Bushe Mulabomba Bwino na Bantu?

Ilyo ali ku muulu Yesu alisambilile imibele iisuma iyalengele alebomba bwino na Lesa. Na lintu aishile pe sonde, iyi mibele iisuma e yalengele alebomba bwino na bantu. Finshi twingasambilila kuli Yesu? Nga tulebelenga ilyashi lyakwe kuti twasambililako amashinte yatatu ayengalenga tulebomba bwino na bantu. Aya mashinte kuti yalenga tulebomba bwino na ba bwananyina.

Umuntu uubomba bwino na bantu bambi, aliicefya. Alishiba ukuti abo abomba nabo balicindama kabili taitakisha. Ifi e fyo Yesu asambilile kuli Wishi. Nangu ca kuti Yehova e walinga ukwitwa ukuti Kabumba, alilengele abantu baishiba imilimo iyacindama iyo Umwana wakwe abombele. Icalenga twishibe ifi, mashiwi ayo Lesa alandile aya kuti: “Natubumbe umuntu mu cipasho cesu.” (Ukute. 1:26) Ilyo Yehova alandile aya mashiwi Yesu alishibe ukuti Yehova aliicefya sana.—Amalu. 18:35.

Ilyo Yesu ali pano isonde, na o ali uwaicefya sana. Talesuminisha abantu ukulamulumbanya pa fyo alecita, lelo alelumbanya Lesa. (Marko 10:17, 18; Yoh. 7:15, 16) Yesu ali uwa mutende na basambi bakwe kabili alebamona ukuti fibusa fyakwe, te basha iyo. (Yoh. 15:15) Inshita imo alisambile fye na makasa yabo pa kuti abasambilishe ukuba abaicefya. (Yoh. 13:5, 12-14) Na ifwe bene tufwile ukucindika abo tubomba nabo. Tatufwile ukulafwaya fye ifingatusekesha. Nga ‘tulecindikana,’ kabili tatulesakamana pa o bali no kutasha pa fyo twabombele, kuti tulebomba ifingi.—Rom. 12:10.

Umuntu uwaicefya alishiba ukuti “ukuli abapanda amano abengi amapange yalafikilishiwa.” (Amapi. 15:22) Te mulandu ne milimo twaishiba, ne fyo twaishibisha ukubomba iyo milimo, tulingile ukulaibukisha ukuti takwaba umuntunse uwaishiba fyonse. Na Yesu alilandile ukuti kwali fimo ifyo ashaishibe. (Mat. 24:36) Kabili alekutika na ku fyo abasambi bakwe abashali abapwililika baishibe nelyo ifyo baletontonkanya. (Mat. 16:13-16) E calengele abasambi bakwe baletemwa ukuba nankwe. Na ifwe nga tuli abaicefya kabili tuleibukisha ukuti te fyonse twaishiba na kabili tulekutikako ne fyo bambi balelanda, tukalabomba bwino kabili tukabomba imilimo iingi.

Baeluda maka maka bafwile ukulapashanya Yesu ilyo balebomba na baeluda banabo. Bafwile ukwibukisha ukuti umupashi wa mushilo kuti wabomfya eluda uuli onse ukulanda ifingabomba ilyo balelanshanya. Nga ca kuti ilyo baeluda balekumana baleleka uuli onse ukulanda ifyo aletontonkanya, cikalenga bakapingule bwino pa fintu ifikawamina icilonganino.

Umuntu uubomba bwino na bantu aliba no mutembo ilyo alebomba nabo. E kutila, tapampamina fye pa co alefwaya. Yesu pa miku iingi alemona uko Wishi ashalepampamina fye pa cintu cimo. Ku ca kumwenako, Yehova alimutumine ku kwisalubula abantunse abalingile ukufwa.—Yoh. 3:16.

Yesu talepampamina fye pa kucita ifyo alefwaya. Ibukisheni ifyo aundepe umwana mwanakashi wa mwina Foinike nangu ca kuti atuminwe ku ng’anda ya kwa Israele. (Mat. 15:22-28) Tale-enekela ifyacilamo ku basambi bakwe. Ku ca kumwenako, ilyo cibusa wakwe Petro amukeene pa cintubwingi, Yesu alimweleele, kabili pa numa alipeele Petro imilimo iingi iikalamba. (Luka 22:32; Yoh. 21:17; Imil. 2:14; 8:14-17; 10:44, 45) Ifyo Yesu acitile, fitulanga ukuti tufwile ukuleka abantu bonse beshibe ukuti ‘tuli ba mutembo’ nga ca kuti tatulepampamina fye pa cintu cimo.—Fil. 4:5.

