Bushe Mulesunga Bwino “Inkwela Iikalamba iya Citetekelo” Cenu?

1-2. (a) Ukulingana ne lembo lya Abena Efese 6:16, mulandu nshi tulingile ukukwatila “inkwela iikalamba iya citetekelo”? (b) Mepusho nshi twalaasuka?

BUSHE mwalikwata “inkwela iikalamba iya citetekelo”? (Belengeni Abena Efese 6:16.) Ukwabula no kutwishika mwalikwata. Filya fine inkwela iikalamba icingilila umubili wa mushilika, e fyo ne citetekelo cenu cimucingilila ku mibele yabipa, pamo nga ubulalelale, ubunkalwe, ne mibele imbi iyo Lesa ashifwaya.

² Nomba apo tuleikala “mu nshiku sha kulekelesha,” tukalakwata amesho. (2 Tim. 3:1) Kuti mwabebeta shani inkwela ya citetekelo cenu pa kuti mumone nga ili iyakosa? Kabili finshi mufwile ukucita pa kuti icitetekelo cenu citwalilile ukuba icakosa? Twalaasuka aya mepusho.

 3. Finshi abashilika balecita ku nkwela yabo, kabili mulandu nshi?

³ Mu nshita balelemba Baibolo, ilingi line abashilika balekwata inkwela iyo balekupako impapa. Abashilika baleshinga amafuta ku nkwela pa kuti impapa ionaika na pa kuti ikwata ingalaawa. Umushilika nga amona ukuti inkwela yakwe nayonaika, aleiwamya bwangu bwangu pa kuti akaibomfye mu bulwi. Kuti mwacita shani ifyo abashilika balecita pa kuti mukoshe icitetekelo cenu?

 4. Mulandu nshi mulingile ukulabebetela inkwela ya citetekelo cenu, kabili kuti mwaibebeta shani?

⁴ Nga filya fine abashilika balecita kale, na imwe lyonse mufwile ukulabebeta inkwela ya citetekelo cenu no kulaisunga bwino pa kuti muleipekanya ukulwa ubulwi. Fwe Bena Kristu tulwa ubulwi bwa ku mupashi kabili tulwa ne mipashi ibifi. (Efes. 6:10-12) Takuli uwingamusungilako inkwela ya citetekelo cenu. Kuti mwaishiba shani nga ca kuti icitetekelo cenu cikaba icakosa ilyo mukakwata amesho? Ica kubalilapo, mufwile ukulomba Lesa ukuti amwafwe. Lyena mulingile ukubomfya Icebo ca kwa Lesa pa kuibebeta pa kuti mumone nga ca kuti icitetekelo cenu cili ukulingana ne fyo Lesa afwaya. (Heb. 4:12) Baibolo itila: “Tetekela Yehova no mutima obe onse kabili wishintilila pa mano yobe we mwine.” (Amapi. 3:5, 6) Bushe kwali ifyacitike nomba line ifyo mwalingile ukusalapo ifya kucita? Ku ca kumwenako, bushe mwalekabila sana indalama? Bushe mwalibukishe ifyo Yehova atulaya ifyaba pa AbaHebere 13:5 apatila: “Nshakakushe nakalya nangu ukukulekelesha nakalya”? Bushe ubu bulayo bwalilengele mwacetekela ukuti Yehova akamwafwa? Nga ca kuti mwalicetekele Yehova, ninshi mulasunga bwino inkwela ya citetekelo cenu.

 5. Finshi nalimo mwingasanga nga mwabebeta icitetekelo cenu?

⁵ Nalimo kuti mwapapa ifyo mwingasanga nga mwabebeta icitetekelo cenu. Kuti mwasanga ukuti kwaliba fimo ifyo mushicita bwino ifyo mushaishiba no kwishiba. Ku ca kumwenako, kuti mwasanga ukuti ukusakamana sana, ukukutika amalyashi ya bufi, nelyo ukufuupulwa fyalyonaula icitetekelo cenu. Nga ca kuti ifi e fyo caba, finshi mulingile ukucita pa kuti icitetekelo cenu cionaikilako?

