Yehova Alalambula Abamufwaisha

1, 2. (a) Bushe ukutemwa ne citetekelo fyayampana shani? (b) Mepusho nshi twalalandapo?

ICO twatemenwa Yehova ni co “e wabalilepo ukututemwa.” (1 Yoh. 4:19) Yehova alapaala ababomfi bakwe aba cishinka kabili iyi e nshila iyo alangilamo ukuti alibatemwa. Nga twatemwa sana Yehova e lyo icitetekelo cesu cikakoselako kabili tatwakaletwishika ukuti alalambula abo atemwa.—Belengeni AbaHebere 11:6.

² Yehova alitemwa ukulambula ababomfi bakwe aba cishinka kabili ifi fine e fyo aba. Te kuti tulande ukuti twalikwata icitetekelo nga ca kuti tulatwishika ukuti Lesa akalambula bonse abamufwaisha pantu “icitetekelo kulolela kwashininkishiwa ukwa kuti ifintu tulesubila fikacitika.” (Heb. 11:1) Nga twalikwata icitetekelo tukashininkisha ukuti ifyo Lesa atulaya fikafikilishiwa. Nomba busuma nshi bwaba mu kusubila ukuti Lesa akatulambula? Bushe kale Yehova alambwile shani ababomfi bakwe, kabili alambula shani ababomfi bakwe muno nshiku? Natumone.

 3. Finshi Yehova atulaya ifyaba pali Malaki 3:10?

³ Yehova Lesa alilaya ukuti akalambula ababomfi bakwe aba cishinka. Nomba afwaya ukuti tulecitapo fimo pa kuti aletupaala. Baibolo itila: “‘Shi munjeshe . . .’ e fyo Yehova wa mabumba asosa, ‘mumone nga nshakamwiswile ifipunda fya mu muulu no kumupongolwela amapaalo mpaka kukabule incende apa kubika amapaalo yambi.’” (Mal. 3:10) Kuti twalanga ukutila tulatasha sana pa fyo Yehova atulaya nga tulecita ifyo ili lembo lyatweba.

 4. Cinshi cingalenga twacetekela ifyo Yesu alandile ifyaba pali Mateo 6:33?

⁴ Yesu aebele abasambi bakwe ukuti nga babika intanshi Ubufumu, Lesa ali no kulabafwa. (Belengeni Mateo 6:33.) Icalengele ukuti Yesu alande aya mashiwi ni co alimwene ukuti lyonse Yehova alafikilisha ifyo alaya. Yesu alishibe ukuti fyonse ifyo Lesa alaya filafikilishiwa. (Esa. 55:11) Na ifwe bene nga twakwata icitetekelo icakosa muli Yehova akafishapo ifyo atulaya, atila: ‘Nshakamushe nakalya nangu ukumulekelesha nakalya.’ (Heb. 13:5) Kuti twayampanya aya mashiwi Lesa alanda ne fyo Yesu alandile pa kufwaya intanshi Ubufumu no bulungami bwa kwa Lesa.

 5. Mulandu nshi ifyo Yesu ayaswike Petro fikosesha icitetekelo?

⁵ Bushiku bumo umutumwa Petro aipwishe Yesu ati: “Twalisha fyonse no kumukonka; finshi ifwe tukakwata?” (Mat. 19:27) Yesu takalipiile Petro lelo aebele abasambi bakwe ukuti Lesa akabalambula pa fyo baipeelesha ukumubombela. Abatumwa aba cishinka e lyo na bantu bambi bakalateka na Yesu ku muulu. Lelo na pali ino ine nshita Lesa alalambula ababomfi bakwe. Yesu atile: “Onse uwasha amayanda nelyo bamunyina nelyo inkashi nelyo wishi nelyo nyina nelyo abana nelyo amabala pa mulandu we shina lyandi, akapokelela ifingi nga nshi e lyo no mweo wa muyayaya.” (Mat. 19:29) Abasambi bakwe baali no kukwata amapaalo ayengi sana ukucila na pa fintu fyonse ifyo bashile pa kuti balebombela Lesa. Bushe bashifwe, banyinefwe, bamunyinefwe, bankashi yesu, e lyo na bana abo twakwata mu cilonganino ca kwa Lesa, tabacindama sana ukucila ifintu ifyo twasha pa mulandu wa Bufumu?

