Ifyo Bamalaika Batwafwa

DANIELE alondolwele icimonwa umo amwene bamalaika ba kwa Lesa, ukuti: “Bamalaika amakana ikana balepyungila [Lesa], na makana ikumi ukufushiwa ku makana ikumi nabeminina pa cinso cakwe.” (Daniele 7:10) Aya mashiwi yaletweba umulandu Lesa apangile bamalaika. Abapangile ukulamupyungila no kulacita ifyo abeba.

Lesa alatuma bamalaika ukwafwa abantu mu fintu fimo fimo. Twalalanda pa fyo Lesa atuma bamalaika ku kukosha no kucingilila abantu bakwe, ukutwala ubukombe, e lyo no kufikilisha ubupingushi bwakwe pa babifi.

Bamalaika Balakosha Kabili Balacingilila

Ukutula apo bamalaika bamwene uko Lesa apangile isonde na bantu ba kubalilapo, aba bamalaika balitemwa sana abantu. Yesu Kristu uwalondololwa nga mano, ilyo ashilaisa pe sonde atile: “Ifyo natemenwe sana fyakumine abana ba bantu.” (Amapinda 8:31 NW) Kabili Baibolo itweba ukuti ‘bamalaika bakumbwo kulengela’ mu fyebo fyapuutwamo ifilanda pali Kristu na pa nshita ya ku ntanshi ifyo Lesa asokolwele kuli bakasesema bakwe.—1 Petro 1:11, 12.

Mu kupita kwa nshita, bamalaika bamwene ukuti abantu abengi tabalebombela Kabumba wabo uwa kutemwa. Ici cifwile calikalifye aba bamalaika ba busumino. Lelo, ilyo umubembu alapila no kwalukila kuli Yehova ‘bamalaika balasekelela.’ (Luka 15:10) Balabikako sana amano ku mikalile ya bantu ababombela Lesa. Kabili imiku iingi Yehova alabatuma ku kukosha no kucingilila ababomfi bakwe aba busumino pe sonde. (AbaHebere 1:14) Natumone ifya kumwenako fimo.

Bamalaika babili baafwile Lote umulungami pamo na bana bakwe abanakashi ukupusuka ubonaushi bwa misumba ya Sodomu na Gomora pa kubafumya muli cilya cifulo.a (Ukutendeka 19:1, 15-26) Ilyo papitile imyaka iingi, kasesema Daniele na o balimupoosele mu cilindi ca nkalamo, nangu cali fyo tashamucenene iyo. Mulandu nshi shishamucenene? Daniele atile: “Lesa wandi natuma malaika wakwe, no kushindiko tunwa twa nkalamo.” (Daniele 6:22) Bamalaika balyafwile Yesu ilyo atendeke umulimo wakwe pe sonde. (Marko 1:13) Kabili ilyo Yesu ali mupepi no kufwa, malaika amoneke kuli wena no ‘kumukosha.’ (Luka 22:43) Ukwafwa kwa bamalaika kufwile kwalikoseshe Yesu mu nshita shayafya. Na kabili malaika alikakwile umutumwa Petro mu cifungo.—Imilimo 12:6-11.

Bushe Bamalaika balatucingilila pali lelo? Nga tulepepa Yehova ukulingana ne fyo Icebo cakwe cilanda, ukwabula no kutwishika bamalaika bakwe aba maka abashimoneka bakatucingilila. Baibolo yalaya kuti: “Malaika wa kwa Yehova acite nkambi ukushinguluka pa bamutiina, [na o alabapususha, NW].”—Amalumbo 34:7.

Lelo, tufwile ukwishiba ukuti ica kubalilapo fye bamalaika babelapo ukubomba umulimo wa kwa Lesa te kubombela abantu iyo. (Amalumbo 103:20, 21) Babomba ifyo Lesa abatuma ukucita, te fintu abantu balefwaya. Kanshi, uo tufwile ukupaapaata ukuti atwafwe ni Yehova Lesa te bamalaika iyo. (Mateo 26:53) Na kuba, apo tatumona bamalaika, te kuti tulande fyonse pa fyo Lesa ababomfya ukwafwa abantu mu nshila shalekalekana. Lelo twalishiba ukuti Yehova ‘alalanga amaka yakwe aya kwafwa ababa ne mitima ya cishinka kuli ena.’ (2 Imilandu 16:9; Amalumbo 91:11) Ukwabula no kutwishika twalishiba ukuti: “Te mulandu ne co twalomba icilingene no kufwaya kwakwe, [Lesa] alatuumfwa.”—1 Yohane 5:14.

Amalembo nayo yatweba ukuti amapepo yesu yafwile ukulungatikwa fye kuli Lesa. Kabili tufwile ukulapepa Lesa epela. (Ukufuma 20:3-5; Amalumbo 5:1, 2; Mateo 6:9) Bamalaika ba cishinka batukoselesha ukucita ifyo fine. Ku ca kumwenako, ilyo umutumwa Yohane afwaile ukupepa malaika, ulya malaika alimukalipile, amwebele ukuti: “Cenjela! Wicita ifyo! . . . Pepa Lesa.”—Ukusokolola 19:10.

