ICIPANDE CA KUSAMBILILAMO 2
Ifyo Tusambilila Kuli Yakobo Munyina wa kwa Yesu
“Ine ne Yakobo, ne musha wa kwa Lesa kabili uwa kwa Shikulu Yesu Kristu.”—YAKO. 1:1.
ULWIMBO 88 Nengeni Ukwishiba Inshila Shenu
IFYO TWALASAMBILILAa
1. Londololeni ifyo ulupwa lwa kwa Yakobo lwali.
YAKOBO munyina wa kwa Yesu akuliile mu lupwa umo batemenwe sana ifya kwa Lesa. Yosefe na Maria abafyashi ba kwa Yakobo balitemenwe sana Yehova kabili balebombesha mu mulimo wakwe. Yakobo alikwete ipaalo na limbi. Umukalamba wakwe aishileba e Mesia uo balelolela. Ala lyali lishuko nga nshi kuli Yakobo ukukulila muli ulu lupwa!
Yakobo alishibe sana umukalamba wakwe Yesu pantu bakuliile pamo (Moneni paragrafu 2)
2. Finshi fyali no kulenga Yakobo asambilile fimo ku mukalamba wakwe?
2 Fingi ifyo Yakobo ali no kusambilila ku mukalamba wakwe. (Mat. 13:55) Ku ca kumwenako, Yesu alishibe sana Amalembo ica kuti ilyo ali ne myaka 12, bakasambilisha abaishibe sana Amalembo abali mu Yerusalemu balipapile ifyo alelanda. (Luka 2:46, 47) Yakobo nalimo afwile alebomba na Yesu umulimo wa bukabasa. Nga ca kuti balebombela pamo ninshi afwile alishibe bwino sana umukalamba wakwe. Ba Nathan H. Knorr batemenwe ukulanda ati: “Tuleshiba bwino umuntu nga ulebomba nankwe.”b Yakobo afwile alimwene ukuti “Yesu alekula mu mano na mu mushinku kabili Lesa na bantu balimutemenwe.” (Luka 2:52) Pa mulandu ne fi twalandapo, nalimo kuti twatontonkanya ukuti Yakobo nga ali pa basambi ba kubalilapo aba kwa Yesu. Nomba ifi te fyo cali.
3. Finshi ifilangilila ukuti Yakobo tali musambi wa kwa Yesu ilyo Yesu ali pano sonde?
3 Ilyo Yesu ali pano isonde Yakobo tali musambi wakwe. (Yoh. 7:3-5) Na kuba Yakobo nalimo ali pali balupwa lwa kwa Yesu abamwene kwati Yesu “napena.” (Marko 3:21) Na kabili takwaba icilangilila ukuti Yakobo ali na nyina Maria ilyo Yesu balemupoopela pa cimuti.—Yoh. 19:25-27.
4. Finshi twalasambilila?
4 Ilyo papitile inshita, Yakobo aishiletetekela Yesu kabili aishileba eluda mu cilonganino ca Bena Kristu. Muli cino cipande twalasambilila ifintu fibili kuli Yakobo: (1) ico tulingile ukubela abaicefya na (2) ifyo twingalasambilisha bwino.
MULEBA ABAICEFYA NGA FILYA YAKOBO ALI
Ilyo Yesu amoneke kuli Yakobo, Yakobo aliicefeshe no kusumina ukuti Yesu ali ni Mesia. Ukufuma palya pene Yakobo aishileba umusambi wa kwa Yesu uwa cishinka (Moneni amaparagrafu 5-7)
