Lenga Isambilisho Ilituntulu Ukuba Inshila Yobe iya Bumi

“Ukuipeelesha kwa bukapepa kwa kunonsha ku fintu fyonse.”—1 TIMOTE 4:8, NW.

1, 2. Kufika ku cipimo nshi abantu balangisha ukwangwako ku butuntulu bwabo ubwa bumi, kabili mu kuba ne ca kufumamo nshi?

ABANTU abengi balasumina ukwabula ukushimunuka ukuti ubutuntulu busuma e cikwatwa cacilapo ukumo mutengo mu bumi. Bapeelesha inshita yakulisha ne ndalama mu kuisungilila abatuntulu lwa ku mubili no kushininkisha ukuti bapokelela ukusakamana kwa fya cipatala ukwalinga lintu balekabila kwene. Mu United States, ku ca kumwenako, umutengo wa cila mwaka uwa kusakamana ubutuntulu bwa bumi ukwa mwaka wa nomba line kwali amadola 9000,000,000,000. Ico cifika ukucila pa madola 3,000 cila mwaka ku mwaume uuli onse, umwanakashi, no mwana muli cilya calo, kabili umutengo ku muntu umo umo mu fyalo fyalunduluka fimbi waba mupepi na cimo cine.

² Cinshi cintu ukupoosa konse ukwa nshita, ulupikwe, ne ndalama kwaleta? Mu kushininkisha tapali nangu umo uwingakaana ukuti, mu cinkumbawile, twalikwata ifibombelo fya fya cipatala ifyatumpuluka ukucilapo ne fibombelo fikabilwa ilelo ukucila pa nshita iili yonse imbi mu lyashi lya kale. Nalyo line, ici mu kuicitikilako tacifumamo imikalile ya butuntulu busuma ubwa bumi. Na kuba, mu mashiwi yalelondolola programu atubulwilwe uwa kusakamana kwa butuntulu bwa bumi ukwa United States, presidenti alondolwele ukuti ukulunda ku “mitengo yakulisha iya lukaakala muli cino calo,” abekashi ba United States “bakwata ifipimo fyasumbuka ifya AIDS, ifya kupeepa no kunwesha, ifya kwimita kwa bapungwe, ifya tunya utushifina mu kulinga pa kufyalwa” ukucila uluko ululi lonse lumbi ulwalunduluka. Insondwelelo yakwe? “Tufwile ukwalula inshila shesu nga ca kuti mu cituntulu tulefwaya ukuba abantu aba butuntulu busuma.”—Abena Galatia 6:7, 8.

Inshila ya Bumi Iituntulu

 3. Mu cilolwa ca lutambi lwa mu Greece wa pa kale, kufunda nshi uko Paulo apeele?

³ Mu mwanda wa myaka uwa kubalilapo, abaGreek baishibikilwe ku kuipeelesha kwabo ku kutukusho mubili, ukukosho mubili, ukucimfyanya kwa bapambana. Mu kati ka ifi fyashingulukako, umutumwa Paulo apuutilwemo ukulembela umulumendo Timote ukuti: “Ukutukusho mubili kwafwa panono; lelo ukuipeelesha kwa bukapepa kwa kunonsha ku fintu fyonse, pa kuba ne cilayo ku bwikashi bwa nomba no bukesa.” (1 Timote 4:8) Muli ifyo, Paulo alelondolola ico abantu ilelo baleisa ku kutesekesha, ukucilumbula, ukuti ukupayanya kwa fya cipatala nelyo ukwa ku mubili takwebekesha inshila ituntulu iya bumi. Paulo atwebekesha, nangula ni fyo, ukuti icishingasuulwako caba kulundulula ulubanda lwa ku mupashi no kuipeelesha kwa bukapepa.