 6. Mulandu nshi Yehova alaila ababomfi bakwe ukuti akabapeela icilambu?

⁶ Yehova alilaya bakapepa bakwe ukuti akabapeela icilambu kabili ifi filenga baleshipikisha nga baeshiwa. Ababomfi ba kwa Yehova Lesa balikwata amapaalo ayengi pali ino nshita, lelo balafwaisha no kukwata amapaalo na yambi ayengi nga nshi ku ntanshi. (1 Tim. 4:8) Ukwabula no kutwishika, nga twashininkisha ukuti Yehova “alalambula abamufwaisha” tukaba ne citetekelo icakosa.—Heb. 11:6.

 7. Bushe isubilo lyaba shani kwati ni nanga?

⁷ Mu Lyashi lya pa Lupili, Yesu atile: “Sekeleleni no kwanga, pantu icilambu cenu cikalamba mu muulu; pantu e fyo bacushishe na bakasesema abamutangilile.” (Mat. 5:12) Abakapokelela icilambu ku muulu balasekelela nga nshi, lelo na bashakaye ku muulu nabo ‘balasekelela no kwanga’ pantu bakekala umuyayaya muli paradaise pano isonde. (Amalu. 37:11; Luka 18:30) Nampo nga twakwata isubilo lya kuya ku muulu nelyo ilya kwikala pano isonde, isubilo lyesu kuti lyaba nga “inanga ya mweo, ilyashininkishiwa kabili ilyakosa.” (Heb. 6:17-20) Nga filya fine inanga ikasha ubwato pa kuti bwisela ilyo kuli icimwela icikalamba, e fyo ne subilo lya kuti tukakwata icilambu litwafwa ukutwalilila ukuba ne citetekelo icakosa. Na kabili ili subilo kuti lyatwafwa ukushipikisha ilyo tuli na mafya.

 8. Bushe isubilo kuti lyalenga shani twaleka ukusakamana sana?

⁸ Isubilo ilyo twakwata lilatwafwa ukuleka ukusakamana sana. Amalayo ya kwa Lesa yaba kwati mafuta ya ku mupashi ayatontolola imitima yesu iyasakamikwa. Kanshi ‘natulepoosa icisendo cesu pali Yehova,’ pantu ‘akatukosha.’ (Amalu. 55:22) Te kuti tutwishike no kutwishika ukuti Lesa kuti acita “fyonse no kulundapo ukucila na pa fyo twingalomba nangu pa fyo twingatontonkanya.” (Efes. 3:20) Tontonkanyeni pali aya amashiwi aya kutila Lesa kuti acita ifingi ukucila na pa fyo twingalomba na pa fyo twingatontonkanya!

 9. Kuti twashininkisha shani ukuti Yehova akatupeela ifyo atulaya?

⁹ Nga tulefwaya Yehova akatulambule, tulingile ukumutetekela no kulacita ifyo atweba. Mose aebele abena Israele ati: “Yehova akamupaala mu calo ico Yehova Lesa wenu alemupeela ukuti cibe cenu, nga mwaumfwa fye kwi shiwi lya kwa Yehova Lesa wenu no kubika amano ku mafunde yonse ayo ndemweba lelo. Pantu Yehova Lesa wenu akamupaala nga filya fine amulaile.” (Amala. 15:4-6) Bushe mwalicetekela ukuti Yehova akamupaala nga mwatwalilila ukumubombela ne cishinka? Ukwabula no kutwishika akamupaala.

10, 11. Bushe Yehova alambwile shani Yosefe?

¹⁰ Ico Baibolo yalembelwe, ni pa kuti tulesambililamo. Mwaliba amalyashi ayengi pa fyo Lesa alambwile ababomfi bakwe aba cishinka. (Rom. 15:4) Yosefe aba pa bantu abo Lesa alambwile. Yosefe balimushitishe kuli bandume nankwe, kabili ilyo ali mu Egupti umukashi wa kwa shikulu wakwe alimubepeshe ne ci calengele ukuti bamukake. Bushe Lesa alimulabileko? Nakalya! “Yehova ali na Yosefe kabili alemulanga icikuuku . . . Yehova ali na Yosefe kabili Yehova alepaala conse ico alecita.” (Ukute. 39:21-23) Ilyo Yosefe ali na mafya, alelolela Lesa ukumwafwa.

