Beni Abacingililwa pa Kuba mu Kuteyanya kwa kwa Lesa

“Ishina lya kwa Yehova lupungu ulwakosa, e mo abutukilo mulungami no kuba fye.”—AMAPINDA 18:10.

 1. Ukulingana ne fyapepele Yesu, ni mu mibele nshi iyayafya intu Abena Kristu babamo?

ILYO fye Yesu talafwa, alipepeleko abakonshi bakwe kuli Wishi wa ku muulu. Mu kuba no kwangwako kwa kutemwa, atile: “Ine nabapeele cebo cenu; na ba pano isonde nababapata ico tabali ba pano isonde, ifyo ine nshili wa pano isonde. Nshilelomba ukuti mubafumye pano isonde, lelo ukuti mubabake ku mubifi.” (Yohane 17:14, 15) Yesu alishibe fyo icalo tacali na kuwamina Abena Kristu. Cali no kulangisha ukuti calibapata ukupitila mu kubabepesha no kubapakasa. (Mateo 5:11, 12; 10:16, 17) Na kabili cali no kulenga abantu ukuba ne mibele yabotelela.—2 Timote 4:10; 1 Yohane 2:15, 16.

 2. Ni kwi Abena Kristu bengasango kucingililwa kwa ku mupashi?

² Icalo icali no kupata Abena Kristu cakwata abantu abanunuka kuli Lesa kabili abatekwa na Satana. (1 Yohane 5:19) Cino calo calikulisha nga nshi ukucila pa cilonganino ca Bwina Kristu, e lyo amaka ya kwa Satana umwine yalicila nga nshi pa muntunse fye uuli onse. Ukupatwa ne calo kanshi kwaba cintiinya icine cine. Ni kwi abakonshi ba kwa Yesu bengasango kucingililwa kwa ku mupashi? Icalondolwelwe mu Ulupungu lwa kwa Kalinda ulwa ciNgeleshi ulwa December 1, 1922, kuti cayafwa ukwasuka, ukuti: “Tuli nomba mu kasuba ka bubifi. Pali ukulwa pa kati ka kuteyanya kwa kwa Satana no kuteyanya kwa kwa Lesa. Kulwa ukwakakala.” Muli uku kukangana, ukucingililwa kwa ku mupashi kusangwa fye mu kuteyanya kwa kwa Lesa. Ishiwi lya kuti “ukuteyanya” talyabamo muli Baibolo, kabili muli ba 1920, inumbwilo ya kuti “ukuteyanya kwa kwa Lesa” yali iipya. Inga kanshi uku kwine ukuteyanya cinshi? Kabili kuti kwatucingilila shani?

Ukuteyanya kwa kwa Yehova

3, 4. (a) Ukulingana no kulondolola kwa dikishonari umo e lyo no Ulupungu lwa kwa Kalinda, bushe ukuteyanya cinshi? (b) Bushe ukubishanya kwa Nte sha kwa Yehova ukwa mu calo conse ni mu nshila nshi kwingetilwa ukuti kuteyanya?

³ Ukulingana no bulondoloshi bwa Concise Oxford Dictionary, ukuteyanya kwaba “libumba ilyateyanishiwa.” Nga twalaibukishe co, kuti twailuko kuti apantu abatumwa bateyenye Abena Kristu ba mu mwanda wa myaka uwa kubalilapo ukuti babe mu filonganino fyabo ukulayangalilwa ne bumba litungulula ilya mu Yerusalemu, kuti calinga ukulosha kuli balya “ba bwananyina” ukuti baali kuteyanya. (1 Petro 2:17) Inte sha kwa Yehova ilelo baba no kuteyanya kwapalako. “Ifya bupe ku bantu” e lyo na “bacemi na bakasambilisha” e bakoseshe buumo bwa lilye bumba lya mu mwanda wa myaka uwa kubalilapo. Bamo pali bene baleendauka mu filonganino, ilintu bambi bena bali fye ni baeluda mu filonganino fya pa mwabo. (Abena Efese 4:8, 11, 12; Imilimo 20:28) “Ifya bupe” fyapalako filakosha buumo bwa Nte sha kwa Yehova ilelo.