 4. Finshi fyaba ubunonshi bwa kuipeelesha kwa bukapepa?

⁴ Ubumi bwa musango yo bwaliba ubwa kunonsha ku “bwikashi bwa nomba” pantu bupayanya ubucingo ukulwisha ifintu fya kucena fyonse ifyo abantu babulwa bukapepa, nelyo abo abakwata fye “mimonekele ya [kuipeelesha kwa bukapepa, NW],” bailasamo abene. (2 Timote 3:5; Amapinda 23:29, 30; Luka 15:11-16; 1 Abena Korinti 6:18; 1 Timote 6:9, 10) Abo abasuminisha ukuipeelesha kwa bukapepa ukumumunga ubumi bwabo bakwata umucinshi utuntulu ku mafunde ya kwa Lesa ne fifwaikwa, kabili ico cibakunta ku kulenga isambilisho lya kwa Lesa ilyaba ilituntulu ukuba inshila yabo iya bumi. Inshila ya musango yo ibaletela ubutuntulu bwa ku mupashi no bwa ku mubili, ukwikushiwa, ne nsansa. Kabili “baitutilile fyuma fisuma ifya bwikashi ubukesa, ukuti bekate ku mweo uwabo mweo wine wine.”—1 Timote 6:19.

 5. Makambisho nshi ayo Paulo apayenye mu cipandwa ca cibili ica kalata wakwe kuli Tito?

⁵ Apantu ubumi ubutungululwa ne sambilisho ilituntulu ilya kwa Lesa buleta amapaalo ya musango yo nomba na ku nshita ya ku ntanshi, tulekabila ukwishiba, mu mibele ibomba, inshila twingalengelamo isambilisho ilituntulu ilya kwa Lesa ukuba inshila yesu iya bumi. Umutumwa Paulo apayenye icasuko muli kalata wakwe kuli Tito. Twalapeelako ukusakamana kwaibela ku cipandwa ca cibili ica lilye buuku, umo akambishe Tito ‘ukutwalilila ukulande fiyene ne sambilisho lituntulu.’ Mu kushininkisha ifwe bonse, abaice na bakalamba, abaume na banakashi, kuti twanonkelamo mwi “sambilisho lituntulu” ilya musango yo ilelo.—Tito 1:4, 5; 2:1.

Ukufunda ku Baume Bakalamba

 6. Kufunda nshi uko Paulo apeele “abaume bakalamba,” kabili mulandu nshi cabelele cikuuku kuli wene ukucite fyo?

⁶ Ica kubalilapo, Paulo akwatile abaume bakalamba mu cilonganino ukufunda. Twapaapaata belenga Tito 2:2. “Abaume bakalamba,” nge bumba, balacindikwa no kuloleshiwako nge fya kumwenako fya citetekelo na bucishinka. (Ubwina Lebi 19:32; Amapinda 16:31) Pa mulandu wa ici, bambi kuti baba abashimunuka ukutambika ukufunda nelyo imitubululo ku baume bakalamba pa milandu iyo ishili yakakala nga nshi. (Yobo 32:6, 7; 1 Timote 5:1) Muli ifyo, cili cikuuku kuli Paulo ukulanda ku baume bakalamba intanshi, kabili kuti caba icisuma kuli bene ukukatamika amashiwi ya kwa Paulo no kushininkisha ukuti bene, ukupala Paulo, bawaminwa ukupashanya.—1 Abena Korinti 11:1; Abena Filipi 3:17.

7, 8. (a) Cinshi cintu “ukutekanya” kusanshamo? (b) Mulandu nshi ukuba “aba mushiye” kulingile ukushikatalikwa no kuba “abatekanya”?

⁷ Abaume bakalamba aba Bwina Kristu, ica kubalilapo, bali no kuba “abatekanya.” Nangu ca kuti ishiwi lya kutendekelako kuti lyalosha ku misango ya minwene (“ukukanakolwa,” Kingdom Interlinear), na kabili lyakwata ubupilibulo bwa kuba uwalola, uwiluka, nelyo ukucenjela. (2 Timote 4:5; 1 Petro 1:13) Muli ifyo, nampo nga ni mu kunwa nelyo mu fintu fimbi, abaume bakalamba bafwile ukuba abatekanya, te kuba abacishamo.