¹¹ Ilyo papitile imyaka, Farao alifumishe Yosefe mu cifungo kabili alimupeele icifulo icikalamba mu Egupti. (Ukute. 41:1, 37-43) Ilyo muka Yosefe akwete abana abaume babili, “Yosefe ainike ishina lye beli ati Manase, ico umwine atile, ‘pantu Lesa nanenga ukulaba ukucula kwandi konse no kulaba ing’anda ya kwa tata yonse.’ No wa cibili amwinike ati Efraimu, ico umwine atile, ‘Lesa nanenga ukukwata abana abengi mu calo ico naculiilemo.’” (Ukute. 41:51, 52) Apo Yosefe ali uwa cishinka kuli Lesa, alimupaalile ica kuti pa mulandu wakwe abena Israele na bena Egupti tabafwile ku cipowe. Ico tulelandapo ca kuti, Yosefe alishibe ukuti uwamulambwile ni Yehova kabili e wamupaalile.—Ukute. 45:5-9.

12. Finshi fyayafwile Yesu ukutwalilila uwa cishinka ilyo aleeshiwa?

¹² Yesu Kristu na o alitwalilile uwa cishinka kuli Lesa na lintu alekwata amesho ayalekanalekana, kabili Lesa alimulambwile. Finshi fyalengele ashipikishe? Icebo ca kwa Lesa citila: “Pa mulandu wa kusekelela ukwabikilwe pa ntanshi yakwe alishipikishe ilyo alecula pa cimuti ca kucushiwilwapo, asuulile insoni.” (Heb. 12:2) Ukwabula no kutwishika Yesu aleumfwa bwino ukulenga ishina lya kwa Lesa ukuba ilya mushilo. Bushe Wishi amulambwile shani? Alimutemenwe kabili alimupeele ne milimo iingi. Baibolo itila: “Aikala ku kuboko kwa ku kulyo ukwa cipuna ca bufumu ica kwa Lesa.” Na kabili itila: “Lesa na o alimusansabike kabili mu cikuuku amupeele ishina ilyacila amashina yonse.”—Fil. 2:9.

13, 14. Bushe Yehova omfwa shani pa fyo tumubombela?

¹³ Te kuti tutwishike no kutwishika ukuti Yehova alatasha pa fyo tuibikilishako ukumubombela. Aleshiba nga tulemona kwati te kuti tubombe imilimo imo. Aleshiba nga natusakamana pa fya ncito ne fya kusakamana ulupwa nelyo pa bumi bwesu nangu pa fintu fimbi ica kuti twalafilwa no kumubombela bwino. Kuti twacetekela ukuti Yehova alatemwa nga amona ifyo ababomfi bakwe babombesha pa kuti batwalilile aba cishinka kuli ena.—Belengeni AbaHebere 6:10, 11.

¹⁴ Tatufwile ukulaba ukutila kuti twalanda na ‘uumfwa ipepo’ no kucetekela ukuti alabika amano ku masakamika yesu. (Amalu. 65:2) “Shifwe wa nkumbu kabili Lesa wa cisansamushi conse” takafilwe ukutwafwa nalimo ukupitila mu Bena Kristu banensu. (2 Kor. 1:3) Yehova alatemwa nga twalanga icikuuku kuli bambi. Baibolo itila: “Uulepeela umupiina ninshi aleashimisha Yehova, e ukamubwesesha pa luse lwakwe.” (Amapi. 19:17; Mat. 6:3, 4) Kanshi nga twayafwa abali na mafya, Yehova amona ukuti e o twayashimisha. Na kuba alitulaya ukuti akatulambula pa cikuuku tulanga.

15. Cilambu nshi mufwaisha ukupokelela? (Moneni icikope pa ntendekelo ya cino cipande.)

¹⁵ Abena Kristu basubwa balikwata isubilo lya kupokelela “icilambu ca bulungami, ico Shikulu, kapingula uwalungama, [akabapeela] . . muli bulya bushiku.” (2 Tim. 4:7, 8) Ici tacilolele mu kuti nga tamwakaye ku muulu ninshi tamwacindama sana. Na kuba abantu abengi nga nshi aba mu “mpaanga shimbi” isha kwa Yesu balafwaisha ukupokelela icilambu ca kwikala umuyayaya muli paradaise pano isonde. Mu calo cipya abantu “bakasekelela nga nshi pantu umutende ukafula.”—Yoh. 10:16; Amalu. 37:11.