⁴ Ulupungu lwa kwa Kalinda ulwa ciNgeleshi ulwa November 1, 1922 lwalandile pe shiwi lya “ukuteyanya” ukuti: “Ukuteyanya kwaba libumba lya bantu ababelako ukubombela pe pange ilyaimikwa.” Lulya Ulupungu lwa kwa Kalinda lwatwalilile no kulondololo kuti ukwite Nte sha kwa Yehova ukuti kuteyanya takwabalengele ukuba “icakaniko ukulingana no musango ishiwi libomfiwilwamo, lelo cipilibula fye ukuti Abasambi ba Baibolo [Inte sha kwa Yehova] besha ukucita cintu Lesa afwaya no kucibombela mu nshila intu Shikulu acitilamo ifintu fyonse, mu muyano.” (1 Abena Korinti 14:33) Umutumwa Paulo alangilile ukuti Abena Kristu ba mu kasuba kakwe balecite fintu mu muyano. Alingenye bumunyina bwa Bena Kristu basubwa ku mubili wa buntunse, uwaba ne filundwa ifingi, cimo cimo no mulimo capeelwa pa kuti umubili ulebomba bwino. (1 Abena Korinti 12:12-26) Ico cilalangilila bwino nga nshi ifyo ukuteyanya kwaba! Mulandu nshi Abena Kristu babelele mu kuteyanya? Ni pa kuti balecita “cintu Lesa afwaya,” ukucito kufwaya kwa kwa Yehova.

 5. Bushe ukuteyanya kwa kwa Lesa ukumoneka cinshi?

⁵ Baibolo yasobele fyo Abena Kristu ba cine ilelo bali no kwikatana, ukuletwa capamo mu “calo” ngo “luko” lumo, umo bali no ‘kulamoneka nge fyengelo pano nse.’ (Esaya 66:8; Abena Filipi 2:15) Ulu “luko” lwateyanishiwa pali nomba lukwete abantu ukucila pa mamilioni yasano na hafu. (Esaya 60:8-10, 22) Nangu cibe fyo, ukuteyanya kwa kwa Lesa takwapelela fye apa pene. Na bamalaika na bo bene balibimbwamo.

 6. Nga kusanshamo fye bonse, ni bani baba mu kuteyanya kwa kwa Lesa?

⁶ Ilingi bamalaika balibombela pamo na babomfi ba kwa Lesa aba buntunse. (Ukutendeka 28:12; Daniele 10:12-14; 12:1; AbaHebere 1:13, 14; Ukusokolola 14:14-16) E mulandu wine kanshi cabelele icalinga Ulupungu lwa kwa Kalinda ulwa ciNgeleshi ulwa May 15, 1925 ukusoso kuti: “Bamalaika ba mushilo bonse fye baliba mu kuteyanya kwa kwa Lesa.” Lwalundilepo ukuti: “Uutungululo kuteyanya kwa kwa Lesa, uwakwata amaka yonse no bulashi, [ni] Shikulu Yesu Kristu.” (Mateo 28:18) Kanshi nga kusanshamo fye bonse, mu kuteyanya kwa kwa Lesa mwaba bonse fye aba mu muulu na ba pe sonde ababombela pamo ku kucito kufwaya kwa lwa Lesa. (Moneni umukululo.) Mwandi lyaliba lishuko lishaiwamina ukuba muli uku kuteyanya! Kabili fintu cileto buseko ukusubilo kuti kukabe nshita lintu ifibumbwa fyonse ifya mweo, ifya ku muulu na pano isonde, fikateyanishiwa ku kulumbanya Yehova Lesa mu kwikatana! (Ukusokolola 5:13, 14) Nangu ni fyo, bushe ukuteyanya kwa kwa Lesa kucingilila shani ilelo?

Abacingililwa mu Kuteyanya kwa kwa Lesa—Mu Nshila Nshi?

 7. Ukuteyanya kwa kwa Lesa kutucingilila mu nshila nshi?

⁷ Ukuteyanya kwa kwa Lesa kuti kwatwaafwa ukuibaka kuli Satana na ku matukuto yakwe. (Abena Efese 6:11) Satana pa kutitikisha, ukupakasa, no kutunka bakapepa ba kwa Yehova, ico afwaya cintu fye cimo: ca kubafumya mu ‘nshila iyo bafwile ukuyamo.’ (Esaya 48:17; linganyeniko Mateo 4:1-11.) Muli ino micitile ya fintu tatwingasengaukilila fye ukusanswa. Nangu cibe fyo, ukwampana kwapalamisha kuntu twakwata na Lesa no kuteyanya kwakwe kulatukosha no kutucingilila no kutwaafwa ukukanafuma mu “nshila.” E mulandu wine isubilo lishipusumukila.