 6. Landeni pali fimo ifilelanga ukuti limo caliba fye bwino ukusakamana.

⁶ Tacabipa ukusakamana pa fintu fimo. Ku ca kumwenako, kuti twasakamana pa fyo twingacita pa kuti tulesekesha Yehova na Yesu. (1 Kor. 7:32) Nga twacita ulubembu ulukalamba, tulasakamana pa fyo twingacita pa kuti tube ifibusa fya kwa Lesa na kabili. (Amalu. 38:18) Tulasakamana na pa fyo twingalenga abena mwesu baleba ne nsansa na pa fyo twingacita pa kuti tulesakamana ulupwa lwesu e lyo na ba bwananyina.—1 Kor. 7:33; 2 Kor. 11:28.

 7. Ukulingana ne fyaba pa Amapinda 29:25, cinshi tushilingile ukutiinina abantu?

⁷ Nga tulesakamana sana icitetekelo cesu kuti caonaika. Ku ca kumwenako, nalimo kuti twaikalila fye ukulasakamana pa kukwata ifya kulya ifyalinga ne fya kufwala. (Mat. 6:31, 32) Kuti twatendeka ukubika amano ku kunonka ifyuma pa kuti tuleke ukusakamana. Nalimo kuti twatendeka no kutemwisha indalama. Nga ca kuti twacilamo ukusakamana, kuti twaleka ukutetekela sana Yehova kabili bucibusa bwesu na ena kuti bwapwa. (Marko 4:19; 1 Tim. 6:10) Nelyo kuti twalasakamana sana pa fyo abantu batumona. Lyena kuti twalatiina ukutupumya nelyo ukutucusha ukucila ifyo tutiina ukukalifya Yehova. Pa kuti twilasakamana pa fyo abantu batumona, tufwile ukulomba Yehova pa kuti alenge tube ne citetekelo kabili tube abashipa.—Belengeni Amapinda 29:25; Luka 17:5.

 8. Finshi twingacita nga ca kuti umo aisa mu kutweba ifya bufi?

⁸ Satana “wishi wa bufi,” alalenga abantu atungulula balasabankanya ubufi pali Yehova na pali bamunyinefwe na bankashi. (Yoh. 8:44) Ku ca kumwenako, abasangu balabomfya Intaneti, imilabasa, inyunshipepala e lyo ne mpapulo shimbi pa kusabankanya amalyashi ya bufi na pa kunyonganya ifishinka pa cilonganino ca kwa Yehova. Ubu bufi bwaba pa ‘mifwi ya mulilo’ iya kwa Satana. (Efes. 6:16) Kuti twacita shani nga ca kuti umo aisa mu kutweba amalyashi ya bufi pa cilonganino ca kwa Yehova nelyo pa ba bwananyina? Tatulingile ukukutika kuli ena! Mulandu nshi? Pantu twalitetekela Yehova kabili twalicetekela aba bwananyina. Na kuba tatufwile ukulalanshanya na basangu. Kabili tatutalikana na basangu pa cili conse nangu ca kutila kuti twafwaya ukwishiba fimo pa fyo balandile.

 9. Kuti twaba shani nga twafuupulwa?

⁹ Nga twafuupulwa icitetekelo cesu kuti canaka. Limo amafya tukwata yalalenga twafuupulwa. Na kuba te kuti ciwame ukusuulako fye ku mafya tukwata. Lelo tatulingile ukwikalila fye ukulatontonkanya pa mafya tukwata, pantu kuti twalaba ne fisuma ifyo Yehova atulaya. (Ukus. 21:3, 4) Nga twafuupulwa sana amaka kuti yapwa kabili kuti twaleka no kubombela Yehova. (Amapi. 24:10) Nga cabe ifi te kuti ciwame.