5. Finshi Yakobo acitile ilyo Yesu amonekele kuli ena pa numa ya kubushiwa?
5 Ni lilali Yakobo aishileba umusambi wa kwa Yesu? Ilyo Yesu bamubuushishe “amoneke kuli Yakobo, na ku batumwa bonse.” (1 Kor. 15:7) Pa numa Yesu amonekele kuli Yakobo e lyo aishileba umusambi wakwe. Yakobo aleba pamo na batumwa nga balelongana mu muputule wa pa muulu mu Yerusalemu ninshi balelolela umupashi wa mushilo uo babalaile. (Imil. 1:13, 14) Ilyo papitile inshita Yakobo aishileba mwi bumba litungulula ilya Bena Kristu ba kubalilapo. (Imil. 15:6, 13-22; Gal. 2:9) Ilyo umwaka wa 62 ninshi Yesu alibwelelamo ku muulu taulafika, Yakobo alipuutilwemo ukulembela Abena Kristu basubwa kalata. Na ifwe tulasambililamo ifingi muli iyi kalata nampo isubilo lyesu lya kuya ku muulu nelyo lya kwikala pano isonde. (Yako. 1:1) Kalemba we lyashi lya kale Josephus alembele ukuti, Shimapepo Mukalamba Anania mwana Anasi e walandile ukuti bepaye Yakobo. Yakobo alitwalilile uwa cishinka kuli Yehova mpaka apwisha umulimo wakwe pano sonde.
6. Bushe Yakobo apusene shani ne ntungulushi sha mapepo ishaliko mu nshiku shakwe?
6 Yakobo ali uwaicefya. Mulandu nshi twingalandila ifyo? Natulande pa bupusano bwali pa fyo Yakobo acitile ilyo Yesu alanshenye nankwe e lyo ne fyo intungulushi sha mapepo shacitile. Ilyo Yakobo amwene ifyalelangilila ukuti Yesu ali Mwana wa kwa Lesa aliicefeshe kabili alisumine. Lelo ifi te fyo intungulushi sha mapepo mu Yerusalemu shacitile. Ku ca kumwenako, nabo bali-imwenene ukuti Yesu alibuushishe Lasaro. Mu nshita ya kusumina ukuti Yehova e watumine Yesu bena bafwaile ukwipaya Yesu na Lasaro wine. (Yoh. 11:53; 12:9-11) Na lintu Yesu abuushiwe bafwaile bafise ku bantu ukuti alibuukile. (Mat. 28:11-15) Apo ishi ntungulushi sha mapepo shali ne cilumba, shalikene Mesia.
7. Mulandu nshi tushilingile ukubela ne cilumba?
7 Finshi tulesambililako? Mwilaba ne cilumba kabili muleleka Yehova alemusambilisha. Nga filya fine ubulwele bulenga umutima wa muntu waleka ukulabomba bwino, icilumba na co cilalenga umutima wesu uwa mampalanya waleka ukulaumfwila ifyo Yehova aletufunda. AbaFarise balilekele imitima yabo yakunkuma ica kuti balifililwe no kumona ifyalelanga ukuti Yesu ali no mupashi wa kwa Lesa kabili ali Mwana wa kwa Lesa. (Yoh. 12:37-40) Icilumba bakwete calibipile pantu calengele bafilwa ukuba no mweo wa muyayaya. (Mat. 23:13, 33) Kanshi nacicindama ukuleka Icebo ca kwa Lesa e lyo no mupashi wakwe ukuti filealula ifyo twaba, ifyo tutontonkanya e lyo ne fyo tupingulapo ukucita. (Yako. 3:17) Apo Yakobo ali uwaicefya alyumfwile ifyo Yehova alemusambilisha. Kabili nga fintu twalasambilila, ni pa mulandu wa kuti ali uwaicefya e calengele alesambilisha bwino.
MULESAMBILISHA BWINO NGA YAKOBO
8. Finshi fingatwafwa ukulasambilisha bwino?
8 Yakobo tasambilile sana. Intungulushi sha mapepo pali ilya nshita shalemumona fye nga filya fine shalemona umutumwa Petro na Yohane ukuti bali “abashasambilila kabili abantu yaweyawe.” (Imil. 4:13) Lelo Yakobo alishilesambilila ifya kusambilisha bwino. Tulashininkisha ici nga twabelenga ibuuku lya mu Baibolo ilyo alembele ilyainikwa ishina lyakwe. Nalimo na ifwe tatwasambilila sana nga filya Yakobo ali. Lelo kuti tulesambilisha bwino nga ca kuti Yehova atwafwa ukubomfya umupashi wakwe kabili nga tulekonka ifyo icilonganino cakwe citusambilisha. Natumone ifyo Yakobo alesambilisha e lyo ne fyo twingasambililako.