 8. Ni shani fintu ukuteyanya kwa kwa Yehova ukushimoneka kutungilila ababomfi bakwe aba pe sonde?

⁸ Ni shani fintu ukuteyanya kwa kwa Lesa kupeela uku kucingilila? Ica kubalilapo, twaba no bwafwilisho bwashintililwapo ubwa babomfi ba kwa Yehova ababa imipashi. Ilyo Yesu atitikishiwe nga nshi, malaika alishilemupyungila. (Luka 22:43) Lintu Petro apene epaiwe, mu cipesha amano malaika alimupuswishe. (Imilimo 12:6-11) Nangu line ifipesha mano fya musango yo taficitika muno nshiku, abantu ba kwa Yehova balyebekeshiwa ukuti mu kushimikila kwabo bamalaika bakulabatungilila. (Ukusokolola 14:6, 7) Balakwata amaka yacila pa ya lyonse lintu ifintu fyamoneka ukwafya. (2 Abena Korinti 4:7) Ukulundapo, balishibo kuti “malaika wa kwa Yehova acite nkambi ukushinguluka pa bamutiina, no kubapokolola.”—Ilumbo 34:7.

9, 10. Ni mu nshila nshi cingasoselwa ukuti “ishina lya kwa Yehova lupungu ulwakosa,” kabili ni shani fintu ici cishinte cibomba ku kuteyanya kwa kwa Lesa konse fye?

⁹ Ukuteyanya kwa kwa Yehova ukumoneka na ko kwaliba bucingo. Mu nshila nshi? Pa Amapinda 18:10, tubelengapo ukuti: “Ishina lya kwa Yehova lupungu ulwakosa, e mo abutukilo mulungami no kuba fye.” Ici tacilolele mu kuti ukulumbula fye ishina lya kwa Lesa kulacingilila. Mu cifulo ca ico, ukuuba mwi shina lya kwa Lesa kulangililo kuti twalitetekela Yehova umwine. (Ilumbo 20:1; 122:4) Cipilibula ukutungilila bumulopwe bwakwe, ukusumbula amafunde yakwe ne fishinte, no kutetekela amalayo yakwe. (Ilumbo 8:1-9; Esaya 50:10; AbaHebere 11:6) Cisanshamo ukupeela Yehova ukuipeelesha kwapaatulwa. Ni abo fye beka abapepela Yehova muli iyi nshila e bengasosela pamo na kemba wa malumbo ukuti: “Muli [Yehova] e musamwe mitima yesu, pantu twatetekele shina lyakwe lya mushilo.”—Ilumbo 33:21; 124:8.

¹⁰ Nomba bonse ababa mu kuteyanya kwa kwa Lesa ukumoneka basosela pamo na Mika abati: “Ifwe twakulaendela mwi shina lya kwa Yehova Lesa wesu umuyayaya umuyayaya.” (Mika 4:5) Ukuteyanya kwa muno nshiku kutungululwa na “Israele wa kwa Lesa,” uwainikwa mu Baibolo ukuti ‘abantu ba pe shina lyakwe, NW.’ (Abena Galatia 6:16; Imilimo 15:14; Esaya 43:6, 7; 1 Petro 2:17) Kanshi ukuba mu kuteyanya kwa kwa Yehova cipilibula ukuba mu bantu abafwaisha ukucingililwa, kabili abakusanga mwi shina lya kwa Lesa.

11. Ni mu nshila nshi ukuteyanya kwa kwa Yehova kucingililila ababa muli kwene?

¹¹ Ukulundapo, ukuteyanya kwa kwa Lesa ukumoneka mwaba abantu ba citetekelo, kwaba kubishanya kwa basumina beka beka abakuulana no kukoseleshanya. (Amapinda 13:20; Abena Roma 1:12) Caba cifulo umo abacemi ba Bwina Kristu basakamane mpaanga, ukukoselesha abalwala na bapopomenwa, no kufwaisha ukubwesha abawa. (Esaya 32:1, 2; 1 Petro 5:2-4) “Umusha wa cishinka kabili uwashilimuka” apayanya “ifya kulya mu nshita iyene” ukupitila muli uku kuteyanya. (Mateo 24:45) Ulya “musha,” Bena Kristu basubwa abapeela ifintu fyawamisha ifya ku mupashi, ukwishiba kwalungikwa ukwashimpwa pali Baibolo ukwingatungulula ku bumi bwa muyayaya. (Yohane 17:3) Pa mulandu wa butungulushi bwa uyu “musha,” Abena Kristu balafwiwa ukusungilila ifipimo fya mibele isuma ifyasumbuka no kuba “abacenjela nge nsoka, kabili abafuuke nge nkunda” apo bashingulukwa na masanso. (Mateo 10:16) Kabili “ukupikintika . . . mu mulimo wa kwa Shikulu,” kulabaafwa pantu kubomba nge ca kubacingilila.—1 Abena Korinti 15:58.