Bamalaika Balatwala Ubukombe bwa kwa Lesa

Mu ciHebere na mu ciGriki ishiwi “malaika” lipilibula “inkombe.” Ukutwala ubukombe ku bantu e nshila na imbi iyo Lesa abomfeshamo bamalaika. Ku ca kumwenako, “malaika Gabriele atuminwe kuli Lesa ku musumba wa mu Galili uwitwa Nasarete.” Mulandu nshi amutumine? Amutumine ku kweba umwanakashi we shina lya Maria ukuti nangu ali nacisungu, ali no kwimita no kufyala umwana mwaume uuketwa Yesu. (Luka 1:26-31) Kabili Lesa alitumine malaika kuli bakacema abali mu mpanga ku kubeba ukuti “Kristu Shikulu” alifyelwe. (Luke 2:8-11) Na kabili, bamalaika balitwele ubukombe bwa kwa Lesa kuli Abrahamu, Mose, Yesu, na kuli bambi abalembwa mu Baibolo.—Ukutendeka 18:1-5, 10; Ukufuma 3:1, 2; Luka 22:39-43.

Pali lelo, ni mu nshila nshi bamalaika babomba nge nkombe sha kwa Lesa? Natulande pa mulimo Yesu asobele uo abakonshi bakwe bali no kubomba ilyo icalo tacilapwa. Atile: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.” (Mateo 24:3, 14) Inte sha kwa Yehova balapoosa inshita iikalamba ukushimikila imbila nsuma iya Bufumu bwa kwa Lesa. Lelo bushe mwalishiba ukuti bamalaika na bo bene balibimbwamo muli uyu mulimo? Umutumwa Yohane alandile pa cimonwa amwene ukuti: “Kabili namwene malaika umbi . . . , kabili akwete imbila nsuma ya muyayaya iya kubila ku baikala pe sonde, na ku luko lonse no mutundu no lulimi na bantu.” (Ukusokolola 14:6, 7) Ili lembo lilelanda sana pa mulimo wacindama untu bamalaika babombela abantu pali lelo.

Ilyo Inte sha kwa Yehova baleshimikila ku ng’anda ne ng’anda balashininwa ukuti bamalaika balatungulula uyu mulimo. Ilingi line balakumanya abantu abacilapepa ukuti umo abafwe ukumfwikisha ubufwayo bwa kwa Lesa. Pa mulandu wa kwafwa kwa bamalaika no kubombesha kwa Nte, cila mwaka abantu abengi baleshiba Yehova. Tuleti nonkelenimo mu mulimo wa kupususha uulebombwa pe samba lya butungulushi bwa bamalaika.

Bamalaika Balafikilisha Ubupingushi bwa kwa Lesa

Nangu cingatila bamalaika tabapeelwe insambu sha kupingula abantu, balikwata umulimo babomba. (Yohane 5:22; AbaHebere 12:22, 23) Kale balelofya abantu abo Lesa alepingula. Ku ca kumwenako, Lesa abomfeshe bamalaika ku kulwisha abena Egupti ba ku kale, abasungile abena Israele mu busha. (Amalumbo 78:49) Kabili mu bushiku fye bumo “malaika wa kwa Yehova” aipeye abashilika 185,000 mu nkambi ya balwani ba bantu ba kwa Lesa.—2 Ishamfumu 19:35.

Ku ntanshi nako, bamalaika bakaleta ubupingushi bwa kwa Lesa. Yesu akesa “pamo na bamalaika bakwe aba maka mu mulilo uulebilima, ilyo akalete cilandushi pa bashaishiba Lesa na bashinakila imbila nsuma.” (2 Abena Tesalonika 1:7, 8) Lelo ubo bonaushi, bukesa fye pa bantu abashankula ku bukombe ubuleshimikilwa mu calo conse mu kuba no kwafwa kwa bamalaika. Abo bonse abafwayafwaya Lesa no kucita ifyo Amalembo yasambilisha tabakonaulwe.—Sefania 2:3.

Tulatasha bamalaika ba busumino abacita ifyo Lesa abeba. Yehova alabatuma ku kwafwa no kucingilila abantu bakwe aba cinshika pe sonde. Tulatemwa ukwishiba ifyo, pantu kwaliba imipashi iyabipa iitwa ifibanda iifwaya ukutucena.

Ifibanda Finshi?

Imyaka 1,500 pa numa lintu Satana abepele Efa mu Edeni, bamalaika bamwene ukuti Satana Kaseebanya alifumishe abantu abengi kuli Lesa ukushako fye abanono abali ne citetekelo pamo nga Abele, Enoke, na Noa. (Ukutendeka 3:1-7; AbaHebere 11:4, 5, 7) Bamalaika bamo balinakileko ku kusonga kwa kwa Satana. Baibolo ilanda pali aba bamalaika ukuti mipashi iyabulilwe icumfwila “mu nshiku sha kwa Noa.” (1 Petro 3:19, 20) Ni mu nshila nshi aba malaika babulilwe icumfwila?