⁸ Lyene, na kabili bafwile ukuba “aba mushiye” kabili “abafuuka.” Ukuba uwa mushiye, nelyo uwa bulumba, kabili uwawaminwo mucinshi, ilingi line kwendela pamo no mushinku. Bamo, nangu ni fyo, pambi kuti bakongamina ku kuba abacishamo ukuba aba mushiye, abashipokelela inshila sha maka isha bulumendo. (Amapinda 20:29) E mulandu wine ‘umushiye’ ulingile ukushikatalikwa no ‘kufuuka.’ Abaume bakalamba bakabila ukusungilila umushiye uwalingana mu cipimo no mushinku, lelo pa nshita imo ine ukuba abashikatala, abakwata ukulama kwakumanina pa kuyumfwa kwabo no kutuninkisha.

 9. Mulandu nshi abaume bakalamba balingile ukubela batuntulu mu citetekelo no kutemwa no kucilisha mu kushipikisha?

⁹ Mu kulekelesha, abaume bakalamba bali no kuba “abatuntulu mu citetekelo, mu kutemwa, mu [kushipikisha, NW].” Inshita ishingi mu kulemba kwakwe, Paulo atantike icitetekelo no kutemwa capamo ne subilo. (1 Abena Korinti 13:13; 1 Abena Tesalonika 1:3; 5:8) Pano apyanike “ukushipikisha” pe “subilo.” Napamo ni pa mulandu wa kuti ukuyumfwa kwa kutompoka kuti kwasokelelamo mu kwanguka mu kuba no mushinku uletantalila. (Lukala Milandu 12:1) Nangu cibe fyo, nga fintu Yesu alondolwele, “uwashipikisha ukufika ku mpela, wene akapusuka.” (Mateo 24:13) Mu kulundapo, abakalamba fya kumwenapo fisuma ku bashala te pa mulandu fye wa mushinku wabo nelyo ukubelesha lelo pa mulandu wa mibele yabo iya ku mupashi iyapambana—icitetekelo, ukutemwa, no kushipikisha.

Ku Banakashi Bakalamba

10. Kufunda nshi uko Paulo apayanishisha “abanakashi bakalamba” mu cilonganino?

¹⁰ Paulo mu kukonkapo ayalwilile ukusakamana kwakwe ku banakashi bakalamba mu cilonganino. Twapaapaata belenga Tito 2:3. “Abanakashi bakalamba” baba e nkonkotela pa kati ka banakashi mu cilonganino, ukusanshako abakashi ba “baume bakalamba” na banyina na banakulu ba filundwa fimbi. Apantu babe fyo, kuti bakwata ukusonga kukalamba, ku busuma nelyo ku bubi. Uyo e mulandu wine Paulo mu mashiwi yakwe asanshishemo “ifyo fine,” ukupilibula ukuti “abanakashi bakalamba” na bo bene balikwata ifishingamo fimo ifya kwikalilako pa kuti bengafikilisha ulubali lwabo mu cilonganino.

11. Cinshi caba imiikalile ya mushilo?

¹¹ Ica kubalilapo, “eba abanakashi bakalamba . . . ukuba ne miikalile ya mushilo,” e fyasosele Paulo. “Imiikalile” yaba kulumbulula kwa ku nse ukwa mibele ya mutima iya umo no buntu, nga fintu fibelebeshiwa mu myendele ne mimonekele. (Mateo 12:34, 35) Cinshi, lyene, cilingile ukuba e mibele ya mutima nelyo ubuntu ku mwanakashi mukalamba uwa Bwina Kristu? Mu numbwilo imo, “iya mushilo.” Ili lyapilibulwa ukufuma kwi shiwi lya ciGreek ilyo lipilibula “icintu icayamo mu bantu, incitilo nelyo ifintu ifyapeelwa kuli Lesa.” Uku mu cituntulu kuli kufunda kwalinga mu cilolwa ca kusonga bakwata pali bambi, ukucilisha pa bakashana mu cilonganino.—1 Timote 2:9, 10.

