Imimwene ya Baibolo

Bushe Satana E Ulenga Ukuti Tulecite Membu?

SATANA e walengele ulubembu lwa kubalilapo. Efa atile: “Insoka e yambeleleka, na ine nalya.” (Ukutendeka 3:13) Ukutule lyo, “icisoka cikote iciitwa Kaseebanya kabili Satana” calitwalilila ukusansa abantunse, ‘ukupofwishe imitima’ ya bantu no ‘kulufya bonse abaikala mu calo conse.’ (Ukusokolola 12:9; 2 Abena Korinti 4:4) Takuli umuntunse uushingasanswa kuli Satana. Lelo bushe cilepilibulo kuti te kuti tulwishe ukusonga kwakwe? Kabili na lintu twacita ulubembu, bushe e ulenga lyonse?

Baibolo ilondololo kuti ca cine Satana alibepele Efa. (1 Timote 2:14) Alibepelwe ukutontonkanya ukuti nga atoba ifunde lya kwa Lesa, kuti ashilimuka no kuba umuntungwa nga Lesa. (Ukutendeka 3:4, 5) Pa kutunga ifyo no kutunga, Efa alibembwike. Nangu cibe fyo, Lesa amumwene ukuti alishingemwe ulubembu kabili amupingwile ukufwa. Mulandu nshi? Pantu nangu cingati Satana alibepele, Efa alishibe bwino bwino ikambisho lya kwa Lesa. Tapatikishiwe ukukanaumfwila; lelo, aali acili na maka ya kuilama, kabili aali na maka yakumanina aya kulwisha ukusonga kwa kwa Satana.

Lwisheni Kaseebanya

Nga bantunse kuti twalwisha Kaseebanya. Pa Abena Efese 6:12 twalyebwa ukuti “ukushomboka kwesu” kwaba ku “fimipashi fya bubifi ifya mu lwelele.” Kanshi, lyene, Lesa atwenekela ukulwisha ukusonga kwa kwa Satana. Lelo ni shani fintu umuntunse engalwisha amaka yacila pa ya buntunse aya kwa Satana ne fibanda? Bushe baletweba ukulwa ubulwi bwabula umulinganya, ubo twishibe fyo kuti twacimfiwa? Iyo, pantu Lesa taletweba ukulwisha Kaseebanya ukubomfya ubukose bwesu. Yehova alatupeela inshila shapusanapusana isha kulwisha ukubeleleka kwa kwa Kaseebanya kabili no kucimfya. Baibolo itweba untu Kaseebanya aba, fintu abomba, na fintu twingaicingilila.—Yohane 8:44; 2 Abena Korinti 2:11; 11:14.

Ifya ‘Kukaana Kaseebanya’

Amalembo yatubulula inshila ya minkubili pa kulwisha Kaseebanya. Twakambishiwa ukuti: “E ico lambeni kuli Lesa; lelo kaaneni Kaseebanya, na o akafulumuka kuli imwe.” (Yakobo 4:7) Ica ntanshi pa kulamba kuli Lesa cisanshamo ukumfwila amakambisho yakwe. Ukuba abaibukila lyonse ukuti Lesa e ko aba, ulwa busuma bwakwe, na maka yakwe aya kutiinya ne mitekele, kabili ne fishinte fyakwe ifyasumbuka fikatupeela ubukose bwa kukaanya Satana. Ne pepo lya mukoosha lilakabilwa.—Abena Efese 6:18.

Langulukeni akashita kamo lintu Yesu atunkilwe kuli Kaseebanya. Ukwibukisha amakambisho ya kwa Lesa no kuyambula icine cine kwalyafwilishe Yesu ukukaana. Ilyo afililwe ukubeleleka Yesu ukubembuka, Satana alimushile. Pa numa ya bulya bwesho, Yehova mu kulundapo alitumine bamalaika ku kukosha Yesu. (Mateo 4:1-11) E mulandu wine Yesu aali uwaicetekela pa kukoselesha abasambi bakwe ukuti balelomba Lesa ‘ukubapokolola ku bubifi.’—Mateo 6:13.

Ukutupokolola kuli Lesa tacipilibula ukuti alatubika mu lubao lwa bucingo. Lelo, atweba ukukonkelela imibele ya bukapepa, pamo nga icine, ubulungami, umutende, ne citetekelo. Iyi mibele ibomba nga ifya kufwala “fya bulwi,” ukutupeela amaka ya kuba “abakosa ku kushangilile fya kubeleleka fya kwa Kaseebanya.” (Abena Efese 6:11, 13-18) E co mu kuba no kwaafwa kwa kwa Lesa kuti twakaana amatunko ya kwa Kaseebanya.