16. Mashiwi nshi ayatusansamusha ayaba pali 1 Yohane 3:19, 20?

¹⁶ Inshita shimo kuti twaumfwa kwati tatulebombesha nelyo kuti twalatwishika nga ca kuti Yehova alatemwa ifyo tubomba mu mulimo wakwe. Nalimo kuti twalamona kwati Lesa talingile no kutulambula. Lelo twilalaba ukuti “Lesa alicila imitima yesu kabili alishiba fyonse.” (Belengeni 1 Yohane 3:19, 20.) Yehova alatasha pali fyonse ifyo tucita mu mulimo wakwe pa mulandu wa kuti twalimutetekela kabili twalimutemwa, nangu ca kuti tulemona ukutila ifyo tucita mu mulimo wakwe tafyacindama.—Marko 12:41-44.

17. Bushe Lesa atulambula shani na pali ino ine nshita?

¹⁷ Yehova alapaala abantu bakwe na muli shino shine nshiku shabipa. Alasambilisha ababomfi bakwe bonse kabili alalenga baba no mutende. (Esa. 54:13) Nga filya fine Yesu alaile, Yehova alatulambula na pali ino ine nshita, alilenga twaba mu lupwa ulwa ba bwananyina ba mwi sonde lyonse. (Marko 10:29, 30) Na kabili Lesa alalambula bonse abamufwaisha pantu alabapeela umutende, alabafwa ukuteka imitima, kabili alalenga baba ne nsansa.—Fil. 4:4-7.

18, 19. Bushe ababomfi ba kwa Yehova bomfwa shani pa fyo abalambula?

¹⁸ Ababomfi ba kwa Yehova mwi sonde lyonse balasumina ukuti Yehova alabalambula. Ku ca kumweko, ba Bianca abekala ku Germany balandile ati: “Teti nkwate na mashiwi ya kulanda pa kutasha Yehova pa fyo angafwa nga nakwata amasakamika na pa fyo aba na ine cila bushiku. Mu calo mwaisula fye ifimfulunganya kabili ifintu filebipilako fye. Lelo ukubombela pamo na Yehova kwalilenga ndeumfwa uwacingililwa. Nga naipeelesha ukumubombela, alampaala nga nshi.”

¹⁹ Ba Paula abali ne myaka 70 abekala ku Canada, balilwala ubulwele bwa spina bifida (ubulwele bwa mu mungololo ubo umuntu afyalwa nabo). Ba Paula balandile ati: “Nangu ca kuti nshenda ndashimikila abantu imbila nsuma. Ndabomfya inshila ishalekanalekana isha kubililamo imbila nsuma pamo nga ukushimikila pa foni no bunte bwa mu lyashi. Nalikwata akatabo ako nembamo amalembo ne fyebo ifyo mfumya mu mpapulo ifinkoselesha, kabili ndabelengamo libili libili. Aka katabo nketa ati, akatabo akangafwa. Nga twabika amano ku fyo Yehova atulaya tukalamona amasakamika ukuti ya pa kashita fye akanono. Yehova akatwalilila ukutwafwa nangu tukwate amafya ya musango shani.” Nalimo tamwakwata ubwafya ubo ba Bianca na ba Paula bakwata. Na lyo line, mufwile mulebukisha ifyo Yehova amulambula ne fyo alambula abantu bambi. Natutwalilile ukutontonkanya pa fyo Yehova atulambula pali ino nshita e lyo na pa fyo akatulambula ku ntanshi!

20. Cilambu nshi tukakwata nga twatwalilila ukubombela Yehova no mweo onse?

²⁰ Muleibukisha ukuti Lesa akamupeela “icilambu icikalamba” pa mapepo mupepa no mweo onse. Te kuti mutwishike no kutwishika ukuti nga “mwacita ukufwaya kwa kwa Lesa, mukapokelele ifyo bamulaya.” (Heb. 10:35, 36) Kanshi natutwalilile ukukosha icitetekelo cesu no kulabombela Yehova no mweo onse. Nga tulecita ifi, Yehova akatupeela icilambu.—Belengeni Abena Kolose 3:23, 24.