniel Sydlik, uwa mwi Bumba Litungulula, e wakonkelepo ne lyashi lyaleti “Ukubaka Ifunde lya Mulinganya.” Alondolwele ukuti icishinte casumbuka Yesu aimike pali Mateo 7:12, ica kuti “fyonse ifyo mufwayo kuti abantu bacite kuli imwe, e fyo na imwe mucite kuli bene,” cibimbamo ukucitila bambi ifisuma, te kukanacita fye icabipa kuli bene.

Pa kucite ci bwino, ifintu fitatu filakabilwa pamo nga: ilinso ilimona, umutima wa cililishi, no kwafwilisha bambi. Mu kusupawila, asosele ati: “Nga tulefwaisha ukwafwilisha bambi, twiikata na ku cani. Tufwile ukutukuta ukucitila bambi ifintu ifyo na ifwe tufwaya batucitile.” Maka maka cili icalinga kuli bamishonari abaleya ku fyalo fimbi mu kwafwilisha abantu ukwishiba ubuKristu bwa cine ukucite ci.

Bakafundisha Bacinkulako Abana be Sukulu mu Nshila Isuma

Kafundisha we Sukulu lya Gileadi Karl Adams akoseleshe bamishonari bapya mu lyashi lyaleti “Twalilileni Ukukula.” Mu nshila nshi? Ica ntanshi, balingile ukukula mu kwishiba na mu kubomfya bwino kwene. Ilyo bali ku Gileadi, abana be sukulu basambilile ifyo bengasapika pa kwishiba bwino ifyo amalyashi ya mu Baibolo yalelandapo. Bakoseleshiwe ukubebeta fintu ilyashi limo na limo lilingile ukwambukila ubumi bwabo. Bacincishiwe ukutwalilila ukucite ci.

Munyina Adams asosele ati: “Ica bubili, twalilileni ukukula mu kutemwa. Ukutemwa kulakula nga mulekulela. Lelo nga mwakulekelesha, kulafwa.” (Abena Filipi 1:9) Nomba, pamo nga bamishonari, balekabila ukukula mu kutemwa mu mibele yapusanapusana. Ne ca butatu: “Kulileni mu kusenamina no kwishiba kwa kwa Shikulwifwe kabili Umupusushi wesu Yesu Kristu.” (2 Petro 3:18) Kalanda asosele ati: “Uku kwaba kusenamina kwawamisha uko Yehova alangisha ukupitila mu Mwana wakwe. Ilintu tulekula mu kutesekesha uku kusenamina, insansa shesu shilakula mu kucito kufwaya kwa kwa Lesa no kucita ifyo atwebo kucita.”

Kafundisha umbi uwe Sukulu lya Gileadi, Mark Noumair, alandile pa mutwe uwaleti “Pokeleleni Imibele Iyayafya mu Kutemwa, Kabili Kuti Mwashipikisha Yene.” Akonkomeshe ati: “Sambilileni ukupokelela mu kutemwa imibele iyayafya iya muli bumishonari, kabili mukashipikisha yene. Yehova asalapula fye abo atemwa. Na lintu fye mwamona kwati ukufunda kumo takuweme, kuli ukwa musoobolola, nelyo ukwa muncishanya, ukutemwa Yehova na bucibusa bwenu na wene fikamulenga ukupokelela kwene.”

Munyina Noumair alondolwele ukuti bumishonari bubimbamo imilimo iingi. “Lelo nga mulebomba ukwabulo kutemwa tamwakekushiwe. Ukwabulo kutemwa, imilimo yenu iya pa ng’anda—pamo nga ukwipika, ukushita ifintu, ukusamfya ifisabo, ukwipika amenshi—kuti yamuletela ubulanda. Mufwile ukupemwina no kuipusha amuti, ‘Mulandu nshi ndebombela iyi milimo?’ Lelo, mu mutima nga mwatila, ‘Imilimo iyo ndebomba yalaletela bamishonari banandi ubumi busuma ne nsansa,’ ninshi cikamwangukila ukuibomba.” Mu kusupawila, akonkomeshe ati: “Nampo nga cilebimbamo ukupokelela ukufunda, ukubomba imilimo yenu iya bumishonari, atemwa ukukalulula ukupusana, ukuficita mu kutemwa kukamulenga ukushipikisha mu mulimo wenu. ‘Ukutemwa takupwa.’”—1 Abena Korinti 13:8.