10. Finshi mwasambilila ku fyo nkashi alembele muli kalata?

¹⁰ Umfweni ifyo nkashi umo uwa ku America acita pa kuti atwalilile ukuba ne citetekelo icakosa ilyo alesunga umwina mwakwe uwalwala sana. Muli kalata alembeele aba ku maofeshi yakalamba atile: “Limo tulasakamana sana kabili tulafuupulwa, lelo tulatwalilila ukuba ne subilo. Ndatasha sana Yehova pali fyonse ifyo atupeela ifilenga tulekosha icitetekelo kabili ifitukoselesha. Tulakabila sana ifi fyebo kabili tulakabila sana ukutukoselesha. Ifi filalenga tuletwalilila ukubombela Yehova kabili tuleshipikisha amesho ayo Satana atuletela pa kuti atufuupule.” Ku fyo uyu nkashi alandile kuti twasambililako ukutila kuti twatwalilila ukubombela Yehova nangu tuli na mafya! Finshi mufwile ukucita? Mulemona amafya ayo mukwata ukuti mesho ayafuma kuli Satana. Mulecetekela ukuti Yehova akulamusansamusha. Kabili muletasha pa fya kulya fya ku mupashi ifyo atupekanishisha.

11. Mepusho nshi tufwile ukuyipusha pa kuti tumone nga ca kuti icitetekelo cesu calikosa nelyo iyo?

¹¹ Bushe mulemona ukuti inkwela ya citetekelo cenu ifwile ukukoselako? Bushe mu myeshi inono iyapitapo mwalilekapo ukusakamana sana? Bushe mwalikaanapo ukukutika no kutalikana na basangu pa bufi ubo basabankanya? Na kabili bushe kwaliba ifyo mwacitapo pa kuti mwilafuupulwa? Nga ca kuti mwalicitapo ifi fyonse twalandapo, ninshi icitetekelo cenu calikosa. Lelo tufwile ukutwalilila ukucingilila icitetekelo cesu pantu kwaliba ifyanso na fimbi ifyo Satana abomfya pa kutusansa. Natulandeko pa canso cimo.

12. Finshi fingacitika nga ca kuti twatemwisha ifyuma?

¹² Nga twatemwisha ifyuma icitetekelo cesu kuti canaka kabili te kuti tulebombela sana Yehova. Umutumwa Paulo atile: “Takwaba umushilika nangu umo uitumpa mu fya kucitacita ifya muli cino calo pa kuti apange indalama. Pantu afwaya ukucita ifya kuti asekeshe uwamwingisha ubushilika.” (2 Tim. 2:4) Abashilika abena Roma tabalebasuminisha ukubomba imilimo imbi. Nomba caleba shani nga ca kuti umushilika takonkele ili ifunde?

13. Mulandu nshi bashalesuminishisha umushilika ukubomba imilimo imbi?

¹³ Elenganyeni ukuti ulucelo lonse abashilika balesambilila ifya kubomfya bapanga pa kulwa, lelo umushilika umo ena talipo. Ali mu tauni aleshitisha ifya kulya. Mu nshita ya cungulo, abashilika balebebeta ifyanso no kunoona bapanga babo. Lelo ulya umushilika uushitisha ifya kulya ena alepekanya ifya kulya ifyo akashitisha ubushiku bukonkelepo ulucelo. Ubushiku bwakonkapo ulucelo umulwani abasansa ukwabula no kwenekela. Mushilika nshi mulemona uwingalwisha umulwani kabili uwingasekesha umukalamba wa bashilika? Kabili nga ca kuti na imwe mulelwako ubu bulwi, bushe kuti mwatemwa ukuba mupepi no mushilika uwalesambilila ifya kulwa nelyo kuti mwatemwa ukuba mupepi no ushalesambilila ifya kulwa?

14. Cinshi fwe bashilika ba kwa Kristu tumona ukuti e cacindama?

¹⁴ Na ifwe twaba nga bashilika abasuma. Ico tufwaisha kulacita ifingasekesha abakalamba ba bashilika besu, e kutila Yehova na Kristu. Twalishiba ukuti ukucita ifi kwalicindama sana ukucila conse ico twingakwata muli cino calo ca kwa Satana. Kanshi lyonse tufwile ukulakwata inshita na maka pa kuti tulebombela Yehova na pa kuti tulesunga bwino inkwela ya citetekelo cesu e lyo ne fyanso fimbi ifya bulwi ifya ku mupashi.