Ni Bani Baba mu Kuteyanya kwa kwa Lesa?

12. Ni bani baishibikwa ukuti e baba mu kuteyanya kwa kwa Lesa ukwa mu muulu?

¹² Apantu uku kucingilila kubomba pali abo baba mu kuteyanya kwa kwa Lesa, ni bani basanshiwamo? Ku kuteyanya kwa mu muulu kwena, tapengaba no kutwishika pa kwasuka ubu bwipusho. Satana na bamalaika bakwe tababa na kabili ku muulu. Lelo bamalaika ba busumino “abalongana,” bena baciliko. Umutumwa Yohane amwene fyo mu nshiku sha kulekelesha “Umwana wa mpaanga,” bakerubi (“ifya mweo fine”), na “bamalaika abengi,” baali no kupalamina ku cipuna ca bufumu ica kwa Lesa. Pali bene pali no kuba abakalamba 24, abemininako Abena Kristu basubwa abaingila mu bupyani bwa bukata ubwa mu muulu. (AbaHebere 12:22, 23; Ukusokolola 5:6, 11; 12:7-12) Bonse fye baba mu kuteyanya kwa kwa Lesa. Pa bantunse pena, palipikanako.

13. Ni shani fintu Yesu alangilile ababa mu kuteyanya kwa kwa Lesa na bashabamo?

¹³ Yesu alandile ulwa bamo abali no kulaitungo kumukonka ati: “Abengi muli bulya bushiku bakatila kuli ine, Mwe Shikulu, mwe Shikulu, bushe tatwasesemene mwi shina lyenu? bushe tatwafumishe ifiwa mwi shina lyenu? bushe tatwacitile ifya maka ifingi mwi shina lyenu? Kabili e lyo nkasosa kuli bene, nkatila, Nshamwishiba nakalya; fumeni apa, mwe bacita amampuulu.” (Mateo 7:22, 23) Nga umo aba ni kacita wa mampulu, ninshi taba mu kuteyanya kwa kwa Lesa, te mulandu na fintu aitunga, kabili te mulandu na kuntu apepa. Yesu na kabili alangilile ifya kwishiba umo uwaba mu kuteyanya kwa kwa Lesa. Atile: “Te onse uutila kuli ine, Shikulu, Shikulu, akengila mu bufumu bwa mu muulu iyo; kano uucite cifwaya Tata wa mu muulu.”—Mateo 7:21.

14. Ni mbali nshi isha kufwaya kwa kwa Lesa ishaishibikwa ukuti e shifwaikwa kuli abo baba mu kuteyanya kwa kwa Lesa?

¹⁴ E co kanshi, pa kuba mu kuteyanya kwa kwa Lesa, ukwabika “ubufumu bwa mu muulu” nge cintu cikalamba, umuntu afwile ukulacito kufwaya kwa kwa Lesa. Bushe ukufwaya kwakwe cinshi? Paulo alumbwile icakatama sana mu kufwaya kwa kwa Lesa lintu atile: ‘[Lesa] afwaya abantu bonse ukupusuka no kufika ku kwishibe Cine.’ (1 Timote 2:4) Ngo muntu alefwaisha sana ukunonka ukwishiba kwalungikwa ukwa mu Baibolo, ukukubomfya mu bumi bwakwe, no kwananya kwene ku “bantu bonse,” ninshi alecito kufwaya kwa kwa Lesa. (Mateo 28:19, 20; Abena Roma 10:13-15) Na kabili caba kufwaya kwa kwa Lesa ukuti impaanga sha kwa Yehova shileliishiwa no kusakamanwa. (Yohane 21:15-17) Icibomba bwino sana muli ici caba kulongana kwa Bwina Kristu. Umuntu uushikwete icilemulesha nga talesangwa ku kulongana kwa musango yo, ninshi tatesekesha icifulo cakwe mu kuteyanya kwa kwa Lesa.—AbaHebere 10:23-25.