9. Kuti mwalondolola shani imisambilishishe ya kwa Yakobo?
9 Yakobo talebomfya amashiwi ayakosa kabili alelondolola ifyebo mu nshila ya kuti abantu baumfwa bwangu ico alelandapo. Ici calengele abo alesambilisha baishiba ifyo balingile ukucita. Ku ca kumwenako, moneni ifyo Yakobo asambilishe Abena Kristu mu nshila ya-anguka ukuti balingile ukushipikisha ilyo babafyenga no kukanalaenda ne cikonko ku mukoshi. Alembele ukuti: “Tuletila balipaalwa abashipikisha amacushi. Mwalyumfwa ukushipikisha kwa kwa Yobo kabili mwalishiba ne fyo Yehova acitile pa kulekelesha, icilanga ukuti Yehova wa nkumbu nga nshi kabili wa luse.” (Yako. 5:11) Yakobo abomfeshe Amalembo ilyo alesambilisha aba bwananyina. Abomfeshe Icebo ca kwa Lesa pa kulenga aba bwananyina beshibe ukuti Yehova alalambula bonse ababa ne cishinka kuli ena nga filya Yobo ali. Yakobo alengele abo alesambilisha baumfwa ico alelandapo pantu abomfeshe amashiwi aya-anguka kabili alondolwele ifyo alelandapo mu nshila iya-angula. Ici calengele belabika sana amano kuli ena lelo balebika amano kuli Yehova.
10. Bushe kuti twapashanya shani Yakobo ilyo tulesambilisha?
10 Finshi tulesambililako? Mulesambilisha ifya-anguka kabili mulebomfya Icebo ca kwa Lesa pa kusambilisha. Ilyo tulesambilisha tatufwile ukulanda ifyebo ifingi pa kuti fye tupapushe abantu, lelo tufwile ukulenga baishiba ukuti Yehova e waishiba ifintu ifingi nga nshi kabili alibabikako amano. (Rom. 11:33) Kuti twacita ifi nga ca kuti fyonse ifyo tulesambilisha filefuma mu Malembo. Ku ca kumwenako, mu cifulo ca kweba abasambi ifya kucita nga ca kuti ni fwe twali no bwafya bakwete, tufwile ukubafwa ukutontonkanya pa bantu balembwa mu Baibolo pa kuti beshibe ifyo Yehova amona e lyo ne fyo omfwa pa fintu. Ici cikalenga bakalefwaisha ukucita ifyo balesambilila pantu ninshi balefwaya ukulenga Yehova ukusekelela te kufwaya fye ukutusekesha.
11. Mafya nshi Abena Kristu bamo mu nshiku sha kwa Yakobo bakwete kabili abafundile shani? (Yakobo 5:13-15)
11 Yakobo talepita mu mbali pa kufunda aba bwananyina. Kalata Yakobo alembeele Abena Kristu banankwe ilanga ukuti alishibe bwino amafya bakwete kabili alibebele bwino bwino ifyo balingile ukucita pa kuti bapwishe ayo amafya. Ku ca kumwenako, Abena Kristu bamo balekokola sana ukucita ifyo babafunda. (Yako. 1:22) Bambi balitemenwe sana abakankaala ukucila abapiina. (Yako. 2:1-3) Bambi nabo tabaleilama mu fyo balelanda. (Yako. 3:8-10) Ifi Abena Kristu balecita tafyaweme nangu panono lelo Yakobo alicetekele ukutila kuti ba-aluka. E ico alibafundile cikuuku cikuuku lelo tabapitile mu mbali. Na kabili alikoseleshe Abena Kristu abanakile mu fya kwa Lesa ukuti bamone baeluda pa kuti babafwe.—Belengeni Yakobo 5:13-15.