15. Finshi Paulo atusokeleko, kabili mulandu nshi?

¹⁵ Lyonse tulingile ukuba abalola! Mulandu nshi? Umutumwa Paulo asokele ukuti ‘abafwaisha ukuba ne fyuma bakalufya icitetekelo.’ (1 Tim. 6:9, 10) Ishiwi bapilibula ukuti “balilufya,” lyalola mu kutila kuti twalafwaisha ukukwata ifintu ifyo tushikabila no kukabila. Lyena kuti twatendeka ukuba no ‘lunkumbwa ulwingi ulwa kutumpa kabili ulwa kutuletelela.’ Kanshi mu cifulo ca kuleka ulu ulunkumbwa lwaingila mu mitima yesu, tufwile ukulalumona ukuti canso ico Satana abomfya pa kunenuna icitetekelo cesu.

16. Bushe ilyashi lyaba pali Marko 10:17-22 lifwile ukulenga twayipusha amepusho nshi?

¹⁶ Tutile twalikwata indalama ishingi isho twingashitamo ifintu ifingi. Bushe nga twashita ifintu ifyo tulefwaya lelo ifyo tushikabila ninshi twalufyanya? Kwena ninshi tatulufyenye. Lelo tufwile ukutontonkanya pali aya amepusho: Nangu ca kuti natukwata indalama sha kushita icintu cimo, bushe tukalakwata inshita na maka ya kucibomfya no kucisakamana? Bushe tatwakatendeke ukutemwisha ifyo twakwata? Bushe nga twatemwisha ifyo twakwata tatwakacite ifyacitile umulumendo uwakeene ilyo Yesu amwebele ifyo alingile ukucita pa kuti alebomba sana umulimo wa kwa Lesa? (Belengeni Marko 10:17-22.) Kuti cawama sana nga twaangusha imikalile kabili twalapoosa inshita iikalamba na maka ku kucita ukufwaya kwa kwa Lesa!

17. Cinshi tufwile ukulaibukisha lyonse?

¹⁷ Lyonse tulingile ukulaibukisha ukuti tulalwa ubulwi, kabili tulingile ukuipekanya pa kuti tulelwa cila bushiku. (Ukus. 12:17) Bamunyinefwe na bankashi te kuti batusendeleko inkwela ya citetekelo cesu. Fwe bene ni fwe tufwile ukulakosha icitetekelo cesu.

18. Cinshi calelenga abashilika baleikatisha inkwela shabo?

¹⁸ Kale umushilika balemucindika nga ca kuti alishipa mu bulwi. Lelo aleseebana sana nga abwela ku bulwi ukwabula inkwela yakwe. Tacitus umwina Roma uwasambilila ilyashi lya kale alembele ukuti: “Waleba museebanya uukalamba nga ca kuti umushilika abwela ku bulwi ukwabula inkwela.” Ici calelenga abashilika baleikatisha inkwela shabo.

19. Finshi tulingile ukulacita pa kuti tuleikatisha inkwela ya citetekelo cesu?

¹⁹ Twikatisha inkwela ya citetekelo cesu nga tulelongana lyonse na Bena Kristu banensu, kabili nga tuleshimikila abantu pe shina lya kwa Lesa ilya kuti Yehova na pa Bufumu bwakwe. (Heb. 10:23-25) Na kabili tufwile ukulabelenga Icebo ca kwa Lesa cila bushiku no kulalomba Yehova ukuti aletwafwa ukukonka ifyo cilanda muli fyonse ifyo tucita. (2 Tim. 3:16, 17) Nga tulecita ifi, takwakabe icanso nangu cimo ico Satana akabomfya icikalenga tukaleke ukubombela Yehova. (Esa. 54:17) “Inkwela iikalamba iya citetekelo” cesu ikatucingilila. Tukaba abashipa ilyo tukalabombela pamo na bamunyinefwe na bankashi. Tukalacimfya ubulwi tulwa cila bushiku ubwa kutwalilila ukuba ne citetekelo icakosa. Ne cacindamisha ca kuti tukaba ku lubali lwa kwa Yesu ilyo akacimfya Satana ne fibanda fyakwe mu bulwi.—Ukus. 17:14; 20:10.