Mulekoseleshanya, “Maka Maka apo Mulemona Ubushiku Bulya Bulepalama”

 1. Mulandu nshi umutumwa Paulo akonkomeseshe Abena Kristu abaHebere ukulakoseleshanya sana?

MULANDU nshi tulingile ukulakoselesesha sana abanensu? Umutumwa Paulo alilandile umulandu muli kalata alembeele Abena Kristu abaHebere. Abebele ati: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” (Heb. 10:24, 25) Mu myaka fye 5 ukutula apo abalembele kalata, Abena Kristu abaYuda abaleikala mu Yerusalemu bali no kumona “ubushiku bwa kwa Yehova” buleisa kabili bali no kwiluka icishibilo ico Yesu alandile ukuti nga bacimona balingile ukufulumuka mu musumba. (Imil. 2:19, 20; Luka 21:20-22) Ubushiku bwa kwa Yehova bwaishile mu mwaka wa 70 ninshi Yesu aliya kale ku muulu ilyo Yehova abomfeshe abena Roma pa kusansa umusumba wa Yerusalemu.

 2. Mulandu nshi tulingile ukubikila sana amano ku kukoseleshanya muno nshiku?

² Muno nshiku, twalishininkisha ukuti ubushiku bwa kwa Yehova “ubukalamba kabili ubwa kutiinya icine cine” nabupalama. (Yoele 2:11) Kasesema Sefania asobele ati: “Ubushiku ubukalamba ubwa kwa Yehova nabupalama. Nabupalama, kabili buleyangufyanya nga nshi.” (Sefa. 1:14) Ubu busesemo bulatukuma na muno nshiku. Apo ubu bushiku nabupalama, tufwile ‘ukulatontonkanya pa banensu ku kucincishanya ku kutemwa kabili ku kubomba imilimo iisuma.’ (Heb. 10:24) Kanshi tulingile ukulabika sana amano ku ba bwananyina pa kuti tulebakoselesha ilyo balekabila ukubakoselesha.

 3. Finshi Paulo alandile pa kukoselesha? (Moneni icikope pa ntendekelo ya cino cipande.)

³ Baibolo itila: “Amasakamika yalenga umutima wa muntu ukufinininwa, lelo amashiwi ayasuma yalenga umutima ukusekelela.” (Amapi. 12:25) Bonse fye tulaba na masakamika. Kanshi bonse tulakabila ukutukoselesha. Paulo alilandile ukuti no muntu uwakwata umulimo wa kukoselesha abantu na o wine alakabila ukumukoselesha. Alembeele Abena Kristu abaleikala mu Roma ati: “Ndefuluka ukumumona, pa kuti nkamupeeleko ica bupe icafuma kuli Lesa ku kumukosha; nelyo, ntile, pa kuti nkamukoseleshe e lyo na imwe mukankoseleshe, umo na umo ku citetekelo ca mubiye, e kutila ku citetekelo cenu na ku citetekelo candi.” (Rom. 1:11, 12) Kanshi Paulo uwalekoselesha sana aba bwananyina na o inshita shimo alekabila uwakumukoselesha.—Belengeni Abena Roma 15:30-32.

4, 5. Ni bani abo tulingile ukulakoselesha muno nshiku, kabili mulandu nshi?

⁴ Tulingile ukulatasha aba bwananyina abaipusulako fimo pa kuti babombele Lesa. Pali aba paba na bapainiya ba nshita yonse. Abengi balaipeelesha sana pa kuti balebomba bupainiya. Ifi fine e fyo na bamishonari, ababombela pa Bethel, bakangalila ba muputule na bena mwabo, e lyo na babombela pa maofeshi ya bakapilibula bacita. Bonse aba balaipeelesha pa kuti balebomba umulimo wa kwa Lesa. Kanshi tulingile ukulabakoselesha. Na bonse abalebomba umulimo wa nshita yonse kale lelo abashingakumanisha ukubomba na kabili pa mulandu wa fintu ifyalekanalekana, nabo bene tulingile ukulabakoselesha.

⁵ Bamunyinefwe na bankashi abashimbe abomfwila ifunde lya kuupila no kuupilwa “muli Shikulu epela” nabo tulingile ukulabakoselesha. (1 Kor. 7:39) Nangu fye banakashi abaupwa ababombesha balatemwa nga babakoselesha ku bena mwabo. (Amapi. 31:28, 31) Na kabili Abena Kristu abatwalilila aba cishinka nangu balebacusha nelyo balelwalilila tufwile ukubakoselesha. (2 Tes. 1:3-5) Yehova na Kristu balasansamusha aba bonse ababomfi ba cishinka.—Belengeni 2 Abena Tesalonika 2:16, 17.