12. Kubomfya bubi bubi nshi ukwa lulimi bonse balingile ukusengauka?

¹² Mu kukonkapo kwaisa imibele yabipa ibili: “te ba lwambo nangu abatekwo busha ku mwangashi uwingi.” Cili ca kulengo buseko ukuti ifi fibili fyabikwa mwi bumba limo. “Mu nshita sha pa kale, lintu waini yali fye e ca kunwa cikola ceka fye,” e filandapo Profesa E. F. Scott, “caleba ni pa mitebeto yabo iinono iya kunwa waini epo abanakashi bakalamba balebongolola amashina ya banabo.” Abanakashi mu cinkumbawile baliba abacilapo ukwangwako pa lwa bantu ukucila ifyaba abaume, icili ca kutasha. Nalyo line, ukwangwako kuti kwabotelela ukwingila mu lwambo nelyo fye mu bukwakwa, ukucilisha nga ca kuti ululimi lwatendeka ukubwabwata pa mulandu wa kunwa. (Amapinda 23:33) Mu kushininkisha, bonse abalesupila inshila ituntulu iya bumi, abaume na banakashi, balacita bwino ukuba abapempwila kuli ici cimfokonshi.

13. Ni mu nshila nshi abanakashi bakalamba bengabela bakasambilisha?

¹³ Ku nshila isuma iya kubomfeshamo inshita bakwete, abanakashi bakalamba bakoseleshiwa ukuba “bakasambilisha wa cisuma.” Ukwashala kumbi, Paulo apeele amakambisho yalengama ukuti abanakashi tabali no kuba bakasambilisha mu cilonganino. (1 Abena Korinti 14:34; 1 Timote 2:12) Ici, nangu cibe fyo, tacicilikila bene ukufuma ku kupeela ukwishiba kwaumo mutengo ukwa kwa Lesa mu finshingwa-ŋanda fyabo na ku cintubwingi. (2 Timote 1:5; 3:14, 15) Na kabili kuti bapwishishisha ubusuma ubwingi pa kuba ifya kumwenako fya Bwina Kristu ku bakashana mu cilonganino, nga fintu ifikomo fikonkelepo filelanga.

Ku Bakashana

14. Ni shani fintu abakashana ba Bwina Kristu bengalangisha ukushikatala mu kusakamana imilimo yabo?

¹⁴ Mu kukoselesha abanakashi bakalamba ukuba “bakasambilisha wa cisuma,” Paulo alumbwile maka maka abakashana. Twapaapaata belenga Tito 2:4, 5. Ilintu ukufunda ukwingi kushinguluka pa milandu ya pa ŋanda, abakashana ba Bwina Kristu tabali na kucishamo, ukusuminisha amasakamika ya fya ku mubili ukuteka ubumi bwabo. Ukucila, bali no kuba “abatekanya, aba musangwela, . . . abasuma,” kabili pali fyonse, abaiteyanya ukwafwilisha ukutantika kwa bumutwe ukwa Bwina Kristu, “ukuti icebo ca kwa Lesa ciipontelwa.”

15. Mulandu nshi abakashana abengi mu cilonganino balingile ukutashiwa?

¹⁵ Ilelo, imibele ya lupwa yalyaluka apakalamba ukufuma ku fintu yali mu kasuba ka kwa Paulo. Indupwa ishingi shaliba ishayakanikana ukulosha ku citetekelo, kabili shimbi shakwata fye umufyashi umo. Nelyo fye ni mu ndupwa sha lyonse, tacaba icaseeka ku mukashi nelyo nyina ukulasunga fye iŋanda. Ici conse cibika ukutitikisha kwakulisha ne cishingamo pa bakashana ba Bwina Kristu, lelo ici tacibafumyako ku kukakililwako kwabo ukwa mu Malembo. Cili buseko bukalamba, muli ifyo, ukumona abakashana ba busumino abengi balebombesha na maka ku kushikatalika imilimo yabo iyafulisha kabili nalyo line balatunguluka ukubika amabuseko ya Bufumu intanshi, bamo ukuba fye na mu butumikishi bwa nshita yonse nga bapainiya ba kwafwilisha nelyo bapainiya ba nshita yonse. (Mateo 6:33) Mu cine cine bafwile ukutashiwa!