12. Finshi twingacita pa kuti twafwe abasambi ba Baibolo ukwaluka?
12 Finshi tulesambililako? Mwilapita mu mbali ilyo mulesambilisha lelo mulecetekela ukuti abo mulesambilisha kuti ba-aluka. Abengi abo tusambilisha Baibolo nalimo kuti cabakosela ukulabomfya ifyo balesambilila. (Yako. 4:1-4) Palapita inshita pa kuti umuntu aleke ukucita ifyabipa no kuba ne mibele iyo Umwina Kristu alingile ukukwata. Nga filya fine Yakobo acitile na ifwe bene tufwile ukushipa no kweba abasambi ba Baibolo umo balingile ukwaluka. Tufwile ukucetekela ukutila kuti ba-aluka, no kuti Yehova alalenga abantu abaicefya baba ifibusa fyakwe kabili alabapeela na maka ya kwaluka.—Yako. 4:10.
13. Ukulingana na mashiwi yaba pali Yakobo 3:2, finshi ifyo Yakobo ashaletontonkanyapo?
13 Yakobo taletontonkanya ukuti alicindeme sana. Yakobo taletontonkanya ukuti pa mulandu no lupwa afuminemo e lyo ne milimo alebomba mu cilonganino alicindeme ukucila aba bwananyina. Aleita bakapepa banankwe ukuti bamunyinane “batemwikwa.” (Yako. 1:16, 19; 2:5) Kabili talecita ifintu ifyalelenga abantu balamumona kwati alipwililika. Lelo alembele ukuti “bonse tulaipununa imiku iingi.”—Belengeni Yakobo 3:2.
14. Mulandu nshi tushilingile ukulacitila ifintu kwati tulalufyanya?
14 Finshi tulesambililako? Muleibukisha ukuti bonse tuli babembu. Tatufwile ukulatontonkanya ukuti twalicindama sana ukucila abo tusambilisha Baibolo. Mulandu nshi? Nga tulecita ifintu ifingalenga umusambi alamona kwati ifwe tatulufyanya, kuti twamufuupula pantu kuti twalenga alatontonkanya ukuti te kuti akumanishe ukukonka Amafunde ya kwa Lesa. Nomba nga ca kuti twaeba umusambi ukuti na ifwe bene cilatukosela ukukonka amashinte ya mafunde ya mu Baibolo kabili twamulondolwela ne fyo Yehova atwafwa ukulapwisha amafya tukwata, cikalenga umusambi akamone ukuti na o wine kuti abombela Yehova.
Ifilangililo Yakobo alelanda fyali ifya-anguka ukumfwa kabili fyalefika abantu pa mutima (Moneni paragrafu 15 na 16)c
15. Bushe ifilangililo Yakobo alebomfya fyali shani? (Yakobo 3:2-6, 10-12)
15 Yakobo alebomfya ifilangililo ifyalefika abo alelandako pa mutima. Ukwabula ukutwishika umupashi wa kwa Lesa walimwafwile, lelo nalimo asambilile ifya kubomfya ifilangililo pa kusambilisha ku mukalamba wakwe Yesu. Ifilangililo Yakobo abomfeshe muli kalata yakwe fyalyanguka kabili tuleshiba ne fyo twingasambililako.—Belengeni Yakobo 3:2-6, 10-12.
16. Mulandu nshi tufwile ukulabomfesha ifilangililo ifingafika abantu pa mutima?
16 Finshi tulesambililako? Mulebomfya ifilangililo ifingafika abantu pa mutima. Nga mulebomfya ifilangililo ifisuma kuti mulelenga abo mulesambilisha ukulaelenganya ifyo balesambilila. Ifilangililo kuti fyalenga abo mulesambilisha ukulaibukisha icine ca mu Baibolo. Yesu alebomfya bwino ifilangililo kabili ndume nankwe Yakobo na o alebomfya bwino ifilangililo. Natulandeko pa cilangililo cimo ico Yakobo alandile no mulandu citufikila pa mutima.