 6. Mulimo nshi iyo baeluda abo balandapo pali Esaya 32:1, 2 bakwata?

⁶ Belengeni Esaya 32:1, 2. Yesu Kristu alakoselesha no kutungulula ababa no bulanda kabili abafuupulwa ukubomfya abasubwa na “bacilolo” e kuti baeluba ba mu mpaanga shimbi. Na kuba ifi fine e fyo cifwile ukuba pantu aba baeluda te “bakapitao” ba citetekelo ca bamunyinabo lelo ‘babomfi banensu’ abakuletela bamunyinabo insansa.—2 Kor. 1:24.

7, 8. Ukulunda pa kweba aba bwananyina amashiwi ya kukoselesha, finshi fimbi baeluda balingile ukucita?

⁷ Tulingile ukulapashanya umutumwa Paulo. Alembeele Abena Kristu mu Tesalonika abo balecusha ati: “Apo twalimutemwa sana, tatwalefwaisha fye ukumupeela imbila nsuma ya kwa Lesa epela, lelo twalefwaya ukumupeela ne myeo yesu, pantu mwaishileba abatemwikwa kuli ifwe.”—1 Tes. 2:8.

⁸ Ifyo Paulo aebele baeluda mu Efese filanga ukuti te lyonse bengakoselesha aba bwananyina ku mashiwi fye, atile: ‘Mufwile ukwafwa abanaka, kabili mufwile ukwibukisha amashiwi ya kwa Shikulu Yesu, uwasosele umwine ati, “Mwaba insansa ishingi mu kupeela ukucila ishaba mu kupokelela.”’ (Imil. 20:35) Paulo talepelela fye pa kukoselesha bamunyina ku mashiwi fye lelo ‘alebomfya fyonse ifyo akwete no kupoosa umweo wakwe pa mulandu wabo.’ (2 Kor. 12:15) Baeluda nabo tabalingile ukulakoselesha no kusansamusha fye bamunyinabo ku mashiwi fye lelo balingile no kulababikako sana amano pa kuti balebakuula.—1 Kor. 14:3.

 9. Bushe baeluda kuti bafunda shani umuntu mu nshila iisuma?

⁹ Mu kukoseleshanya mwaba no kufunda, lelo baeluda balingile ukusambililako ku bantu abo Baibolo yalandapo pa kuti balefunda bwino aba bwananyina. Ifyo Yesu acitile ilyo abuushiwe kuti fyayafwa baeluda. Alikalipile ifilonganino fimo ifyali mu Asia Minor, lelo ilyo ashilabakalipila abalile atasha ifilonganino fya mu Efese, mu Pergamo na mu Tuatira. (Ukus. 2:1-5, 12, 13, 18, 19) Aebele icilonganino mu Laodikea ati: “Bonse abo natemwa ndabafunda no kubasalapula. E ico ube uwacincila no kulapila.” (Ukus. 3:19) Baeluda balingile ukulapashanya Kristu ilyo balefwaya ukufunda aba bwananyina.

10. Finshi bonse tufwile ukulacita pa kuti tulekuulana?

¹⁰ Te baeluda fye balingile ukulakoselesha aba bwananyina. Paulo akoseleshe Abena Kristu bonse ukulalanda “amashiwi ayasuma aya kukuula ukulingana no kukabila, pa kuti yengakuula” Abena Kristu banabo. (Efes. 4:29) Bonse tulingile ukubika amano ku fyo abanensu ‘balekabila.’ Paulo afundile Abena Kristu abaHebere ati: “Kosheni amaboko yenu ayatompoka na makufi ayanakuka, kabili mulewamya inshila sha kwendamo amakasa yenu, pa kuti icilundwa icalemana cifyutuka, lelo cipole.” (Heb. 12:12, 13) Kanshi bonse fye na baice kumo tufwile ukulalanda amashiwi ya kukoselesha pa kuti tulekuulana.

11. Bushe ba Marthe babakoseleshe shani ilyo bali no bulanda?

¹¹ Nkashi uo twalaita ati Marthe ali no bulanda pa nshita imo, alembele ati: “Bushiku bumo ilyo nalombele Yehova ukuti ankoseleshe, nakumenye nkashi umukalamba uwanangile ukuti alintemwa kabili aleng’umfwila uluse, ifi fine e fyo nalekabila sana pali ilya nshita. Alinshimikileko ubwafya akwete ubwapalene no bwafya nakwete, ici calengele naumfwa ukuti te ine neka nakwete ubu bwafya.” Nalimo nkashi umukalamba taishibe no kwishiba ukuti ifyo alandile fyalikoseleshe sana ba Marthe.

12, 13. Kuti twacita shani pa kuti tulekonka ukupanda amano ukwaba pa Abena Filipi 2:1-4?

¹² Paulo afundile bonse abali mu cilonganino ca mu Filipi ati: “E ico, nga ca kutila muli Kristu mwaliba ukukoselesha, nga ca kutila mwaliba ukusansamusha pa mulandu wa kutemwa, nga ca kutila mwaliba ukulangulukilana, nga ca kutila mwaliba icitemwishi ne nkumbu, munenge ukusekelela nga nshi pantu mwaliba na mano yamo yene no kutemwa kumo kwine, umutima umo wine, ukutontonkanya kumo kwine, kabili tamukansana nelyo ukuibililika, lelo mwali-icefya pantu mumona bambi ukuti balimucila, e lyo tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Fil. 2:1-4.