Kafundisha we Sukulu lya Gileadi Wallace Liverance e wakonkelepo ne lyashi lya kupituluka mu fya kukumanya fishaiwamina ifyo abana be sukulu baipakishe ilyo balebomba ne filonganino fyabela mu ncende ya Patterson. Ukulunda pa kushimikila ku ng’anda ne ng’anda, balebomfya amasomo ya bumishonari ku kufwaya abantu, ifimbayambaya, apo abantu baiwashisha ifya kufwala, pa fitesheni fya mashitima, na mu fifulo fimbi.

Bamishonari Abakokole Bakoselesha Abana be Sukulu

Lintu bamishonari bapya baya ku kubombela ku calo cimbi, bushe balingile ukusakamikwa? Bushe kuti bakumamo ukubombela mu calo cimbi? Amaofesi ya Sosaite yafwilisha shani bamishonari bapya ukubomba bwino? Pa kwasuka aya mepusho ukusanshako na yambi, Steven Lett, uwa ku Dipartimenti wa Mulimo, na David Splane, uwa ku Dipartimenti wa Kulemba, baipwishe bamunyina abasangilwe pali ilya nshita ku sukulu lya baba muli bakomiti ba misambo ilibela pa Watchtower Educational Center. Bamunyina baipushiwe baba muli bakomiti ba misambo ku Spain, Hong Kong, Liberia, Benin, Madagascar, Brazil, na Japan.

Aba babomfi babelesha aba kwa Yehova, abengi aba bene ababomba nga bamishonari pa myaka iingi, bakoseleshe abana be sukulu abalepwisha kumo na bafyashi babo na balupwa abasangilweko. Balandile fintu bapitamo ne fyapitamo bamishonari banabo, ukubalanga ukuti amafya na masakamika kuti fyacimfiwa. Raimo Kuokkanen, uuli ni mishonari ku Madagascar alandile ukuti amafya twingapitamo kuti yaba ayakalamba “lelo kuti yapikululwa, kabili Sosaite ilatwafwilisha.” Östen Gustavsson, uubombela nomba ku Brazil asosele ati: “Te ifwe twasalile ukwisabombela kuno, twalituminwe. E co kanshi twalipingwilepo ukuibikilishako ukutwalilila no mulimo wesu.” James Linton, uubombela ku Japan, asosele ukuti “ukumona bamunyina abatendeke kale umulimo wa bumishonari,” kwalimwafwile. Bumishonari bwaba ni nshila ya nsansa kabili iya kwikusha iya kubombelamo Yehova no kusakamaninamo impaanga shakwe.

Ukusengauka Icikuko Icingepaya Bumupashi

Theodore Jaracz, uwa mwi Bumba Litungulula, uwali mu kalasi lya Gileadi ilyalenga 7 mu 1946, alandile ilyashi lya kusondwelela, ilya mutwe waleti “Ukulolenkana no Mulandu wa Kutwalilila Ukuba Abomi lwa ku Mupashi.” Pa numa ya kulanda pa bukalushi bwabipisha ubulecitika mu fyalo fyalekanalekana, alandile ukuti na kuba, kuli utuyofi twacilapo ukubipa utuleponena abantunse.

Ukulosha ku Amalumbo 91, Munyina Jaracz alandile pa “cikuko” na “pumpunta” ifilelwalika abantu lwa ku mupashi no kwipayaula imintapendwa ya bantu mpanga yonse. Kaseebanya no bwikashi bwakwe ubwabipa balibomfya ukukubanya kwapala icikuko, ukwashimpwa pa mano ya buntunse no kutemwa ifikwatwa, ku kunenuna no kwipaya bumupashi, lelo Yehova atulayo kuti ici cikuko tacakapalame ku “waikalo mwa kufisama ku Wapulamo.”—Amalumbo 91:1-7.