17. Mulandu nshi icilangililo caba pali Yakobo 1:22-25 citufikila pa mutima?
17 Belengeni Yakobo 1:22-25. Icilangililo Yakobo alandile ica muntu uulelolesha mu cilola cilatufika sana pa mutima. Alefwaya ukutusambilisha ukuti pa kunonkelamo mu Cebo ca kwa Lesa, tatulingile ukupelela fye pa kubelenga lelo tulingile no kulacita ifyo tulebelenga. Yakobo alilandile icilangililo icali ica-anguka ukumfwa e kutila icilangililo ca muntu uulelolesha mu cilola. Cinshi alefwaya ukuti tusambilileko? Abantu kuti bamona ukuti umuntu muwelewele nga ca kuti namona mu cilola apo alingile ukuwamya lelo tacitilepo nangu cimo. Ifi fine e fyo cingaba nga ca kuti ilyo tulebelenga Icebo ca kwa Lesa twamona umo tulingile ukwaluka lelo tatucitilepo nangu cimo. Ninshi buwelewele.
18. Fintu nshi fitatu ifyo tufwile ukucita nga tulefwaya ukubomfya icilangililo?
18 Ilyo mulebomfya ifilangililo pa kusambilisha kuti mwapashanya Yakobo nga ca kuti mulecita ifi fintu ifitatu: (1) Muleshininkisha ukuti icilangililo mulefwaya ukubomfya nacilingana ne fyo mulelandapo. (2) Mulebomfya icilangililo ico abo mulelandako bengomfwa bwangu. (3) Mulelondolola bwino ifyo bengabomfya ifili mu cilangililo. Nga cilamwafya ukusanga ifilangililo ifisuma ifya kubomfya, kuti mwamona mu Icisontelelo ca Mpapulo sha Watch Tower. Pa mutwe utila “Ifilangililo,” paliba ifilangililo ifingi ifyo mwingabomfya. Muleibukisha ukuti ifilangililo fyaba kwati cisoselo, cilalenga ifyo mulelanda ukumfwika. E ico mulebomfya fye ifilangililo ilyo mulelanda pa fishinka fikalamba ifyo mulefwaya abo mulesambilisha basambilileko fimo. Icikalamba ico tufwaila ukulasambilisha bwino, ni co tufwaya abantu abengi baisa mu lupwa lwa kwa Yehova ulwa nsansa, te kufwaya ukuti abantu baletulumbilisha.
19. Kuti twalanga shani ukuti twalitemwa bamunyinefwe na bankashi?
19 Ifwe tatwakwata balupwa abapwililika, na lyo line twalikwata bamunyinefwe na bankashi abengi abo tubombela Yehova pamo nabo. Tulanga ukuti twalibatemwa nga ca kuti tuleangalila capamo nabo, tulesambililako fimo kuli bena kabili nga tulebombela capamo umulimo wa kubila imbila nsuma no kusambilisha. Nga ca kuti tulepashanya Yakobo ifyo ali, ifyo alecita e lyo ne fyo alesambilisha bwino, tukalenga Yehova akacindikwe. Na kabili tuli no kulenga abantu ababa ne mitima ya cishinka ukuba ifibusa fya kwa Shifwe wa ku muulu uwatutemwa.
ULWIMBO 114 ‘Mube Abatekanya’
a Yakobo na Yesu bakuliile mu lupwa lumo lwine. Yakobo alishibe bwino sana Umwana wa kwa Lesa ukucila ifyo abantu abengi bamwishibe pali ilya nshita. Muli cino cipande twalasambilila ku mwaice wa kwa Yesu uwaishileba pa baume abaletungulula icilonganino ca Bena Kristu ba kubalilapo.
b Ba Nathan H Knorr bali mwi Bumba Litungulula. Bapwile umulimo wabo pe sonde mu 1977.
c UBULONDOLOSHI BWA CIKOPE: Yakobo alandile pa cilangililo ca mulilo ilyo alelanda pa fyabipa ifingafumamo nga tatulebomfya bwino ululimi. Ici cilangililo caliweme pantu abantu bonse balishibe umulilo.