¹³ Kanshi bonse fye tulingile ukubika amano ku fyo abanensu bafwaya, tulingile ukusansamusha bamunyinefwe na bankashi mu kutemwa, tufwile ukubabikako amano, no kubalanga ukuti twalibatemwa kabili tulabalangulukilako.

14. Finshi fingatukoselesha?

¹⁴ Nga tuleumfwa amalyashi ayasuma pa bantu abo twayafwile kale kuti yatukoselesha, nga fintu cali ku mutumwa Yohane uwalembele ukuti: “Takuli icintu nangu cimo icinsansamusha nga nshi ukucila pa kumfwa ukuti abana bandi bale-enda mu cine.” (3 Yoh. 4) Bapainiya abengi kuti basumina ukuti ukumfwa amalyashi pa fyo abo bayafwile kale ukuba mu cine batwalilila aba cishinka kabili nalimo balabomba na bupainiya kulakoselesha icine cine. Nga twaeba painiya uufuupwilwe ifisuma ifyo acita mu mulimo wa kwa Yehova kuti asansamuka.

15. Cinshi twingacita pa kukoselesha ababombela Yehova ne cishinka?

¹⁵ Bakangalila ba muputule abengi na bena mwabo balilanda pa fyo amakalata ya kubatasha ayo aba bwananyina balemba nga batandalila icilonganino yabakoselesha. Nangu fye ni baeluda, bamishonari, bapainiya, na babombela pa Bethel balakoseleshiwa nga babatasha pa fyo babombela Lesa ne cishinka.

16. Bushe pa kukoselesha umuntu kano fye twamwebapo fimo?

¹⁶ Tatulingile ukulatontonkanya ukutila te kuti tukoseleshe abanensu pantu mu cifyalilwa fye twalitalalila. Tacayafya sana ukukoselesha abantu, nalimo kuti mwamwentula fye ilyo muleposha umuntu. Nga mwamona ukuti uyo muntu tamwentwile ilyo mwamumwentwila, nalimo icalenga ni co nakwata ubwafya kabili alefwaya uwakwebako ubwafya akwete. Kuti mwamukoselesha nga mwakutika ilyo alelanda.—Yako. 1:19.

17. Bushe munyinefwe umo uwacaice bamukoseleshe shani ilyo ali no bulanda sana?

¹⁷ Munyinefwe wacaice Henri ali no bulanda nga nshi ilyo balupwa lwakwe ukubikako fye na bawishi abali baeluda balekele ukubombela Yehova. Kangalila wa muputule alikoseleshe Henri, alimusendele uko banwena kofi kabili amukoseleshe ukulanda fyonse ifyo aleumfwa. Pa numa ya kulanshanya, Henri alilwike ukutila kuti ayafwa fye balupwa lwakwe ukubwela kuli Yehova nga atwalilila ukuba uwa cishinka. Alisansamushiwe nga nshi ilyo abelengele Amalumbo 46; Sefania 3:17 na Marko 10:29, 30.

18. (a) Finshi Imfumu Solomone yalandile? (b) Finshi umutumwa Paulo alandile?

¹⁸ Ifyacitike kuli ba Marthe na Henri filanga ukutila kuti twakoselesha munyinefwe nelyo nkashi uulekabila ukumukoselesha. Imfumu Solomone yalembela aiti: “Amashiwi ayalandwa apo pene fye yalefwaikwa yalawama sana! Ukubengeshima kwa menso kulenga umutima ukusekelela; ilyashi lisuma lilenga amafupa ukwina.” (Amapi. 15:23, 30) Na kabili umuntu nga alebelenga Ulupungu lwa kwa Kalinda nelyo ifyebo ifyaba pa jw.org kuti fyamukoselesha. Paulo alandile ukuti ukwimbila pamo inyimbo sha Bufumu kuti kwatukoselesha. Alembele ati: “Mulesambilishanya no kukonkomeshanya [nelyo ukukoseleshaa] mu nyimbo sha malumbo, mulelumbanya Lesa, ku nyimbo shakwe no kumucindika, kabili muleimbila Yehova mu mitima yenu.”—Kol. 3:16; Imil. 16:25.

19. Mulandu nshi ukukoseleshanya kukacindamina sana mu nshiku ishili ku ntanshi, kabili finshi tulingile ukucita?

¹⁹ Mu nshiku ishili ku ntanshi ilyo tukamona ubushiku bwa kwa Yehova “bulepalama” e lyo cikalafwaikwa sana ukulakoseleshanya. (Heb. 10:25) Nga filya Paulo aebele Abena Kristu banankwe ukuti, “mulesansamushanya no kukuulana, nga filya fine mucita” e fyo na ifwe tulingile ukulacita.—1 Tes. 5:11.