Inshila ya bubili iyatubululwa pali Yakobo 4:7 yaba ‘kukaana Kaseebanya.’ Ici cibimbamo ukucitapo cimo mu kushipa, ukufulumuka ukusonga kwakwe ukwabipa. Umo afwile ukusengauka amaka ya kwa Satana aya kubeleleka no kukaana amano ya buntunse ayaseeka ilelo mwi sonde aya kutemwa ifikwatwa na ya bucisenene. Ukukaana Kaseebanya muli uyu musango capamo no bumi ubwapeeleshiwa mu kuteemuna Lesa kwalicindama mu kulwisha Satana. Lelo bushe imembu shonse shilengwa no kusonga kwa mu kulungatika ukwa kwa Kaseebanya?

Ubulwi bwa lwa Nkati

Kalemba wa Baibolo Yakobo alondololo kuti: “Lelo umuntu onse atunkwa pa kulembulwa no kubelelekwa ku lunkumbwa lwakwe lwine; e lyo ulunkumbwa ilyo lwaimita lufyalo lubembu.” (Yakobo 1:14, 15) Ku ca bulanda, te kuti tucimfye amabunake yonse twapyana no kukanapwililika. (Abena Roma 5:12) Baibolo isoso kuti: “Pantu tapali pano isonde umuntu mulungami uucite cisuma no kubulo kubembuka.”—Lukala Milandu 7:20.

Ici tacilepilibule fyo te kuti tulwishe imembu shonse. Inshita shimo tulailetela amesho fwe bene ukupitila mu kusala kwalubana. E co nangu cingati ukufwaisha kwalubana napamo kuti kwaba pa mulandu wa kukanapwililika kwesu nelyo ukusonga kwa kwa Satana, nampo nga twakutentemba nelyo ukukukaana, cashintilila pali ifwe. Umutumwa Paulo mu kulinga alembele ati: “Ico umuntu abyala, e co akalobolola.”—Abena Galatia 6:7.

Sumineni Ukuti Nimwe Mulengele

Ilingi calyafya ku bantunse ukusumina amabunake yabo, ukufilwa, no kupelebela—calyafya ukusumina imembu. (Ilumbo 36:2) Icintu cimo icingatwaafwa ukusumina ukuti nifwe tulengele ukuti tubembuke kwishiba ukuti Lesa tatupinda ukuti tube abapwililika pali nomba. Kemba wa malumbo Davidi abilishe ati: “Tacita kuli ifwe umwabele membu shesu, tatupeelo mwabela amampuulu yesu.” (Ilumbo 103:10) Nangu cingati Lesa aleleela, nalyo line atwenekela ukulwisha na maka, no kuisalapula, ukulwisha ukubeleleka kwa kwa Kaseebanya no kukongama kwesu ku lubembu.—1 Abena Korinti 9:27.

Tufwile ukumfwikisha ukuti nangu cingati Lesa alishiba ukuti Kaseebanya kuti asonga incitilo shesu no kuti e ulenga apakalamba ukuti bantunse balebembuka, ici tacitwilulula ku kulubulula kwa pa lwesu. Pali uyu mulandu Abena Roma 14:12 basosa ati: “Ifwe bonse umo umo tukalubulula kuli Lesa.”

Nangu cibe fyo, nga ca kuti ‘twaba abapato bubifi’ no ‘kulambatila ku busuma,’ kuti twacimfya ububi. (Abena Roma 12:9, 21) Umwanakashi wa kubalilapo Efa alifililwe ukucite co kabili alikandilwepo; nga alilwishishe ububi no kumfwila Lesa. (Ukutendeka 3:16) Kwena, Lesa tasuulileko pa fyo Kaseebanya abeepele Efa. Kaseebanya alitipilwe no kupingwilwa ukonaulwa ku ntanshi. (Ukutendeka 3:14, 15; Abena Roma 16:20; AbaHebere 2:14) Ubulwi bwesu ukulwisha ukusonga kwakwe ukwa bubifi buli no kupwa nomba line.—Ukusokolola 20:1-3, 10.

[Abatusuminishe Ukubomfya Icikope pe bula 30]

Erich Lessing/Art Resource, NY