Bucibusa ne Calo

15. Ni shani fintu Yakobo asokele ifilonganino fya mu kasuba kakwe?

¹⁵ Imyaka mupepi na 30 cibe ninshi Yesu alifwa, Yakobo munyina citika alangilileko fimo ifingalenga umo ukulufya icifulo mu kuteyanya kwa kwa Lesa. Alembele ati: “Mwe banakashi bacende, bushe tamwaishibo kuti ukuba na bucibusa ne calo bulwani kuli Lesa? E ico uyo afwayo kuba bucibusa ne calo aicito mulwani kuli Lesa.” (Yakobo 4:4) Umulwani wa kwa Lesa cine cine tengaba mu kuteyanya kwakwe. Inga bucibusa ne calo kanshi cinshi? Calilondololwa ukuti buba mu nshila shalekanalekana, pamo ngo kulundulula nelyo ukubishanya ne fibusa fyabipa. Mu kulundapo, Yakobo atontomeshe pa cintu fye cimo, e kuti imibele yabipa iitungulula ku myendele yabipa.

16. Mashiwi nshi yashinguluka ku kusoka kwa kwa Yakobo ukwa kuti bucibusa ne calo bulwani kuli Lesa?

¹⁶ Pali Yakobo 4:1-3, tubelengapo kuti: “Bushe ifya bulwi fifuma kwi, no lubuli ululi muli imwe lufuma kwi? Bushe tafifuma ku fya lunkumbwa fyenu ificito buta mu filundwa fyenu? Mulakumbwa no kukwata iyo: mutale misoka no kucita akalumwa, no kufilwo kupokelela: mucito lubuli no kulwa; tamwakwata pantu tamulomba kuli Lesa; mulalomba kabili tamupokelela, pa kuti mulomba bubi bubi ukuti mupoosaike mu mangalo yenu.” Aya mashiwi e yo Yakobo abalilepo kulemba e lyo pa numa aisasoka ulwa bucibusa ne calo.

17. Bushe “ifya bulwi” no “lubuli” ni mu nshila nshi fyabelele mu cilonganino ca Bwina Kristu ica mu mwanda wa myaka uwa kubalilapo?

¹⁷ Imyanda ya myaka iingi cibe ninshi Yakobo alifwa, Abena Kristu ba bufi balelwishanya no kutale misoka mu nshila ya cine cine. Nangu cibe fyo, abo Yakobo alelembela baali ba muli “Israele wa kwa Lesa,” abaleenekelwa ukuba ‘bashimapepo kabili ishamfumu’ sha ku muulu. (Ukusokolola 20:6) Tabaletale misoka nelyo ukwipayana. Nomba mulandu nshi Yakobo alandile ulwa fintu fya musango yo pa Bena Kristu? Umutumwa Yohane ainike onse uupata munyina ukuti ni ntalamisoka. Kabili Paulo alandile ulwa kukangana kwa mibele ya buntu no bulwani mu filonganino ukuti fyali “lubuli” ne “fikansa.” (Tito 3:9; 2 Timote 2:14; 1 Yohane 3:15-17) Cilemoneka kwati ici e co Yakobo aletontonkanyapo—icakulilepo sana cali ca kukanatemwa Abena Kristu banabo. Abena Kristu baleumana kwati bantu ba ku calo.

18. Cinshi cingalengo kuti pabe ncitilo shabulamo kutemwa ne shabulo kumfwilo bulanda pa Bena Kristu?

¹⁸ Mulandu nshi ifintu fya musango yo fyacitikile mu cilonganino ca Bwina Kristu? Ni pa mulandu wa mibele yabipa, pamo nga kalumwa no ‘kufwaisha amangalo.’ Icilumba, akalumwa, no kuibililika na fyo kuti fyaonaula ukubishanya kwabamo kutemwa ukwa mu cilonganino. (Yakobo 3:6, 14) Imibele yabipa iya musango yo ilenga umuntu ukuba cibusa ne calo, na muli yo nshila ukuba umulwani wa kwa Lesa. Takuli nangu umo uwingalangulukwa ukuti aba mu kuteyanya kwa kwa Lesa nga alisungilila imibele ya musango yo.

19. (a) Nani maka maka ali no kupeelwo mulandu ngo Mwina Kristu asango kuti imitontonkanishishe yalubana iletendeka mu mutima wakwe? (b) Ni shani fintu Umwina Kristu engacimfya ukutontonkanya kwalubana?