Munyina Jaracz asosele ati: “Tulolenkene no mulandu wa kutwalilila ukuba abatuntulu mu citetekelo, no kutwalilila ukuba mu cubo. Te kuti tupashanye bakapumya ‘abashaba na Mupashi.’ Ubu nomba e bwafya buliko ilelo. Bonse fwe baba mu kuteyanya tulolenkene no bu bwafya. Na imwe bene kuti mwabukumanya mu mulimo wenu uwa bumishonari.” (Yuda 18, 19) Lelo bamishonari bapya baebelwe ukuti bali no kutunguluka mu kusungilila bumupashi bwabo mu mulimo wabo. Ku ca kumwenako, bacincishiwe ukumona ifyo bamunyinefwe baleshipikisha ku Russia, ku Asia, na mu fyalo fya mu Afrika—te mulandu no kubindwa, ukukaanya kwatapata, ukupumya, ubufi ubo abashasumina muli Lesa bakubanya, no kubabepesha. Kabili, ilingi line, amafya ya ku mubili yalalundwako, ayaletwako no kushenkana kwa mitundu no kubulisha ifintu ifikabilwa.

Lintu bumupashi bwatotobela, “mulingile ukufwailisha icilengele kabili lyene ukubombelapo, ukubomfya ukufunda kwa Cebo ca kwa Lesa.” Alandile pa fya kumwenako fimo ifya mu Baibolo. Yoshua alikoseleshiwe ukubelenga ibuuku lya Malango no kutontonkanyapo cila bushiku. (Yoshua 1:8) Lintu ibuuku lya Amalango lyasangilwe mu nshiku sha kwa Yoshia, Yehova alipaalile abakonkele mu busumino amakambisho ya liko. (2 Ishamfumu 23:2, 3) Timote alishibe amalembo ya mushilo ukufuma ku bunya. (2 Timote 3:14, 15) Abena Berea bali bakakutika basuma; kabili bali “abakankaala” pa mulandu wa kuti balefwayafwaya mu Malembo cila bushiku. (Imilimo 17:10, 11) Kabili Yesu Kristu aba ca kumwenako capulamo ica muntu uwaishibe Icebo ca kwa Lesa no kucibomfya.—Mateo 4:1-11.

Mu kusondwelela, Munyina Jaracz mu nsansa akonkomeshe bamishonari bapya ati: “Nomba namuiteyanya ukuyabomba umulimo wenu uwa bumishonari. Kabili muleya ku fyalo fya kutali, ku fyalo fyalekanalekana ifya pe sonde. Nga ca kuti twacimfyo bwafya bwa kutwalilila ukuba abomi lwa ku mupashi, lyene tatwakasuminishe icili conse ukupumfyanya ifyo twapingulapo ukucita. Mukayashimikila mu kupimpa, ukukoselesha bambi ukupashanya icitetekelo cenu, kabili tukalapepela pamo na imwe pa kuti abo mukalasambilisha, Yehova akabalenga abomi nga fintu acita na kuli ifwe. Na muli ifyo abengi bakafulumuka akayofi ka ku mupashi akatebelele sonde nomba. Abengi bakailunda kuli ifwe ku kucita ukufwaya kwa kwa Yehova. Kabili shi Yehova amupaale muli uyu mulimo.”

Ilyo ceyamani abelengele bakalata ba mitende abafumine ku fyalo fyalekanalekana, abana be sukulu batendeke ukupokelela amadiploma yabo. Lyene kalata wa kutasha uwalembelwe na bana be sukulu alibelengelwe. Mwandi balitashishe Yehova no kuteyanya kwakwe pa masomo yaibela bakanshiwe na pa mulimo wabo untu bapeelwe uwa kuyabomba nga bamishonari “ku mpela ya pano nse”!—Imilimo 1:8.

[Akabokoshi pe bula 29]

Ukulondolola Ikalasi

Ifyalo bafumineko: 11

Ifyalo batuminweko: 24

Abana be sukulu bonse: 48

Abaupana: 24

Avareji wa myaka bakwete: 34

Avareji wa myaka mu cine: 17

Avareji wa myaka mu mulimo wa nshita yonse: 12

[Icikope pe bula 26]

Ikalasi Lyalenga 107 Ilyalepwisha Isukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ku kuso ukuya ku kulyo mu mutande umo umo.

1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.