Nga tatulepampamina fye pa cintu cimo cikalenga tukalebomba bwino na bantu abalekanalekana. Yesu aleumfwana bwino sana na bantu abalekanalekana ica kuti abalwani bakwe batendeke ukumupeela imilandu ya kuti ali ni “cibusa wa bakasonkesha ba misonko na babembu” abalekutika ku mbila nsuma alebila. (Mat. 11:19) Bushe na ifwe tulabomba bwino na bantu abalekanalekana nga filya Yesu alecita? Munyinefwe Louis, uwabomba na bantu abalekanalekana mu mulimo wa bukangalila bwa muputule e lyo na pa Bethel atile: “Ukubomba na bantu abashapwililika kwaba kwati kukuula icibumba na mabwe ayapusana ubukulu. Pa mulandu wa kuti amabwe nayapusana ubukulu, kano twabombesha pa kuti icibumba cololoke. Ndesha ukwalukako muli fimo pa kuti ndebomba bwino na bantu bambi na pa kuti umulimo ulebombwa bwino.” Ifi e fyo tufwile ukucita!

Ni lilali twingalanga ukuti tatupampamina pa cintu cimo ilyo tulebomba na ba bwananyina mu cilonganino? Kuti twacita ifyo ilyo tulebomba nabo twaba nabo mwi bumba lya mulimo. Tufwile ukulabomba na bakasabankanya abalekanalekana, pamo nga abakwata imilimo iingi mu lupwa ukucila iyo twakwata nelyo aba mushinku uwalekanalekana. Kuti twalanga ukuti tuli ba mutembo kabili tatupampamina pa cintu cimo nga ca kuti tatule-endesha ilyo tulebila ku ng’anda ne ng’anda, tuletuushako panono kabili tulebomfya ne nshila iyo uo tulebomba na o atemwa iya kubililamo imbila nsuma.

Umuntu uubomba bwino na bantu bambi, ‘alaiteyanya ukupako bambi.’ (1 Tim. 6:18) Ilyo Yesu alebomba na Wishi, alimwene ukuti Yehova talemufisa ifintu. Ilyo Yehova “apekenye imyulu,” Yesu ‘e ko ali’ kabili alesambililako kuli Wishi. (Amapi. 8:27) Ilyo Yesu ali pano calo, aleebako abasambi bakwe fyonse ifyo ‘aumfwile’ kuli Wishi. (Yoh. 15:15) Kuti twapashanya Yehova nga ca kuti tule-ebako bamunyinefwe na bankashi ifyo twasambilila. Kanshi umuntu uubomba bwino na bantu bambi takaana ukubebako ifyo balingile ukwishiba nelyo ifingalenga balebomba bwino umulimo pa mulandu wa kutontonkanya ukutila kuti bamupoka imilimo. Alatemwa ukwebako bambi ifisuma ifyo asambilila.

Tufwile no kulakoselesha abo tubomba nabo. Ala tulomfwa bwino nga ca kuti umo atutasha ukufuma pa nshi ya mutima pa fyo tulebombesha. Yesu aletasha abasambi bakwe abo alebomba nabo pa fisuma ifyo balecita. (Linganyeniko Mateo 25:19-23; Luka 10:17-20.) Alibebele no kuti “bali no kucita imilimo iyacila” pa yo abombele. (Yoh. 14:12) Pa bushiku ilyo ashilafwa, aebele abasambi bakwe aba cishinka ukuti: “Ni mwe mwe batwalilila na ine mu fya kunjesha.” (Luka 22:28) Elenganyeni ifyo aya mashiwi yakoseleshe abasambi bakwe no kubalenga ukuti batwalilile ukubombesha! Nga ca kuti tuletasha abo tubomba nabo, cikalenga bakabe ne nsansa kabili bakulabombesha.

Munyinefwe Kayode atile: “Umuntu uubomba bwino na bantu bambi tafwile ukuba uwapwililika, lelo alalenga abo alebomba nabo baba ne nsansa. Ne ci cilalenga balebomba bwino imilimo.” Bushe na imwe ifi e fyo mwaba? Nalimo kuti mwaipushako aba bwananyina pa kuti bamwebe ifyo batontonkanya ukuti e fyo mwaba. Nga ca kuti balomfwa bwino ukubomba na imwe nga filya abasambi ba kwa Yesu baleumfwa bwino ukubomba nankwe, kuti mwalanda nga filya umutumwa Paulo alandile ukuti: “Tuli babomfi banenu aba kumuletela insansa.”—2 Kor. 1:24.