¹⁹ Nga twasanga imibele yabipa iletendeka mu mutima wesu, nani twingapeelo mulandu? Bushe ni Satana? Nalimo ee. Pantu e “kateka wa bucibinda bwa mu lwelele,” ubwa cino calo umo imibele ya musango yo yakumana mpanga yonse. (Abena Efese 2:1, 2; Tito 2:12) Nomba ilingi, ukutendekelo kutontonkanya kwalubana ni ku mubili wesu wine uushapwililika. Pa numa ya kusoka pa lwa kukanaba na bucibusa ne calo, Yakobo alembele ati: “Mutila ilembo ili lyasosa apa fye, aliti, Umupashi uo alengele ukwikala muli ifwe ufuluka no bufuba?” (Yakobo 4:5) Ifwe bonse mu cifyalilwa twakongamina ku kucite calubana. (Ukutendeka 8:21; Abena Roma 7:18-20) Nangu ni fyo, kuti twalwisha uko kufuluka nga twasumino kuti twalinaka no kushintilila pa kwaafwa kuntu Yehova apeela pa kwansha amabunake. Yakobo atila: “[Lesa] apeelo kusenamina ukwacilamo [ukwacila pa kukongama kwa cifyalilwa ukwa bufuba].” (Yakobo 4:6) Pa mulandu wa kwaafwa kwa mupashi wa mushilo uwa kwa Lesa no kutungililwa na bamunyina ba Bwina Kristu aba busumino, no kupitila mu busuma bwe lambo lya cilubula ilya kwa Yesu, Abena Kristu ba busumino tabacimfiwa ku mabunake ya mubili wabo. (Abena Roma 7:24, 25) Balicingililwa mu kuteyanya kwa kwa Lesa, umwaba bacibusa ba kwa Lesa, te ba calo.

20. Mapaalo nshi ayawamisha yantu ababa mu kuteyanya kwa kwa Lesa baipakisha?

²⁰ Baibolo yebekesho kuti: “Yehova apeela abantu bakwe ubukose; Yehova apaala abantu bakwe ukuti babe umutende.” (Ilumbo 29:11) Nga cine cine twaliba mu “luko” lwa kwa Yehova ulwa muno nshiku, ukuteyanya kwakwe ukumoneka, tukapokako amaka yantu apeela no kuipakishako umutende alenga abantu bakwe ukuipakisha. Ca cine ukuti, icalo ca kwa Satana cikalamba nga nshi ukucila ukuteyanya kwa kwa Yehova ukumoneka, kabili Satana alitucisha amaka. Lelo Yehova aba Wa maka yonse. Umupashi wakwe uwa mushilo tawingacimfiwa. Bamalaika bakwe aba maka balikatana na ifwe mu kubombela Lesa. Kanshi, te mulandu no lupato tulolenkana na lo, kuti twashangila. Kuti twacimfye calo, nga fintu Yesu acimfishe.—Yohane 16:33; 1 Yohane 4:4.

Bushe Kuti Mwalondolola?

◻ Bushe ukuteyanya kwa kwa Lesa ukumoneka cinshi?

◻ Ni mu nshila nshi ukuteyanya kwa kwa Lesa kucingililila ababamo?

◻ Ni bani baba mu kuteyanya kwa kwa Lesa?

◻ Ni shani twingasengauka ukuba ifibusa ne calo?

[Akabokoshi pe bula 9]

Bushe Ukuteyanya kwa kwa Lesa Cinshi?

Mu mpapulo sha Nte sha kwa Yehova, inumbwilo ya kuti “ukuteyanya kwa kwa Lesa” ibomfiwa mu nshila shitatu.

1 Ukuteyanya kwa kwa Yehova ukwa mu muulu, ukushimoneka ukwapangwa ne fibumbwa fya mupashi ifya busumino. Uku kuteyanya mu Baibolo kwainikwa ukuti ni “Yerusalemu waba apasansuka.”—Abena Galatia 4:26, NW.

2 Ukuteyanya kwa kwa Yehova ukwa bantunse, ukumoneka. Ilelo muli uku kuteyanya mwaba abashalapo basubwa ukwailunda ne bumba likalamba.

3 Ukuteyanya kwa kwa Yehova ukwa fibumbwa fyonse. Ilelo, umu mwasanshiwa ukuteyanya kwa kwa Yehova ukwa ku muulu pamo na bana bakwe abasubwa abali pe sonde, ababa ne subilo lya ku mupashi. Mu kupita kwa nshita, mukasanshiwa na bantunse bapwililika abakekala pe sonde.

[Icikope pe bula 10]

Ica kulya cawamisha ica ku mupashi cipayanishiwa ukupitila mu kuteyanya kwa kwa Yehova