Ku Balumendo

16. Kufunda nshi uko Paulo akwatile abalumendo, kabili mulandu nshi uko kwabela ukwa pa nshita yalinga?

¹⁶ Paulo lyene aishile ku balumendo, ukusanshako Tito. Twapaapaata belenga Tito 2:6-8. Mu cilolwa ca nshila shabula ukusakamana kabili isha boni isha misepela iingi iya lelo—ukupeepa, ukubomfya bubi bubi imiti ikola ne fya kunwa fikola, ukwampana kwa bwamba kushili kwa mwi funde, ne fikonkelelo fimbi ifya ku calo, pamo nge fyangalo fya congo ne nyimbo shibotelesha ne fya kusekesha—uku mu cituntulu kuli kupanda amano kwa pa nshita yalinga ku misepela ya Bwina Kristu iilefwaya ukukonka inshila ya bumi iituntulu kabili iya kwikusha.

17. Ni shani fintu umulumendo engaba ‘uwatekanya’ kabili “ica kumwenapo ca milimo isuma”?

¹⁷ Mu kucilana ne misepela ya ku calo, umulumendo wa Bwina Kristu alingile ukuba ‘uwatekanya’ kabili “ica kumwenapo ca milimo isuma.” Paulo alondolwele ukuti umuntontonkanya watekanya kabili uwakosoka unonkwa, te kuli abo abasambilila fye, lelo kuli abo “bakansho kulingulula kwabo pa kweshaesha ukupaatululo busuma ukubulekanya no bubi.” (AbaHebere 5:14) Fintu ciba icawamisha ukumona abacaice ukuitemenwa ukupoosa inshita yabo na maka ku kukwata ukwakanamo kwakumanina mu milimo iingi iya mu cilonganino ca Bwina Kristu, mu cifulo ca konaula ubukose bwabo ubwa bwaice mu fikonkelelo fya kaso! Ukucite fyo, bene, ukupala Tito, kuti baba ifya kumwenapo fya “milimo isuma” mu cilonganino ca Bwina Kristu.—1 Timote 4:12.

18. Cinshi cipilibula ukusambilisha mu cishinka, ukuba uwa mushiye mu ncitilo, kabili ukusose cebo cituntulu?

¹⁸ Abalumendo bacinkulwako ukuti ‘mu kusambilisha [kwabo] balingile ukuba aba cishinka, aba mushiye, abasose cebo cituntulu icishingasekwa.’ Icisambilisho ica “cishinka” cifwile ukuba icashimpwa mu kukosa pa Cebo ca kwa Lesa; e co, abalumendo bafwile ukuba abasambi ba Baibolo aba mukoosha. Ukupala abaume bakalamba, abalumendo na bo bene bali no kuba aba mushiye. Bakabila ukwibukila ukuti ukuba umutumikishi wa Cebo ca kwa Lesa caba cishingamo cakakala, na muli ifyo bafwile “[ukwikala] imiikalile iyawamine mbila nsuma.” (Abena Filipi 1:27) Mu kupalako imilandile yabo ifwile ukuba ‘iituntulu’ kabili ica kuti te kuti ‘isekwe’ pa kuti tabapeele bakakaanya apa kuilishanishisha.—2 Abena Korinti 6:3; 1 Petro 2:12, 15.

Ku Basha na Babomfi

19, 20. Ni shani fintu pambi abo abaingile ncito ku bantu bambi ‘bengapulamika isambilisho lya kwa Lesa Umupusushi wesu’?

¹⁹ Mu kulekelesha, Paulo ayalukile kuli abo abaingile ncito ku bantu bambi. Twapaapaata belenga Tito 2:9, 10. Te bengi aba ifwe ilelo ababa abasha nelyo ababomfi, lelo abengi balingile ncito kabili ni bakabomba ababombela bambi. Muli ifyo, ifishinte ifyo Paulo atantawile filabomba bwino na lelo line.

