Baacitile Ukufwaya kwa kwa Yehova

Umuntu Wakulisha Abomba Umulimo Wasuulwa

YESU alishibe ukuti inshita ya kuba na basambi bakwe umuku wa kulekeleshako yali no kuba iyawamisha. Mu kwangufyanya aali no kwikatwa, kabili icitetekelo cakwe cali no kweshiwa ukucila ifyo cabalile aceshiwapo. Kabili alishibe ukuti amapaalo yakalamba yali ku ntanshi. Kwashele inshita inono ukuti asansabikwe ku kwa kulyo kwa kwa Lesa no kupeelwe “shina ilyacila amashina yonse; ukuti kwi shina lya kwa Yesu ikufi lyonse likafukame, ilya mu muulu ne lya pano nse ne lya pa nshi ya calo.”—Abena Filipi 2:9, 10.

Lelo, amasakamika ya pa mfwa yalepalamina nelyo ukufulukisha icilambu alailwe tafyapumbwile Yesu ku kwaafwilisha abatumwa bakwe. Pa numa Yohane aishilelemba mwi Landwe lyakwe ukuti, “Abatemenwe na ku mpela.” (Yohane 13:1) Kabili muli aya maawala yayafya ayasheleko ku bumi bwakwe ilyo ali umuntunse uwapwililika, Yesu asambilishe abatumwa bakwe isambililo ilyacindama.

Isambililo lya Kuicefya

Abatumwa bali na Yesu mu Yerusalemu mu muputule wa pa muulu ku kusefya ica Kucilila. Ku numa uku, Yesu alyumfwile abatumwa bakwe balekansanina pa wali no kuba umukalamba pali bene. (Mateo 18:1; Marko 9:33, 34) Aali nalanshanya na bo pa lwa uyu mulandu kabili alyeseshe ukulungika ukutontonkanya kwabo. (Luka 9:46) Nangu cibe fyo, uno muku Yesu abomfya inshila imbi pa kukomaila pa fyo abasambilishe pali uyu mulandu. Asalilepo ukucitapo cimo ku kubasambilisha pa lwa kuicefya ukucila ukulanda fye.

Yohane alemba ati Yesu, “aima pa mulalilo no kubika amalaya yakwe; e lyo abuulile icitambala, akaka mu musana. E lyo aitile amenshi mu musambilo, atendeke ukusamba amakasa ya basambi, no kuyafuuta ku citambala ico akakile mu musana.”—Yohane 13:4, 5.

Pa nshita yakaba ku Middle East wa pa kale, ilingi line abantu balefwala indyato ilyo baleenda mu misebo ya lukungu. Ilyo baingila mu ng’anda ya mupiina, shibweni aalebaposha, no kubapekanishisha imisambilo ya menshi pa kuti basambe ku makasa. Mu mayanda ya bakankaala, umusha e walesamba amakasa ya beni.—Abapingushi 19:21; 1 Samwele 25:40-42.

Muli ulya muputule, Yesu na basambi bakwe tabakwete uwakubapokelela. Shibweni wa kubapekanishisha imisambilo talipo, tapali na basha bakubasamba amakasa. Lintu Yesu atendeke ukubasamba amakasa, abatumwa balipeshiwe amano. Pantu shi moneni Yesu uwakulisha pali bene e wabombele umulimo wasuulilwe sana!

Pa kubala, Petro alikene ukuti Yesu amusambe amakasa. Lelo Yesu amwebele ukuti: “Nga nshikusambile, tauli ne senge na ine.” Lintu Yesu apwile ukusamba abatumwa bonse amakasa, atile: “Bushe mwaishiba ico nacita kuli imwe? Imwe munjita Kasambilisha kabili Shikulu: cena mulalunjika; pantu e fyo ndi. E ico ine, ne Shikulwinwe kabili Kasambilisha wenu, nga musambile amakasa, na imwe mufwile ukusambana amakasa. Pantu imupeele ica kumulanga, ukuti na imwe mucite ifyo fine namucitila.”—Yohane 13:6-15.

Pano Yesu talecita umulimo wa kusamba amakasa ukube cishilano ca kusefya. Lelo, aleafwa abasambi bakwe ukuti bateuluke mu misango, baleicefye no kulaitemenwa ukubombela bamunyinabo imilimo yasuulwa sana. Cilemoneke fyo, balikutulwike muntu aloseshe. Bebeteni icacitike libe napapita imyaka iingi lintu kwaimine umulandu wa kusembululwa. Nangu line kwali “fikansa ifingi,” abasangilwepo tabacitile cimfulunganya kabili balikutike mu mucinshi ku fyo bambi balelandapo. Ukulundapo, cilemoneka kwati uwaleangalila kulya kukumana musambi Yakobo, lelo te ulya uwa mu batumwa, nga fintu pambi twingenekela, apantu abatumwa e po bali. Ifi fyebo fyalundwapo ifyaba mu Imilimo filangilila ukuti abatumwa baliteulwike apakalamba mu kulangisha ukuicefya.—Imilimo 15:6-29.

Ifyo Twingasambililako

Pa kusamba amakasa ya basambi bakwe, Yesu atupayanishishe isambililo lishaiwamina ilya kuicefya. Cine cine, Abena Kristu tabalingile ukuimona ukuti balicindamisha ica kuti balefwaya bambi ukulababombela lyonse, nangu ukulafwaisha ififulo fya mucinshi no kulumbuka. Lelo, bafwile ukukonka ica kumwenako Yesu aimike, ‘uushaishile ku kupyungilwa, lelo ku kupyungila, no kupeelo mweo wakwe icilubula ca pa bengi.’ (Mateo 20:28) Cine cine, abakonshi ba kwa Yesu balingile ukuitemenwa ukupyungilana mu milimo yasuulwa sana.

Petro alilungike ukulemba ukuti: “Ikakeni mu musana aka kufwala ka bupete ku kupyungilana; pa kuti Lesa acincintila aba miiya, lelo ku bapetama apeelo kusenamina.” (1 Petro 5:5) Mu ciGriki ishiwi lya kuti “ikakeni” lyafuma kwi shiwi ilipilibula “aproni wa musha,” uo baalekaka pe laya ilyaseela. Bushe nalimo Petro alelosha kuli filya Yesu aikakile icitambala no kutendeka ukusamba amakasa ya batumwa bakwe? Tatwingashininkisha bwino ici. Nangu ni fyo, umulimo wa kuicefya Yesu abombele walifikile nga nshi Petro pa mutima, nga fintu ulekabila ukufika pa mitima ya bonse abasanguka abakonshi ba kwa Kristu.—Abena Kolose 3:12-14.