Mwe Bafyashi

Mulesambilisha Abana Benu Ukufuma ku Bunya

BAIBOLO itila: “Moneni! Abana bupyani ubufuma kuli Yehova; ubufyashi bwa mwi fumo cilambu.” (Amalu. 127:3) Kanshi e mulandu wine abafyashi Abena Kristu babela ne nsansa sana ilyo bakwata umwana.

Nangu ca kuti abafyashi balasekelela nga bakwata umwana, balakwata no mulimo uukalamba. Pa kuti umwana akule bwino no kuba no bumi ubusuma, abafyashi bafwile ukulamupeela ifya kulya ifisuma cila bushiku. E lyo pa kuti akabe na bucibusa bwakosa na Yehova, abafyashi bafwile ukulamusambilisha amafunde ya kwa Lesa. (Amapi. 1:8) Ni lilali abafyashi bafwile ukutendeka ukusambilisha umwana wabo, kabili finshi bafwile ukumusambilisha?

ABAFYASHI BALAKABILA UKWAFWA KWA KWA LESA

Tontonkanyeni ifyacitike kuli Manoa uwa mu lupwa lwa bena Dani, uwaleikala mwi tauni lya Sora mu Israele. Malaika wa kwa Yehova aebele umukashi wa kwa Manoa uwali ing’umba ukuti aali no kukwata umwana umwaume. (Abapi. 13:2, 3) Ukwabula no kutwishika, Manoa no mwina mwakwe balitemenwe sana pa fyo malaika abebele. Na lyo line, balisakamene pa fyo bali no kukusha umwana wabo. E ico, Manoa apepele ukuti: “Mwe Yehova. Umuntu wa kwa Lesa wa cine uo mwacituma, mukwai lekeni ese na kabili kuli ifwe no kutweba ifyo tufwile ukucita ku mwana uukafyalwa.” (Abapi. 13:8) Manoa no mwina mwakwe balisambilishe umwana wabo Samsone, amafunde ya kwa Lesa, kabili na o alikonkele ifyo balemusambilisha. Baibolo ilanda pali Samsone ukuti: “Umuye nshiku umupashi wa kwa Yehova watendeke ukumucincisha.” Ici calengele ukuti ilyo Samsone ali umupingushi mu Israele, alecita ifipesha amano ifingi.—Abapi. 13:25; 14:5, 6; 15:14, 15.

Ni lilali mufwile ukutendeka ukusambilisha umwana wenu? Timote balimusambilishe ‘amalembo ya mushilo ukufuma ku bunya’ kuli banyina ba Yunike na banakulu ba Loisi. (2 Tim. 1:5; 3:15) Kanshi Timote batendeke ukumusambilisha Amalembo ninshi acili fye akanya.

Cisuma abafyashi Abena Kristu ukupepa kuli Lesa ukuti abatungulule kabili balingile no kupekanishisha libela pa kuti bakatendeke ukusambilisha umwana wabo “ukufuma ku bunya.” Amapinda 21:5 yatila: “Amapange ya wacincila yamulenga ukubomba bwino.” Ilyo umwana ashilafyalwa, abafyashi balapekanya ifintu bwino. Limo balalemba ne fintu ifyo umwana akalakabila. Calicindama no kuti abafyashi bapekanishisha libela ifyo bakalasambilisha umwana ifya kwa Lesa. Ico bafwile ukubikako sana amano kutendeka ukusambilisha umwana ilyo acili fye akanya.

Icitabo ca Early Childhood Counts—A Programming Guide on Early Childhood Care for Development citila: “Imyeshi ya kubalilapo fye ilyo umwana afyalwa yalicindama nga nshi pantu e lyo insandesande sha muli bongobongo ishilenga umuntu ukusambilila ifintu shibomba sana.” Kanshi calicindama sana abafyashi ukusambilisha umwana pali Yehova na pa mafunde yakwe pali iyi yine nshita!