Mu nshita ya kwa Noa bamalaika abashaishibikwa impendwa bashile ififulo fyabo mu muulu, ukwalula imibili yabo no kwisa pe sonde. Mulandu nshi bacitile fyo? Balefwaisha ukulaulungana na banakashi pe sonde. Ici calengele ukuti bafyale abana abaleitwa ukuti abaNefili, abali amapaka aya lukaakala nga nshi. Na kabili, Baibolo itila ‘ububi bwa bantu bwalifulile pano isonde, no kulinga konse ukwa matontonkanyo ya mitima yabo kwalibipile inshiku shonse.’ Lelo, Yehova Lesa tasuminishe ubu bubi ukutwalilila. Aletele Ilyeshi pe sonde lyonse, ilyaonawile abantu babipa pamo pene na baNefili. Ababomfi ba kwa Lesa aba busumino e bapuswike fye.—Ukutendeka 6:1-7, 17; 7:23.

Bamalaika abapondweke tabaonawilwe ilyo Ilyeshi lyaishile. Bafulile imibili ya buntunse no kubwelela ku mekalo ya mupashi. Ukutula lilya, betwa ifibanda. Batungilila Satana Kaseebanya, uwitwa “kateeka wa fibanda.” (Mateo 12:24-27) Ukupala kateka wafiko, ifi fibanda filafwaisha ukuti abantu balefipepa.

Ifibanda fyalibipa, lelo tatufwile ukufitiina. Amaka yafiko yalipelela. Ilyo bamalaika ababulilwe icumfwila babwekele ku muulu, tababasuminishe ukuba mu lupwa lwa bamalaika aba busumino na kabili. Kabili, tabasuminishiwe ukuipakisha ifintu fya ku mupashi, e lyo tabakwata isubilo ilili lyonse ilya ku ntanshi. Bapooselwe mu mfifi ya ku mupashi iitwa Tartari. (2 Petro 2:4) Yehova ali bashinshibike “mu fikakilo fya pe” pa kuti babe mu mfifi ya ku mupashi. Na kabili, ino nshita tabakwata amaka ya kufwala imibili ya buntunse.—Yuda 6.

Cinshi Imwe Mufwile Ukucita?

Bushe ifibanda filasonga abantu na pali lelo? Ca cine, filacita ifyo pa kubomfya “imicenjelo,” nelyo “ifya kubeleleka” pamo nga filya ifibomfya kateka wafiko, Satana Kaseebanya. (Abena Efese 6:11, 12) Ukulabomfya ukufunda ukwaba mu Cebo ca kwa Lesa, kuti kwalenga twaba abakosa ukulwisha ifibanda. Na kabili, abo abatemwa Lesa balacingililwa na bamalaika abakwatisha amaka.

Kanshi, nacicindama ukuti musambilile ifyo Lesa afwaya ifyaba mu Malembo kabili no kulacita ifyo mwasambilila. Kuti mwasambilila ifingi ifyo Baibolo ilandapo nga mwaipusha Inte sha kwa Yehova uko mwikala nelyo ukulembela abalemba uno magazini. Inte sha kwa Yehova bakaba aba nsansa ukumusambilisha Baibolo pa nshita iyo mulefwaya kabili ukwabula ukumulipilisha.

[Futunoti]

[Akabokoshi pe bula 6]

IMILIMO BAMALAIKA BABOMBA

Yehova atantika ulupwa lwakwe ulukalamba ulwa bamalaika muli iyi nshila:

Malaika mukalamba uwakwatisha amaka no bulashi ni Mikaele, nelyo Yesu Kristu. (1 Abena Tesalonika 4:16; Yuda 9) E wangalila baserafi, bakerubi, na bamalaika bambi.

Baserafi balikwata icifulo icikalamba sana mu kuteyanya kwa kwa Lesa. E bapyunga ku cipuna ca bufumu ica kwa Lesa. Umulimo wabo usanshamo ukubilisha bumushilo bwa kwa Lesa no kwafwa abantu bakwe ukuba abasanguluka ku mupashi.—Esaya 6:1-3, 6, 7.

Bakerubi baba pe samba lya cipuna ca kwa Lesa, kabili e batungilila bumulopwe bwa kwa Yehova.—Amalumbo 80:1; 99:1; Ezekiel 10:1, 2.

Bamalaika bambi e bo Yehova atuma ku kucita ukufwaya kwakwe.

[Icikope pe bula 4]

Bamalaika bafumishe Loti na bana bakwe abanakashi mu busanso

[Icikope pe bula 5]

Ilyo umutumwa Yohane afwaile ukupepa malaika, malaika atile: “Wicita ifyo!”

[Icikope pe bula 6]

Bamalaika balafikilisha ubupingushi bwa kwa Lesa

[Icikope pe bula 7]

Bushe mulenonkelamo mu mulimo wa kushimikila uletungululwa na bamalaika?