Mulebombesha mu Mulimo Bamupeela!

BUSHE mumfwa shani nga mwapokelela kalata ya kukoselesha ukufuma kuli cibusa wenu? Umusambi Timote alipokelele kalata ya kukoselesha ukufuma ku mutumwa Paulo. Iyi kalata eyo twita pali ino nshita ukuti 2 Timote. Ukwabula no kutwishika Timote alile ku cifulo ukushali icongo no kutendeka ukubelenga iyi kalata. Nalimo Timote aletontonkanya ukuti: ‘Bushe Paulo ali shani? Bushe pali ifyo alefwaya ukunjeba pa fyo mfwile ukulabomba umulimo wandi? Bushe ifyo alembele kuti fyangafwa ukwishiba ifya kubomba bwino umulimo wa kubila imbila nsuma no kula-afwako abantu bambi?’ Nga fintu twalamona Timote alisangile amasuko ya aya amepusho, kabili alisambilile ne fintu fimbi muli iyi kalata iyacindama. Muli cino cipande twalalandako pali fimo ifyacindama ifyo twingasambilila muli iyi kalata.

Ilyo Timote atendeke ukubelenga amashiwi ya kubalipo muli iyi kalata, alimwene ifyo Paulo amutemenwe sana. Paulo aitile Timote ukuti “we mwana wandi uwatemwikwa.” (2 Tim. 1:2) Timote apokelele iyi kalata nalimo mu mwaka wa 65 ninshi Yesu alibwelelamo ku muulu. Pali iyi inshita ninshi ali ne myaka nalimo ukucila pali 30 kabili ninshi alibomba bueluda pa myaka iingi. Alibombele na Paulo pa myaka ukucila pali 10 kabili alisambilile ifingi kuli ena.

Timote afwile alikoseleshiwe sana ilyo aishibe ukuti Paulo aleshipikisha amafya alekwata kabili alitwalilile uwa cishinka kuli Yehova. Paulo balimukakile mu Roma kabili bali no kumwipaya inshita iili yonse. (2 Tim. 1:15, 16; 4:6-8) Timote alimwene ukuti Paulo ali uwashipa ilyo abelengele amashiwi Paulo alandile aya kuti: “Nshipikishisha ifintu fyonse.” (2 Tim. 2:8-13) Nga fintu cali kuli Timote, na ifwe kuti twashipikisha nga twatontonkanya pa fyo Paulo aleshipikisha amafya alekwata.

Paulo akoseleshe Timote ukulamona umulimo Lesa amupeele ukuti walicindeme sana. Paulo alefwaya Timote ‘alebilimya ica bupe ca kwa Lesa icali muli ena kwati mulilo.’ (2 Tim. 1:6) Umutumwa Paulo abomfeshe ishiwi lya ciGriki ilya kuti khaʹri·sma ilyo alelanda pa “ca bupe.” Ili ishiwi lipilibula icintu ico bakupeele fye kabili ico ushibombeele. Timote alipokelele ica bupe ilyo bamupeele umulimo uwaibela uwakumine ifilonganino—1 Tim. 4:14.

Bushe Paulo akoseleshe shani Timote ukulabomfya ici ica bupe? Ilyo Timote abelengele amashiwi ya kuti “ucibilimye kwati mulilo,” afwile alitontonkenye pa fyo umulilo wa nkuni wingaleka ukubilima nga tamulebikapo inkuni. Mufwile ukulasonkeleshapo inkuni pa kuti umulilo utwalilile ukubilima. Dikishonari imo itila ishiwi lya ciGriki ilyo Paulo abomfeshe ilya kuti a·na·zo·py·reʹo, lyalola mu kuti “ukubukulula fimo nelyo ukulenga umulilo ukubilima.” Kanshi ili ishiwi lipilibula “ukutemwa nelyo ukufwaisha ukucita fimo.” Kanshi ukulingana ne fyo ili ishiwi lipilibula, kuti twatila Paulo ale-eba Timote ukuti: ‘Ulebombesha mu mulimo obe!’ Muno nshiku na ifwe tufwile ukulacita ifyo Paulo aebele Timote, e kutila ukulabombesha mu mulimo wesu.