Nkashi umo painiya atile: “Natendeke ukuya no mwana wandi mu kushimikila ninshi ali fye no mweshi umo. Nangu ca kutila taleishiba ifyalecitika, nalishiba ukuti ifi nalecita fyalemwafwa. Ilyo ali ne myaka ibili, taletiina ukushalika amatrakiti nga tuleshimikila.”

Mulafuma ifisuma nga mwatendeka ukusambilisha umwana ilyo acili fye akanya. Lelo abafyashi balishiba no kuti limo cilafya ukusambilisha umwana ifya kwa Lesa.

‘MULEBOMFYA BWINO INSHITA’

Ilingi line abana balapumbulwa bwangu pantu balafwaya ukwishiba ifintu ifingi pa muku umo, ne ci cilaba bwafya ubukalamba ilyo abafyashi balebasambilisha. Finshi abafyashi bengacita pa kuti bafwe umwana ukulabikako amano ku fyo balemusambilisha?

Tontonkanyeni pa mashiwi Mose alandile ayaba pa Amalango 6:6, 7, ayatila: “Amashiwi ayo ndemweba lelo yabe mu mitima yenu; kabili muleyasambilisha ku bana benu no kuyalandapo ilyo mwikele mu mayanda yenu na lintu mule-enda mu musebo na pa kulaala na pa kubuuka.” Ili lembo lilangilila ukuti abafyashi bafwile ukulabwekeshapo imiku iingi ifyo balesambilisha abana. Abana baba nga kamuti akanono akafwaikwa ukulatapililwa lyonse. Nga filya fine abakalamba bebukisha bwangu ifintu nga ca kutila balifyumfwapo imiki iingi, na ku bana bene e fyo caba!

Pa kuti abafyashi basambilishe abana icine pali Lesa, bafwile ukulaba pamo nabo. Lelo ici tacayanguka pantu ilingi abafyashi balakwata ifya kucita ifingi. Lelo umutumwa Paulo atile, “mulebomfya bwino inshita” ku fintu ifyacindama. (Efes. 5:15, 16) Bushe abafyashi kuti babomfya shani bwino inshita? Munyinefwe umo eluda uwakwata umwina mwakwe painiya alipekanya bwino pa kuti alekwata inshita ya kusambilisha umwana, iya kubomba imilimo ya mu cilonganino e lyo no kuya ku ncito. Bacita shani pa kuti balekwata inshita ya kulasambilisha umwana wabo? Munyinefwe atile: “Cila lucelo ilyo nshilaya ku ncito, ine no mwina mwandi tulabelengela umwana Icitabo ca Malyashi ya mu Baibolo nelyo akatabo ka Ukubebeta Amalembo Cila Bushiku. Icungulo ilyo ashilasendama, tulamubelengelako fimo, kabili nga tuleya mu kushimikila, tulamusenda. Tufwaya ukuti tumusambilishe ili line acili umwaice.”

‘ABANA BABA NGE MIFWI’

Tufwaya ukuti abana besu bakakule bwino. Lelo icikalamba ico tubasambilishisha, kufwaya ukuti basambilile ukutemwa Yehova.—Marko 12:28-30.

Amalumbo 127:4 yatila: “Ifyaba imifwi mu minwe ya mpalume, e fyaba na bana aba ku bulumendo.” Abana babapashanya ku mifwi iyo bafwile ukutonta bwino pa kuti balase palya pene balefwaya. Uulasa imifwi te kuti alule umufwi nga wafuma mu buta. Abafyashi balikwata “imifwi,” e kutila abana abo baba fye nabo pa myaka iinono. Bafwile ukubomfya iyi nshita ku kusambilisha abana ukutemwa amafunde ya kwa Lesa.

Umutumwa Yohane alembele pa bana bakwe aba ku mupashi, ukuti: “Takuli icintu nangu cimo icinsansamusha nga nshi ukucila pa kumfwa ukuti abana bandi bale-enda mu cine.” (3 Yoh. 4) Abafyashi Abena Kristu nabo balatemwa ilyo bamona abana babo “bale-enda mu cine.”

[Caption pe bula 17]

Manoa apepele kuli Lesa ukuti amwafwe ukwishiba ifya kukusha umwana uukafyalwa