Ifipusho Ukufuma ku Babelenga

Ifi Yehova aitemenwa ukwelela imembu ukubomfya ilambo lya cilubula, mulandu nshi cikabilwa ukuti Abena Kristu bayebelele kuli baeluda ba mu cilonganino?

Nga fintu twingamona mu mulandu wa kwa Davidi na Batisheba, Yehova alekelele ulubembu lwa kwa Davidi, nangu ca kuti lwali ulukalamba, pantu Davidi alilapiile icine cine. Ilyo kasesema Natani ailemumona, Davidi ayebelele ati: “Nimembuka kuli Yehova.”—2 Samwele 12:13.

Nalyo line, Yehova alomfwa ukuyebelela kwa bufumacumi ukwa ubembwike no kumwelela kabili alateyanyako na fimo ifyakwafwa uulufyenye ukufika ku kupuupuutulwa kwa ku mupashi. Kuli Davidi, uko kwaafwa kwapitile muli kasesema Natani. Ndakai, mu cilonganino ca Bwina Kristu, mwaba abaume bakalamba abakosoka lwa ku mupashi, nelyo baeluda. Umusambi Yakobo alondolola ati: “Bushe umuntu wa muli imwe nalwala [lwa ku mupashi]? Ete abakalamba ba lukuta bese, na bo bapepe pali wene, no kumusubila amafuta mwi shina lya kwa Shikulu; ne pepo lya citetekelo likapususho mulwele, na Shikulu akamubuusha; kabili imembu isho acita shikalekelelwa kuli wene.”—Yakobo 5:14, 15.

Baeluda balamuka kuti bayafwa sana ukunashako ukukalipwa kwa mutima uko uubembwike omfwa. Balesha ukupashanya Yehova ilyo balebomba no ubembwike. Tabafwaya ukuba abakalushi, nangu ca kutila kuti kwabako ukusalapula kwaluma. Lelo, mu cikuuku balamona umo uulufyenye alekabila ukwafwiwa nga nshi. Baleesha ukupuupuutula uubembwike mu mutekatima pa kubomfya Icebo ca kwa Lesa. (Abena Galatia 6:1) Nangu ca kuti umuntu apatikishiwa fye ukuyebelela ulubembu lwakwe, nalyo line kuti alengwa ukulapila ilyo baeluda bamumona, nga filya cali kuli Davidi ilyo Natani amumwene. Ukwaafwa kwa baeluda kulenga uubembwike ukukanabwekeshapo ulubembu ne fyakufumamo fya kuba uwakunkuma mu kucita ulubembu.—AbaHebere 10:26-31.

Kwena tacayanguka ukuyebelela ifyo umo acitile ifyo aleyumfwilapo insoni no kulomba ubwelelo. Kano wapama fye lwa nkati. Nangu cibe fyo, taleni tontonkanyeni pali cimbi ico ici cingacita. Umwaume umo uwafililwe ukusokolola ulubembu lukalamba kuli baeluda ba mu cilonganino atile: “Naleumfwa ukukalipwa ku mutima ukushalepwa. Nalingilisheko imibombele mu mulimo wa kushimikila, lelo ukuyumfwa uwa mulandu kwena takwapwile.” Amwene ukuti ukuyebelela fye kuli Lesa mwi pepo kwalilingile, lelo takwakumanine, pantu aumfwile nge fyaumfwile Imfumu Davidi. (Amalumbo 51:8, 11) Fintu cawama ukumfwila ukwaafwa kusuma uko Yehova acita ukupitila muli baeluda!