²⁰ “Ukunakila bacibinda wabo bene, . . . mu fintu fyonse” cipilibula ukuti Abena Kristu abaingile ncito bafwile ukulangisha ababengishe ncito na bakapitao babo umucinshi wine wine. (Abena Kolose 3:22) Bafwile na kabili ukukwata ukushimikwa kwa kuba bakabomba bafumacumi, ukubomba umulimo wakumanina uwa kasuba kamo na kamo nga fintu ababengishe ncito bafwaya. Kabili bafwile ukusungilila ifipimo fyasumbuka ifya myendele ya Bwina Kristu mu fifulo fyabo ifya ncito te mulandu ne mibele ya bambi kulya. Ifi fyonse “ukuti bapulamike isambilisho lya kwa Lesa Umupusushi wesu muli fyonse.” Yalifula imiku tumfwa pa lwa fya kufumamo fya nsansa lintu abamonako bafumaluka bankulako ku cine pa mulandu wa myendele ishaiwamina iya Nte babomba na sho nelyo ishaingile ncito! Ici caba cilambu Yehova abika pali abo abakonka isambilisho lyakwe ilituntulu nelyo fye pa fifulo fyabo ifya ncito.—Abena Efese 6:7, 8.

Abantu Basangululwa

21. Mulandu nshi Yehova apayanishisha isambilisho ilituntulu, kabili ni shani fintu tulingile ukwankulako?

²¹ Isambilisho ilituntulu ilyo Paulo akolobondelemo talyaba fye mutande wa fishinte fisuma nelyo ifyakatamikwa fya mibele isuma ifyo pambi twingaloshako nga tulefwaya. Paulo atwalilile ukulondolola imifwaile ya liko. Twapaapaata belenga Tito 2:11, 12. Ukufuma mu kutemwa kwakwe ne cikuuku cakwe ica pa fye, Yehova Lesa alipayanya isambilisho ilituntulu pa kuti twingasambilila ukwikala ubumi bwabamo imifwaile kabili ubwa kwikusha muli shino nshita shayafya kabili isha busanso. Bushe uli uwaitemenwa ukupokelela no kulenga isambilisho ilituntulu ukuba inshila yobe iya bumi? Ukucite fyo kukapilibula ipusukilo lyobe.

22, 23. Mapaalo nshi tulobolola lintu twalenga isambilisho ilituntulu ukuba inshila yesu iya bumi?

²² Ukucila pali ico, ukulenga isambilisho ilituntulu ukuba inshila yesu iya bumi kutuletela ishuko lyaibela nomba ne subilo lya nsansa ilya nshita ya ku ntanshi. Twapaapaata belenga Tito 2:13, 14. Mu cituntulu, ukulenga isambilisho ilituntulu ukuba inshila yesu iya bumi kutwimika abapaatukako ukufuma ku calo cabola icilefwa pamo nga bantu basangululwa. Amashiwi ya kwa Paulo yalingana ne fya kucinkulako fya kwa Mose ku bana ba kwa Israele pa Sinai ifya kuti: ‘Na o Yehova . . . akamubiko luko lwapulamo mu nko shonse isho acitile, mu kutashiwa, kabili mu lulumbi, kabili mu kulumbuka; ukuti mube uluko lwa mushilo kuli Yehova Lesa wenu, ifyo asosele.’—Amalango 26:18, 19.

²³ Shi lyonse natuleteesa ishuko lya kuba abantu basangululwa aba kwa Yehova pa kulenga isambilisho ilituntulu ukuba inshila yesu iya bumi! Lyonse ukuba abapempwila ukukaana umusango uuli onse uwa kubulwa bukapepa no lunkumbwa lwa ku calo, muli ifyo ukutwalilila ukuba abasangululwa kabili abafikapo ku kubomfiwa na Yehova mu mulimo ukalamba uyo alelenga ukucitwa ilelo.—Abena Kolose 1:10.

Bushe Uleibukisha?

◻ Mulandu nshi ukuipeelesha kwa bukapepa kwabela ukwa kunonsha ku fintu fyonse?

◻ Ni shani fintu abaume bakalamba aba Bwina Kristu na banakashi bengakonkelela isambilisho ilituntulu nge nshila ya bumi?

◻ Lisambilisho nshi ilituntulu ilyo Paulo akwatile abalumendo na bakashana mu cilonganino?

◻ Lishuko nshi ne paalo ifingaba fyesu nga ca kuti twalenga isambilisho ilituntulu ukuba inshila yesu iya bumi?

[Ifikope pe bula 18]

Abengi ilelo balebomfya ukufunda pali Tito 2:2-4