Ilyo Timote akonkenyepo ukubelenga kalata Paulo amulembeele, alisangile amashiwi na yambi ayali no kumwafwa ukubomba bwino umulimo wakwe. Paulo alembele ukuti: “Ici cuma icaseekeshiwa ucisunge ukupitila mu mupashi wa mushilo uwaikala muli ifwe.” (2 Tim. 1:14) Cuma nshi ico Timote bamusekeshe? Mu cikomo 13 Paulo alandile pa “mashiwi ayatuntulu,” e kutila icine icaba mu Malembo ya mushilo. (2 Tim. 1:13) Apo ali Mwina Kristu, Timote alingile ukusambilisha icine ku bali mu cilonganino na ku bashali mu cilonganino. (2 Tim. 4:1-5) Na kabili Timote balimusontele ukuba eluda pa kuti alecema impaanga sha kwa Lesa. (1 Pet. 5:2) Pa kucingilila icine ico alesambilisha, Timote alingile ukushintilila pa mupashi wa mushilo uwa kwa Yehova na pa Malembo ya mushilo.—2 Tim. 3:14-17.

Muno nshiku na ifwe bene balitusekesha icine ico tusambilishako abantu bambi. (Mat. 28:19, 20) Kuti twalanga ukuti tulatasha pa cine icacindama ico batusekesha nga tulepepa lyonse no kulaisambilisha Baibolo. (Rom. 12:11, 12; 1 Tim. 4:13, 15, 16) Fimbi ifyo bengatusekesha mulimo wa bueluda nelyo umulimo wa nshita yonse. Nga batupeela iyi milimo, tufwile ukuba abaicefya no kushintilila pali Lesa ukutwafwa ukuibomba. Kanshi kuti twacingilila ifyo batusekesha, nga tulefimona ukuti fyalicindama kabili nga tuleshintilila pali Yehova ukutwafwa.

Pa milimo Timote bamupeele pali no kusambilisha bambi ifya kubomba umulimo alebomba. Ici e calengele Paulo ebe Timote ukuti: “Ifintu ifyo waumfwile kuli ine . . . , ufipeele ku ba cishinka, abakafikapo bwino bwino ukusambilisha bambi.” (2 Tim. 2:2) Kanshi Timote alingile ukusambilishako abaume Abena Kristu fyonse ifyo asambilile. Calicindama ukuti bakangalila bonse mu cilonganino ca Bwina Kristu balesambilishako bambi imilimo. Kangalila musuma tafisa ifyo aishiba pa mulimo abomba kubo alesambilisha. Lelo alabasambilisha fyonse pa kuti bakalebomba bwino uyo mulimo. Tatiina ukuti nalimo abo alesambilisha bakeshiba ifingi ukumucila nelyo bakalabomba bwino umulimo ukucila ifyo abomba. Kanshi kangalila tafwile ukusambilisha abo alesambilisha ifinono fye pa mulimo abomba. Afwile ukubafwa pa kuti babe abakalamba mu fya kwa Lesa. Nga acita ifyo ‘abaume aba cishinka’ abo alesambilisha bakala-afwa sana icilonganino.

Ukwabula no kutwishika Timote alitemenwe sana ilya kalata Paulo amulembele. Kuti twaelenganya ifyo Timote alebelenga iyi kalata libili libili no kutontonkanya pa fyo ali no kubomfya ifyali muli iyi kalata mu mulimo alebomba.

Na ifwe bene tufwile ukulacita ifyaba muli kalata Paulo alembeele Timote. Nomba kuti twacita shani pa kuti tulekonka ifyo Paulo alandile? Tufwile ukulabombesha mu mulimo batusekesha, ukulacingilila ifyo batusekesha, no kulasambilishako bambi fyonse ifyo twaishiba. Nga twacita ifi ninshi ‘tukalabombesha mu mulimo wesu onse’ nga fintu Paulo aebele Timote.—2 Tim. 4:5.